Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 15 - Yāu̍ Mɛ̄lɛ̄ka̍a̍

A̍bi̍sa̍lɔ̄m kɛ̍ɛ̍si̍a̍a̍ le̍ Dēēve̍ fi̍nyā ndɔ̍ sīmūllo̍

¹ Mɛ̄ɛ̍ te̍le̍ŋ ti̍ŋ hīo̍u̍ mi̍ A̍bi̍sa̍lɔ̄m sɔ̍lā nyɛ̄ nyāāna᷄ŋ su̍a̍ā ā nāŋ ndo̍ a̍ su̍a̍a̍ ā ti᷄ŋ le̍ ndu̍ pi̍la̍. Mbo̍ nūūwā pūa̍a̍ ŋ̄wāŋ be̍le̍-ŋu̍ɛ̍ɛ̍nu̍ (50) le̍ ndu̍ wāa̍ kīlta̍ŋ lāchī.

² Tē pāa̍le̍ŋ lē sɛ̄ ni᷅ŋ pɛ̍ i̍di̍i̍ pu̍u̍ŋ, ō kɔ̍ si᷅m o̍ sāāsa̍ chi̍o̍o̍ sōndōo̍ nāa̍ wāŋnda̍ hīāū wa̍. Ndu̍yɛ̍ Chūlu̍sɛ̄lɛ̄m chi̍e̍e̍ wāŋnda̍ nda̍ a̍a̍ ku̍ā a̍ sɔ̄ɔ̍ŋ ndāa̍ŋ le̍ dīmīo̍o̍ ni̍, nāa̍ Māsāa̍ Dēēve̍ chūā. Wāna̍ hu᷅ŋ ko̍ a̍ sūɛ̍i̍ ndūɛ̍i̍ nāa̍ Dēēve̍ chu̍a̍ le̍ dīmīo̍o̍, A̍bi̍sa̍lɔ̄m ve̍e̍lū ndu̍ ō nyūnā ndu̍ āā, “Chi̍e̍e̍ kūɛ̍ɛ̍nɛ̍ ŋ̄ chɛ᷄ŋ yɛ̍.” Tē wānā ko̍ŋ dīmu̍l ndu̍ pɛ̍ āā, “I̍ fu̍la̍ o̍ yu̍ŋgo̍o̍ ō pīlɛ̍ chōo̍ I̍sɔ̄lūɛ̄ī,”

³ A̍bi̍sa̍lɔ̄m di̍mu̍l ndu̍ āā, “Su̍ɛ̍i̍ nu̍m nde̍ ī chō o̍ di̍o̍o̍ mɛ̄ɛ̍ sāwāa̍ dīmi̍ yɛ̍. Kɛ̍ wānā o̍ wānā cho̍ mbō māla̍ māsāa̍ mbō dīmi̍ sūɛ̍i̍ nu̍m nde̍ le̍.

⁴ Tē ndu̍ o̍o̍ wa̍ pɛ̍ māā ya̍ wa̍ māsa̍ di̍mī sɔ̍ɔ̍ŋ wa̍ā nu̍a̍ā wo̍ ni̍, nāa̍ ya̍ chu̍a̍ ko̍ni̍ nya̍ a̍a̍ hu᷅ŋ a̍ sɔ̍ɔ̍ŋ nyāa̍ŋ ni̍, mī ya̍ i̍i̍ di̍mi̍ mu̍ŋ mɛ̄ɛ̍ sāwāa̍ dīmi̍ yɛ̄.”

⁵ Tē wānā ko̍ŋ kūɛ̄ le̍ ndu̍ tūndɔ᷄ŋndo̍ o̍ lābɛ̄ŋgu̍ ni̍ŋ pɛ̍ ō chūa̍ ndu̍ ō kɔ̄ma̍ŋ ndu̍.

⁶ I̍sɔ̄lūɛ̍i̍ya̍a̍ nda̍ a̍a̍ ku̍ā a̍ sɔ̄ɔ̍ŋ ndāa̍ŋ o̍ māsāa̍ Dēēve̍ lo̍ wa̍ ki̍nɛ̍i̍, le̍nde̍ A̍bi̍sa̍lɔ̄m ndu̍ o̍o̍ to̍sā a̍ ndu̍ ni̍. Mbo̍ lō tōsāa̍ le̍nde̍ ha̍a̍a̍, mbo̍ chīī nda̍ kɔ̄lta̍ŋ mūlī o̍ ndu̍ lo̍ kpo̍u̍.

⁷ Mɛ̄ɛ̍ wɔ̄sīla̍ŋ lā hīōū lā hīɔ̍ɔ̍lu̍, mi̍ A̍bi̍sa̍lɔ̄m kɔ̍ di̍mūl Māsā Bɛ̍ndōo̍ Dēēve̍ fi̍nyā ndɔ̍ āā, “Kɛ̄kɛ̍, I̍ ku̍ā wɔ̍ Hi̍būlɔ̄ŋ, mī kɔ̍ pe̍e̍lū būŋgɛ̄ī ya̍ I̍ chu̍a̍ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ ve̍.

⁸ Bōōndi̍i̍ ya̍ I̍ wa̍ kɛ̍sīɔ̄ɔ̄ chi̍e̍e̍, o̍ lɛ̄ŋndē Si̍i̍lūīāle̍ŋ ni᷄ŋ nde̍, mi̍ chu̍ā būŋgɛ̄i̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Mi̍ di̍mūl ndu̍ a̍a̍, ‘Mɛ̄lɛ̄ka̍ Ya̍a̍wɛ̄ɛ̄, tē a̍ to̍sa̍ a̍ sa̍bū pɛ̍ mī mi̍i̍ŋgu̍ Chūlu̍sɛ̄lɛ̄m, mɛ̄ɛ̍ mī mi̍i̍ŋgu̍ Hi̍būlɔ̄ŋ na̍nu᷄ŋ mī hu̍ŋ so̍o̍lūū nu̍m.’ ”

⁹ Mi̍ Māsāa̍ Dēēve̍ di̍mūl ndu̍ āā, “Kɔ̍, mɛ̄ɛ̍ fu̍u̍lu̍u̍ kɛ̍ndɛ̄.” Mi̍ A̍bi̍sa̍lɔ̄m cha̍ŋ mbo̍ kūā Hi̍būlɔ̄ŋ.

¹⁰ Mɛ̄ɛ̍ o̍ ku̍ɛ̄ mbo̍ kɔ̍ so̍lī ki̍i̍la̍a̍ mbo̍ vīām nda̍ sɔ̍ɔ̍sɔ̍ɔ̍, māā ā bālu̍ yu̍ŋgu̍la̍ I̍sɔ̄lūɛ̍i̍la̍ŋ chōo̍ kpo̍u̍ mā dīmu̍l nda̍ māā tē ā tūēī pɛ̍ mī bu̍lu̍la̍ŋ lā sōō, ā kɔ̍ a̍ dīmu̍la᷅ŋ ndo̍ āā, “A̍bi̍sa̍lɔ̄m si̍mnu᷄ŋ māsāa̍ Hi̍būlɔ̄ŋ.”

¹¹ Mi̍ A̍bi̍sa̍lɔ̄m yo̍o̍ŋgū mīālla̍ ta̍u̍ ta̍u̍ o̍ sa̍lāa̍ ho̍ō sōlīo̍o̍. Wāŋnda̍ kɛ̄mɔ̄ɔ̍ lē dīi̍ŋ (200) o̍ chɛ̍ŋ Chūlu̍sɛ̄lɛ̄m ni̍ mbo̍ kūā a̍ nda̍ kɔ̍ɔ̍lī. Kɛ̍ wāŋnda̍ ha̍ā nda̍ a̍a̍ si̍nā i̍sɔ̍ɔ̍ o̍ īsɔ̄ɔ̍ a̍ kɛ̄ɛ̄sīāā A̍bi̍sa̍lɔ̄m ndu̍ o̍o̍ kɛ̍ɛ̍si̍a̍a̍ ho̍ō wo̍ o̍kɔ̄ɔ̄ le̍. Kɔ̄ltā ndāla̍ŋ lā wānu̍ŋ wa̍la̍ŋ o̍ sūɛ̍i̍ he̍ī ni᷄ŋ.

¹² Mɛ̄ɛ̍ A̍bi̍sa̍lɔ̄m wa̍ sa̍lāa̍ ho̍ō sōlīo̍o̍, mbo̍ yɔ̄ŋ dīōmnde̍ŋ Ki̍lɔ̄ɔ̄ chi̍e̍e̍, nāa̍ Āhīto̍fɛ̄l chu̍a̍, Dēēve̍ wānāā ndūāā si̍lāa̍ ō pīlɔ̍ɔ̍, ndu̍ bɛ̍ɛ̍ mbo̍ hūŋ. Mi̍ ku̍nda̍ wa̍ A̍bi̍sa̍lɔ̄m kɔ̄ɔ̄lī wo̍, ō hīāū lāchī a̍ kūīyo̍. Mi̍ A̍bi̍sa̍lɔ̄m sɔ̍lā ni̍ko̍ kpa̍a̍yāa̍ kpe̍e̍kpe̍i̍ le̍ fi̍nyā ndɔ̍ fāŋāa̍ o̍ lēmāsā.

Dēēve̍ nya̍a̍nu̍ŋ A̍bi̍sa̍lɔ̄m

¹³ Kɛ̍ mi̍ yāāfānɔ̄ɔ̍ mālnu᷄ŋ mbo̍ hu᷄ŋ di̍mūl Dēēve̍ āā, “Fāllo̍, a̍ cha̍l nu̍a̍ā kɛ̍ I̍sɔ̄lūɛ̍i̍ya̍ kpo̍u̍ ā hīōūnu᷄ŋ A̍bi̍sa̍lɔ̄m po̍ nu̍m kɔ̄ɔ̄lī.”

¹⁴ O̍ ko̍ŋ, mi̍ Dēēve̍ dīmūl pūa̍a̍ wa̍ ndu̍ o̍ bā Chūlu̍sɛ̄lɛ̄m lo̍ŋ nda̍ kpo̍u̍ āā, “Lā ŋ̄ fāŋa᷅ŋ na̍nu᷄ŋ chɔ̍ chɔ̍ tē ŋ̄ yēēma̍ mī ŋ̄ hɛ̄lu᷄ŋ A̍bi̍sa̍lɔ̄m pɛ̍. Ō chō su̍ŋ su̍ŋ hu̍nɔ̄ɔ̄ nda̍ so̍vɛ̄i̍ya̍a̍ ndūa̍a̍. Yɔ̄ŋi̍ nda̍ hu᷄ŋ de᷅l na̍a̍ chōo̍ mā tɛ̄ɛ̄mbu̍u̍ yōōmūlā bɔ̄ɔ̍ bɔ̍ɔ̍ chi̍e̍e̍ na̍nu᷄ŋ.”

¹⁵ Mi̍ pūa̍a̍ ndūa̍a̍ dīmūl ndu̍ āā, “Tōnya̍ ŋ̄ dīmi̍ ni̍ fāllo̍. Nyɛ̄ o̍ nyɛ̄ ŋ̄ dīmu̍l na̍a̍ le̍ tōsāa̍ pɛ̍, ŋ̄ chō bɛ̄ɛ̄ndīa̍ŋ mī ŋ̄ tōsa̍.”

¹⁶ O̍ ko̍ŋ, mi̍ Dēēve̍ chūā pūa̍a̍ ndūa̍a̍ a̍ yu̍ŋgu̍ ndɔ̄ɔ̍ ma̍ māl chi̍o̍o̍. Mɛ̄ɛ̍ o̍ wa̍ kɔ̄la̍ŋ mbo̍ mɛ̄i̍ lāāndāā ndūāā yɔ̍ŋāa̍ ŋ̄wāŋ tɔ̍ le̍ mī nda̍ kōma̍ lɔ̍ chīɛ̄īyo̍ īkɛ̄i̍.

¹⁷ Mɛ̄ɛ̍ Dēēve̍ nda̍ wānāa̍ wa̍ ndu̍ kɔ̄ɔ̄lī wa̍ ā fūūlu̍u̍ o̍ chīɛ̄ī mɛ̄ɛ̄lāa̍, o̍ chi̍o̍o̍ da̍ŋga̍la̍, nda̍ kpo̍u̍ ma̍ sīm lo̍ŋ.

¹⁸ O̍ ko̍ŋ, mi̍ so̍vɛ̄i̍ya̍a̍ Dēēve̍ wa̍, a̍ pūa̍a̍ ma̍ndā ndu̍ wa̍ ā wā hīōūwɔ̄ɔ̍ a̍ ku̍ndāla̍ŋ mī Dēēve̍ mɛ̄ɛ̄ndāŋ nda̍. Mi̍ Dēēve̍ chā ku̍ndā so̍vɛ̄i̍ya̍a̍ kɛ̄mɛ̄ le̍ ŋɔ̍mpu᷅m (600) nda̍ a̍ fu̍la̍ Ka̍a̍tī chi̍e̍e̍ wa̍ hīōūwɔ̄ɔ̍.

¹⁹ Mɛ̄ɛ̍ Dēēve̍ chē nda̍, mbo̍ dīmūl I̍tāī, wāna̍ wa̍ nda̍ bɔ̍lle̍ŋ ndo̍ āā, “I̍tāī ye̍ē nya̍ mīālla̍ bɛ̍ɛ̍ mi̍ lā hūŋ na̍a̍ kɔ̄ɔ̄lī. Nya̍ nya̍ wānāā lēkāa̍ nya̍ chō ni̍, ndu̍ o̍o̍ ve̍ le̍tu̍u̍ mī nya̍ a̍a̍ hi᷅ŋ na̍a̍ kɔ̄ɔ̄lī le̍.

²⁰ Hūnɔ̄ɔ̄ nyāa̍ na̍nu᷄ŋ ō vīu̍ wɔ̍ bɛ̍ɛ̍ le̍. I̍ nɔ̍lā mī chu̍a̍ nya̍ mī to᷅l sēēmīa̍a̍ a̍ nya̍ kɔ̄ɔ̄lī le̍. I̍ si̍nā bɛ̍ɛ̍ nāa̍ ya̍ I̍ cho̍ kɔ̄la̍ŋ te̍. Le̍la̍ŋ chu̍a̍ pu̍a̍a̍ nu̍m nda̍ lā mīīŋgu̍ nāa̍ māsā bɛ̍ndū sɛ̍nɛ̄i̍ su̍llo̍ chūā, mī lā kɔ̍ wa᷅ wa̍llo̍ le̍ ndu̍. Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ hi̍o̍ū la̍chi̍ a̍ nya̍ sɔ̄ɔ̍ŋ kɛ̍ndɔ̍ŋ tōsāllo̍ ndu̍yɛ̍ nyɛ̄ o̍ nyɛ̄ o̍ chu̍e̍l nya̍ būŋgɛ̄i̍, mbō tōsa̍l nya̍ ndu̍ fɔ̍.”

²¹ Kɛ̍ mi̍ I̍tāī me̍nāla᷄ŋ ndu̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l po̍, mbo̍ dīmūl ndu̍ āā, “Bā o̍ bā ŋ̄ kɔ̍ ŋ̄ chō nu̍m kɔ̄ɔ̄lī, ŋ̄ me᷅l nu̍m te̍. Tē ō wa̍ sūɛ̍i̍ yōōmū nī lo̍ lēni᷄ŋ pɛ̍, ō lo̍, kɛ̍ I̍ fe̍ŋāŋ nu̍m kɔ̄ɔ̄lī le̍.”

²² Mi̍ Dēēve̍ lō o̍ ko̍ŋ mbo̍ dīmūl ndu̍ āā, “Ō na᷄ŋ le̍nde̍, lā hīo̍u̍.” O̍ ko̍ŋ, I̍tāī ni̍, a̍ pūa̍a̍ ndūa̍a̍ kpo̍u̍, a̍ yu̍ŋgu̍la̍ ndāla̍ŋ lātūlu̍ ma̍ tūāl Dēēve̍ kɔ̄ɔ̄lī.

²³ Mɛ̄ɛ̍ wāŋnda̍ Chūlu̍sɛ̄lɛ̄m a̍ chē Māsāa̍ Dēēve̍ kɔ̄la̍ŋ nda̍ wānāa̍ wa̍ ndu̍ kɔ̄ɔ̄lī wa̍, nda̍ kpo̍u̍ ma̍ chāŋ chōo̍ cho̍o̍ kpe̍le̍ŋ. Mi̍ Māsāa̍ Dēēve̍ nda̍ wānāā o̍ wa̍ kɔ̄la̍ŋ kɔ̄ɔ̄lī wa̍ ā kɔ̍ ta᷅ŋ pēē pɔ̍mbɔ̄ɔ̍ Ki̍di̍lɔ̄ŋ ma̍ kūā kūmbū lɛ̄ŋndē po̍lte̍ŋ.

²⁴ Ābīa̍a̍tā nda̍ Sa̍dɔ̍kī wānāā sōlīāā lāsa̍lāa̍ ni̍, a̍ Līva̍īya̍a̍ wa̍ kɔ̄la̍ŋ a̍ kɔ̍fū kpe̍ma̍a̍ wa̍ nda̍ kpo̍u̍ ma̍ tūāl Dēēve̍ kɔ̄ɔ̄lī. Kɔ̍fu̍ Mɛ̄lɛ̄ka̍a̍ lo̍ ō kɛ̄sīāā o̍ chīɛ̄ī mɛ̄ɛ̄lāa̍ o̍ chi̍o̍o̍ da̍ŋga̍la̍, ha̍a̍a̍ mbo̍ lō o̍ ko̍ŋ mi̍ wānāā Dēēve̍ wa̍ kɔ̄la̍ŋ kɔ̄ɔ̄lī wa̍ ā chīī chi̍o̍o̍ mālɔ̄ɔ̄.

²⁵ O̍ ko̍ŋ kɔ̍ɔ̍lī, mi̍ Māsāa̍ Dēēve̍ di̍mūl Sa̍dɔ̍kī āā, “Chu̍a̍ kɔ̍fū kpe̍ma̍a̍ mā mīīŋgu̍ a̍ ndu̍ chi̍e̍e̍. Tē Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̄l a̍ ya̍ pɛ̍, ō chō ya̍ mīŋgī na̍nu᷄ŋ mī che᷅ vɛ̄lɛ̄ kɔ̍fū ndɔ̄ɔ̍ a̍ fo̍ndāŋ o̍ cho̍ ō kɛ̄sīāā wo̍.

²⁶ Tē ō hīni̍ yɛ̍ kɔ̄l a̍ ya̍ mī mi̍i̍ŋgu̍ na̍nu᷄ŋ te̍ nyɛ̄ o̍ nyɛ̄ o̍ yi̍ya̍ŋ pɛ̍ māā ō bɛ̄nda̍ le̍ tōsā ō tōsa̍.”

²⁷ Mi̍ Dēēve̍ hīāū lāchī a̍ sūɛ̍i̍ nāa̍ Sa̍dɔ̍kī chu̍a̍, mbo̍ dīmūl ndu̍ āā, “Sa̍dɔ̍kī, wānā cha̍ā sɔ̄ɔ̍ŋ wa̍ā lāchīo̍o̍ ŋ̄ chō ni̍. Le̍la̍ŋ lā mīīŋgu̍ nya̍ Ābīa̍a̍tā a̍ pūa̍a̍ nyāā ŋi̍ɔ̍ɔ̍ŋnda̍, Āhi̍ma̍a̍sī po̍ nu̍m, a̍ Chōna̍ta᷅ŋ po̍ Ābīa̍a̍wo̍.

²⁸ I̍ cho̍ wā īchāli̍ chu᷅mndo̍ chɔ̍ɔ̍dāŋ o̍ pēēlo̍ nāa̍ tɛ̍ɛ̍ŋgāa̍. Nyɛ̄ o̍ nyɛ̄ nya̍ tūēī pɛ̍, lā yɔ᷄ŋ ya̍ yōōŋgōo̍ I̍ cho̍ wā lo̍ŋ, I̍ cho̍ fa̍ŋa᷄ŋ te̍, ha̍a̍a̍ mī tu̍e̍ī lā wāā chi̍e̍e̍.”

²⁹ O̍ ko̍ŋ, Sa̍dɔ̍kī ni̍ a̍ Ābīa̍a̍tā mi̍ nda̍ mīīŋgū Chūlu̍sɛ̄lɛ̄m chi̍e̍e̍ a̍ kɔ̍fū kpe̍ma̍a̍ mi̍ nda̍ lō lo̍ŋ.

³⁰ Mi̍ Dēēve̍ māl chi̍o̍o̍ mbo̍ kūā bā Pēmbīī Ɔ̍li̍fīve̍. Mbo̍ hāndu᷄ŋ ba᷅la̍ŋ o̍ lēbōl, mbō kūā a̍ cha᷄ŋndo̍ pēlūŋ fo̍ndō. Wānāa̍ wa̍ ndu̍ kɔ̄ɔ̄lī wa̍ kpo̍u̍ ma̍ hāndu᷄ŋ ba᷅la̍ŋ o̍ hɔ̄l mā kūā a̍ cha᷄ŋndo̍.

³¹ O̍ ko̍ŋ kɔ̍ɔ̍lī, mi̍ Dēēve̍ tūɛ̄ī māā Āhīto̍fɛ̄l bɛ̍ɛ̍ ndu̍ hi̍o̍u̍nu᷄ŋ A̍bi̍sa̍lɔ̄m kɔ̄ɔ̄lī. Mɛ̄ɛ̍ o̍ tu̍e̍ī le̍nde̍, mbo̍ pīɛ̄ī Mɛ̄lɛ̄ka̍ āā, “Yāndi̍i̍ Mɛ̄lɛ̄ka̍ Ya̍a̍wɛ̄ɛ̄, sīlā o̍ sīlā Āhīto̍fɛ̄l o̍ si̍la̍ A̍bi̍sa̍lɔ̄m pɛ̍, to̍sa̍ mī sīlā kōŋ ō sīmnu᷄ŋ i̍di̍ɔ̄m.”

³² Mɛ̄ɛ̍ Dēēve̍ fu̍u̍lu̍u̍ pēmbēi̍ chōo̍ o̍ fo̍ndāŋ nda̍ sōōlūū Mɛ̍lɛ̄ka̍ wo̍, mi̍ po̍ pi᷅lɛ̍ dīōla̍ŋ āā Hu̍sāī, wānā wa̍ā o̍ lɛ̄ŋndē A̍lu̍a̍cha̍i̍tīi̍le̍ŋ ni᷄ŋ o̍ ko̍māl ndu̍ lo̍ŋ a̍ dōmāa̍ ndu̍ lēkɔ̄ɔ̍ o̍ sɛ̍ɛ̍si̍ɛ̍i̍, chu̍ndo̍o̍ wa̍ ndu̍ o̍ lēbōl kpo̍u̍. Ndu̍yɛ̍ Dēēve̍ chāa̍ŋ ndɔ̍ wa̍ pōo̍ ho̍ō ni̍.

³³ Mɛ̄ɛ̍ Dēēve̍ chē ndu̍, mbo̍ dīmūl ndu̍ āā, “Hu̍sāī, wa̍ bɛ̍ɛ̍ ya̍ īkɛ̄i̍ na̍nu᷄ŋ a̍ nɔ̍lā mā ma̍la̍ ya̍ le̍.

³⁴ Ō wā le̍tu̍u̍ mā mi̍i̍ŋgu̍ Chūlu̍sɛ̄lɛ̄m mā kɔ̍ cha᷅l lo̍ŋ. Ā kūɛ̄ pɛ̍ a̍ kɔ̍ di̍mu̍l A̍bi̍sa̍lɔ̄m āā, fi̍nyā nūm o̍ bā ya̍ I̍ wa̍ bu̍ɛ̍īle̍ŋ pāāndū ni̍. Kɛ̍ mɛ̄ɛ̍ ŋ̄ sīmnu᷄ŋ ni᷅ŋ māsāa̍ yɛ̍ I̍ wa᷅ nu̍m bu̍ɛ̍īle̍ŋ o̍ bā. Tē A̍bi̍sa̍lɔ̄m chɛ̍l pɛ̍ mā wa̍ ndu̍ wa̍llo̍ o̍ bā, nyɛ̄ o̍ nyɛ̄ Āhīto̍fɛ̄l o̍ si̍la̍ ndu̍ ni᷅ŋ le̍ tōsāa̍ pɛ̍, ā nɔ̄lā mā tɛ̍ɛ̍mbu̍u̍ sīlā kōŋ.

³⁵ Wānāa̍ sōlīāā lāsa̍lāa̍, Sa̍dɔ̍kī nda̍ Ābīa̍a̍tā a̍ cho̍ wā lo̍ŋ. Nyɛ̄ o̍ nyɛ̄ ŋ̄ tūēī pɛ̍ mī wānāa̍ cho̍ o̍ chīɛ̄ī lēmāsāa̍ ni᷄ŋ nda̍ ā kɛ̄ɛ̄si̍a̍a̍ le̍ tōsāa̍ a̍ hu̍ŋ di̍mūl nda̍.

³⁶ Pūa̍a̍ ndāa̍ chō lo̍ŋ, Āhi̍ma̍a̍sī nda̍ Chōna̍ta᷅ŋ. Nyɛ̄ o̍ nyɛ̄ nya̍ tūēī a̍ ya̍ o̍kɔ̄ɔ̄ pɛ̍ lā vēm nda̍ ā hu᷄ŋ di̍mūl la̍.”

³⁷ O̍ ko̍ŋ, mi̍ Dēēve̍ chāa̍ŋ ndɔ̄ Hu̍sāī ndu̍ bɛ̍ɛ̍ o̍ mi̍i̍ŋgū chi̍e̍e̍. Ndu̍yɛ̍ a̍ te̍le̍ŋ A̍bi̍sa̍lɔ̄m o̍ wa᷅ nu̍a̍ā hēlɔ̄ɔ̍ chīe̍e̍ wo̍ ki̍nɛ̍i̍ o̍ fu̍u̍lu̍u̍ ni̍.