Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 12 - Yāu̍ Mɛ̄lɛ̄ka̍a̍

Mɛ̄lɛ̄ka̍ vēm Ne̍ta̍ŋ, wāna̍ su̍a̍ā le̍ Mɛ̄lɛ̄ka̍ wo̍ nāa̍ Dēēve̍ chūā a̍ yōōŋgōo̍

¹ Ō wa̍ a̍ pāa̍le̍ pi᷅lɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ Ne̍ta̍ŋ wāna̍ su̍a̍ā le̍ Mɛ̄lɛ̄ka̍ wo̍ yōōŋgōo̍ le̍ Dēēve̍. Mi̍ Ne̍ta̍ŋ ma̍lnu᷄ŋ mbo̍ kūā nāa̍ Dēēve̍ chūā. Mbo̍ dīmūl ndu̍ āā, “Pūa̍a̍ pu̍m wa̍ nda̍ ŋi̍ɔ̍ɔ̍ŋ o̍ chi̍e̍e̍ pi᷅lɔ̍ɔ̍ ni᷄ŋ. Ō pīlɔ̍ɔ̍ wānā su̍lāa̍, ō pīlɔ̍ɔ̍ wānā ta̍mbɛ̍i̍yo̍.

² Po̍ su̍lāa̍ ho̍ō ndu̍ o̍o̍ nɔ̍ nāūwa̍ a̍ sāa̍ ta̍u̍ ta̍u̍.

³ Po̍ ta̍mbɛ̍i̍yo̍ ho̍ō yɛ̍ ndu̍ ndu̍ o̍o̍ nɔ̍ nyɛ᷅ o̍ nyɛ̄ le̍, mɛ̄ɛ̍ sāā fɔ̍ŋndɔ̍ɔ̍ ndu̍ pīlɛ̍ kpe̍. Sāa̍ ho̍ō yɛ̍ pīōndɔ̄ɔ̍ ndu̍ o̍o̍ pe̍ndū ndu̍ ni̍. Mbo̍ lō ndu̍ māndāa̍ chīɛ̄ī ni̍ŋ ha̍a̍a̍, mi̍ sāa̍ ho̍ō hīndū nda̍ chūāūwāā pōo̍ ho̍ō lātūlu̍. Nyɛ̄ dīāā pōo̍ ho̍ō ndu̍ o̍o̍ di̍ā wo̍, ndu̍ ko̍ni̍ sāa̍ ho̍ō ndu̍ o̍o̍ di̍ā ni̍. Tāāla̍ ndu̍ o̍o̍ ko᷅l lo̍, lēni᷄ŋ ko̍ni̍ sāa̍ ho̍ō ndu̍ o̍o̍ ko᷅l ni̍. Sāa̍ ho̍ō hōlī hōli᷄ŋndo̍ pōo̍ ho̍ō māā chūā ndɔ̄. Sāa̍ ho̍ō wa̍ ni᷅ŋ pōo̍ ho̍ō o̍ bā māā chūā ndɔ̄ lāāndū.

⁴ Mi̍ ī yɔ̄nu᷄ŋ pa̍a̍le̍ pi᷅lɛ̍ mi̍ mīāllo̍ hūŋ lāŋu̍nɔ̄ su̍lāa̍ o̍ bɛ̄ŋgu̍ chōo̍, mbo̍ yēēmā le̍ mīāllo̍ ho̍ō nyɛ̄ dīa̍a̍ bɛ̄ɛ̄ndīāllo̍. Kɛ̍ ndu̍ o̍o̍ ye̍e̍ma̍ mī ndu̍ o̍o̍ di̍ī chɔ̄lūāā ndūa̍a̍ ō pīlɛ̍ bɛ̍ɛ̍ le̍. Mbo̍ cha᷄ŋ mbo̍ kɔ̍ bi̍ī sāa̍ po̍ ta̍mbɛ̍i̍yo̍ ho̍ō mbo̍ kɔ̍ di̍ī le̍ mīāl ndɔ̄ɔ̍.”

⁵ Ne̍ta̍ŋ chīīyo̍ Dēēve̍ sūɛ̍i̍ he̍ī chɔ̄mndo̍, mi̍ Dēēve̍ du̍a̍u̍nu᷄ŋ tu̍mbe̍ o̍ ka̍lā ka̍lā. Mbo̍ dīmūl Ne̍ta̍ŋ āā, “I̍ me̍na̍ŋ o̍ Mɛ̄lɛ̄ka̍ Ya̍a̍wɛ̄ɛ̄ po̍, wāna̍ to̍sa̍ sūɛ̍i̍ kɔ̄l vēsɛ̍i̍ wa̍ā le̍nde̍ pɛ̍, ō nɔ̄ mbō sɔ̄la̍ pīɔ̍mndo̍.

⁶ Wānā wa̍ā le̍nde̍ ō nɔ̄ mbō mīŋgi̍ sāa̍ ā hīɔ̍ɔ̍lu̍ sɔ̍ŋgɔ̍ sāa̍ o̍ di̍ī ko̍ŋ ndo̍, kāni̍ fo̍ndōle̍, ō cho̍ wa᷅na̍ īnyīɛ̍ɛ̍ le̍.”

⁷ Mi̍ Ne̍ta̍ŋ di̍mūl ndu̍ āā, “Nūm kpe̍e̍kpe̍i̍ cho̍ wānā ko̍ŋ ni̍. Ndu̍yɛ̍ le̍ nyɛ̄ ŋ̄ tōsa̍ ko̍ŋ ndo̍, ya̍ŋ ni᷅la̍ŋ mā tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ Mɛ̄lɛ̄ka̍ I̍sɔ̄lūɛ̍i̍ya̍ ō dīmi̍ wo̍. Ō dīmi̍ āā, ‘Dēēve̍, ya̍ hɛ̍li̍ nu̍m ni̍ mi̍ si̍i̍ŋgūū nu̍m māsāa̍ le̍ I̍sɔ̄lūɛ̄ī, ndu̍yɛ̍ mi̍ ma̍ndā nu̍m Sɔ̍ɔ̄ nɔ̍la̍ mbō yɔ̍ŋ nu̍m nyɛ̄ le̍.

⁸ Ndu̍yɛ̍ lāāndāā ndūa̍a̍ ni̍, a̍ chīɛ̄ī ndɔ̄ɔ̍ kpo̍u̍, mi̍ chu̍ā mi̍ ma᷅l nu̍m o̍ bā le̍ mā to̍sa̍ nyɛ̄ ŋ̄ hɛ̄na̍ŋ a̍ nda̍ wo̍. Mi̍ ke᷅ nu̍m I̍sɔ̄lūɛ̄ī a̍ Chu̍dā kpo̍u̍. Tē nyɛ̄ ya̍ I̍ to̍sa̍l nu̍m ndo̍ ndu̍ o̍o̍ ve̍ le̍tu̍u̍ a̍ nūm te̍, nūm o̍o̍ nyu̍na̍ ya̍, I̍ wa̍ nu̍m ō chēle̍ŋ chɔ̄ɔ̄lū tōsāl mī ndu̍ o̍o̍ hi̍o̍ū bɛ̍ɛ̍ o̍ ta̍so̍o̍.

⁹ Vɛ᷅ ma̍ sōlī ya̍ Mɛ̄lɛ̄ka̍ Ya̍a̍wɛ̄ɛ̍ dīōm, ma̍ tōsā sūɛ̍i̍ wɔ̍ɔ̍ŋīī wāā nu̍a̍ā? Ma̍ lō o̍ ko̍ŋ ma̍ nūūwā nɛ̄īla̍ŋ le̍ Yūla̍ya̍ dīyɔ̄ɔ̍. Ma̍ tōsā mi̍ A̍mɔ᷅na̍i̍tīi̍ya̍ dīī ndu̍ o̍ chɔ̄ūwo̍, ma̍ mūli᷄ŋ ma̍ chūā la̍a̍ ndɔ̄ mi̍ lā chāl nya̍ ndu̍.

¹⁰ Le̍ dīōm ŋ̄ sōli̍ ya̍ ko̍ŋ, ma̍ dīī Yūla̍yā, ndu̍yɛ̍ ma̍ mūli᷄ŋ ma̍ chūā la̍a̍ ndɔ̍ o̍ nɔ̄ɔ̍ ni᷄ŋ ndo̍, chɔ̍ŋ a̍ bōōnde̍i̍ he̍ī mbō kūɛ̄ a̍ lāchī kɛ᷅, pīɔ̍m īmɔ̄ɔ̄ chu̍ū lɛ̍ o̍ nūm ndo̍ chi̍ɛ̍ī ni̍ŋ te̍.’

¹¹ Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, ‘Nūm, Dēēve̍ mɛ̄ɛ̍ mī to̍sa̍ mī chūāūwāā nūm nda̍ ō pīlɛ̍ hu᷄ŋ si̍mūl nu̍m mbō tūsi̍ nu̍m nyɛ̄ pālāa̍ chōo̍. Ndu̍yɛ̍, I̍ cho̍ hūnɔ̄ɔ̄ lāāndāā nūmnda̍ chūā nu̍m o̍ hɔ̄l kpe̍nde̍ke̍le̍ mī ke̍ chāa̍ŋ nu̍m nya̍ chīɛ̄ɛ̄li̍āŋ ndo̍, mbō wa̍ a̍ nda̍ i̍pa̍la̍ de̍ŋ.

¹² Nūm nūm nyɛ̄ ŋ̄ tōsa̍ wo̍ sɔ̍ɔ̍ sɔ̍ɔ̍ ŋ̄ tōsa̍ ndu̍ ni̍, kɛ̍ ya̍ ya̍ īpāla̍ de̍ŋ ya̍ I̍ cho̍ he̍ī tōsā ni̍, mī I̍sɔ̄lūɛ̍i̍ya̍ kpo̍u̍ a̍ che᷅.’ ”

¹³ Mi̍ Dēēve̍ lō o̍ ko̍ŋ mbo̍ dīmūl Ne̍ta̍ŋ āā, “I̍ tɛ̍ɛ̍mbu̍u̍ a̍ Mɛ̄lɛ̄ka̍ Ya̍a̍wɛ̄ɛ̄.” Mi̍ Ne̍ta̍ŋ di̍mūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ ma̍l nu̍m le̍ yɔ̄ŋ nūm wɔ̍ɔ̍ŋndo̍, a̍ cho̍ pi̍ɔ̍m sɔ̍lā le̍ he̍ī le̍.

¹⁴ Kɛ̍ ndu̍yɛ̍ le̍ nyɛ̄ ŋ̄ tōsa̍ ho̍ō, ma̍ tōsā ya̍a̍mɔ̍ɔ̍wa̍a̍ Mɛ̄lɛ̄ka̍ Ya̍a̍wɛ̄ɛ̄ wa̍ ā nɔ̍ lɛ̍ lēbɛ̄ɛ̄ le̍ Mɛ̄lɛ̄ka̍ le̍ wo̍, chɛ̄lɛ̄kpɛ̍ Bāsi̍ɛ̍bā vi̍lu̍l nu̍mndo̍ ō cho̍ lō yōōmū le̍.”

¹⁵ Mɛ̄ɛ̍ Ne̍ta̍ŋ chi̍i̍ ndu̍ yōōŋgū kōŋ dīmūl kpo̍u̍, mi̍ Ne̍ta̍ŋ cha̍ŋ mbo̍ mīīŋgū o̍ chīɛ̄ī ndɔ̄ɔ̍. Mɛ̄ɛ̍ te̍le̍ŋ ti̍ŋ hīo̍u̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sa̍ mi̍ chɛ̄lɛ̄kpɛ̍ Bāsi̍ɛ̍bā, la̍nɔ̍ Yūla̍yā o̍ mɛ̍i̍yo̍ o̍ vi̍lu̍l Dēēve̍ wo̍ ō dēl a̍ nāa̍.

A̍ pīɔ̍m po̍ Dēēvi̍o̍o̍ o̍kɔ̄ɔ̄

¹⁶ O̍ ko̍ŋ, mi̍ Dēēve̍ bi̍ī su᷅mndo̍ mbo̍ pīɛ̄ī Mɛ̄lɛ̄ka̍ le̍ mī Mɛ̄lɛ̄ka̍ sīŋgi̍ chɛ̄lɛ̄kpɔ̍ɔ̍ ho̍ō. Dēēve̍ ndu̍ o̍o̍ di᷅ nyɛ̍ dīāā le̍, ndu̍ o̍o̍ kɔ̍l te̍, ndu̍ o̍o̍ lɔ᷅l o̍ kpēlē le̍. Tē nyūmnda̍ŋ mā tōl pɛ̍ ō lūɛ̄ī chīɛ̄ī ni̍ŋ a̍ kɔ̄l tāmbɛ̍i̍ bɛ̍ndōo̍ ō kɔ̍ hi̍nī lɛ̄ŋ.

¹⁷ Mī wāŋ bɛ̄ndūa̍a̍ I̍sɔ̄lūɛ̄ī a̍ ku̍ā nāa̍ ndu̍ chu̍a̍ ma̍ nyɔ̄ɔ̄lu̍ ndu̍ le̍ mbō chɛ᷄ŋ lɛ̄ŋ mbō dē nyɛ̄ dīa̍a̍, kɛ̍ mbō kɛ̄ɛ̍.

¹⁸ Mɛ̄ɛ̍ pālɛ̍i̍ hīōū ī ŋɔ᷄mmɛ̍ū mi̍ chɛ̄lɛ̄kpɔ̍ɔ̍ ho̍ō ō wū. Kɛ̍ mi̍ bu̍ɛ̍i̍yāa̍ Dēēvi̍a̍a̍ ā wō le̍ Dēēve̍ dīmūllo̍, ma̍ wā ndu̍ vīŋndo̍. Ma̍ dīmī āā, “Chɛ̄lɛ̄kpɔ̍ɔ̍ wa̍ a̍ nāa̍, ŋ̍ so̍o̍ bɛ̍ɛ̍ nāa̍ ndu̍ chu̍a̍ ō ye᷅ŋ na̍a̍ lānī le̍, tē ŋ̄ dīmu̍l ndu̍ ni᷅ŋ pɛ̍ māā ō vī ō kɛ̄ɛ̍ ndu̍ pi̍la̍ nyɛ̄ yɔ᷄ŋ?”

¹⁹ Mɛ̄ɛ̍ Dēēve̍ chē nda̍ hīŋnɔ᷄ŋ ko̍ŋ, mbo̍ sīnā māā chɛ̄lɛ̄kpɔ̍ɔ̍ ho̍ō vī. Mbo̍ nyūnā nda̍ āā vɛ̄ɛ̄, “Wūo̍o̍ chɛ̄lɛ̄kpɔ̍ɔ̍ vī ni̍?” Ma̍ dīmūl ndu̍ āā, “E̍ī fāllo̍, ō vī.”

²⁰ O̍ ko̍ŋ, mi̍ Dēēve̍ cha̍ŋ mbo̍ kɔ̍ pu̍lu᷄ŋ fo̍, mbo̍ sāāndīāā yīīŋnde̍ nyɛ̄ kɛ̄ndɛ̍ī mbo̍ su̍u̍ŋ chūɛ̄īya̍ŋ, mbo̍ sōlī nyɛ̄la̍ wa̍ ndu̍ lēkɔ̄ɔ̍ la̍ŋ mbo̍ chūā lā chēle̍ŋ. O̍ ko̍ŋ kɔ̍ɔ̍lī, mbo̍ cha᷄ŋ mbo̍ kūā o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ mbo̍ kɔ̍ pi̍ɛ̍ī Mɛ̄lɛ̄ka̍. Mɛ̄ɛ̍ o̍ kɔ̍ chi̍ī pīɛ̄īle̍ŋ, mbo̍ mīīŋgū chīɛ̄ī ni̍ŋ, mbo̍ dīmūl bu̍ɛ̍i̍yāā ndūa̍a̍ māā ā chūu̍ ndu̍ nyɛ̄ dīa̍a̍. Ma̍ chūū ndu̍ nyɛ̄ dīa̍a̍ mbo̍ dīā.

²¹ Mɛ̄ɛ̍ o̍ chi̍i̍ nyɛ̄ dīa̍a̍ dīo̍, mi̍ bu̍ɛ̍i̍yāā ndūa̍a̍ dīmūl ndu̍ āā, “Fāllo̍, ō yɛ̄ɛ̍nɛ̍ ŋ̄ tōsa̍ yɛ̄ ho̍ō? Bōōndi̍i̍ chɛ̄lɛ̄kpɔ̍ɔ̍ wa̍ a̍ nāa̍ ve̍, ma̍ bīī su᷅mndo̍, ndu̍yɛ̍ ma̍ chāŋ cha᷄ŋndo̍ pīla̍ le̍ ndu̍. Kɛ̍ mɛ̄ɛ̍ o̍ vi᷅ ni᷅ŋ ma̍ cha᷄ŋ ma̍ dīā nyɛ̄ dīa̍a̍.”

²² Mi̍ Dēēve̍ di̍mūl nda̍ āā, “Le̍nde̍ kpe̍e̍kpe̍i̍ ya̍ I̍ to̍sa̍ ni̍. Bōōndi̍i̍ chɛ̄lɛ̄kpɔ̍ɔ̍ ō wa̍ wɔ̄ yōōmū ve̍, mi̍ bi̍ī su᷅mndo̍, ndu̍yɛ̍ mi̍ cha᷅ŋ cha᷄ŋndo̍ pīla̍ nāa̍ Mɛ̄lɛ̄ka̍ chūā le̍ ndu̍. Yīya᷄ŋ nūu̍ wa̍ ni̍, māā kɛ̄lɛ̄ŋgāā Mɛ̄lɛ̄ka̍ Ya̍a̍wɛ̄ɛ̄ o̍ wa̍ ya̍ īnyīɛ̍ɛ̍ tūīīnɔ᷄ŋ mī ndu̍ o̍o̍ chi̍i̍ndi̍a̍a̍ chɛ̄lɛ̄kpɔ̍ɔ̍ ho̍ō.

²³ Kɛ̍ ō chīī ni᷅ŋ wu̍, le̍ yɛ̄ɛ̍nɛ̍ ya̍ I̍ bi̍ī yɛ̍ vɛ̄lɛ̄ su᷅mndo̍? Bāā tē I̍ bi̍ī su᷅mndo̍ pɛ̍, I̍ nɔ̍la̍ ndu̍ mīŋgī yōōmu̍? I̍ nɔ̍lā lɛ̄ mī mi̍ŋgi̍ ndu̍ na̍nu᷄ŋ te̍. Mɛ̄ɛ̍ ni᷅ŋ le̍ fɛ̍ɛ̍ŋ mī ŋ̄ kɔ̍ chi̍īki̍āŋ na̍a̍ ndu̍ chi̍e̍e̍ pīɔ̍m, kɛ̍ ndu̍ mi̍i̍ŋgu̍ lɛ̍ na̍nu᷄ŋ te̍.”

A̍ vīōlɔ᷄ŋ Sɔ̍lɔ̍mɔ̄ŋ ndo̍ o̍kɔ̄ɔ̄

²⁴ O̍ ko̍ŋ kɔ̍ɔ̍lī, mi̍ Dēēve̍ nyɔ̍ɔ̍lū Bāsi̍ɛ̍bā kɔ̄llo̍, le̍ mbō pūɛ̄ɛ̄nu̍ŋ nyɛ᷅ yɔ̍nu̍ŋ ndu̍ wo̍. Mɛ̄ɛ̍ te̍le̍ŋ ti̍ŋ hīo̍u̍, mi̍ Bāsi̍ɛ̍bā chu̍ā vɛ̄lɛ̄ yo᷄llo̍ mbo̍ vīālū vɛ̄lɛ̄ pōo̍. Ma̍ kē ndu̍ dīōla̍ŋ āā Sɔ̍lɔ̍mɔ̄ŋ.

²⁵ Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍lā pōo̍mbɔ̄ɔ̍ ho̍ō ta̍u̍. Mi̍ Mɛ̄lɛ̄ka̍ dīmūl wāna̍ su̍a̍ā le̍ ndu̍ wo̍ Ne̍ta̍ŋ māā ō ke᷄ pōo̍mbɔ̄ɔ̍ ho̍ō dīōla̍ŋ āā Chɛ̄dīda̍yā fo̍ndōle̍, Mɛ̄lɛ̄ka̍ ndu̍ o̍o̍ ka̍a̍la̍ ndu̍ ta̍u̍.

Dēēve̍ bīī Lu̍a̍bā

²⁶ Mi̍ Cho̍wa̍bī hi̍a̍ū lāchī a̍ sɔ̍ŋgɔ̄ɔ̍ a̍ wāŋnda̍ Lu̍a̍bā, chi̍e̍e̍ le̍bo᷅llo̍ le̍ lɛ̄ŋndē A̍mɔ᷅nde̍ŋ. Mbo̍ kūā ni᷅ŋ fi̍ɔ̍ɔ̍ fi̍ɔ̍ɔ̍ le̍ ndu̍ bīyɔ̄ɔ̍.

²⁷ Mɛ̄ɛ̍ o̍ che᷅ ni᷅ŋ māā ō chō le̍ ndu̍ bīyɔ̄ɔ̍, mbo̍ yɔ̄ŋ ki̍i̍la̍a̍ nāa̍ Dēēve̍ chu̍a̍, mbo̍ dīmūl Dēēve̍ āā, “I̍ chīŋa̍la᷅ŋ Lu̍a̍bā chi̍e̍e̍ mi̍ wa᷅ ni̍ŋ fi̍ɔ̍ɔ̍ fi̍ɔ̍ɔ̍ le̍ ndu̍ bīyɔ̄ɔ̍. I̍ chi̍i̍ ni᷅ŋ pēē nda̍ ko̍lāa̍ bīyɔ̄ɔ̍.

²⁸ Le̍la̍ŋ chu̍u̍ŋgi̍a̍a̍ so̍vɛ̄i̍ya̍a̍ tūa̍a̍ cho̍ lo̍ŋ nda̍ kpo̍u̍ nāa̍ pi᷅lɛ̍ mī nūm pi̍la̍ hu̍ŋ si̍o̍ū ndu̍ bīyɔ̄ɔ̄, fo̍ndōle̍, I̍ ye̍e̍ma̍ mī bi̍ī ndu̍, mī wāŋnda̍ mɛ̄i̍ nu̍m sāŋgālā mā sāŋga̍la̍ ya̍ le̍.”

²⁹ O̍ ko̍ŋ, mi̍ Dēēve̍ chūūŋgīāā so̍vɛ̄i̍ya̍a̍ tūa̍a̍ kpo̍u̍ na̍a̍ pi᷅lɛ̍ mbo̍ chūā nda̍ ma̍ kɔ̍ de᷅l Lu̍a̍bā chōo̍ ma̍ bīī ndu̍.

³⁰ Ndu̍yɛ̍ wāŋnda̍ ha̍ā mɛ̄lɛ̄ka̍ nda̍ nda̍ a̍a̍ pi̍ɛ̍īyo̍ dīōlā ndɔ̄la̍ŋ āā Mo̍lɛ̍kī. Mɔ̍si̍l lēmāsa̍ wa̍ mɛ̄lɛ̄ka̍ ndāa̍ ho̍ō o̍ lēbōllo̍ a̍ ko̍o̍līi̍yo̍ŋ kpo̍sōŋ o̍ wa̍ ō tōōsīāā ni̍. O̍ ko̍ŋ kɔ̍ɔ̍lī, pōūtā ba̍ā kālālā bɛ̍ndūla̍ŋ lā wa̍ lā hōlīāā o̍ mɔ̍si̍llo̍ ho̍ō chɛ̍chɛ̍. Mɔ̍si̍llo̍ ho̍ō ō wa̍ lūsu̍llo̍ le̍ pa᷅ŋnda̍ŋ be̍le̍ ŋɔ̍mmɛ̍ū a̍ lā ŋūɛ̍ɛ̍nu̍. Mi̍ Dēēve̍ kɔ̍ su̍ŋgū mɛ̄lɛ̄ka̍ ndā ko̍ŋ mɔ̍si̍l ko̍ŋ o̍ lēbōl mbo̍ hāndu᷄ŋ o̍ lēbōl. Ndu̍yɛ̍, mi̍ Dēēve̍ chūā vɛ̄lɛ̄ nyɛ̄m chēle̍ŋ ta̍u̍ ta̍u̍ o̍ chi̍e̍e̍ ko̍ŋ ni᷄ŋ mbo̍ kūānu᷄ŋ a̍ mu̍ŋ.

³¹ Wānā o̍ wāna̍ wa̍ o̍ chi̍e̍e̍ ko̍ŋ ni᷄ŋ mi̍ Dēēve̍ sīīŋgūū nda̍ chīa̍a̍ wa̍lla̍. Mbo̍ sūāā nda̍ su̍ɛ̍īla̍ŋ o̍ lābā, a̍ dɛ̄ndɛ̄la̍, a̍ chīli̍ŋu̍ŋ wa̍llo̍ŋ ŋ̄ pūm, a̍ chūo̍o̍ŋ, mbo̍ sīmī nda̍ kpi̍līki̍o̍ŋ lɔ̄ɔ̍. Ndu̍yɛ̍ chi̍e̍e̍ o̍ chi̍e̍e̍ Dēēve̍ bi̍ī o̍ lɛ̄ŋndē A̍mɔ᷅nde̍ŋ ni̍ŋ, le̍nde̍ o̍ to̍sa̍ a̍ wāŋnda̍ o̍ chi̍e̍e̍ŋ mu̍ŋ ni᷄ŋ tu᷅ ni̍. O̍ ko̍ŋ kɔ̍ɔ̍lī, mi̍ Dēēve̍ chūā pūa̍a̍ ndūa̍a̍ kpo̍u̍ ma̍ mīīŋgū Chūlu̍sɛ̄lɛ̄m.