Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 11 - Yāu̍ Mɛ̄lɛ̄ka̍a̍

Nyɛ̍ yɔ̍nu̍ŋ Dēēve̍ tɛ̄ɛ̄ŋ nda̍ Bāsi̍ɛ̍bā wo̍

¹ O̍ ko̍ŋ kɔ̍ɔ̍lī, mi̍ te̍le̍ŋ Māsāā bɛ̍ndūa̍a̍ ā kūā o̍ chɔ̄ūwo̍ o̍ wɔ̄sīo̍o̍ ni᷄ŋ ndo̍ ō fūūlūū. Ndu̍yɛ̍ le̍ wɔ̄ɔ̄le̍ŋ hūnɔ̄ɔ̍ bɔ̄ŋāa̍ a̍ sīālte̍ŋ ki̍nɛ̍i̍, māsāā bɛ̍ndūa̍a̍ nda̍ a̍a̍ ku̍ā o̍ chɔ̄ūwo̍ ni̍. Kɛ̍ Dēēve̍ ku̍e̍ le̍, mbo̍ vīām Cho̍wa̍bī a̍ wāŋ bɛ̄ndūa̍a̍ kpo̍u̍ ma̍ kūā. Ndu̍yɛ̍ mi̍ I̍sɔ̄lūɛ̍i̍ya̍ ā kɔ̍ yo᷅m A̍mɔ᷅na̍i̍tīi̍ya̍. O̍ ko̍ŋ kɔ̍ɔ̍lī, ma̍ kɔ̍ ba̍lū Lu̍a̍bā, chi̍e̍e̍ ndā bɛ̍ndōo̍. A̍ te̍le̍ŋ ko̍ŋ, Dēēve̍ ndu̍ wa̍ Chūlu̍sɛ̄lɛ̄m.

² Pāa̍le̍ pi᷅lɛ̍, mi̍ Māsāa̍ Dēēve̍ o̍ hi̍nī sīɛ̄ndi᷄ŋndo̍ a̍ pāa̍le̍ yɔ̍ŋga᷄ŋnde̍ŋ. Mɛ̄ɛ̍ o̍ chɛ̍ŋ mbo̍ wā bālɔ̄ɔ̍ o̍ chīɛ̄īyo̍ chōo̍, mbo̍ sīɛ̄ndī hɔ̄lla̍, mbo̍ chā chūa̍a̍ pūlɔ᷄ŋndo̍. Chūa̍a̍ ho̍ō yɛ̍ nāŋɔ̄ɔ̍ pīla̍ ndu̍ o̍o̍ na̍ŋ ni̍.

³ O̍ ko̍ŋ, mi̍ Dēēve̍ vi̍ām wāŋndo̍ le̍ mbo̍ kɔ̍ nyu̍nā a̍ chūa̍a̍ ho̍ō o̍kɔ̄ɔ̄. Mi̍ wānā ko̍ŋ mīīŋgū mbo̍ hu᷄ŋ di̍mūl Dēēve̍ āā, “Fāllo̍, chūā kōŋ dīōlā ndɔ̄la̍ŋ āā Bāāsi̍ɛ̍bā, chūa̍ I̍līām ndo̍. Yūla̍yā Hi̍ta̍i̍tīi̍nɔ̍, la̍a̍ ndɔ̍ cho̍ ko̍ŋ ni̍.”

⁴ Mi̍ Dēēve̍ vi̍ām wāŋnda̍ le̍ mā kɔ̍ ve̍e̍lūl ndu̍ chūa̍a̍ ho̍ō, mi̍ chūa̍a̍ hūŋ. Mi̍ Dēēve̍ hu̍ŋ wa᷅ a̍ chūa̍a̍ ho̍ō. Ndu̍yɛ̍ chūa̍a̍ ho̍ō ndu̍ o̍o̍ chi̍i̍ yɔ̄ kɔ̍ te̍le̍ŋ ndɔ̍ ŋ̄wāŋ lāāndōo̍ ki̍nɛ̍i̍. O̍ ko̍ŋ kɔ̍ɔ̍lī, mi̍ chūa̍a̍ mīīŋgū o̍ chīɛ̄ī ndɔ̄ɔ̍.

⁵ Mɛ̄ɛ̍ te̍le̍ŋ ti̍ŋ hīo̍u̍, mi̍ chūa̍a̍ sāālu᷄ŋ māā ō chō a̍ yo᷄llo̍. Mbo̍ yɔ̄ŋ dīōmnde̍ŋ nāa̍ Dēēve̍ chu̍a̍ mbo̍ dīmūl ndu̍ māā ō chō a̍ yo᷄llo̍.

⁶ Mɛ̄ɛ̍ Dēēve̍ tu̍e̍ī sūɛ̍i̍ he̍ī, mbo̍ yɔ̄ŋ dīōmnde̍ nāa̍ Cho̍wa̍bī chu̍a̍, mbo̍ dīmūl ndu̍ āā, “Yɔ̍ŋ ndɔ̍ ya̍ Yūla̍yā.” O̍ ko̍ŋ, mi̍ Cho̍wa̍bī ma᷅l Yūla̍yā mbo̍ kōmāl Dēēve̍.

⁷ Mɛ̄ɛ̍ Yūla̍yā fu̍u̍lu̍u̍, mi̍ Dēēve̍ nyūnā ndu̍ tē Cho̍wa̍bī nda̍ so̍vɛ̄i̍ya̍a̍ tūa̍a̍ ā chō kɛ̄ndɛ̄. O̍ ko̍ŋ kɔ̍ɔ̍lī, mbo̍ nyūnā ndu̍ a̍ chɔ̄ūwo̍ o̍kɔ̄ɔ̄, mɛ̄ɛ̍ o̍ cho̍ kɔ̄la̍ŋ yɛ̍.

⁸ Mi̍ Dēēve̍ lo᷅ o̍ ko̍ŋ mbo̍ dīmūl ndu̍ āā, “Kɔ̍ o̍ chīɛ̄ī nūm ndo̍ mā kɔ̍ pɛ̍ŋgī.” Mi̍ Yūla̍yā fu̍lā mbo̍ kūā o̍ bɛ̍ɛ̄. Mi̍ Dēēve̍ bɛ̄ɛ̄ndīāā pēē si̍mbāā kɛ̄ndɛ̄ kɛ̍ndɛ̄ mbo̍ yɔ̄ŋ Yūla̍ya̍ o̍ chīɛ̄ī ndɔ̄ɔ̍.

⁹ Kɛ̍ Yūla̍yā ku̍e̍ o̍ chīɛ̄ī ndɔ̄ɔ̍ le̍, mbo̍ lɔ̍lnu᷄ŋ o̍ dīō nda̍ pūa̍a̍ ma̍ndā chi̍ɛ̍ī lēmāsāa̍ wa̍.

¹⁰ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, ma̍ dīmūl Dēēve̍ māā Yūla̍yā ku̍e̍ o̍ chīɛ̄ī ndɔ̄ɔ̍ le̍. Mi̍ Dēēve̍ ve̍e̍lū Yūla̍yā mbo̍ dīmūl ndu̍ āā, “Pōo̍, a̍ vīōūwɔ̄ɔ̄ bɛ̄ndū ŋ̄ vīōū ho̍ō yōndō wo̍, vɛ᷅ a̍ ku̍e̍ o̍ chīɛ̄ī nūm ndo̍ mā kɔ̍ pɛ̍ŋgī le̍?”

¹¹ Mi̍ Yūla̍yā di̍mūl ndu̍ āā, “Fāllo̍, wāna̍ nī ba̍nāa̍ Cho̍wa̍bī a̍ pūa̍a̍ chɔ̄ūwa̍ I̍sɔ̄lūɛ̄ī kpo̍u̍, o̍ ko̍ŋ kɔ̍ɔ̍lī, a̍ kɔ̍fū kpe̍ma̍ Mɛ̄lɛ̄ka̍a̍ lātūlu̍, nda̍ chō o̍ chɔ̄ūwo̍ lāchī ā chō lūa̍ŋ o̍ būu̍ŋnda̍ŋ bɛ̄ŋgu̍ na̍a̍ kpa̍yāŋnda̍ yōndōo̍ ni᷄ŋ. Vɛ̄ɛ̍nɛ̍ ya̍ ya̍ ku̍ā yɛ̍ mī kɔ̍ cha᷅l dīo̍la̍ŋ o̍ ya̍ lo̍ chi̍ɛ̍ī ni̍ŋ, mī to̍sa̍ kɔ̄l kɛ̄ndɔ̄ɔ̍ na̍a̍ la̍a̍ nūu̍? I̍ nɔ̍lā mī to̍sa̍ ke̍ŋ te̍ fāllo̍.”

¹² Mi̍ Dēēve̍ di̍mūl ndu̍ āā, “Ō bɛ̄nda̍ le̍nde̍. Lɔ̍l ni̍ko̍ ha̍ū na̍nu᷄ŋ, sīɔ̄dīi̍ I̍ ma̍l nu̍m ŋ̄pēlū a̍ mi̍i̍ŋgu̍.” Mi̍ Yūla̍yā lɔ᷅l vɛ̄lɛ̄ pāa̍le̍ le̍ŋ Chūlu̍sɛ̄lɛ̄m lo̍ŋ. Dīi̍mā ndɔ̄ɔ̍ pīlɔ̍ɔ̍,

¹³ mi̍ Dēēve̍ ve̍e̍lū ndu̍ le̍ mā kɔ̍ di̍ō nyɛ̄ dīa̍a̍. Mi̍ Dēēve̍ kɔ̍ pi̍mī ndu̍ mūɛ̄īya̍ŋ cha̍. Kɛ̍ Yūla̍yā chɛ̍l mbō kūɛ̄ o̍ chīɛ̄ī ndɔ̄ɔ̍ le̍. Mɛ̄ɛ̍ nyūmnda̍ŋ mā to᷄l, mbo̍ kɔ̍ pɛ̍ŋgɛ̄lā wāla̍ ndɔ̄ɔ̍ bu̍ɛ̍i̍yāā māsānɔ̍ ndɔ̄ɔ̍ īkɛ̄i̍ mbo̍ lɔ̄lnu᷄ŋ lo̍ŋ.

¹⁴ Pāa̍le̍ŋ sīɔ̍ɔ̍ dīi̍mā ndɔ̄ɔ̍, mi̍ Dēēve̍ po̍o̍nyīāl Cho̍wa̍bī yāu̍wo̍, mbo̍ kē Yūla̍yā lē mbō yōo̍ ndu̍.

¹⁵ Mbo̍ dīmūl Cho̍wa̍bī o̍ yāu̍wo̍ ni᷄ŋ āā, “Cho̍wa̍bī, hi̍vi̍ la̍gu̍nɔ̄ɔ̍ ho̍ō o̍ chɔ̄ūwo̍ lāchī, nāa̍ chɔ̄ūwo̍ tūūlū tu̍u̍lu̍ bɛ̍ndōo̍ wa̍. Tē lā chē pɛ̍ ke̍nde̍ ke̍ndi̍o̍o̍, lā mīīŋgu᷄ŋ a̍ mākɔ̄ɔ̄ ā dīī ndu̍.”

¹⁶ Ndu̍yɛ̍ Cho̍wa̍bī nda̍ so̍vɛ̄i̍ya̍a̍ ndūa̍a̍ ā wa̍ Lu̍a̍bā ā bālāā kpɔ̍kɔ̍su̍ le̍ ndu̍ bīyɔ̄ɔ̍, chi̍e̍e̍ ya̍a̍mɔ̍ɔ̍wa̍a̍ ndāa̍. Mɛ̄ɛ̍ Cho̍wa̍bī che᷅ nāa̍ ya̍a̍mɔ̍ɔ̍wa̍a̍ ndāa̍, a̍ sɔ̍ŋgā sɔ̍ŋgā bɛ̄ndōo̍ wa̍ ā chō wa̍, mbo̍ sīmī Yūla̍ya̍ o̍ fo̍ndāŋ kōŋ kpe̍e̍kpe̍i̍.

¹⁷ O̍ ko̍ŋ, ya̍a̍mɔ̍ɔ̍wa̍a̍ ndāa̍ ā chā nda̍, ma̍ fūlā ma̍ hu᷄ŋ sa̍ā nda̍ a̍ sɔ̍ŋgɔ̄ɔ̍. Ndu̍yɛ̍ ma̍ yām I̍sɔ̄lūɛ̍i̍ya̍, ma̍ dīū so̍vɛ̄i̍ya̍a̍ Dēēvi̍a̍a̍ dīūwo̍ pīla̍. Yūla̍yā bɛ̍ɛ̍ ma̍ dīī ndu̍.

¹⁸ O̍ ko̍ŋ, mi̍ Cho̍wa̍bī so̍lī ki̍i̍la̍a̍ mbo̍ vīām ndu̍ le̍ mbō kɔ̍ do̍o̍nu᷄ŋ Dēēve̍ ko̍na̍ a̍ chɔ̄ūwo̍ o̍kɔ̄ɔ̄.

¹⁹ Mbo̍ chōŋgu᷄ŋ ndu̍ āā, “Tē a̍ kɔ̍ chi̍ī ndu̍ ko̍na̍ do̍o̍nɔ᷄ŋ pɛ̍ kpo̍u̍,

²⁰ lɔ̍ɔ̍ pu᷅m ō chō tu̍mbe̍ dɔ̍ɔ̍nɔ᷄ŋ mbō dīmi̍ āā, ‘vɛ᷅ mi̍ lā sɔ̄ɔ̄ŋgūū chi̍o̍o̍ īkɛ̄i̍ le̍nde̍ kpɛ̍ɛ̍lūŋ o̍ sɔ̍ŋgɔ̄ɔ̍? Lā si̍nā nu̍a̍ā māā tē lā sɔ̄ɔ̄ŋgu̍u̍ ya̍a̍mɔ̍ɔ̍wa̍a̍ nyāa̍ īkɛ̄i̍ le̍nde̍ a̍ sɔ̍ŋgɔ̍ɔ̍ pɛ̍, ya̍a̍mɔ̍ɔ̍wa̍a̍ nyāa̍ lō o̍ sāāsa̍ chi̍o̍o̍ kɔ̄ɔ̄lī mā vīi̍ nya̍ a̍ chīŋūa̍ŋ te̍?

²¹ Lā pūɛ̄ɛ̄nu̍ŋ nyɛ᷅ yɔ̍nu̍ŋ Ābīmɛ̍lɛ̍kī po̍ Ki̍dīɔ̄ŋ ndo̍ o̍ chɔ̄ūwo̍ Ti̍bi̍sī wo̍? Ō cho̍ wa̍nā la̍nɔ̍ɔ̍ le̍ ma̍l ndu̍ pōū lūsūlāā bɛ̄ndōo̍ chōo̍ o̍ sāāsa̍ chi̍o̍o̍ kɔ̄ɔ̄lī mbo̍ dīī ndu̍ le̍? Nya̍ a̍a̍ nɔ̍ mi̍ nya̍ a̍a̍ sɔ̍ɔ̍ŋgu̍u̍ chi̍o̍o̍ īkɛ̄i̍ le̍nde̍ a̍ sɔ̍ŋgɔ̄ɔ̍ le̍?’ Tē māsāa̍ Dēēve̍ ō dīmi̍ le̍nde̍ pɛ̍ a̍ di̍mu̍l ndu̍ āā, ‘Yūla̍yā Hi̍ta̍i̍tīi̍nɔ̍, so̍vɛ̄i̍ya̍a̍ nūm nda̍ ō pīlɔ̍ɔ̍, ndu̍ bɛ̍ɛ̍ ā dīī ndu̍.’ ”

²² Mi̍ ki̍i̍la̍nɔ̍ ko̍ŋ mālnu᷄ŋ mbo̍ kūā, nyɛ̄ ō nyɛ̄ Cho̍wa̍bī cho̍ŋgu̍ŋ ndu̍ mbo̍ kɔ̍ do̍o̍nu᷄ŋ Dēēve̍ ko̍na̍.

²³ Mbo̍ dīmūl Dēēve̍ āā, “Mɛ̄ɛ̍ na̍a̍ ŋ̄ kɔ̍ ba̍lū ya̍a̍mɔ̍ɔ̍wa̍a̍ nāa̍, ma̍ fūlā a̍ kpāāyā bɛ̍ndōo̍ ma̍ hu᷄ŋ chi᷅ŋa̍la᷅ŋ na̍a̍ a̍ sɔ̍ŋgɔ̄ɔ̍ nāa̍ kpa̍yāŋ nda̍. Kɛ̍ mi̍ ŋ̄ kīndī kīndī mi̍ ŋ̄ chūā nda̍ nyīndɔ̄ɔ̍ lo̍ŋ mi̍ ŋ̄ kɔ̍ mɛ̍ɛ̍lū nda̍ o̍ dīō sāāsa̍ chi̍e̍e̍ ndāa̍ sōndōo̍.

²⁴ Kɛ̍ mi̍ pūa̍a̍ ndāa̍ sɔ̍ŋgā a̍ chīɔ̄ūla̍ŋ nda̍ ā vīī na̍a̍ a̍ chīŋūa̍ŋ o̍ sāāsāa̍ kɔ̄ɔ̄lī, ma̍ dīū pūa̍a̍ nu̍m nda̍ ā ti᷄ŋ. Yūla̍yā Hi̍ta̍i̍tīi̍nɔ̍, so̍vɛ̄i̍ya̍a̍ nu̍m nda̍ ō pīlɔ̍ɔ̍, ndu̍ bɛ̍ɛ̍ ā dīī ndu̍.”

²⁵ Mɛ̄ɛ̍ o̍ chi̍i̍ Dēēve̍ ko̍na̍ do̍o̍nɔ᷄ŋ kpo̍u̍, mi̍ Dēēve̍ dīmūl ndu̍ āā, “Kɔ̍ di̍mūl Cho̍wa̍bī ō ta̍mbū kɔ̄l te̍. Chɔ̄ūwo̍ ndu̍ le̍nde̍ o̍ cho̍ ni̍, ō hɛ̍lī wa᷅na̍ o̍ di̍ī le̍. Kɛ̍ di̍mu̍l ndu̍ māā ō kɔ̍ chi᷅ŋa̍la᷅ŋ nda̍ a̍ sɛ̍mbɛ̍ mbō kīndi̍ ki̍ndi̍ mbo̍ bīī chi̍e̍e̍ ko̍ŋ. Di̍mu̍l ndu̍ māā ō sīmu̍l kɔ᷅l.”

²⁶ Mɛ̄ɛ̍ Bāāsi̍ɛ̍bā tu̍e̍ī māā ā dīī Yūla̍yā pɔ̍nɔ̍ ndɔ̍, mbo̍ chāŋ cha᷄ŋndo̍ pīla̍.

²⁷ Mɛ̄ɛ̍ dɛ̍nɛ̍la̍ pɔ̍nɔ̍ ndɔ̄la̍ŋ lā chūū kpo̍u̍, mi̍ Dēēve̍ vīām wānā ma̍ kɔ̍ hu᷅ŋ a̍ ndu̍ o̍ ndu̍lo̍ chi̍ɛ̍ī ni̍ŋ mbo̍ sīmnu᷄ŋ la̍a̍ndɔ̍, ndu̍yɛ̍ mbo̍ vīlūl Dēēve̍ pōo̍. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ta̍mbū kɔ̄l a̍ nyɛ̄ Dēēve̍ to̍sa̍ ho̍ō wo̍.