Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 14 - Yāu̍ Mɛ̄lɛ̄ka̍a̍

Cho̍wa̍bī so̍ō nāa̍ Dēēve̍ chu̍a̍ le̍ mbō mīŋgi̍ A̍bi̍sa̍lɔ̄m Chūlu̍sɛ̄lɛ̄m

¹ O̍ ko̍ŋ kɔ̍ɔ̍lī, mi̍ Cho̍wa̍bī cha᷅ māā Māsā Bɛ̍ndōo̍ Dēēve̍ yēēma̍ ni᷅ŋ A̍bi̍sa̍lɔ̄m po̍ ndɔ̄ yēēmɛ̍i̍ pīla̍.

² Chūā pīlɛ̍ wa̍ Tɛ̄ko̍wā chi̍e̍e̍ wānā la̍nɔ̍ kɔ̄l kālo̍o̍ pīla̍ o̍ wa̍ ni̍. Mɛ̄ɛ̍ Cho̍wa̍bī che᷅ le̍nde̍, mbo̍ yɔ̄ŋ le̍ chūa̍a̍ ho̍ō, mi̍ chūa̍a̍ hūŋ. Mi̍ Cho̍wa̍bī di̍mūl ndu̍ āā, “Chūa̍a̍ I̍ ye̍e̍ma̍ mī ve᷅m nu̍m nāa̍ Māsāa̍ Dēēve̍ chūā. Tē a̍ wa̍ kɔ̄la̍ŋ pɛ̍, a̍ do̍vi̍ŋ māā wāna̍ bīīsi̍, mɛ̄ɛ̍ wāŋndo̍ wāna̍ ndɔ̄ɔ̍ wū nu̍a̍ā mbō wa̍ cha᷄ŋ ko̍ŋ le̍ te̍le̍ŋ vi̍lɛ̄ī yɛ̍.

³ Nyɛ̄ o̍ nyɛ̄ ya̍ I̍ cho̍ nu̍m chōŋgɔ᷄ŋ tē ā kūɛ̄ pɛ̍ a̍ kɔ̍ di̍mūl Māsāa̍ Dēēve̍.” O̍ ko̍ŋ, mi̍ Cho̍wa̍bī chi̍ī ndu̍ chōŋgɔ᷄ŋ kpo̍u̍.

⁴ Mi̍ chūa̍a̍ mālnu᷄ŋ mbo̍ kūā nāa̍ Māsā Bɛ̍ndōo̍ Dēēve̍ chūā. Mɛ̄ɛ̍ o̍ fu̍u̍lu̍u̍ mbo̍ tūndu᷄ŋ Dēēve̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mbo̍ dīmūl ndu̍ āā, “Fāllo̍, I̍ hi᷅ŋ nāa̍ nūm chu̍a̍ mā māla̍ ya̍.”

⁵ Mi̍ Dēēve̍ nyūnā ndu̍ āā, “Mālā yɛ̄ɛ̍nɛ̍ ŋ̄ yēēma̍ yɛ̄ mī ma̍la̍ nu̍m?” Mi̍ chūa̍a̍ dīmūl ndu̍ āā, “Vīi̍yo̍ ya̍ I̍ cho̍ ni̍ fāllo̍, I̍ nɔ̍ lɛ̍ pɔ̍nɔ̍ le̍. Pɔ̍nɔ̍ nūu̍ ō vī.

⁶ Kɛ̍ mbo̍ mɛ̄ī ya̍ pūa̍a̍ o̍ bā nda̍ ŋi̍ɔ̍ɔ̍ŋ. Pūa̍a̍ ŋi̍ɔ̍ɔ̍ŋāā o̍ mɛ̍i̍ ya̍ ka̍ŋ o̍ bā wa̍, pāa̍le̍ pi᷅lɛ̍ le̍ wa̍, ma̍ cha᷄ŋ ma̍ kūā o̍ chīɛ̍i̍ ni᷄ŋ. Kɔ̄la̍ŋ lo̍ŋ, ma̍ kɔ̍ sa̍āŋ sɔ̍ŋgɔ̄ɔ̍ yōndō kōŋ ni᷄ŋ nda̍ ŋi̍ɔ̍ɔ̍ŋ. Wānā o̍ wānā ve̍ lo̍ŋ mbō kpāāli̍a̍a̍ nda̍ le̍. Ā lo̍ sɔ̍ŋgɔ̄ɔ̍, mi̍ ō pīlɔ̍ɔ̍ dīī chāa̍ŋ ndɔ̍.

⁷ O̍ ko̍ŋ, mi̍ wānāā nīa̍a̍ ā tūāl la̍ kɔ̄ɔ̄lī māā mɛ̄ɛ̍ mī yɔ̍ŋgu̍ nda̍ po̍ di̍ī ko̍ŋ cha̍a̍ŋ ndɔ̍ wo̍, ndu̍ bɛ̍ɛ̍ mā dīī ndu̍ sɔ̍ŋgɔ̍ ko̍ŋ. Ndu̍yɛ̍ po̍le̍ le̍ŋ, le̍ŋ pīlɛ̍ kpe̍ ya̍ I̍ ti̍i̍nda̍ŋ ni᷅ŋ ni̍. Tē ā dīīlu̍l la̍ ndu̍ pɛ̍ mɛ̄ɛ̍ nyɛ̄m ke᷅ŋ pɔ̍nɔ̍ nūu̍ ō mɛ̄i̍yo̍ŋ ŋ̄ chō lāāsīa̍ŋ. Ndu̍yɛ̍ ō fūla̍ o̍ ko̍ŋ kɔ̍ɔ̍lī, tē ndu̍ vi᷅ ni᷅ŋ pɛ̍, mɛ̄ɛ̍ wānā o̍ wānā chɛ̍le̍ŋ ve᷅ lɛ̍ mbō lōo̍ dīōla̍ pɔ̍nɔ̍ nūu̍ o̍ chi̍e̍ēŋndo̍ chōo̍ le̍.”

⁸ Mi̍ Dēēve̍ di̍mūl ndu̍ āā, “Bālā tīɔ̍ɔ̍ŋ, mi̍i̍ŋgu̍ I̍ tu̍e̍ī. I̍ cho̍ nu̍m mālā.”

⁹ Mi̍ chūa̍a̍ dīmūl ndu̍ āā, “Fāllo̍, nyɛ̄ o̍ nyɛ̄ ŋ̄ tōsa̍ o̍ sūɛ̍i̍ he̍ī ni᷄ŋ pɛ̍ le̍ ya̍ mālāa̍, nūm ni̍, yu̍ŋgu̍ nu̍m ndo̍ ni̍, tɔ̍ɔ̍ya̍ŋ ko̍ŋ ve᷅ nya̍ chōo̍ le̍. Ya̍ a̍ yɔ̍ŋgu̍ nūu̍ na̍a̍ tɔ̍ɔ̍ya̍ŋ ko̍ŋ ō wā cho̍o̍ ni̍.”

¹⁰ Mi̍ Māsā Bɛ̍ndōo̍ Dēēve̍ di̍mūl ndu̍ āā, “Mi̍i̍ŋgu̍, wānā o̍ wāna̍ kɔ̍ ke᷅ nu̍m īsɔ̄ɔ̍ pɛ̍, ā hīŋ a̍ wānā ko̍ŋ nāa̍ ya̍ chu̍a̍. I̍ cho̍ tōsā fɛ̍ɛ̍ŋ a̍ fɛ̍ɛ̍ŋ wānā pi̍lā lɛ̍ nu̍m sōndōo̍ le̍ sūɛ̍i̍ ke̍ŋ te̍.”

¹¹ Mi̍ chūa̍a̍ dīmūl ndu̍ āā, “Fāllo̍, mɛ̄ɛ̍ me̍na̍la̍ŋ ya̍ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l, Mɛ̄lɛ̄ka̍ nu̍m ŋ̄ pīɛ̄īyo̍ māā a̍ chɛ᷅l ni̍ŋ mī wānā o̍ wānā di̍ī po̍ nūu̍ le̍.” O̍ ko̍ŋ, mi̍ Dēēve̍ me̍na᷄ŋ mbo̍ dīmūl ndu̍ āā, “I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, yīīŋnde̍ŋ lēpīlɛ̍ bɛ̍ɛ̍ le̍ ke̍ndīŋ po̍ nu̍m ndo̍ o̍ lēbōl te̍.”

¹² Mi̍ chūa̍a̍ dīmūl ndu̍ āā, “Māsānɔ̍ nu̍u̍, yāndi̍i̍, ke̍ ya̍ fo̍ndāa̍ mī chɔ̍ɔ̍lū īsɔ̄ɔ̍ nāa̍ nūm chu̍ā.” Mi̍ Dēēve̍ di̍mūl ndu̍ āā, “Mɛ̄ɛ̍ so̍o̍.”

¹³ Mi̍ chūa̍a̍ dīmūl ndu̍ āā, “Vɛ᷅ ma̍ tōsāl wānāa̍ Mɛ̄lɛ̄ka̍a̍ ka̍fālā wāā nu̍a̍ā? Tē ā nɔ̄lā pɛ̍ mā ma̍la̍ ya̍ mālā wāā nu̍a̍ā, vɛ᷅ ni᷅ŋ po̍ nu̍m ŋ̄ vēlū kɛ̍sɛ̍ kɛ̍sɛ̍ wo̍, ndu̍ yɔ̍nūŋ māā A̍bi̍sa̍lɔ̄m ni̍ a̍ me̍l ndu̍ le̍ nyɛ̄ o̍ to̍sa̍ wo̍ mā mi̍ŋgi̍ ndu̍ na̍nu᷄ŋ te̍? Nūm pi̍la̍ chi̍i̍ yāāla᷄ŋ a̍ nyɛ̄ ŋ̄ dīmu̍l la̍ wo̍.

¹⁴ Na̍a̍ kpo̍u̍ ŋ̄ nɔ̄ le̍ wūo̍o̍, wānā o̍ wānā cho̍ lo᷅ na̍nu᷄ŋ te̍. Na̍a̍ wāŋndā chīe̍e̍ya̍, mɛ̄ɛ̍, wānā chu̍i̍ŋī nu̍a̍ā mɛ̄ŋnda̍ŋ lɛ̄ŋ a̍ nɔ̍lā lɛ̍ ma̍ŋ mīŋgī kɔ̄ndɔ̄ɔ̄ le̍ yɛ̍, le̍nde̍ na̍a̍ ŋ̄ cho̍ ni̍. Kɛ̍ Mɛ̄lɛ̄ka̍ ndu̍ ndu̍, ā yɔ᷄ŋ bɛ̍ɛ̍ mī ŋ̄ ma᷄l nɛ̄i̍ ndɔ̄ɔ̍, nɛ̄īla̍ŋ o̍ nu̍u̍wā ni̍ mbō mīŋgi̍ŋ na̍a̍ o̍ ībūŋ. Kɛ̍ o̍ chi̍ī a̍ na̍a̍ o̍ lēpīlɛ̍ ni᷄ŋ kpe̍ le̍, fo̍ndōle̍ ō nɔ̄ kāālāa̍ le̍ na̍a̍ ŋ̄wāŋndā chīe̍e̍ ta̍u̍. Tē Mɛ̄lɛ̄ka̍ ndu̍ nɔ̍lā wɔ̍ pɛ̍ mbō tōsa̍ ke̍ŋ a̍ na̍a̍, na̍a̍ yɛ̄, ŋ̄ to̍sā le̍nde̍ le̍?

¹⁵ Fāllo̍, kɔ̄ŋgɔ̄la᷄ŋ wānāā nīa̍a̍ nda̍ a̍a̍ kɔ̍ŋgɔ̍la̍ŋ ya̍ wo̍, ō wa̍ ō bɔ̄ɔ̍. Nyɛ̄ kōŋ sīōōŋnde̍ bīī ya̍ ni̍ mi̍ di̍mī a̍a̍, ‘I̍ ku̍ā wɔ̍ nāa̍ māsānɔ̍ nūu̍ chūā mī kɔ̍ chɔ᷅m ndu̍ bā nī ha̍vɛ̍i̍yo̍, kɛ̄lɛ̄ŋgāā dɔ̍ɔ̍ mbō māla̍ ya̍.’

¹⁶ Mi̍ yi̍ya᷄ŋ māā nāa̍ pu̍m ā chō ya̍ īnyīɛ̍ɛ̍ tūīīnɔ᷄ŋ, mā to̍sa̍ ya̍ ni̍, po̍ nūu̍ ni̍, ā di̍ī na̍a̍ mā fāŋa̍ na̍a̍ o̍ lɛ̄ŋndē Mɛ̄lɛ̄ka̍ ke̍ le᷅ŋ na̍a̍ le̍ŋ ni᷄ŋ te̍.

¹⁷ Ndu̍yɛ̍ mi̍ si̍nā māā būŋgɛ̄ī o̍ būŋgɛ̄ī ŋ̄ chūe̍l la̍ pɛ̍, ā chō būŋgɛ̄ī kēŋ pēēlū mā to̍sa̍ mī kɔ̄l nūu̍ nyūlu̍l, fo̍ndōle̍, I̍ si̍nā māā sɔ̍ŋgɔ̍ ki̍i̍la̍nɔ̍ Mɛ̄lɛ̄ka̍a̍ ŋ̄ chō ni̍, ā sīnā i̍kɛ̍ndɛ̄i̍ a̍ īwɔ̄ɔ̍ŋnde̍ pɛ̄ŋgu̍. Ndu̍yɛ̍ mbɔ̄ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūm ndo̍ ō wa̍ nu̍m kɔ̄ɔ̄lī fɔ̍.”

¹⁸ Mi̍ Māsāa̍ Dēēve̍ lō o̍ ko̍ŋ mbo̍ dīmūl chūa̍a̍ āā, “I̍ nyu̍nā wɔ̍ nu̍m mā di̍mūl la̍ tōnya̍a̍ kpe̍e̍kpe̍i̍.” Mi̍ chūa̍a̍ dīmūl ndu̍ āā, “Nyu̍na̍ fāllo̍.”

¹⁹ Mi̍ Māsāa̍ Dēēve̍ nyūnā ndu̍ āā, “Bāā Cho̍wa̍bī dɔ̍ū nu̍m dīōmnda̍ŋ nda᷅ŋ o̍ sōndō le̍ ya̍ dīmūllo̍ ni̍?” Mi̍ Chūa̍a̍ dīmūl ndu̍ āā, “Fāllo̍, māsānɔ̍ nūu̍ ŋ̄ chō ni̍. I̍ nɔ̍lā mī vi̍ŋ nu̍m īsɔ̄ɔ̍ o̍ īsɔ̄ɔ̍ le̍. Cho̍wa̍bī bu̍ɛ̍ī nu̍m dɔ̍ū ya̍ dīōmnda̍ŋ nda᷅ŋ ki̍nɛ̍i̍ o̍ sōndō ni̍, le̍ mī hu̍ŋ di̍mūl nu̍m.

²⁰ Cho̍wa̍bī ye̍e̍ma̍ mbō chīi̍ sūɛ̍i̍ he̍ī nya̍ tɛ̄ɛ̄ŋ nya̍ po̍ nu̍m ndo̍, nyɛ̄ kōŋ o̍ dɔ̍ū ya̍ dīōmnda̍ŋ nda᷅ŋ ki̍nɛ̍i̍ o̍ sōndō ni̍ le̍ mī hu̍ŋ di̍mūl nu̍m. Kɛ̍ nūm ā nɔ̄ bɔ̍ɔ̍ kɔ̍l kālo̍o̍ le̍ sɔ̄ɔ̍ŋ kēlēŋāa̍ sīnāa̍ pɛ̄ŋgu̍ chɔ̍ chɔ̍. Ā chō māchūāā māā ki̍i̍la̍nɔ̍ Mɛ̄lɛ̄ka̍a̍ o̍ si̍nā nyɛ᷅ o̍ nyɛ᷄ cho̍ yɔ̄nɔ᷄ŋndo̍ o̍ chi̍e̍ēŋndo̍ ni᷄ŋ ndo̍.”

²¹ O̍ ko̍ŋ, mi̍ Māsāa̍ Dēēve̍ vēēlū Cho̍wa̍bī, mbo̍ dīmūl ndu̍ āā, “I̍ tu̍e̍ī nyɛ̄ ŋ̄ dīmi̍ wo̍. Kɔ̍ mā kɔ̍ hu᷅ŋ a̍ po̍ chu̍a̍ pīāāndōo̍ A̍bi̍sa̍lɔ̄m ō mīīŋgu̍ na̍nu᷄ŋ.”

²² Mi̍ Cho̍wa̍bī ba᷅ŋ wūla̍ŋ mbo̍ fūūlūū hɔ̄lla̍ lɛ̄ŋ mɛ̍ɛ̄ Māsāa̍ Dēēve̍ o̍ lābɛ̄ŋgu̍ ni᷄ŋ, le̍ ndu̍ bɛ̄ɛ̄le̍ŋ kīo̍o̍, mbo̍ dūāū Dēēve̍ sa̍la̍ āā, “Mbɔ̄ māā Mɛ̄lɛ̄ka̍ dɔ̍u̍ nu̍m sa̍lā fāllo̍, le̍ ya̍ nīla̍ŋ yāŋɔ̄ɔ̍ ma̍ chɛ̄l nyɛ̄ ya̍ I̍ di̍mu̍l nu̍m ndo̍. A̍ chɔ̍m ya̍ pāa̍le̍ hāūle̍ŋ nde᷅ŋ kpe̍e̍kpe̍i̍ māā a̍ hi̍ni̍ kɔ̄l a̍ ya̍.”

²³ Mi̍ Cho̍wa̍bī ma̍lnu᷄ŋ mbo̍ kūā Kɛ̍sīɔ̄ɔ̄ mbo̍ kɔ̍ hu᷅ŋ a̍ A̍bi̍sa̍lɔ̄m.

²⁴ Kɛ̍ mi̍ Māsāa̍ Dēēve̍ dīmī māā A̍bi̍sa̍lɔ̄m wa̍ chi̍ɛ̍ī ndɔ̄ te̍ŋge̍ŋ, ō fu̍lā ndu̍ o̍ hɔ̄l te̍. Mɛ̄ɛ̍ mi̍ A̍bi̍sa̍lɔ̄m ndu̍ wa᷅ chīɛ̄ī ndɔ̄ te̍ŋge̍ŋ ndu̍ o̍o̍ fu̍lā Māsāa̍ Dēēve̍ o̍ hɔ̄l te̍.

A̍bi̍sa̍lɔ̄m mi̍i̍ŋgu̍ o̍ Dēēve̍ lo̍ chi̍ɛ̍ī ni̍ŋ

²⁵ Ndu̍yɛ̍ pūa̍a̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ ki̍nɛ̍i̍, po̍ o̍ po̍ ve̍ lo̍ŋ mī ndu̍ o̍o̍ si̍i̍ma᷅ŋ na̍ŋɔ̄ɔ̍ a̍ A̍bi̍sa̍lɔ̄m te̍. Chɔ̍ŋ a̍ pēlo̍ŋ mbo̍ hēl a̍ bōlle̍ŋ ndi̍, sɔ̄ŋ o̍ sɔ̄ŋ ve̍ ndu̍ le̍.

²⁶ Ndu̍yɛ̍ yīīŋnde̍ pīla̍ ndu̍ o̍o̍ nɔ̍ ni̍. Kɛ̍ lē pīlɛ̍ kpe̍ ndu̍ o̍o̍ se̍ndī o̍ wɔ̄sīo̍o̍ ni᷄ŋ ni̍. Tē yīīŋnde̍ bāndu̍ ndu̍ pɛ̍ te̍i̍, mī ī wa̍ ndu̍ ni᷅ŋ lūsu̍llo̍ ō sēndi̍. Tē ndu̍ o̍o̍ se᷅ndi̍ pɛ̍, mā lāndu̍ yīīŋīī ndūɛ̍i̍ o̍ sēke̍lēi̍ māsā bɛ̍ndo̍o̍ le̍ sīnāa̍ mɛ̄ɛ̍ i̍ cho̍ lūsu̍lo̍ yɛ̍ pɛ̍, yīīŋīī ndūɛ̍i̍ mī ndi̍ i̍i̍ wa̍ lūsu̍lo̍ le̍ pa᷅ŋnda̍ŋ lā ŋūɛ̍ɛ̍nu̍.

²⁷ A̍bi̍sa̍lɔ̄m ndu̍ o̍o̍ nɔ̍ chūāūwa̍ ā hīɔ̍ɔ̍lu̍, pūa̍a̍ ā yāa̍ a̍ wānā la̍nɔ̍ɔ̍ ō pīlɛ̍, dīōla̍ŋ āā Ta̍māā. Ndu̍yɛ̍ nāŋɔ̄ɔ̍ pīla̍ ndu̍ bɛ̍ɛ̍ ndu̍ o̍o̍ na̍ŋ ni̍.

²⁸ Mi̍ A̍bi̍sa̍lɔ̄m chi̍ī wɔ̄sīla̍ŋ lā tīɔ̍ɔ̍ŋ Chūlu̍sɛ̄lɛ̄m ō fu̍lā Dēēve̍ fi̍nyā ndɔ̍ o̍ hɔ̄l te̍.

²⁹ Pāa̍le̍ pi᷅lɛ̍, mi̍ A̍bi̍sa̍lɔ̄m yɔ᷅ŋ le̍ Cho̍wa̍bī. Ndu̍ o̍o̍ ye̍e̍mā mī ndu̍ o̍o̍ ve᷅m ndu̍ nāa̍ Dēēve̍ fi̍nyā ndɔ̄ chu̍a̍. Kɛ̍ Cho̍wa̍bī hi̍ŋ te̍. Mi̍ A̍bi̍sa̍lɔ̄m vi̍ām vɛ̄lɛ̄ wāŋndo̍ le̍ mbō kɔ̍ ve̍e̍lū ndu̍. Kɛ̍ Cho̍wa̍bī hi̍ŋ vɛ̍lɛ̄ le̍.

³⁰ O̍ ko̍ŋ, mi̍ A̍bi̍sa̍lɔ̄m di̍mūl bu̍ɛ̍i̍yāā nūa̍a̍ āā, “Lā chē chīɛ̍i̍ ŋ̄ba̍a̍līi̍ cho̍ ke̍ŋ chi̍ɛ̍ī nīi̍ īkɛ̄i̍ ye̍, Cho̍wa̍bī chīɛ̄ī ndūɛ̍i̍ cho̍ ke̍ŋ ni̍. Lā kɔ̍ mī lā kɔ̍ ma᷅l ndi̍ o̍ yīŋ mī ī ŋūɛ̄ kpo̍u̍.” Mi̍ bu̍ɛ̍i̍yāa̍ A̍bi̍sa̍lɔ̄m nda̍ ā kūā ma̍ kɔ̍ ma᷅l ndi̍ o̍ yīŋ.

³¹ Mi̍ Cho̍wa̍bī cha̍ŋ mbo̍ kūā o̍ chīɛ̍i̍ A̍bi̍sa̍lɔ̄m ndo̍. Mbo̍ kɔ̍ nyu̍nā A̍bi̍sa̍lɔ̄m āā, “Vɛ᷅ mi̍ bu̍ɛ̍i̍yāā nūm nda̍ kɔ̍ ma᷅l chīɛ̄ī nīi̍ o̍ yīŋ?”

³² Mi̍ A̍bi̍sa̍lɔ̄m di̍mūl ndu̍ āā, “Ō cho̍ fu̍u̍le̍ nda̍ ma᷄l ndi̍ o̍ yīŋ te̍, le̍ vēēlū ya̍ I̍ ve̍e̍lu̍ nu̍m a̍ hi̍ŋ te̍ wo̍. Ya̍ i̍i̍ ye̍e̍ma̍ mī ya̍ i̍i̍ ve᷅m nu̍m nāa̍ Ma̍sā Bɛ̍ndōo̍ chūa̍ mī nūm o̍o̍ nyu̍na̍l ndu̍, vɛ᷅ mbo̍ chūā ya̍ Kɛ̍sīɔ̄ɔ̄, mbo̍ hūŋ a̍ ya̍ na̍nu᷄ŋ, i̍ ve̍ŋnu̍ŋ ni̍ko̍ lo̍ŋ te̍? Ndu̍ o̍o̍ bɛ̍ndā bɔ̍ɔ̍ mī ya̍ i̍i̍ wa̍ŋnu̍ŋ ndo̍ŋ. Le̍la̍ŋ to̍sa̍ a̍ sa̍bū mī che᷅ Māsāa̍. Tē I̍ tɛ̍ɛ̍mbu̍u̍ īsɔ̄ɔ̍ o̍ sɔ̄ɔ̍ pɛ̍, ō dīi̍ ya̍.”

³³ O̍ ko̍ŋ, mi̍ Cho̍wa̍bī cha̍ŋ mbo̍ kūā nāa̍ Māsā Bɛ̍ndōo̍ Dēēve̍ chūā. Nyɛ̄ o̍ nyɛ̄ A̍bi̍sa̍lɔ̄m so̍ō, mbo̍ kɔ̍ do̍o̍nu᷄ŋ Dēēve̍ ko̍na̍. Mi̍ Māsāa̍ Dēēve̍ yɔ̄ŋ le̍ A̍bi̍sa̍lɔ̄m, ma̍ kɔ̍ ve̍e̍lū ndu̍ mbo̍ hūŋ. Mɛ̄ɛ̍ o̍ fu̍u̍lu̍u̍ Dēēve̍ lāchi̍, mbo̍ tūndu᷄ŋ ndu̍ o̍ lābɛ̄ŋgu̍ ni̍ŋ le̍ ndu̍ bɛ̄ɛ̄le̍ŋ kīo̍o̍. Mi̍ Māsāa̍ Dēēve̍ cha̍ŋ mbo̍ kɔ̍ma᷄ŋ ndu̍.