Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 17 - Yāu̍ Mɛ̄lɛ̄ka̍a̍

Hu̍sāī si̍la̍ A̍bi̍sa̍lɔ̄m sīlā wɔ̄ɔ̍ŋndo̍

¹ O̍ ko̍ŋ kɔ̍ɔ̍lī, mi̍ Āhīto̍fɛ̄l di̍mūl A̍bi̍sa̍lɔ̄m āā, “Māsāā, I̍ hɛ̍lī wɔ̍ pūa̍a̍ wāa̍la̍ŋ tɔ̍ a̍ lā tīɔ̍ɔ̍ŋ (12,000) mī ŋ̄ tīsa̍ Dēēve̍ kɔ̄ɔ̄lī chūɛ̄llɛ̄ŋ.

² Bōōndi̍i̍ o̍ cho̍ wā o̍ sāŋgɛ̍i̍, o̍ nɔ̍lā mbō tōsa̍ nyɛ̄ o̍ nyɛ̄ le̍ ve̍, ŋ̄ kɔ̍ wo̍o̍lū ndu̍ a̍ sɔ̍ŋgɔ̄ɔ̍. A̍ te̍le̍ŋ ko̍ŋ Sīōōŋnde̍ cho̍ ndu̍ bīyɔ̄ɔ̄, o̍ ko̍ŋ kɔ̍ɔ̍lī, pūa̍a̍ ndūa̍a̍ kpo̍u̍ mā nyāānu̍ŋ. O̍ ko̍ŋ, mī ŋ̄ dīī ndu̍. Ndu̍ pīlɛ̍ kpe̍ na̍a̍ ŋ̄ chō dīyɔ̄ɔ̄ ni̍.

³ Pūa̍a̍ ndūa̍a̍ nda̍ ki̍nɛ̍i̍ ŋ̄ cho̍ nda̍ dīyɔ̄ɔ̄ le̍. Nda̍ nda̍ mī ŋ̄ bīī nda̍ kpo̍u̍ mī ŋ̄ hīŋ a̍ nda̍, mā hu᷄ŋ mu̍li᷄ŋ ku̍mbū nūm ndo̍. Tē ŋ̄ dīī Dēēve̍ pɛ̍, pūa̍a̍ ndūa̍a̍ kpo̍u̍ hūnɔ̄ɔ̍ nda̍ hūŋ a̍ kɔ̄l kɛ̄ndɛ̄ bɛ̄ndōo̍ ni̍, mā mūli̍ŋ ku̍mbū nūmndo̍. I̍ si̍nā māā Dēēve̍ ndu̍ pīlɛ̍ kpe̍ ŋ̄ yēēma̍ le̍ dīyɔ̄ɔ̍ ni̍.”

⁴ A̍bi̍sa̍lɔ̄m ni̍, a̍ wāŋnda̍ I̍sɔ̄lūɛ̄ī kpo̍u̍ ma̍ hīnī kɔ̄l a̍ nyɛ̄ Āhīto̍fɛ̄l o̍ di̍mi̍ ho̍ō wo̍.

⁵ Kɛ̍ mi̍ A̍bi̍sa̍lɔ̄m di̍mūl pūa̍a̍ ndūa̍a̍ āā, “Lā vēēlu̍ wɔ̍ vɛ̍lɛ̄ Hu̍sāī mī ŋ̄ tūēī nyɛ̄ ndu̍ cho̍ dīmī wo̍.”

⁶ Ma̍ kɔ̍ ve̍e̍lū Hu̍sāī mbo̍ hūŋ. Mi̍ A̍bi̍sa̍lɔ̄m dīmu̍l ndu̍ āā, “Hu̍sāī nu̍a̍ā Āhīto̍fɛ̄l o̍ di̍mi̍ ni̍, nūm yɛ̍ vɛ̄ɛ̍nɛ̍ ŋ̄ dīmi̍ yɛ̍? Bāā ŋ̄ tōsa̍ mɛ̄ɛ̍ o̍ di̍mi̍ yɛ̍?”

⁷ Mi̍ Hu̍sāī lō ko̍ŋ mbo̍ dīmūl ndu̍ āā, “Sīlā Āhīto̍fɛ̄l o̍ si̍la̍ nu̍m ndo̍, ō ve᷅ wɔ̍ lētūu̍ mā to̍sa̍ le̍nde̍ su̍ŋ su̍ŋ te̍.

⁸ Nūm pi̍la̍ si̍nā māā fi̍nyā nūm nda̍ pūa̍a̍ ndūa̍a̍ wānāā sɔ̍ŋgāa̍ pīla̍ nda̍ chō ni̍. Nāa̍ nda̍ chō ni᷅ŋ ka̍ŋ nda̍ mɛ̄ɛ̍ vīsī bīyāa̍ ō wānūŋ nu̍a̍ā a̍ chūāūwāā ndūa̍a̍ ma̍ bīī chūāūwāā ndūāā ka̍ŋ mbō chāl ni᷅ŋ a̍ yōlɛ̄ī ke̍ŋ yɛ̍, le̍nde̍ nda̍ cho̍ ni᷅ŋ su̍ŋ su̍ŋ ni̍. Ndu̍yɛ̍ wāna̍ si̍nā a̍ sɔ̍ŋgɔ̄ɔ̍ o̍kɔ̄ɔ̄ ta̍u̍ wo̍ Dēēve̍ fi̍nyā nūm o̍ cho̍ ni̍. Ō chɛ᷅l mbō lɔ᷄l nāa̍ pi᷅lɛ̍ nda̍ so̍vɛ̄i̍ya̍a̍ ndūa̍a̍ le̍.

⁹ Su̍ŋ su̍ŋ bɛ̍ɛ̍ ō chō ni᷅ŋ dɔ̍ɔ̍ o̍ vīāŋna᷄ŋ o̍ būūlū pi᷅lɛ̍ ni᷄ŋ ɔ̄ɔ̄ nāa̍ vi̍a̍ŋna᷄ŋ a̍ kɛ̍ndɛ̄ kɛ̍ndɛ̄. Tē ŋ̄ kɔ̍ chi᷅ŋa̍la᷅ŋ ndu̍ su̍ŋ su̍ŋ pɛ̍, mī ŋ̄ nɔ̄la̍ ndu̍ le̍, mbō dīī pūa̍a̍ nu̍m nda̍ a̍ ti᷄ŋ, wāŋnda̍ chō tūēīyɔ̄ɔ̄ mā dīmi̍ māā Dēēve̍ ye᷅m wānāa̍ tɔ̍l A̍bi̍sa̍lɔ̄m kɔ̄ɔ̄lī wa̍.

¹⁰ O̍ ko̍ŋ, so̍vɛ̄i̍ya̍a̍ kɔ̄ltā sīmūlāa̍ nɔ̍ bɛ̍ɛ̍ i̍si̍o̍o̍ŋ te̍ wa̍ nda̍ kpo̍u̍ sīōōŋnde̍ chō nda̍ bīyɔ̄ɔ̄. Fo̍ndōle̍, wānā o̍ wāna̍ cho̍ I̍sɔ̄lūɛ̄ī, ā sīnā māā so̍vɛ̄i̍nɔ̍ si̍nā a̍ chɔ̄ūwo̍ o̍kɔ̄ɔ̄ ta̍u̍ wo̍ fi̍nyā nūm o̍ cho̍ ni̍. Ndu̍yɛ̍ ā sīnā vɛ̍lɛ̄ māā pūa̍a̍ cho̍ ndu̍ kɔ̄ɔ̄lī wa̍ bɛ̍ɛ̍ wānāā sɔ̍ŋgāa̍ pīla̍ nda̍ chō ni̍.

¹¹ Le̍la̍ŋ ya̍ sīlā ya̍ I̍ nɔ̍ wo̍ cho̍ ho̍ō ni̍, chu̍u̍ŋgi̍a̍a̍ wɔ̍ fɛ̍lɛ̍ŋ pu̍a̍a̍ I̍sɔ̄lūɛ̄ī kpo̍u̍ na̍a̍ pi᷅lɛ̍, a̍ cho̍ kɔ̄ɔ̄lī kɔ̄ɔ̄lī wa̍ kpo̍u̍ mā yo̍o̍ŋgu̍ nda̍. Tē a̍ chu̍u̍ŋgi̍a̍a̍ nda̍ pɛ̍ kpo̍u̍ na̍a̍ pi᷅lɛ̍, mā wa̍ sɛ̍lɛ̍ bɛ̍ndo̍o̍, nūm pi̍la̍ si̍m na̍a̍ lāchī ŋ̄ tīsa̍ ni᷅ŋ Dēēve̍ kɔ̄ɔ̄lī.

¹² Bā o̍ bā Dēēve̍ wa̍, sāālɔ᷄ŋndo̍ na̍a̍ ŋ̄ sāālūŋ ndu̍ ni̍ mī ŋ̄ de᷄l ndu̍ chōo̍. Ndu̍ ni̍, pūa̍a̍ cho̍ ndu̍ kɔ̄ɔ̄lī wa̍ ni̍, ā nɔ̍lā lɛ̍ mā hɛ̄lu᷄ŋ nāā le̍.

¹³ Ā yɔ̄ŋ bɛ̍ɛ̍ mbō nyāānu̍ŋ o̍ chi̍e̍e̍ŋ cho̍ ŋ̄ bālāā a̍ sāāsāla̍ bɛ̄ndūla̍ŋ ndo̍ŋ ō pīlɛ̍ ni᷄ŋ, ŋ̄ lō ma̍lu̍a̍ā sāāsā ko̍ŋ pīɔ̄lɔ̄ɔ̍ mī ŋ̄ pīi̍ ndu̍ kpo̍u̍.”

¹⁴ Mɛ̄ɛ̍ A̍bi̍sa̍lɔ̄m nda̍ wāŋnda̍ I̍sɔ̄lūɛ̄ī a̍ tu̍e̍ī si̍lā Hu̍sāī o̍ si̍la̍ nda̍ wo̍, nda̍ kpo̍u̍ mi̍ nyɔ̄ɔ̍ hɛ̄na᷄ŋ nda̍. Ma̍ dīmī āā, “Sīla̍ Hu̍sāī wo̍ hi̍o̍ū nāŋɔ̄ɔ̄ a̍ sīlā Āhīto̍fɛ̄l o̍ si̍la̍ na̍a̍ wo̍.” O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ tɛ̍ɛ̍mbūū tūū kɛ̄ndɛ̄ Āhīto̍fɛ̄l ndu̍ o̍o̍ tu̍u̍ a̍ le̍ Dēēve̍ dīyɔ̄ɔ̍ wo̍. Fo̍ndōle̍ Mɛ̄lɛ̄ka̍ ndu̍ o̍o̍ ye̍e̍ma̍ mi̍ ndu̍ o̍o̍ tu̍si̍ A̍bi̍sa̍lɔ̄m nyɛ̄ pālāa̍ chōo̍.

Dēēve̍ hɛ̄lu᷄ŋ ya̍a̍mɔ̍ɔ̍wa̍a̍ ndūa̍a̍

¹⁵ O̍ ko̍ŋ kɔ̍ɔ̍lī, mi̍ Hu̍sāī ku̍ā sɔ̍ɔ̍ sɔ̍ɔ̍ nāa̍ Sa̍dɔ̍kī chūa̍ nda̍ Ābīa̍a̍tā wānāā sōlīāā lāsa̍lāa̍. Mbo̍ kɔ̍ chɔ᷅m nda̍ nyɛ̄ o̍ nyɛ̄ Āhīto̍fɛ̄l o̍ si̍la̍ A̍bi̍sa̍lɔ̄m nda̍ wāŋ bɛ̄ndūa̍a̍ I̍sɔ̄lūɛ̄ī. O̍ ko̍ŋ kɔ̍ɔ̍lī, mbo̍ chɔ̄m nda̍ nyɛ̄ ndu̍ ndu̍ di̍mu̍l nda̍ wo̍.

¹⁶ Mbo̍ dīmūl nda̍ āā, “Lā vīo̍m ŋ̍wa᷅ŋ chɔ̍ chɔ̍ nāa̍ Māsāa̍ Dēēve̍ chūā mā kɔ̍ di̍mūl nda̍ māā ā lɔ᷅l chūɛ̄llɛ̄ŋ o̍ pīo̍o̍ kɔ̄ŋgɔ̍ lo̍ŋ te̍. Ā chɔ᷄ŋ ā ta᷄ŋ chɔ̍ɔ̍dāŋ nda̍ŋ chɔ̍ chɔ̍. Tē ō cho̍ ko̍ŋ te̍, ndu̍ ni̍ wānāa̍ cho̍ ndu̍ kɔ̄ɔ̄lī wa̍ ni̍, ā chō nda̍ lākɔ̄ bāsɔ̄ɔ̄ tɛ̍ɛ̍.”

¹⁷ Ndu̍yɛ̍ Chōna̍ta᷅ŋ ni̍, Āhi̍ma̍a̍sī ni̍, nda̍ wa̍ īchāli̍ chu᷅mndo̍ Ɛ̄nīlo̍kɛ̄ɛ̄ o̍ pēēlo̍ Chūlu̍sɛ̄lɛ̄m chi̍e̍e̍ le̍kɔ̍ɔ̍. Nda̍ a̍a̍ fu̍lā chi̍e̍e̍ le̍, yɔ̄ŋi̍ wāŋnda̍ chɔ᷅ nda̍. Yōōŋgū o̍ yōōŋgu̍ ndu̍ o̍o̍ wa̍ pɛ̍ le̍ Māsā Bɛ̍ndōo̍ Dēēve̍, ā vēm chūāāmbɔ̄ bu̍ɛ̍īyo̍ ō kɔ̍ di̍mūl nda̍ sɔ̍ɔ̍ sɔ̍ɔ̍. Tē ō dīmu̍l nda̍ pɛ̍, ā mālnu᷄ŋ ā kɔ̍ di̍mūl Dēēve̍.

¹⁸ Kɛ̍ pāa̍le̍ pi᷅lɛ̍ mi̍ pōo̍mbɔ̄ pīlɛ̍ sāālu᷄ŋ nda̍ lo̍ŋ, mbo̍ kɔ̍ di̍mūl A̍bi̍sa̍lɔ̄m. Mɛ̄ɛ̍ nda̍ sīna̍ māā ā chīīku̍u̍ nda̍, ma̍ fāŋa᷄ŋ ndo̍ŋ chɔ̍ chɔ̍ ma̍ kūānu᷄ŋ Ba̍hu̍lūīm, ma̍ kɔ̍ vi̍o̍ŋnu᷄ŋ o̍ chīɛ̄ī po̍ pi᷅lɛ̍. Pōo̍ ho̍ō ndu̍ o̍o̍ nɔ̍ so̍o̍ŋ māmɛ̄ŋndo̍ o̍ chīɛ̄ī ndɔ̄ɔ̍ īkɛ̄i̍ lo̍ŋ. Ma̍ kɔ̍ lu̍ɛ̍ɛ̍nu᷄ŋ o̍ so̍o̍ŋ ko̍ŋ ni᷄ŋ ma̍ vīāŋnu᷄ŋ.

¹⁹ Mi̍ la̍nɔ̍ɔ̍ pōo̍ ho̍ō ō pɛ̄ŋgɛ̄lā nyɔ̄ɔ̍ o̍ so̍o̍ŋ ko̍ŋ chōo̍ mbo̍ tɛ̄ī wi̍tīi̍ŋ ndɔ̄ɔ̍ŋ lēcho̍ō. Wānā o̍ wānā si̍na̍ māā pūa̍a̍ ha̍ā ā chō lo̍ŋ te̍.

²⁰ Mi̍ A̍bi̍sa̍lɔ̄m nda̍ pūa̍a̍ ndūa̍a̍ ā cha᷄ŋ pu̍a̍a̍ ha̍ā nūūwāa̍. O̍ ko̍ŋ, ma̍ kūā o̍ chīɛ̄ī lāŋu̍nɔ̄ɔ̍ ho̍ō. Ma̍ kɔ̍ nyu̍nā la̍nɔ̍ɔ̍ pōo̍ ho̍ō āā, “ŋ̄ tūēī māā Chōna̍ta᷅ŋ nda̍ Āhi̍ma̍a̍sī hi᷅ŋ na̍nu᷄ŋ. Tē ā wa̍ na̍nu᷄ŋ pɛ̍ so̍li̍ nda̍ na̍nu᷄ŋ.” Kɛ̍ mi̍ chūa̍a̍ dīmūl nda̍ āā, “Ā wa̍ na̍nu᷄ŋ kɛ̍ ā tāŋnu̍ŋ pi̍o̍o̍ ma̍ kūānu᷄ŋ.” Mi̍ pūa̍a̍ A̍bi̍sa̍lɔ̄m nda̍ ā bālū nda̍ nūūwāa̍ ha̍a̍a̍ kɛ̍ ā sēēlu̍ŋ nda̍ le̍. O̍ ko̍ŋ, ma̍ mīīŋgu᷄ŋ Chūlu̍sɛ̄lɛ̄m.

²¹ Mɛ̄ɛ̍ nda̍ mīīŋgu̍, mi̍ Chōna̍ta᷅ŋ nda̍ Āhi̍ma̍a̍sī a̍ ko̍mā fu̍lā ma̍ kūānu᷄ŋ nāa̍ Māsā Bɛ̍ndōo̍ Dēēve̍ o̍ wa̍ wa̍. Nyɛ̄ o̍ nyɛ̄ Āhīto̍fɛ̄l ndu̍ o̍o̍ tu̍u̍ le̍ tōsāa̍, ma̍ kɔ̍ do̍o̍nu᷄ŋ Dēēve̍ ko̍na̍ kpo̍u̍. Ma̍ dīmūl Dēēve̍ āā, “Fāllo̍, lā cha᷅l na̍nu᷄ŋ te̍, lā ta̍ŋ pi̍o̍o̍ chɔ̍ chɔ̍.”

²² Mi̍ Dēēve̍ chu̍ā pūa̍a̍ ndūa̍a̍ kpo̍u̍ ma̍ bīī kɔ̄la̍ŋ Chɔ̍ɔ̍dāŋ le̍e̍lōo̍. Ndu̍yɛ̍ lɔ̍ɔ̍pa̍ mi̍ pāa̍le̍ŋ lē sīā, nda̍ kpo̍u̍ ma̍ chūū tāŋɔ̄ɔ̄.

²³ Mɛ̄ɛ̍ Āhīto̍fɛ̄l o̍ chɛ̍ māā A̍bi̍sa̍lɔ̄m nda̍ wāŋ bɛ̄ndūa̍a̍ I̍sɔ̄lūɛ̄ī a̍ sɛ̍ɛ̍ŋgi̍a̍a̍ ndu̍ dīōm, mbo̍ hēl o̍ sōfɛ̍lɛ̍ ndɔ̄ɔ̍ chōo̍ mbo̍ mīīŋgu᷄ŋ o̍ ndu̍ lo̍ chi̍e̍e̍. Mɛ̄ɛ̍ o̍ mi̍i̍ŋgu̍, mbo̍ kɔ̍ ve̍e̍lū, yu̍ŋgu̍ ndɔ̄ɔ̍ a̍ bu̍ɛ̍i̍yāā ndūa̍a̍ mbo̍ chōŋgu᷄ŋ nda̍ mɛ̄ɛ̍ nda̍ nɔ̄ mā kōma̍ bi̍ī chīɛ̄īyo̍ yɛ̍. Mɛ̄ɛ̍ o̍ chi̍i̍ nda̍ chōŋgɔ᷄ŋ kpo̍u̍, mbo̍ kɔ̍ la̍ndu᷄ŋ o̍ yōōle̍ŋ mbo̍ wū. Ma̍ chūā ndu̍ ma̍ kɔ̍ chɔ᷅ ndu̍ o̍ sɛ̄i̍ nda̍ yu̍ŋgo̍o̍ ni᷄ŋ.

²⁴ Mi̍ Dēēve̍ nda̍ pūa̍a̍ ndūa̍a̍ ā kūānu᷄ŋ Ma̍ha̍nēm chi̍e̍e̍. O̍ ko̍ŋ kɔ̍ɔ̍lī, mi̍ A̍bi̍sa̍lɔ̄m chu̍ā pūa̍a̍ ndūa̍a̍ kpo̍u̍, ma̍ tāŋ chɔ̍ɔ̍dāŋ le̍e̍lōo̍, Dēēve̍ nūūwāa̍.

²⁵ Ndu̍yɛ̍ Cho̍wa̍bī wa̍ pūa̍a̍ I̍sɔ̄lūɛ̄ī kpo̍u̍ bɔ̍lle̍ŋ ni̍. Kɛ̍ mi̍ ndu̍ ku̍a̍nu᷄ŋ Dēēve̍ kɔ̄ɔ̄lī. Mɛ̄ɛ̍ mi̍ A̍bi̍sa̍lɔ̄m mi̍ŋgī Āma̍sā o̍ fōōfo̍ ndɔ̄ɔ̍, pūa̍a̍ I̍sɔ̄lūɛ̄ī kpo̍u̍ lāchi̍. Āma̍sā ko̍ŋ fi̍nyā ndɔ̍ wa̍ Chɛ̍tɛ̄ɛ̄ ni̍, fūlāa̍ o̍ yu̍ŋgu̍ Īsīmāli̍īya̍ chōo̍. Ka̍la̍ ndɔ̍ dīōla̍ŋ āā Ābi̍kēē chūa̍ Na̍ha̍sī wo̍. Yēma̍ ndɔ̍ wa̍ Cho̍wa̍bī ni̍.

²⁶ Mi̍ A̍bi̍sa̍lɔ̄m nda̍ pūa̍a̍ ndūa̍a̍ ā kɔ̍ ki̍o̍lū dɔ̍ɔ̍ŋgɔ̍ o̍ būŋgɛ̄ī Ki̍i̍li̍a̍dī ve̍ ni᷄ŋ.

²⁷ Mɛ̄ɛ̍ Dēēve̍ fu̍u̍lu̍u̍ Ma̍ha̍nēm, mi̍ pūa̍a̍ pu᷅m ā hūŋ ndu̍ yīlɔ̄ɔ̍. Pōo̍ pīlɔ̍ɔ̍ dīōla̍ŋ āā Si̍o̍bī, po̍ Na̍ha̍sī wo̍, fūlāa̍ Lu̍a̍bā chi̍e̍e̍ o̍ lɛ̄ŋndē A̍mɔ᷅nde̍ŋ ni᷄ŋ. Ō pīlɔ̍ɔ̍ dīōla̍ŋ āā Māka̍yā, po̍ A̍mīɛ̄l wo̍, fūlāa̍ Lo̍dɛ̍bāā. Ō pīlɔ̍ɔ̍ dīōla̍ŋ āā Ba̍a̍si̍lāī, fūlāa̍ Lɔ̍chi̍līm chi̍e̍e̍ o̍ būŋgɛ̄ī Ki̍i̍li̍a̍dī ve̍ ni᷄ŋ.

^28-29 Ma̍ chūū Dēēve̍ nda̍ pūa̍a̍ ndūa̍a̍ nyɔ̄ɔ̍ŋ ka̍ka̍. Ma̍ chūū nda̍ nyɛ̄lā hīnīāā chōo̍ la̍ŋ a̍ hɛ̄ŋgɛ̍i̍la̍ŋ a̍ kpɛ̍ɛ̍nɔ̍ŋ. O̍ ko̍ŋ kɔ̍ɔ̍lī ma̍ chūū vɛ̄lɛ̄ nda̍ nyɛ̄ dīa̍a̍ ō ti᷄ŋ, wi̍tīi̍yo̍ŋ a̍ ba̍a̍līi̍yo̍ŋ, a̍ kōlo̍ nda̍ tōōsīāā bēe̍dīi̍yo̍ wo̍, a̍ ba̍a̍līi̍ŋ tu̍a̍ŋa᷄ŋ, a̍ kāūwu̍ŋ yɛ̍ yɛ̍ŋ pu᷅m, o̍ ko̍ŋ kɔ̍ɔ̍lī, a̍ līa̍a̍ŋ, a̍ nɔ̍nɔ̍ma̍ ŋ̍kpu̍ŋgba᷄ŋ, a̍ mā yɔ̄ŋāā mā pūm, a̍ sāa̍ ā ti᷄ŋ. Ma̍ yīya᷄ŋ māā o̍ po̍llo̍ ni̍ŋ Dēēve̍ nda̍ pūa̍a̍ ndūa̍a̍ ā chō ni̍, māā yīa̍a̍ŋ mā nɛ̄i̍ nda̍, kōlɔ̄ɔ̍ bīī nda̍, ndu̍yɛ̍ māā ā wā vɛ̍lɛ̄ ā sāŋgāā nyɛ̄ ko̍ŋ nda̍ yōo̍ nda̍ nyɛ̄m mu᷅ŋ ni̍.