Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 16 - Yāu̍ Mɛ̄lɛ̄ka̍a̍

Nyɛ̍ yɔ̍nu̍ŋ Dēēve̍ tɛ̄ɛ̄ŋ nda̍ Si̍bā wo̍

¹ O̍ ko̍ŋ kɔ̍ɔ̍lī mi̍ Dēēve̍ hīāū lāchī a̍ kɔ̄la̍ŋ. Dīmīo̍o̍ nu̍a̍ā ō kāndu̍ pēmbēi̍ tōlɔ̄ɔ̍, ma̍ bɔ̄ŋa᷅ŋ nda̍ Si̍bā, bu̍ɛ̍i̍ Mɛ̄fībo̍sīɛ̄ɛ̄ wo̍. Sōfɛ̍li̍a̍a̍ wa̍ ndu̍ kɔ̄ɔ̄lī ā ŋīɔ̍ɔ̍ŋ a̍ wōlɔ̄ɔ̄la̍ŋ lēchōo̍, bēe̍dīi̍yo̍ kpūŋgba᷄ŋ kɛ̄mɔ̄ɔ̍ lēdīi̍ŋ (200) a̍ Kīle̍pīi̍ma̍ ve̍sɛ̍i̍ya̍ŋ kpɔ̄ŋnjɔ̄la̍ŋ kɛ̄mɛ̄ (100) a̍ yɔ̄m kūāmāā chēle̍ŋ kpɔ̄ŋnjɔ̄la̍ŋ kɛ̄mɛ̄ (100), a̍ mūɛ̄īya̍ŋ bɔ̄lɔ̄.

² Mi̍ Māsāa̍ Bɛ̍ndōo̍ Dēēve̍ nyu̍nā ndu̍ āā, “Nɛ̄ɛ̍ nɔ̍ yɛ̄ wōlɔ̄ɔ̄la̍ŋ nda᷅ŋ?” Mi̍ Si̍bā di̍mūl ndu̍ āā, “Sōfɛ̍li̍a̍a̍ ha̍ā ni̍, a̍ wōlɔ̄ɔ̄la̍ŋ ndāŋ kpo̍u̍ nya̍ ya̍ I̍ chu̍u̍ ni̍. Yu̍ŋgu̍ nu̍m ndo̍ ya̍ I̍ chūū Sōfɛ̍li̍a̍a̍ ha̍ā ni̍ le̍ wāa̍ kɔ̄la̍ŋ lēchōo̍. Bēe̍dīi̍yo̍ ho̍ō ni̍, a̍ yɔ̄mīī kūāmɛ̄ī he̍ī, pūa̍a̍ nu̍m nda̍ ya̍ I̍ chu̍u̍ la̍ŋ ni̍. Nda̍ ya̍ I̍ chu̍u̍ vɛ̄lɛ̄ mūɛ̄īya̍ŋ māŋ ni̍, tē ā lo̍ bālɔ̄ɔ̍ o̍ po̍llo̍ ni᷄ŋ pɛ̍ mī ō pīlɛ̍ sāŋga̍ mbō hīŋ le̍ wōūwo̍, ō ko᷄l.”

³ Mi̍ Māsā Bɛ̍ndōo̍ Dēēve̍ nyūnā ndu̍ āā, “Ɔ̍ɔ̄ Mɛ̄fībo̍sīɛ̄ɛ̄, wānā nu̍m bānāa̍ po̍ ndɔ̄ɔ̍?” Mi̍ Si̍bā di̍mūl ndu̍ āā, “Ō chō Chūlu̍sɛ̄lɛ̄m. Ō yīya̍ŋ māā ndu̍ I̍sɔ̄lūɛ̍i̍ya̍ chō hāū māsāle̍ŋ fi̍nyā ndɔ̄ ma̍māle̍ŋ mīŋgī o̍ bā ni̍.”

⁴ Mi̍ Dēēve̍ lō o̍ ko̍ŋ mbo̍ dīmūl ndu̍ āā, “Nyɛ̄ o̍ nyɛ̄ Mɛ̄fībo̍sīɛ̄ɛ̄ nɔ̍ nūm ya̍ I̍ ke̍ ni᷅ŋ ni̍.” O̍ ko̍ŋ, mi̍ Si̍bā tu̍ndu᷄ŋ ndu̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mbo̍ dīmūl ndu̍ āā, “Bu̍ɛ̍ī nūmndo̍ ya̍ I̍ cho̍ ni̍ fāllo̍. I̍ cho̍ ō bɛ̄ɛ̄ndīa̍ŋ le̍ te̍le̍ŋ o̍ te̍le̍ŋ le̍ nyɛ̄ ŋ̄ dīmūl la̍ wo̍ tōsāa̍.”

Si̍ɛ̍mɛ̄ī ye̍i̍ Māsāa̍ Dēēve̍

⁵ Bōōndi̍i̍ Māsā Bɛ̍ndōo̍ Dēēve̍ nda̍ pūa̍a̍ ndūa̍a̍ ā wa̍ nyāānɔ᷄ŋndo̍ ve̍, ma̍ fūūlūū chi̍e̍e̍ pi᷅lɛ̍ dīōla̍ŋ āā Ba̍hu̍lūīm. Po̍ pi᷅lɛ̍ wa̍ o̍ chi̍e̍e̍ ko̍ŋ ni᷄ŋ dīōla̍ŋ āā Si̍ɛ̍mɛ̄ī fi̍nyā ndɔ̍ dīōla̍ŋ āā Kɛ̍lūā, o̍ yu̍ŋgu̍ Sɔ̍ɔ̄ wo̍ chōo̍ pōo̍ ho̍ō ndu̍ o̍o̍ fu̍la̍ ni̍. Mɛ̄ɛ̍ pōo̍ ho̍ō chē Dēēve̍, mbo̍ fūlā mbo̍ chīŋa̍la᷅ŋ ndu̍ a̍ yīōūla̍ŋ.

⁶ Mbo̍ chɔ̄ɔ̄vīāā pōūta̍ŋ mbo̍ wā Dēēve̍ nda̍ pūa̍a̍ ndūa̍a̍ vīīyo̍. Pūa̍a̍ Dēēvi̍a̍a̍ kpo̍u̍, ā wa̍ o̍ fo̍ndāŋ kōŋ, ā wa̍ Dēēve̍ ā bɔ̄ŋāā kpɔ̍kɔ̍su̍.

⁷ Si̍ɛ̍mɛ̄ī wa̍ Dēēve̍ yīōūla̍ŋ kpe̍e̍kpe̍i̍, mbo̍ dīmūl Dēēve̍ āā, “Ma̍l chi̍e̍e̍ nāa̍. Fa̍ŋa̍ŋ o̍ na̍a̍ lo̍ chi̍e̍e̍. Wānā di̍yāā ŋ̄wāŋndā chīe̍e̍ wo̍ ŋ̄ chō ni̍. Ā chō wānā wɔ̍ɔ̍ŋ bɛ̄ndū.

⁸ Le̍ dīū bɛ̄ndū ŋ̄ dīu̍ yu̍ŋgu̍ Sɔ̍ɔ̄ wo̍ wo̍ nyɛ̄ kōŋ Mɛ̄lɛ̄ka̍ Ya̍a̍wɛ̄ɛ̄ o̍ ha̍ndu̍ nu̍m nyɛ̄ pālāā bɛ̄ndōo̍ ho̍ō chōo̍ nu̍a̍ā ni̍. Mɛ̄ɛ̍ ŋ̄ pūu̍ māsāle̍ Sɔ̍ɔ̄ le̍ŋ a̍ ka̍ka̍ yɛ̍, le̍nde̍ ko̍ni̍ Mɛ̄lɛ̄ka̍ Ya̍a̍wɛ̄ɛ̄ pu̍u̍ nu̍m nde̍ŋ o̍ bā ni̍ mbo̍ kē A̍bi̍sa̍lɔ̄m po̍ nu̍m. A̍ di̍u̍ wāŋndā chīe̍e̍ya̍ dīū bɛ̄ndōo̍ kɛ̍ ndu̍yɛ̍ nūm bɛ̍ɛ̍ lā pālāā la̍ŋ lā kōma̍l nu̍m.”

⁹ O̍ ko̍ŋ, mi̍ Ābi̍sīāā po̍ Sɛ̄lu̍i̍yā wo̍ ō dīmūl Māsāa̍ Dēēve̍ āā, “Fāllo̍ vɛ᷅ mi̍ tūŋ fo̍ndōo̍ ho̍ō ō wā nu̍m yīōūlā wāā nu̍a̍ā? Ma̍l la̍ I̍ ku̍ā mī kɔ̍ ki̍o̍lū ndu̍ bōlle̍ŋ.”

¹⁰ Kɛ̍ mi̍ Dēēve̍ dīmūl ndu̍ āā, “Ō yēi̍ ya̍ bɛ̍ɛ̍ ō cho̍ su̍ɛ̍i̍ nya̍ le̍ cho̍ ke̍ŋ tē. Tē ō wa̍ yɛ̄ māā yīōūlā o̍ cho̍ ya̍ la᷅ŋ nda̍ŋ māā Mɛ̄lɛ̄ka̍ Ya̍a̍wɛ̄ɛ̍ ve᷅m ndu̍ ni̍ māā ō yēi̍ ya̍ ō nɛ̄ɛ̍nɛ̍ ku̍u̍nā yɛ̍ ndu̍?”

¹¹ Mi̍ Dēēve̍ lō o̍ ko̍ŋ mbo̍ dīmūl nda̍ kpo̍u̍ āā, “Po̍ ni̍ ya̍ I̍ ve̍lū kɛ̍sɛ̍ kɛ̍sɛ̍ wo̍ ō chō ya̍ nūūvīa̍a̍ le̍ ya̍ dīyɔ̄ɔ̍, bāā tē wāna̍ fu̍la̍ ho̍ō o̍ yu̍ŋgu̍ Bɛ̍ŋnja̍mīŋndo̍ chōo̍ pɔ̍ɔ̍li̍ wo̍ ō wa̍ ya̍ yēīyo̍ pɛ̍, ke̍ŋ bi̍ī nya̍ kɔ̄ndɔ̄fi̍li̍ ni̍? Lā ma᷄l ndu̍ ō yēi̍. Kɛ̄lɛ̄ŋgāā mbō wa̍ ndɔ̍ɔ̍ māā Mɛ̄lɛ̄ka̍ Ya̍a̍wɛ̄ɛ̍ ve᷅m ndu̍ ni̍ māā ō yēi̍ ya̍.

¹² Lɔ̍ɔ̍ pu᷅m ō wa̍ bɛ̍ɛ̍ le̍ yīōūlā o̍ cho̍ ya̍ la᷅ŋ nda̍ŋ nu̍a̍ā Mɛ̄lɛ̄ka̍ Ya̍a̍wɛ̄ɛ̄ o̍ cha᷅ sa̍ŋga̍ cho̍ ya̍ chōo̍ wo̍ mbō māla̍ ya̍.”

¹³ O̍ ko̍ŋ, mi̍ Dēēve̍ nda̍ pūa̍a̍ ndūa̍a̍ ā bīī nɛ̄īyo̍ kɔ̍la̍ŋ. Mi̍ Si̍ɛ̍mɛ̄ī tu̍āl nda̍ vɛ̄lɛ̄ kɔ̄ɔ̄lī mbō kūā a̍ ndu̍ yīōūla̍ŋ. Ō chō kɔ̄la̍ŋ a̍ ndu̍ yīōūla̍ŋ mbō vīī nda̍ a̍ pōūta̍ŋ, mbō kūāndū chu̍ndo̍o̍ mbō wūū nda̍ chōo̍.

¹⁴ Mbo̍ lō o̍ ko̍ŋ mi̍ Dēēve̍ nda̍ pūa̍a̍ ndūa̍a̍ ā fūūlūū Chɔ̍ɔ̍dāŋ o̍ pēēlo̍. Fūūlūū ndāa̍ ni᷅ŋ lo̍ŋ ā wa̍ ni᷅ŋ ā sāŋgāā yɔ̍kɔ̍ɔ̄ bɛ̄ndū. O̍ ko̍ŋ, ma̍ chāl pɛ̄ŋgīo̍o̍ lo̍ŋ.

A̍bi̍sa̍lɔ̄m he̍l Chūlu̍sɛ̄lɛ̄m chi̍e̍e̍

¹⁵ O̍ ko̍ŋ kɔ̍ɔ̍lī, mi̍ A̍bi̍sa̍lɔ̄m he᷅l chi̍e̍e̍ nda̍ I̍sɔ̄lūɛ̍i̍ya̍a̍ wa̍ ndu̍ kɔ̄ɔ̄lī wa̍ kpo̍u̍. Ndu̍yɛ̍ Āhīto̍fɛ̄l bɛ̍ɛ̍, o̍ wa̍ nda̍ tɛ̄ɛ̄ŋ.

¹⁶ O̍ ko̍ŋ, mi̍ Hu̍sāī, Dēēve̍ chāa̍ŋ ndɔ̄ o̍ ku̍ā nāa̍ A̍bi̍sa̍lɔ̄m chu̍a̍, mbo̍ dīmī chōo̍ cho̍o̍, “Māsā bɛ̍ndōo̍ vi̍o̍u̍ na̍a̍ chōo̍ kɛ̍ndi̍a̍a̍! Māsā bɛ̍ndōo̍ vi̍o̍u̍ na̍a̍ chōo̍ kɛ̍ndi̍a̍a̍!”

¹⁷ “Mi̍ A̍bi̍sa̍lɔ̄m lō o̍ ko̍ŋ mbo̍ nyūnā ndu̍ āā, ‘Hu̍sāī, mɛ̄ɛ̍ nūm bɛ̍ɛ̍ a̍ fa̍ŋa̍ŋ Dēēve̍ cha̍a̍ŋ nu̍m kɔ̄ɔ̄lī? Vɛ᷅ a̍ tu̍l ndu̍ kɔ̄ɔ̄lī mī lā kūɛ̄ le̍?’ ”

¹⁸ Mi̍ Hu̍sāī di̍mūl ndu̍ āā, “Sāko̍ I̍ tu᷅l ndu̍ kɔ̄ɔ̄lī le̍. Wāna̍ lɛ̄ŋnde̍ŋ kpo̍u̍ a̍ chu̍a̍, ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ hɛ̍lī wo̍, le̍ ndu̍ ya̍ I̍ cho̍ ni̍. Nu̍m ya̍ I̍ cho̍ kɔ̄ɔ̄lī ni̍.

¹⁹ I̍ sa̍a̍ŋgīāl lɛ̍ wānā o̍ wānā che᷅le̍ŋ o̍ nūm kɔ̍ɔ̍lī le̍. Ndu̍yɛ̍ mɛ̄ɛ̍ ya̍ I̍ wa̍ fi̍nyā nu̍m sāāŋgīāllo̍ yɛ̍, le̍nde̍ ko̍ni̍ ya̍ I̍ wa᷅ ni̍ŋ nu̍m sāāŋgīāllo̍ ni̍.”

²⁰ O̍ ko̍ŋ kɔ̍ɔ̍lī, mi̍ A̍bi̍sa̍lɔ̄m nyu̍nā Āhīto̍fɛ̄l āā, “Sīlā yɛ̄ɛ̍nɛ̍ nu̍m nɔ̄ yɛ̄ o̍ sūɛ̍i̍ he̍ī ni᷄ŋ? Ō yɛ̄ɛ̍nɛ̍ na̍a̍ ŋ̄ tōsa̍ yɛ̍?”

²¹ Mi̍ Āhīto̍fɛ̄l di̍mūl ndu̍ āā, “Nyɛ̄ ŋ̄ tōsā wo̍, kɔ̍ o̍ chīɛ̄ī lēmāsa̍ fi̍nyā nūmndo̍ ni᷄ŋ, lāāndāā ndūāā yɔ̍ŋāā o̍ mɛ̍i̍ chīɛ̄īyo̍ īkɛ̄i̍ ya̍ mā kɔ̍ hi̍nī a̍ nda̍. O̍ ko̍ŋ, mī I̍sɔ̄lūɛ̍i̍ya̍ kpo̍u̍ a̍ si̍na̍ māā ā sīmnu᷄ŋ ya̍a̍mɔ̍ɔ̍nɔ̍ fi̍nyā nūmndo̍ kpe̍e̍kpe̍i̍. Ko̍ŋ to̍sā ni̍ mī wānāa̍ cho̍ nu̍m kɔ̄ɔ̄lī wa̍ ā fūla̍ ŋ̄dīāl.”

²² O̍ ko̍ŋ, ma̍ kɔ̍ to̍ndū tɛ̍ndīi̍yo̍ o̍ chīɛ̄ī lēmāsāa̍ chōo̍ de̍ŋ, nāa̍ I̍sɔ̄lūɛ̍i̍ya̍ kpo̍u̍ a̍ cha᷅ wa̍. Ndu̍yɛ̍ mi̍ A̍bi̍sa̍lɔ̄m kɔ̍ wa᷅ a̍ lāāndāā yɔ̄ŋāa̍ fi̍nyā ndūāā ka̍ŋ o̍ Tɛ̍ndīi̍ ko̍ŋ ni᷄ŋ nda̍ o̍ hɔ̄l lo̍ŋ de̍ŋ.

²³ Ndu̍yɛ̍ a̍ te̍le̍ŋ ko̍ŋ, nyɛ̄ o̍ nyɛ̄ Āhīto̍fɛ̄l ndu̍ o̍o̍ di̍mi̍ pɛ̍, chu̍a̍a̍ nda̍ a̍a̍ chu̍ā ndu̍ ni̍. Nda̍ a̍a̍ chu̍a̍ māchūāā dīōm ndɔ̄ɔ̍, māā Mɛ̄lɛ̄ka̍ cho̍ sūɛ̍i̍ nāa̍ nda̍ chūā ni̍. Nyɛ̄ o̍ nyɛ̄ Āhīto̍fɛ̄l ndu̍ o̍o̍ so̍ō pɛ̍, Dēēve̍ ni̍, A̍bi̍sa̍lɔ̄m ni̍, chūa̍a̍ nda̍ a̍a̍ chu̍ā di̍ōm ndɔ̄ ko̍ŋ ni̍, māā Mɛ̄lɛ̄ka̍ so̍ō ni̍.