Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 10 - Yāu̍ Mɛ̄lɛ̄ka̍a̍

Dēēve̍ yēm A̍mɔ᷅na̍i̍tīi̍ya̍ a̍ Si̍i̍lūīāŋnda̍

¹ Mɛ̄ɛ̍ te̍le̍ŋ ti̍ŋ hīo̍u̍, mi̍ Na̍ha̍sī, o̍ wa̍ māsāa̍ le̍ A̍mɔ᷅ŋ ndo̍ ō wū. O̍ ko̍ŋ kɔ̍ɔ̍lī, mi̍ Ha̍nūŋ po̍ ndɔ̄ o̍ mi̍i̍ŋgū māsāa̍ o̍ fōōfo̍ ndɔ̄ɔ̍.

² Mɛ̄ɛ̍ Dēēve̍ tūēī māā Na̍ha̍sī vi᷅, mbo̍ dīmī āā, “Na̍ha̍sī ndu̍ o̍o̍ di̍i̍ku̍ŋ ya̍ bɔ̄ɔ̍. Kɛ̄ndɛ̄i̍ o̍ to̍sa̍l la̍ ve̍, mɛ̄ɛ̍ mī mi̍ŋgu̍l Ha̍nūŋ po̍ ndɔ̍ kɛ̄ndɛ̄ī ke̍ŋ.” O̍ ko̍ŋ, mi̍ Dēēve̍ vīām ki̍i̍la̍a̍ ndūa̍a̍ le̍ mā kɔ̍ yi᷅l Ha̍nu᷄ŋ yīlɔ̄ɔ̄ bīīsi̍ fi̍nyā ndɔ̄ɔ̍.

³ Kɛ̍ mɛ̄ɛ̍ nda̍ kūɛ̄, mi̍ wāŋ bɛ̄ndūa̍a̍ A̍mɔ᷅ŋ a̍ di̍mūl Māsāa̍ Ha̍nūŋ āā, “Fāllo̍, ō cho̍ yi̍lɔ̄ɔ̄ bīīsi̍ le̍ pūa̍a̍ Dēēvi̍a̍a̍ ā hīŋ nu̍a̍ā le̍. Yi̍ya᷄ŋ nu̍a̍ā māā kɔ̄l te̍ Dēēve̍ chō nu̍m nyɔ̄ɔ̄lū le̍ pīɔ̍m fi̍nyā nūmndo̍ le̍. Vīōmɔ̄ɔ̍ o̍ ve᷅m nu̍a̍ā pūa̍a̍ ndūa̍a̍ ni̍ māā ā hu᷄ŋ mā hu᷄ŋ mɛ̍ɛ̍ndīa̍ŋ lɛ᷅ŋnde̍ŋ nde᷅ŋ mā chē mɛ̄ɛ̍ le̍ cho̍ yɛ̍, le̍ na̍a̍ hūnɔ̄ɔ̍ dēlɔ̄ɔ̍ chōo̍ a̍ sɔ̍ŋgɔ̄ɔ̍ mā yēm na̍a̍.”

⁴ Mɛ̄ɛ̍ Ha̍nūŋ o̍ tu̍e̍ī le̍nde̍, mbo̍ bīī pūa̍a̍ ha̍ā. Mbo̍ sēndi̍ nda̍ sīɛ̍i̍yo̍ŋ kpēŋgo᷄ŋ pīlɔ̍ŋ ki̍nɛ̍i̍, o̍ ko̍ŋ kɔ̍ɔ̍lī, mbo̍ kīlī nda̍ dōmāla̍ŋ a̍ mākɔ̄ɔ̄, pɛ̄ŋgu̍ yɔ̄ŋnda̍ŋ chɛ̍chɛ̍ le̍ nda̍ bɛ̄ɛ̄la̍ŋ tɛ̄ɛ̄mbūūwo̍. Mbo̍ ma̍l nda̍ le̍ mā mīīŋgu̍ o̍ māsānɔ̍ ndāa̍ lo̍ a̍ si̍ɔ̍mbu̍la̍ la̍ŋ.

⁵ Mi̍ si̍ɔ̍mbu̍la̍ bɛ̄ndūla̍ŋ lā bīī pūa̍a̍ ha̍ā le̍ mīīŋgōo̍. Mɛ̄ɛ̍ Dēēve̍ tu̍e̍ī nyɛ̍ yɔ̍nu̍ŋ a̍ pūa̍a̍ ndūa̍a̍ wo̍, mbo̍ yɔ̄ŋ ki̍i̍la̍a̍ nāa̍ nda̍ chūā, mbo̍ dīmūl nda̍ āā, “Lā cha᷄l Chɛ̄lu̍i̍kō, ha̍a̍a̍ mbō lo̍ o̍ ko̍ŋ mī sīɛ̍i̍yo̍ŋ mīīŋgu̍ nya̍ wūlɔ̄ɔ̄. Tē ŋ̄ vīl pɛ̍, lā mīīŋgu̍ ni̍ko̍ na̍nu᷄ŋ.”

⁶ Mɛ̄ɛ̍ A̍mɔ᷅na̍i̍tīi̍ya̍ chē māā ā ti̍ŋ Dēēve̍ a̍ sɔ̍ŋgɔ̄ɔ̍, ma̍ hīāū chi̍o̍o̍ŋ kɔ̄ɔ̄lī le̍ mā ke̍ nda̍ pūa̍a̍ ndāa̍ mā hu᷄ŋ ma̍lā nda̍ sɔ̍ŋgɔ̄ɔ̍ a̍ Dēēve̍. Ma̍ kɔ̍ chu̍ā so̍vɛ̄i̍ya̍ o̍ lɛ̄ŋndē Si̍i̍lūīāle̍ŋ ni᷄ŋ, a̍ wa̍ Bɛ̄tīlu̍ɛ̍hɔ̍bī chi̍e̍e̍, a̍ pūa̍a̍ So̍bāā wāa̍la̍ŋ bi̍di̍i̍ŋ (20,000), o̍ ko̍ŋ kɔ̍ɔ̍lī, ma̍ kɔ̍ chu̍ā vɛ̄lɛ̄ ha̍ā To̍bī wāa̍la̍ŋ tɔ̍ a̍ lā tīɔ̍ɔ̍ŋ (12,000). Mi̍ Māsāa̍ Ma̍a̍kāā chi̍e̍e̍ ndu̍ ke᷅ nda̍ pūa̍a̍ wāa̍ ō pīlɛ̍ (1,000).

⁷ Mɛ̄ɛ̍ Dēēve̍ tūēī māā wāŋnda̍ ha̍ā ā bɛ̄ɛ̄ndi̍a̍ŋ le̍ sɔ̍ŋgɔ̍ɔ̍ a̍ ndu̍, mbo̍ vīām Cho̍wa̍bī nda̍ so̍vɛ̄i̍ya̍ kpo̍u̍ le̍ mā kɔ̍ chi᷅ŋa̍la᷅ŋ nda̍ a̍ sɔ̍ŋgɔ̄ɔ̍.

⁸ Mɛ̄ɛ̍ wāŋnda̍ A̍mɔ᷅ŋ a̍ che᷅ dɔ̍ɔ̍ pūa̍a̍ Dēēvi̍a̍a̍, ma̍ fūlā le̍ sɔ̍ŋgɔ̍ɔ̍ a̍ nda̍. Mi̍ nda̍ pi̍la̍ sīm o̍ nɛ̄i̍ he̍l chi̍e̍e̍ wo̍ sōndōo̍ ā bɛ̄ɛ̄ndīa̍ŋ le̍ sɔ̍ŋgɔ̄ɔ̍. O̍ ko̍ŋ kɔ̍ɔ̍lī, pūa̍a̍ nda̍ hīōū kɔ̄ɔ̄lī ki̍nɛ̍i̍ ya̍, ha̍ā Si̍i̍līāā ni̍, a̍ ha̍ā To̍bī chi̍e̍e̍, a̍ ha̍ā Ma̍a̍kāā, mi̍ nda̍ sīm kɔ̄ɔ̄lī kɔ̄ɔ̄lī o̍ fo̍ndāŋ kpe̍nde̍ke̍lo̍o̍, ā bɛ̄ɛ̄ndīa̍ŋ le̍ sɔ̍ŋgɔ̄ɔ̍.

⁹ Mɛ̄ɛ̍ Cho̍wa̍bī che᷅ māā ā bālu̍ nda̍ le̍nde̍, ha̍ā chō nda̍ lāchī, ha̍ā chō nda̍ a̍ mākɔ̄ɔ̍, mbo̍ hɛ̄lī so̍vɛ̄i̍ya̍a̍ sɔ̍ŋgā sɔ̍ŋgā bɛ̄ndōo̍ wa̍ mbo̍ sīmī ka̍ŋ ku̍mbū pūa̍a̍ Si̍i̍līāā a̍ wa̍ wo̍.

¹⁰ O̍ ko̍ŋ kɔ̍ɔ̍lī, mbo̍ chūā Ābi̍sīāā pɔ̍mbɔ̄ ndɔ̍ mbo̍ hāndū ndu̍ so̍vɛ̄i̍ya̍a̍ tūa̍a̍ bōlle̍ŋ, mbō sīmī ka̍ŋ le̍ mī nda̍ sɔ̄ŋga̍ a̍ A̍mɔ᷅na̍i̍tīi̍ya̍ pīla̍.

¹¹ Mbo̍ dīmūl Ābi̍sīāā pɔ̍mbɔ̄ ndɔ̍ āā, “Tē ā chē pɛ̍ māā Si̍i̍lūīāŋnda̍ ā chō le̍ ya̍ bā tīū, ā hīŋ a̍ hu̍ŋ ma̍lā ya̍. Tē ya̍ che᷅ ni̍ māā A̍mɔ᷅na̍i̍tīi̍ya̍ ā chō le̍ nu̍m bā tīū, ya̍ I̍ ku̍ɛ̄ I̍ kɔ̍ ma̍lā nu̍m.

¹² Le̍la̍ŋ wa̍ wa᷅na̍ dīāllūŋ kālā, ndu̍yɛ̍ mā si̍mu̍l kɔ̄l yi̍. Ŋ̄ kīndi̍ kīndīo̍o̍ pīla̍ mī ŋ̄ pīŋi̍ yōōmūlā wānāā nāa̍ a̍ chi̍e̍e̍ŋ Mɛ̄lɛ̄ka̍ nāa̍. Ndu̍yɛ̍ mbɔ̄ māā nyɛ̄ Mɛ̄lɛ̄ka̍ Ya̍a̍wɛ̄ɛ̄ pīla̍ hɛ̍na̍ŋndo̍ ō yɔ̄nu̍ŋ fɔ̍.”

¹³ Mi̍ Cho̍wa̍bī chu̍ā pūa̍a̍ o̍ hɛ̍li̍ ka̍ŋ nda̍ ma̍ kɔ̍ chi᷅ŋa̍la᷅ŋ Si̍i̍lūīāŋnda̍ a̍ sɔ̍ŋgɔ̄ɔ̍. Ndu̍yɛ̍ ma̍ yām Si̍i̍lūīāŋnda̍, mi̍ Si̍i̍lūīāŋnda̍ nyāānu᷄ŋ.

¹⁴ Mɛ̄ɛ̍ A̍mɔ᷅na̍i̍tīi̍ya̍ chē māā Si̍i̍lūīāŋnda̍ ā nyāānu̍ŋ, nda̍ bɛ̍ɛ̍ mi̍ sīōōŋnde̍ bīī nda̍ ma̍ nyāānu᷄ŋ le̍ Ābi̍sīāā, ma̍ mīīŋgū ā kīlta̍ŋ o̍ nda̍ lo̍ chi̍e̍e̍. Mɛ̄ɛ̍ sɔ̍ŋgɔ̄ɔ̍ chūu̍, mi̍ Cho̍wa̍bī chu̍ā pūa̍a̍ ndūa̍a̍ ma̍ mīīŋgū Chūlu̍sɛ̄lɛ̄m.

¹⁵ Mɛ̄ɛ̍ Si̍i̍lūīāŋnda̍ chē māā I̍sɔ̄lūɛ̍i̍ya̍ yēm nda̍, ma̍ chūūŋgīāā so̍vɛ̄i̍ya̍a̍ ndāa̍ kpo̍u̍ na̍a̍ pi᷅lɛ̍ le̍ kɔ̄la̍ŋ I̍sɔ̄lūɛ̍i̍ya̍ chīŋa̍la᷅ŋndo̍.

¹⁶ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Hādādɛ̍sɛ̄ɛ̄ yo̍o̍ŋgū Si̍i̍lūīāŋāa̍ wa̍ o̍ Pēē Bɛ̍ndōo̍ Yūfi̍lu̍a̍tīī le̍e̍lōo̍ wa̍, nda̍ kpo̍u̍ ma̍ chūūŋgi̍āŋ Hɛ̍lām chi̍e̍e̍. Ndu̍yɛ̍ So̍bāā, o̍ wa̍ so̍vɛ̄i̍ya̍a̍ Māsāa̍ Hādādɛ̍sɛ̄ɛ̄ wa̍ bōlle̍ŋ ndo̍, ndu̍ si̍m nda̍ lāchī ni̍ le̍ kɔ̄la̍ŋ o̍ sɔ̍ŋgɔ̄ɔ̍.

¹⁷ Mɛ̄ɛ̍ Dēēve̍ tūēī a̍ ndi̍ o̍kɔ̄ɔ̄, ndu̍ bɛ̍ɛ̍ mbo̍ chūūŋgīāā so̍vɛ̄i̍ya̍ I̍sɔ̄lūɛ̄ī kpo̍u̍ na̍a̍ pi᷅lɛ̍. Mi̍ ndu̍ pi̍la̍ si᷅m nda̍ lāchī, ma̍ tāŋ Chɔ̍ɔ̍dāŋ nda̍ŋ ma̍ kūā Hɛ̍lām nāa̍ Si̍i̍lūīāŋnda̍ chūūŋgi̍āŋ le̍ sɔ̍ŋgɔ̍ɔ̍ a̍ nda̍ wa̍. Ndu̍yɛ̍ mi̍ Si̍i̍lūīāŋnda̍ kɔ̍ sa̍ā nda̍ a̍ sɔ̍ŋgɔ̄ɔ̍ lo̍ŋ.

¹⁸ Kɛ̍ mi̍ Dēēve̍ nda̍ pūa̍a̍ ndūa̍a̍ ā yām nda̍ ma̍ nyāānu᷄ŋ. Ndu̍yɛ̍ mi̍ Dēēve̍ nda̍ pūa̍a̍ ndūa̍a̍ ā dīū nda̍ ta̍u̍ ta̍u̍. Ma̍ dīī pūa̍a̍ ku̍ā o̍ nyɛ̄lā su̍a̍a̍ ā nāŋ nda̍ŋ chōo̍ wa̍ kɛ̄mɔ̄ɔ̍ lē ŋɔ᷄mmɛ̍ū (700) a̍ pūa̍a̍ sɔ̍ŋgā o̍ su̍a̍a̍ chōo̍ wa̍ wāa̍la̍ŋ be̍le̍-hi̍ɔ̍ɔ̍lu̍ (40,000). O̍ ko̍ŋ kɔ̍ɔ̍lī, So̍bāā, o̍ wa̍ so̍vɛ̄i̍ya̍a̍ Si̍i̍lūīāŋ kpo̍u̍ bɔ̍lle̍ŋ ndo̍, ma̍ yɔ̄ŋūl ndu̍ yɔ̄ŋūllo̍ pīla̍, ndu̍ bɛ̍ɛ̍ mbo̍ wū.

¹⁹ Mɛ̄ɛ̍ māsāā bɛ̍ndūa̍a̍ Hādādɛ̍sɛ̄ɛ̄ o̍ bā bɛ̄ŋgu̍ wa̍ ā chē māā I̍sɔ̄lūɛ̍i̍ya̍ yēm nda̍, nda̍ kpo̍u̍ ma̍ kūā nāa̍ I̍sɔ̄lūɛ̍i̍ya̍ chūā, ma̍ kɔ̍ to̍sā chɛ̄la᷅ŋ kɔ̄l nyūlōo̍ a̍ nda̍, ma̍ wā ni᷅ŋ I̍sɔ̄lūɛ̍i̍ya̍ o̍ bā bɛ̄ŋgu̍. O̍ ko̍ŋ, mi̍ sīōōŋnde̍ ni᷅ŋ bīī Si̍i̍lūīāŋnda̍ le̍ A̍mɔ᷅na̍i̍tīi̍ya̍ sɔ̍ŋgɔ̄ɔ̍ mālāa̍.