Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 13 - Yāu̍ Mɛ̄lɛ̄ka̍a̍

Nyɛ̍ yɔ̍nu̍ŋ A̍mi̍nɔ̄ŋ tɛ̄ɛ̄ŋ nda̍ Ta̍māā wo̍

¹ Dēēve̍ pūa̍a̍ ndūa̍a̍ a̍ pīli̍a̍a̍ wa̍ A̍bi̍sa̍lɔ̄m nda̍ A̍mi̍nɔ̄ŋ ni̍. A̍bi̍sa̍lɔ̄m yēma̍ ndɔ̍ wa̍ Ta̍māā ni̍. Ndu̍yɛ̍ nāŋɔ̄ɔ̍ pīla̍ Ta̍māā ndu̍ o̍o̍ na̍ŋ ni̍. Mi̍ ī yɔ̄nu᷄ŋ mi̍ kāāla̍ Ta̍māā wo̍ ō lūɛ̄ī A̍mi̍nɔ̄ŋ ye̍ma̍ ndɔ̍ o̍ kɔ̄l mbo̍ yēēmā le̍ wāa̍ a̍ Ta̍māā.

² Kɛ̍ A̍mi̍nɔ̄ŋ ndu̍ o̍o̍ nɔ̍ mɛ̍ɛ̍ mɛ̍ɛ̍ ndu̍ o̍o̍ lo̍o̍kū to̍sā mī nda̍ a̍a̍ wa̍ nda̍ Ta̍māā le̍. Ta̍māā yɛ̍ yūfu̍a̍a̍nɔ̍ɔ̍ o̍ wa̍ ni̍. Mɛ̄ɛ̍ kāāla̍ Ta̍māā wo̍ ō pɛ̄ A̍mi̍nɔ̄ŋ o̍ kɔ̄l te̍i̍, mi̍ A̍mi̍nɔ̄ŋ de᷅l a̍ nāa̍.

³ A̍mi̍nɔ̄ŋ yɛ̍ ndu̍ o̍o̍ nɔ̍ chāa̍ŋ ndɔ̄ pi᷅lɛ̍ dīōla̍ŋ āā Chōna̍da̍bī. Chōna̍da̍bī ko̍ŋ fi̍nyā ndɔ̍ wa̍ Si̍a̍māā bɛ̄ndōo̍ Dēēve̍ ni̍. Ndu̍yɛ̍ tāāsi̍o̍o̍ pīla̍ pōo̍ ho̍ō ndu̍ o̍o̍ nɔ̍ ni̍.

⁴ Pāa̍le̍ pi᷅lɛ̍, mi̍ Chōna̍da̍bī nyu̍na̍ A̍mi̍nɔ̄ŋ āā, “Vɛ᷅ nu̍a̍ā lɔ̍ɔ̍ o̍ lɔ̍ɔ̍ hɔ̄lla̍ nu̍m ā yīyāā? Nūm chūā lēmāsāa̍, lēpāa̍ o̍ lēpāa̍ hɔ̄lla̍ ve᷅ nu̍m ā kɛ̄ndɛ̄ le̍, vɛ᷅?” Mi̍ A̍mi̍nɔ̄ŋ di̍mūl ndu̍ āā, “Chōna̍da̍bī, hɛ̄na᷄ŋndo̍ ya̍ I̍ hɛ̍na̍ŋ a̍ Ta̍māā te̍i̍ ni̍. Yēma̍ ni̍ fi̍nyā pīlɔ̍ɔ̍ o̍ cho̍ ni̍, kɛ̍ ō hɛ̄na̍ŋ ya̍ bɔ̄ɔ̍. Kɛ̍ I̍ nɔ̍ mɛ̄ɛ̍ o̍ mɛ̄ɛ̍ ya̍ I̍ to̍sā mī ŋ̄ wa̍ na̍a̍ ndu̍ le̍.”

⁵ Mi̍ Chōna̍da̍bī di̍mūl ndu̍ āā, “Mɛ̄ɛ̍ nyɛ̄ ŋ̄ tōsa̍ wo̍, de̍l a̍ nāā sīɛ̄lɛ̍i̍yo̍ mā hi̍nī. O̍ ko̍ŋ, tē fi̍nyā nūm tu̍e̍ī pɛ̍ mbō hīŋ nu̍m yīlɔ̄ɔ̄, a̍ di̍mu̍l ndu̍ āā, ‘Kɛ̄kɛ̍ me̍l la̍ Ta̍māā ye̍ma̍ nī mbō hu᷄ŋ to̍o̍sīāl la̍ nyɛ̄ dīa̍a̍ mi̍ de᷅. I̍ ye̍e̍ma̍ mbō hīŋ na̍nu᷄ŋ mbō hu᷄ŋ to̍o̍sīāā ya̍ ndu̍ o̍ hɔ̄l.’ ”

⁶ O̍ ko̍ŋ, mi̍ A̍mi̍nɔ̄ŋ de᷅l bɛ̍ɛ̍ a̍ nāā sīɛ̄lɛ̍i̍yo̍ mbo̍ hīnī kpu̍. Mi̍ Dēēve̍ fi̍nyā ndɔ̄ tu̍ɛ̍ī mbo̍ hūŋ ndu̍ yīlɔ̄ɔ̍. Mɛ̄ɛ̍ Dēēve̍ hi᷅ŋ ndu̍ yīlɔ̄ɔ̍, mi̍ A̍mi̍nɔ̄ŋ dīmūl ndu̍ āā, “Kɛ̄kɛ̍, yāndi̍i̍ me̍l la̍ Ta̍māā ye̍ma̍ nī mbō hu᷄ŋ to̍o̍sīāl la̍ nyɛ̄ dīa̍a̍. I̍ ye̍e̍ma̍ mbō hīŋ na̍nu᷄ŋ mbō hu᷄ŋ to̍o̍sīāā ya̍ nyɛ̄ dīāā kālāa̍ o̍ hɔ̄l.”

⁷ O̍ ko̍ŋ, mi̍ Dēēve̍ yɔ̄ŋ dīōmnde̍ŋ nāa̍ Ta̍māā chu̍a̍ nāa̍ o̍ wa̍ o̍ chīɛ̄ī lēmāsāa̍ ni᷄ŋ nda̍, mbo̍ dīmūl ndu̍ āā, “Kɔ̍ o̍ A̍mi̍nɔ̄ŋ ye̍mā nu̍m ndo̍ chi̍ɛ̍ī ni̍ŋ mā kɔ̍ to̍o̍sīāl ndu̍ nyɛ̄ dīa̍a̍.”

⁸ Mi̍ Ta̍māā cha̍ŋ mbo̍ kūā o̍ A̍mi̍nɔ̄ŋ ndo̍ chi̍ɛ̍ī ni̍ŋ, ō kōma̍l ndu̍ īhīni̍ kpu̍. Mi̍ Ta̍māā chu̍ā kōllo̍ nda̍ tōōsīāā bēe̍dīi̍yo̍ wo̍, mbo̍ līndā ndu̍ A̍mi̍nɔ̄ŋ o̍ hɔ̄l lo̍ŋ mbo̍ tōōsīāā bēe̍dīi̍yo̍ kpo̍u̍.

⁹ Mɛ̄ɛ̍ o̍ chi̍i̍ tōōsīāā mbo̍ chūā mbo̍ mūlī o̍ nyɔ̄ɔ̍ ni᷄ŋ mbo̍ kūā a̍ ndu̍ A̍mi̍nɔ̄ŋ lāchī. Kɛ̍ mi̍ A̍mi̍nɔ̄ŋ kɛ̍ɛ̄. Mbo̍ dīmūl Ta̍māā āā, “Wānā o̍ wāna̍ cho̍ na̍nu᷄ŋ so̍li̍ nda̍ o̍ bɛ̄ɛ̄ kpo̍u̍.” O̍ ko̍ŋ, mi̍ wāŋnda̍ fūlā kpo̍u̍.

¹⁰ Mɛ̄ɛ̍ nda̍ fūla̍ mi̍ A̍mi̍nɔ̄ŋ di̍mūl Ta̍māā āā, “Chu̍u̍ ya̍ ni̍ko̍ nyɛ᷅ dīāā, mā mi̍ɔ̍u̍ ya̍.” Mi̍ Ta̍māā chu̍ā bēe̍dīi̍yo̍ mbo̍ kūā a̍ ndu̍ A̍mi̍nɔ̄ŋ lāchī.

¹¹ Kɛ̍ mɛ̄ɛ̍ o̍ sɔ̍ɔ̍ŋgu̍u̍ A̍mi̍nɔ̄ŋ īkɛ̄i̍, mi̍ A̍mi̍nɔ̄ŋ sa̍ā ndu̍ mbo̍ dīmūl ndu̍ āā, “Ta̍māā hu̍ŋ ŋ̄ wa̍.”

¹² Mi̍ Ta̍māā di̍mūl ndu̍ āā, “Ɛ̄ ɛ̍ A̍mi̍nɔ̄ŋ, to̍sā ke̍ŋ a̍ ya̍ le̍. To̍sā sūɛ̍i̍ lāsi̍ɔ̍mbu̍i̍ bɛ̍ndūīī wāā le̍nde̍ a̍ ya̍ le̍. Sāwā bɛ̍ndōo̍ pīla̍ cho̍ ko̍ŋ o̍ lɛ̄ŋnde᷅ŋ nde᷅ŋ ni᷄ŋ ni̍.

¹³ Tē a̍ to̍sa̍ ke̍ŋ a̍ ya̍ pɛ̍, mɛ̄ɛ̍ a̍ tu̍si̍ ya̍ si̍ɔ̍mbu̍la̍ bɛ̄ndūla̍ŋ I̍sɔ̄lūɛ̍i̍ya̍ tɛ̄ɛ̄ŋ. Ndu̍yɛ̍ nūm bɛ̍ɛ̍ wānā fo̍ndō fu̍u̍ I̍sɔ̄lūɛ̍i̍ya̍ chā nu̍m ni̍. Le̍la̍ŋ yāndi̍i̍ A̍mi̍nɔ̄ŋ to̍sā ke̍ŋ a̍ ya̍ le̍. Tē a̍ ye̍e̍ma̍ a̍ ya̍ pɛ̍, mɛ̄ɛ̍ kɔ̍ so̍ō nāa̍ māsā bɛ̍ndōo̍ chūā. I̍ la̍a̍la̍ŋ māā tē ā sōō nāa̍ ndu̍ chu̍a̍ pɛ̍, ō ku̍u̍nā nu̍m le̍ ya̍ chūa̍a̍ o̍ nɔ̄ɔ̍ ni᷄ŋ te̍.”

¹⁴ Kɛ̍ A̍mi̍nɔ̄ŋ ye̍ŋ ndu̍ lānī le̍. Mbo̍ kpūwā ndu̍ mbo̍ wā a̍ ndu̍ a̍ ka̍ ka̍, fo̍ndōle̍ ndu̍ o̍o̍ hi̍o̍ū chūa̍a̍ kpāāyā.

¹⁵ Mɛ̄ɛ̍ o̍ chi̍i̍ wā ā ndu̍ kpo̍u̍, mi̍ yēēmɛ̍i̍ ndūɛ̍i̍ fūla᷄ŋ ndu̍ o̍ kɔ̄l. Mbo̍ tōl ndu̍ lēyɛ̄, ndu̍ o̍o̍ ye̍e̍ma̍ lɛ̄ bɛ̍ɛ̍ mī ndu̍ o̍o̍ che᷅ ndu̍ le̍. Mbo̍ dīmūl ndu̍ āā, “Chɔ̍ŋ mā fu̍la̍.”

¹⁶ Mi̍ Ta̍māā di̍mūl ndu̍ āā, “Sāko̍ yēma̍ nūu̍, to̍sā le̍nde̍ a̍ ya̍ le̍. Tōūwɔ̄ɔ̍ ya̍ le̍nde̍ bɛ̍ɛ̍ hi̍o̍u̍ lēwɔ̄ū a̍ nyɛ̄ ŋ̄ to̍sā ho̍ō a̍ ya̍ wo̍.” Kɛ̍ A̍mi̍nɔ̄ŋ yēŋ ndu̍ vɛ̄lɛ̄ lānī le̍.

¹⁷ Mbo̍ vēēlū bu̍ɛ̍i̍ wa̍ ndu̍ wa̍llo̍ o̍ bā chīɛ̄ī ni̍ŋ ndo̍, mbo̍ dīmūl ndu̍ āā, “So̍li̍ chu̍a̍a̍ ho̍ō o̍ bɛ̍ɛ̄ mā ki̍nda̍l la̍ dīo̍o̍, I̍ ye̍e̍ma̍ mī che᷅ ndu̍ le̍.”

¹⁸ Mi̍ lāŋu̍nɔ̄ bu̍ɛ̍īyo̍ kɔ̍ sa̍ā chūa̍a̍ mbo̍ sōlī ndu̍ o̍ bɛ̍ɛ̄, mbo̍ mīŋgī dīo̍o̍ kīndā. Ndu̍yɛ̍ dōmā vi̍lɛ̄īyo̍ wa̍ Ta̍māā lēkɔ̄ɔ̍ ni̍. O̍ ka̍ā māchu̍ūwo̍ ni᷄ŋ si̍ndɛ̄, chūāūwāā lēmāsāa̍, a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍ dōmāla̍ wa̍ā le̍nde̍ nda̍ a̍a̍ wo̍u̍nūŋ ni̍.

¹⁹ Mi̍ Ta̍māā ku̍a̍ndū pūlta̍ŋ mbo̍ dūāūnu᷄ŋ o̍ lēbōl, le̍ kɔ̄l ndɔ̄ ta̍mbɛ̍i̍yo̍ chɔ̄mndo̍ mbo̍ sāā dōmā ko̍ŋ, mbo̍ sɛ̄ɛ̄sīāā. Mbo̍ hāndu᷄ŋ ba᷅la̍ŋ o̍ lēbōl mbo̍ kūā a̍ cha᷄ŋndo̍ kpe̍le̍ŋ o̍ chīɛ̍i̍ A̍bi̍sa̍lɔ̄m ye᷅ma̍ ndɔ̄ wo̍.

²⁰ Mɛ̄ɛ̍ A̍bi̍sa̍lɔ̄m ye̍ma̍ ndɔ̄ che᷅ ndu̍ hūnɔ̄ɔ̍ a̍ cha᷄ŋndo̍, mbo̍ nyūnā ndu̍ āā, “Vɛ᷅ hūnɔ̄ɔ̍ ho̍ō a̍ cha᷄ŋndo̍, nyɛ̄ A̍mi̍nɔ̄ŋ o̍ yɔ̍ŋ nu̍m ni̍?” Mɛ̄ɛ̍ A̍bi̍sa̍lɔ̄m si̍na̍ māā kpūwāa̍ A̍mi̍nɔ̄ŋ o̍ kpu̍wa̍ ndu̍ ni̍, mi̍ A̍bi̍sa̍lɔ̄m nyɔ̍ɔ̍lū ndu̍ āā, “Me̍i̍ yēma̍ nūu̍. To̍sā mī wāŋnda̍ sīna̍ a̍ ndi̍ o̍kɔ̄ɔ̄ le̍, fo̍ndōle̍ yēmā nu̍m fi̍nyā pīlɔ̍ɔ̍ po̍ ko̍ŋ ō chō ni̍.” O̍ ko̍ŋ, mi̍ Ta̍māā wa᷅ ni̍ko̍ o̍ A̍bi̍sa̍lɔ̄m ye᷅ma̍ ndɔ̄ lo̍ chi̍ɛ̍ī ni̍ŋ ndu̍ pīlɛ̍ kpe̍e̍le̍ a̍ kɔ̄l tāmbɛ̍i̍yo̍.

²¹ Mɛ̄ɛ̍ Māsāa̍ Dēēve̍ fi̍nyā ndā tu̍e̍ī nyɛ̄ A̍mi̍nɔ̄ŋ to̍sa̍ a̍ Ta̍māā wo̍, mbo̍ dūāūnu᷄ŋ tu̍mbe̍ o̍ ka̍lā ka̍lā.

²² Mi̍ A̍bi̍sa̍lɔ̄m ta̍mbū kɔ̄l a̍ A̍mi̍nɔ̄ŋ ta̍u̍ le̍ nyɛ̄ o̍ to̍sa̍ o̍ a̍ yēma̍ ndɔ̄ wo̍. Mi̍ nɛ̄īyɔ᷄ŋ ndɔ̄ɔ̍ pīā ndu̍ o̍ kɔ̄l cha̍. Kɛ̍ mbo̍ mēēnu᷄ŋ ndu̍ kpi᷅li̍, ō sūu̍ nyɛ᷅ o̍ nyɛ̄ nāa̍ ndu̍ chu̍a̍ le̍.

A̍bi̍sa̍lɔ̄m mi̍ŋgu̍l A̍mi̍nɔ̄ŋ māa̍

²³ Mɛ̄ɛ̍ wɔ̄sīla̍ŋ lā hīōū lā tīɔ̍ɔ̍ŋ, mi̍ A̍bi̍sa̍lɔ̄m bɛ̍ɛ̍ndīa̍ŋ le̍ sāa̍ ndūa̍a̍ yīīŋnde̍ kīlīo̍o̍, Bāāl Ha̍sɔ̄ɔ̄ chi̍e̍e̍, le̍ kɔ̄la̍ŋ E̍fi̍lūēm i̍kɛ̍i̍. O̍ ko̍ŋ, mbo̍ yōōŋgū pūa̍a̍ Dēēvi̍a̍a̍ kpo̍u̍ le̍ mā kūɛ̄.

²⁴ O̍ ko̍ŋ kɔ̍ɔ̍lī, mbo̍ kūā nāa̍ Māsāa̍ Dēēve̍ chūā mbo̍ kɔ̍ di̍mūl ndu̍ āā, “Kɛ̄kɛ̍, I̍ cho̍ sāa̍ nīa̍a̍ yīīŋnde̍ kīlīo̍o̍, le̍la̍ŋ nūm ni̍, a̍ pūa̍a̍ nu̍mnda̍ kpo̍u̍ I̍ ye̍e̍ma̍ nya̍ mī lā kūɛ̄.”

²⁵ Kɛ̍ mi̍ Dēēve̍ di̍mūl ndu̍ āā, “Sāko̍ po̍ nūu̍, ō vɛ̍ le̍tu̍u̍ mī na̍a̍ kpo̍u̍ ŋ̍ ku̍ɛ̄ le̍. Tē ŋ̄ kūɛ̄ pɛ̍ kpo̍u̍, ō ve᷅ wo̍lɔ̄ɔ̄lā bɛ̍ɛ̍ŋ te̍ la̍ wa᷅ nu̍m chōo̍ le̍.” Mi̍ A̍bi̍sa̍lɔ̄m nyɔ̍ɔ̍lū fi̍nyā ndɔ̄, le̍ mbō kūɛ̄, kɛ̍ Dēēve̍ chɛ̍l te̍. Mi̍ Dēēve̍ lō o̍ ko̍ŋ, mbo̍ dūāū sa̍lāa̍, mbo̍ dīmūl ndu̍ āā, “Kɔ̍ po̍ nūu̍.”

²⁶ Mi̍ A̍bi̍sa̍lɔ̄m di̍mūl ndu̍ āā, “Mɛ̄ɛ̍ me̍l la̍ A̍mi̍nɔ̄ŋ pɔ̍mbɔ̄ nī mī ndu̍ ku̍ɛ̄.” Mi̍ Dēēve̍ nyu̍nā ndu̍ āā, “Le̍ yɛ̄ɛ̍nɛ̍ ŋ̄ yēēma̍ yɛ̄ A̍mi̍nɔ̄ŋ mbō kūɛ̄?”

²⁷ Kɛ̍ mi̍ A̍bi̍sa̍lɔ̄m ki̍ndīlā Dēēve̍ dīmūllo̍ māā ō ma᷄l A̍mi̍nɔ̄ŋ mbō kūɛ̄. O̍ ko̍ŋ, mi̍ Dēēve̍ chɛ̄l mi̍ A̍mi̍nɔ̄ŋ nda̍ pūa̍a̍ Dēēve̍ wa̍ ā pīli̍a̍a̍ ā kūā. Mi̍ te̍le̍ŋndo̍ fūūlūū ma̍ chāl dīo̍la̍ŋ.

²⁸ Mɛ̄ɛ̍ nda̍ cha᷄l, mi̍ A̍bi̍sa̍lɔ̄m di̍mūl bu̍ɛ̍i̍yāā ndūa̍a̍ āā, “Lā wa̍ A̍mi̍nɔ̄ŋ hɔ̄lte̍ŋ kɔ̄ɔ̄lī nyɛ̄ kɛ̄ndɛ̍ī. Tē ō hīu̍ ndɔ̍ɔ̍ mūɛ̄īya̍ŋ kōlɔ̄ɔ̄ pɛ̍ mī mā bīī ndu̍, I̍ di̍mu̍l nya̍ lā dīī ndu̍. Sīōōŋīī bi̍ī nya̍ le̍, ya̍ ve᷅m nya̍ ni̍. Lā wo᷅ le̍, lā sīmu̍l kɔ᷅llo̍ yi̍.”

²⁹ O̍ ko̍ŋ, mi̍ A̍bi̍sa̍lɔ̄m di̍mūl bu̍ɛ̍i̍yāā ndūa̍a̍ ma̍ dīī A̍mi̍nɔ̄ŋ. Mɛ̄ɛ̍ pūa̍a̍ Dēēvi̍a̍a̍ ā pīli̍a̍a̍ ā chē nyɛ̍ yɔ̍nu̍ŋ ndo̍, ma̍ hēl o̍ chɔ̄lūāā ndāā yɛ̍yi̍i̍ mu̍ūli̍āŋnda̍ chōo̍ a̍ kīlta̍ŋ ma̍ nyāānu᷄ŋ.

³⁰ Nda̍ lo̍ nɛ̄ī tɛ̍ɛ̄ŋ mi̍ wāŋndo̍ mālnu᷄ŋ mbo̍ kɔ̍ di̍mūl Dēēve̍ fi̍nyā nda̍ āā, “A̍bi̍sa̍lɔ̄m po̍ nu̍m chīi̍ pūa̍a̍ nu̍m nda̍ dīū kpo̍u̍.”

³¹ Mɛ̄ɛ̍ Dēēve̍ tūēī a̍ ndi̍ o̍kɔ̄ɔ̄, mbo̍ sɛ̄ɛ̄sīa̍ŋ nyɛ̄la̍ŋ lēkɔ̄ɔ̍ mbo̍ dēl lɛ̄ŋ a̍ cha᷄ŋndo̍. Bu̍ɛ̍i̍yāā ndūa̍a̍ wa̍ ndu̍ īkɛ̄i̍ ya̍ kpo̍u̍, ma̍ sɛ̄ɛ̄sīa̍ŋ nyɛ̄la̍ŋ lēkɔ̄ɔ̍, ma̍ dēl a̍ cha᷄ŋndo̍.

³² Kɛ̍ Chōna̍da̍bī, Dēēve̍ bɛ̍ ndɔ̄, ndu̍ yɔ̍nūŋ māā Si̍a̍māā ni̍, po̍ ndɔ̄ɔ̍, mbo̍ dīmūl Dēēve̍ āā, “Fāllo̍, wānā o̍ wāna̍ di̍mu̍l nu̍m pɛ̍ māā pūa̍a̍ nu̍m nda̍ kpo̍u̍ nda̍ dīu̍ ni̍, ō cho̍ to᷅nya̍ le̍. A̍mi̍nɔ̄ŋ ndu̍ pīlɛ̍ kpe̍ A̍bi̍sa̍lɔ̄m o̍ di̍ī ni̍. Tē ā lōōnūŋ pɛ̍ bo̍o̍ndi̍i̍ A̍mi̍nɔ̄ŋ o̍ kpu̍wa̍ Ta̍māā, ye̍ma̍ ndɔ̍ ve̍, bōōndi̍i̍ ke̍ŋ A̍bi̍sa̍lɔ̄m o̍ kɛ̍ɛ̍si̍a̍a̍ kɛ̄ɛ̄sīa̍a̍ ho̍ō le̍ A̍mi̍nɔ̄ŋ dīyɔ̄ɔ̍ ni̍.

³³ Kɛ̍ tē wānā o̍ wānā di̍mūl nu̍m pɛ̄ māā pūa̍a̍ nu̍m nda̍ kpo̍u̍ nda̍ dīu̍ ni̍, la̍a̍la᷄ŋ te̍. A̍mi̍nɔ̄ŋ ndu̍ pīlɛ̍ kpe̍ nda̍ dīī ni̍.”

³⁴ Ko̍ŋ ni᷅ŋ kpo̍u̍, A̍bi̍sa̍lɔ̄m ndu̍ o̍o̍ nya̍a̍nu̍ŋ ni᷅ŋ. Mɛ̄ɛ̍ Chōna̍da̍bī chi̍i̍ sūūki̍āŋ kōŋ nda̍ Dēēve̍, ō bēndu̍ bɛ̍ɛ̍ ti᷅ŋ te̍, mi̍ wāna̍ wa̍ mɛ̍ŋgɛ̄lāa̍ o̍ sāāsa̍ chi̍o̍o̍ chōo̍ wo̍ ō chā wāŋnda̍ ku̍ndā bɛ̄ndōo̍, ā wa̍ chɔ̄nɔ᷄ŋndo̍ nɛ̄i̍ Ho̍lɔ̍nīm ndo̍ ma̍ wā pēmbēi̍ tōlɔ̄ɔ̍. Mi̍ wānā mɛ̍ŋgɛ̄lāa̍ kɔ̍ di̍mūl Dēēve̍ māā wāŋnda̍ chō hūnɔ̄ɔ̍ ku̍ndā bɛ̄ndōo̍.

³⁵ Mi̍ Chōna̍da̍bī di̍mūl Dēēve̍ āā, “Fāllo̍, I̍ di̍mu̍l nu̍m kpɔ̍, pūa̍a̍ nu̍m nda̍ cho̍ ka̍ŋ hu̍nɔ̄ɔ̍, ni̍.”

³⁶ Tē ō mēī so̍ndō nu̍a̍ā mi̍ pūa̍a̍ Dēēvi̍a̍a̍ fūlā lēbōl. Ā wa̍ hūnɔ̄ɔ̍ a̍ cha᷄ŋndo̍ chōo̍ cho̍o̍ kpe̍le̍ŋ. O̍ ko̍ŋ kɔ̍ɔ̍lī, Māsāa̍ Dēēve̍ bɛ̍ɛ̍ nda̍ pūa̍a̍ ndūa̍a̍ ma̍ chāŋ cha᷄ŋndo̍ pīla̍.

^37-38 Mi̍ A̍bi̍sa̍lɔ̄m nya̍a̍nu᷄ŋ Kɛ̍sīɔ̄ɔ̄, mbo̍ kɔ̍ cha᷅l Māsāa̍ Ta̍li̍māī, o̍ bɛ̄ŋgu̍ chōo̍, po̍ Āmi̍hu̍dī wo̍. Mbo̍ kūā te̍le̍ŋ vi̍lɛ̄ī Dēēve̍ cho̍ cha᷄ŋndo̍ le̍ po̍ ndɔ̄ɔ̍. Kɛ̍ ma̍ nyɔ̄ɔ̄lū ndu̍ mbo̍ mēī.

³⁹ Mɛ̄ɛ̍ te̍le̍ŋ ti̍ŋ hīo̍u̍, mi̍ yēēmɛ̍i̍ bīī ndu̍ le̍ A̍bi̍sa̍lɔ̄m po̍ ndɔ̄.