Māsāā Bɛ̍ndūāā Di̍i̍ŋ Ndūa̍a̍ 3 - Yāu̍ Mɛ̄lɛ̄ka̍a̍

Sɔ̍ŋgɔ̍ yɔ̍nu̍ŋ I̍sɔ̄lūɛ̍i̍ya̍ tɛ̄ɛ̄ŋ nda̍ wāŋnda̍ Mo̍wa̍bī wo̍

¹ Wɔ̄sī Chɛ̄hōsi̍a̍fa̍tī o̍ chi̍ŋa̍ wɔ̄sīla̍ŋ tɔ̍ a̍ lā ŋɔ̄ma̍a̍ o̍ lēmāsā Chu̍dā wo̍, wɔ̄sī kōŋ Chɛ̄ho̍lūām po̍ E̍ha̍bī wo̍ ō sīmnu᷄ŋ ma̍sāa̍ I̍sɔ̄lūɛ̄ī ni̍. Ndu̍yɛ̍ mi̍ Chɛ̄ho̍lūām to̍sā māsāle̍ŋ Sāme̍e̍līāā chi̍e̍e̍, le̍ wɔ̄sīla̍ŋ tɔ̍ a̍ lā tīɔ̍ɔ̍ŋ.

² Kɛ̍ Chɛ̄ho̍lūām bɛ̍ɛ̍ mbo̍ tōsā yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄. Kɛ̍ nyɛ̄ o̍ to̍sa̍ wo̍ ndu̍ o̍o̍ si̍i̍ma᷅ŋ a̍ nyɛ̄ fi̍nyā ndɔ̄ nda̍ kāla̍ ndɔ̄ a̍ to̍sa̍ wo̍ le̍. Nyɛ̄ fi̍nyā ndɔ̄ ndu̍ o̍o̍ chɔ̍ū māā mɛ̄lɛ̄ka̍ ndɔ̄ māā sūŋgbu̍le̍ vi̍lɛ̄ī mbō vēēlū ndu̍ āā, Bāāl wo̍, mɛ̄ɛ̍ o̍ si̍mnu᷄ŋ māsā bɛ̍ndōo̍ mbo̍ pēsī pēsī ndu̍ mbo̍ tɛ̄ɛ̄mbūū ndu̍ kpo̍u̍.

³ Kɛ̍ ndu̍yɛ̍ ka̍ā wɔ̄ɔ̍ŋ Chɛ̄lōbo̍wām, po̍ Ne̍ba̍tī wo̍ ō wa̍ chōo̍, mbo̍ tōsā mi̍ wāŋnda̍ I̍sɔ̄lūɛ̄ī a̍ to̍sā yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍, ndu̍ bɛ̍ɛ̍ ka̍ā kōŋ ko̍ni̍ o̍ to᷅l kɔ̄ɔ̄lī nī. Yɔ̄ŋ wɔ̄ɔ̍ŋ Chɛ̄lōbo̍wām o̍ wa̍ chōo̍ wo̍, ndu̍ bɛ̍ɛ̍ ndu̍ o̍ to᷅l kɔ̄ɔ̄lī ni̍.

⁴ Ndu̍yɛ̍ a̍ te̍le̍ŋ ko̍ŋ I̍sɔ̄lūɛ̍i̍ya̍ o̍ bā bɛ̄ŋgu̍ lɛ̄ŋndē Mo̍wa̍bīle̍ŋ lē wa̍ ni̍. Māsā Bɛ̍ndōo̍ Mɛ̍sīā, o̍ wa̍ lɛ̄ŋndē Mo̍wa̍bīle̍ŋ bōlle̍ŋ ndo̍ yɛ̍, sāa̍ ndu̍ o̍o̍ ma̍ndā ni̍. Wɔ̄sī o̍ wɔ̄sī, Māsā Bɛ̍ndōo̍ Mɛ̍sīā ndu̍ o̍o̍ ke᷅ ma̍sa̍ wa̍ I̍sɔ̄lūɛ̄ī yo̍ sāā fɔ̍ŋndu̍a̍a̍ wāa̍la̍ŋ kɛ̄mɛ̄ (100,000) a̍ yīīŋīī nda̍ kīlī sa̍a̍ ko̍ndu̍a̍a̍ wa̍a̍la̍ kɛ̍mīa̍a̍ ve̍ (100,000).

⁵ Kɛ̍ mɛ̄ɛ̍ Māsā Bɛ̍ndōo̍ E̍ha̍bī o̍ vi᷅, mi̍ Māsā Bɛ̍ndōo̍ Mɛ̍sīā o̍ si̍mūl I̍sɔ̄lūɛ̍i̍ya̍ le̍ mbo̍ fūlā nda̍ o̍ bā bɛ̄ŋgu̍.

⁶ O̍ ko̍ŋ, mi̍ Māsā Bɛ̍ndōo̍ Cho̍lūām o̍ ma̍lnu᷄ŋ Sāme̍e̍līāā mbo̍ chu̍u̍ŋgīāā so̍vɛ̄i̍ya̍ I̍sɔ̄lūɛ̄ī kpo̍u̍ na̍a̍ pi᷅lɛ̍.

⁷ O̍ ko̍ŋ kɔ̍ɔ̍lī, mbo̍ yɔ̄ŋ dīōmndo̍ nāa̍ Māsā Bɛ̍ndōo̍ Chɛ̄hōsi̍a̍fa̍tī chu̍a̍, o̍ wa̍ Chu̍dā wo̍. Mbo̍ dīmūl ndu̍ āā, “Māsāa̍ Bɛ̍ndōo̍, o̍ cho̍ Mo̍wa̍bī wo̍ ō bīī mbo̍ sīmūl la̍. Le̍la̍ŋ tē ā chɛ᷅l pɛ̍, I̍ ye̍e̍ma̍ mā kɔ̍ ma̍lā ya̍ sɔ̍ŋgɔ̄ɔ̍ a̍ ndu̍.” Mi̍ Māsāa̍ Chɛ̄hōsi̍a̍fa̍tī di̍mūl ndu̍ āā, “I̍ chɛ̍l mī kɔ̍ ma̍lā nu̍m. Ndu̍yɛ̍ so̍vɛ̄i̍ya̍a̍ nīa̍a̍ ni̍, su̍a̍ā nīa̍a̍ chɔ̄ūwa̍ ni̍, nda̍ kpo̍u̍ ā chō le̍ nūm.

⁸ Kɛ̍ a̍ nɛ̄i̍ kūɛ̍ɛ̍nɛ̍ na̍a̍ ŋ̄ chō yɛ̄ kēēkū le̍ nda̍ kɔ̄la̍ŋ chīŋa̍la᷅ŋndo̍?” Mi̍ Māsā Bɛ̍ndōo̍ Cho̍lūām di̍mūl ndu̍ āā, “A̍ po̍llo̍ I̍dɔ̄m na̍a̍ ŋ̄ chō sāā ni̍.”

⁹ O̍ ko̍ŋ, Māsāa̍ Cho̍lūām ni̍, māsā bɛ̍ndu̍ wa̍ Chu̍dā wo̍ ni̍, a̍ māsā bɛ̍ndu̍ wa̍ I̍dɔ̄m ndo̍, ma̍ chūā so̍vɛ̄i̍ya̍a̍ ndāa̍ ma̍ bīī kɔ̄la̍ŋ, le̍ wāŋnda̍ Mo̍wa̍bī kɔ̄la̍ŋ chīŋa̍la᷅ŋndo̍. Mɛ̄ɛ̍ nda̍ kūɛ̄ le̍ pālɛ̍i̍ ī ŋɔ᷄mmɛ̍ū, mi̍ mɛ̄ŋnda̍ŋ mā chūū nda̍ o̍ bā. Māmɛ̄ŋ o̍ māmɛ̄ŋ mā ve̍ lɛ̍ nda̍ mā kɛ̄sīāā o̍ bā le̍ mī so̍vɛ̄i̍ya̍a̍ ndāa̍ a̍ chɔ̄lūāā nda̍ wa̍ kɔ̄la̍ŋ nda̍ ā ko᷄l te̍.

¹⁰ Mi̍ Māsā Bɛ̍ndōo̍ Cho̍lūām di̍mī āā, “Kpūndɛ̍ bɛ̄ndōo̍ ko̍ma̍l na̍a̍ ho̍ō ni̍. Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍lu̍ ma̍ve̍e̍lāā na̍a̍ māsāā bɛ̍ndūāā yāa̍ wa̍ ha̍ā nāa̍ pi᷅lɛ̍ le̍ mbō ma᷄l na̍a̍ wāŋnda̍ Mo̍wa̍bī o̍ bā.”

¹¹ Mi̍ Māsāa̍ Chɛ̄hōsi̍a̍fa̍tī nyu̍nā āā, “Wāna̍ su̍a̍ā le̍ Mɛ̄lɛ̄ka̍ chō pa̍ o̍ tāndāa̍ ho̍ō ni᷄ŋ, le̍ mī ŋ̄ dīmu̍l ndu̍ mbō nyūna̍l na̍a̍ Mɛ̄lɛ̄ka̍ Ya̍a̍wɛ̄ɛ̄ dīōm?” Mi̍ pūa̍a̍ Cho̍lūām nda̍ ō pīlɛ̍ dīmūl ndu̍ āā, “Po̍ pi᷅lɛ̍ chō o̍ tāndāa̍ ho̍ō ni᷄ŋ mā vēēlū ndu̍ āā Īla̍a̍sīā, fi̍nyā ndɔ̍ dīōla̍ŋ āā Si̍a̍fa̍tī, po̍ ko̍ŋ ndu̍ wa̍ wānā ma̍lāa̍ Īla̍a̍chā wo̍ ni̍.”

¹² Mi̍ Chɛ̄hōsi̍a̍fa̍tī di̍mī āā, “Ndu̍ bɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ndu̍ chu̍a̍.” O̍ ko̍ŋ, mi̍ māsāā ya̍a̍wa̍ ha̍ā, ā cha᷄ŋ ma̍ kūā nāa̍ Īla̍a̍sīā chu̍a̍, ma̍ kɔ̍ di̍mūl ndu̍ le̍ mbō māla̍ nda̍.

¹³ Mi̍ Īla̍a̍sīā di̍mūl Māsā Bɛ̍ndōo̍ Cho̍lūām āā, “Vɛ᷅ mā hīŋ nāa̍ ya̍ chu̍a̍ le̍ mālāa̍? Fi̍nyā nūm, nda̍ kālā nu̍m, wānāā ndāa̍ nda̍ a̍a̍ su̍a̍ā le̍ Mɛ̄lɛ̄ka̍ wa̍ ā chō na̍nu᷄ŋ, kɔ̍ nāa̍ nda̍ chūā ā māla̍ nu̍m. Kɛ̍ ya̍ I̍ nɔ̍ ma̍lā o̍ mālā le̍ nūm te̍.” Mi̍ Māsāa̍ Cho̍lūām o̍ di̍mūl ndu̍ āā, “Ō wa᷅ wɔ̄ le̍nde̍ le̍ Īla̍a̍sīā, mɛ̄ɛ̍ mā ma̍la̍ na̍a̍. Tē ō wa̍ māā yɔ̄ŋɔ̄ɔ̄ pɛ̍, vēēlōo̍ kpe̍e̍kpe̍i̍ Mɛ̄lɛ̄ka̍ Ya̍a̍wɛ̄ɛ̄ o̍ ve̍e̍lu̍ ho̍ō na̍a̍ māsāā ya̍a̍wa̍ ha̍ā ni̍, le̍ mbō ma᷄l na̍a̍ wāŋnda̍ Mo̍wa̍bī o̍ bā.”

¹⁴ Mi̍ Īla̍a̍sīā di̍mūl ndu̍ āā, “Mɛ̄lɛ̄ka̍ Ya̍a̍wɛ̄ɛ̄, o̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍ bu̍ɛ̍ī ndɔ̄ɔ̍ ya̍ I̍ cho̍ ni̍. I̍ mēna̍ŋ o̍ Mɛ̄lɛ̄ka̍ kōŋ po̍, tē ō cho̍ le̍ bɛ̄ɛ̄le̍ Māsā Bɛ̍ndōo̍ Chɛ̄hōsi̍a̍fa̍tī le̍ŋ ho̍ō Chu̍dā le̍, ya̍ i̍i̍ to̍fā nu̍m bɛ̍ɛ̍ le̍. Kɛ̍ le̍ bɛ̄ɛ̄le̍ ndɔ̄le̍ŋ I̍ cho̍ nya̍ mālā.

¹⁵ Lā vēēlu̍l la̍ wānā lu̍a̍ā tōwāa̍.” O̍ ko̍ŋ, ma̍ kɔ̍ ve̍e̍lūl ndu̍ wānā lu̍a̍ā tōwāa̍. Mi̍ wāna̍ tōwāa̍ kāndū tōwa̍ ndɔ̄ɔ̍ lɔ̄ɔ̍. Mɛ̄ɛ̍ o̍ wa̍ tōwāa̍ lɔ̄ɔ̍, mi̍ kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ ō tūāl Īla̍a̍sīā kɔ̄ɔ̄lī, mbo̍ kāndū sɔ̄ɔ̍ŋ wa᷅ lāchīo̍ŋ dīmīo̍o̍.

¹⁶ Mbo̍ dīmī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ māā nya̍ tīu̍ so̍o̍ŋnda̍ŋ tōūwɔ̄ɔ̍ o̍ dɛ̍ŋgbɔ̍ɔ̍ ho̍ō o̍ pēmbo᷄ŋ mu᷅ŋ tɛ̄ɛ̄ŋ sɔ̍.

¹⁷ Ō dīmi̍ māā lā chi᷅ ni̍ŋ mī hūēīyīī o̍ hūēīyīī hɔ᷄ŋ te̍, kɛ̄lɛ̄ŋgāā mī pīɔ̄ɔ̄ sīa̍ bɛ̍ɛ̍. Kɛ̍ mɛ̄ŋnda̍ŋ mā chō hūnɔ̄ɔ̄ mī mā tīu̍ o̍ dɛ̍ŋgbɔ̍ɔ̍ ho̍ō ni᷄ŋ kpo̍u̍, nya̍ kpo̍u̍ mī lā ko᷄l a̍ chɔ̄lūāā nyāa̍ lātūlu̍.

¹⁸ Ndu̍yɛ̍ ke̍ŋ cho̍ bɛ̍ɛ̍ nyɛ᷅ o̍ nyɛ̄, Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l te̍. Ō dīmi̍ māā ō chō vɛ̄lɛ̄ tōsā mī lā kɔ̍ yo᷅m wāŋnda̍ Mo̍wa̍bī.

¹⁹ Chi̍e̍e̍ŋ ndāāŋ nda̍ bɛ̄ɛ̄ndi̍a̍a̍ ŋ̄ kālā ka̍lā yɔ̄ŋi̍ ya̍a̍mɔ̍ɔ̍wa̍ ā lūɛ̍i̍ yo̍ŋ ni̍, chi̍e̍e̍ŋ tɔ̍ɔ̍ŋ bɛ̍ndūŋ nda̍ nɔ̄ wo̍ŋ ni̍, mu̍ŋ kpo̍u̍ lā chō mu̍ŋ hūnɔ̄ɔ̄ yōmɔ̄ɔ̄. Yɔ̄mīī ndɛ̄i̍ ku̍a̍mɛ̄i̍ kɛ̄ndɛ̄ kɛ̍ndɛ̄i̍ kpo̍u̍ lā chō ndi̍ hūnɔ̄ɔ̄ kīīŋūū, o̍ ko̍ŋ kɔ̍ɔ̍lī, mī lā bāŋu̍l pēēla̍ ndāla̍ būūlūla̍ŋ fi̍ɛ̍ fi̍ɛ̍. Fo̍ndāŋndā ndāla̍ tɔ̄lɔ̄ɔ̄la̍ŋ lā nāŋ nda̍ŋ kpo̍u̍ lā chō la̍ŋ hūnɔ̄ɔ̄ tɛ̄ɛ̄mbūū, mī lā kūmbū la̍ŋ a̍ pōūta̍ŋ mɛ̍ mɛ̍.”

²⁰ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, a̍ te̍le̍ŋ nda̍ nda̍ sōlī sa̍lālā īdīi̍la̍ŋ ndo̍ ki̍nɛ̍i̍, ma̍ chā mi̍ mɛ̄ŋnda̍ŋ mā cha᷄ŋ ku̍mbū lɛ̄ŋndē I̍dɔ̄mnde̍ŋ, mi̍ mā hu᷄ŋ pi̍ɔ̄ o̍ dɛ̍ŋgbɔ̍ɔ̍ ho̍ō cha̍.

²¹ Mɛ̄ɛ̍ wāŋnda̍ Mo̍wa̍bī a̍ tu̍e̍ī māā māsāā bɛ̍ndūāā yāa̍wa̍ ha̍ā, ā chūa̍ so̍vɛ̄i̍ya̍a̍ ndāa̍ le̍ mā hu᷄ŋ chīŋa̍la᷅ŋndo̍ nda̍ a̍ sɔ̍ŋgɔ̄ɔ̍, wānā pɔ̍nɔ̍ o̍ wānā pɔ̍nɔ̍ wa̍ Mo̍wa̍bī mbo̍ wā te̍le̍ŋ ku̍a̍ā o̍ chɔ̄ū, chūā pīāāndū ni̍, lāŋu̍nɔ̄ ka̍lā ni̍, ma̍ vēēla᷅ŋ kpo̍u̍ ma̍ kɔ̍ si᷅m nda̍ chūmndo̍ o̍ pɛ̄ŋgu̍la̍ lɛ̄ŋndē ndāle̍ŋ, ā wa̍ ā bɛ̄ɛ̄ndīa̍ŋnda̍ le̍ chɔ̄ūwo̍.

²² Mɛ̄ɛ̍ wāŋnda̍ Mo̍wa̍bī a̍ chɛ᷄ŋ di̍i̍mā ndɔ̄ɔ̍ pīlɔ̍ɔ̍ ma̍ tōfā kūmbū I̍sɔ̄lūɛ̍i̍ya̍ ā wa̍ wo̍, yɛ̄ɛ̄ŋnde̍ wa̍ nu̍a̍ā lɔ̄ɔ̍ o̍ mɛ̄ŋnda̍ŋ chōo̍ le̍ŋ, ma̍ chā mɛ̄ŋnda̍ŋ kɔ̍ɔ̍lī kɔ̄ɔ̄lī mā sīāŋā yɔ̍ɔ̄ māā mākōŋgo̍.

²³ O̍ ko̍ŋ, ma̍ dīmu̍la᷅ŋ āā, “Kōo̍wa̍ŋ kpo̍so̍ŋ, ma̍ cho̍ nu̍a̍ā o̍ dɔ̍ɔ̍ŋgɔ̍ I̍sɔ̄lūɛ̍i̍ya̍ ni̍. Māsāā bɛ̍ndūa̍a̍ ha̍ā, sɔ̍ŋgɔ̄ɔ̍ kɛ̄ɛ̍ nda̍ pi̍la̍ kīōlū tɛ̍ɛ̄ŋ ma̍ dīūwa᷅ŋ te̍. Ŋ̄ kɔ̄ŋnu᷅ŋ mī ŋ̍ kɔ̍ pu̍ŋgāŋ nyɛ̄m kɛ̄ndɔ᷄ŋ o̍ dɔ̍ɔ̍ŋgɔ̍ ndāa̍.” O̍ ko̍ŋ ma̍ cha᷄ŋ ma̍ kūā.

²⁴ Kɛ̍ mɛ̄ɛ̍ nda̍ fūūlu̍u̍, mi̍ I̍sɔ̄lūɛ̍i̍ya̍ kɔ̍ chi᷅ŋa̍la᷅ŋ nda̍ a̍ sɔ̍ŋgɔ̄ɔ̍, ma̍ nyāānu᷄ŋ. Mi̍ I̍sɔ̄lūɛ̍i̍ya̍ tīsā nda̍ kɔ̄ɔ̄lī, ma̍ lō sɔ̍ŋgɔ̄ɔ̍ a̍ nda̍ ma̍ kɔ̍ lu̍ɛ̍ī o̍ lɛ̄ŋndē ndāle̍ŋ ni᷄ŋ. Ko̍ŋ kpo̍u̍, ā chō kɔ̄la̍ŋ a̍ nda̍ dīū wo̍.

²⁵ O̍ ko̍ŋ kɔ̍ɔ̍lī, ma̍ tɛ̄ɛ̄mbūū chi̍e̍e̍ŋ ndāāŋ bɛ̍ndo᷄ŋ a̍ fo̍ndāŋndā ndāla̍ tɔ̄lɔ̄ɔ̄la̍ŋ lā nāŋ nda̍ŋ kpo̍u̍. Bā o̍ bā nda̍ fūūlu̍u̍ pɛ̍ mā kōma̍l fo̍ndāŋ tɔ̄lɔ̄ɔ̄la̍ŋ lā nāŋ ndo̍, ā lō po̍ūta̍ŋ vīīyo̍ o̍ fo̍ndāŋ kōŋ mā kūmbū ndu̍ mɛ̍ mɛ̍ a̍ pōūta̍ŋ. Pēēla̍ ndāla̍ pɔ᷅mpɔ̍mbɔ̄la̍ŋ kpo̍u̍, ma̍ bāŋūl la̍ŋ fi̍ɛ̍ fi̍ɛ̍. O̍ ko̍ŋ kɔ̍ɔ̍lī, yɔ̄mīī ndɛ̄i̍ ku̍a̍mɛ̄i̍ kɛ̄ndɛ̄ kɛ̍ndɛ̄i̍ ma̍ kīīŋūū ndi̍ kpo̍u̍. Chi̍e̍e̍ o̍ chi̍e̍e̍ lāsāāsa̍ wa̍ o̍ lɛ̄ŋndē Mo̍wa̍bīle̍ŋ ni᷄ŋ, ma̍ pēsī mu̍ŋ wɔ̍ wɔ̍. Chi̍e̍e̍ ndu̍ o̍o̍ lo̍ ni᷅ŋ īsīsi̍ ndu̍ pīlɛ̍ kpe̍ wo̍, mɛ̄ɛ̄ Kīāā Hɛ̄lu̍ɛ̍sī, chi̍e̍e̍ wa̍ chi̍e̍e̍ le̍bo᷅llo̍ wo̍. Kɛ̍ ndu̍ bɛ̍ɛ̍ mi̍ pūa̍a̍ sɔ̍ŋgā a̍ fa̍ānda̍la̍ŋ nda̍ ā kɔ̍ ba̍lū ndu̍ ma̍ chīŋa̍la᷅ŋ ndu̍ a̍ fa̍āŋnda̍ la̍ŋ.

²⁶ Mɛ̄ɛ̍ māsā bɛ̍ndōo̍ Mo̍wa̍bī o̍ che᷅ māā ō cho̍ chɔ̍ūwo̍ bā tīū le̍, mbo̍ chūā pūa̍a̍ sɔ̍ŋgā a̍ mɔ̄ɔ̄ŋ fāŋndo̍ŋ nda̍ kɛ̄mɔ̄ɔ̍ le̍ ŋɔ᷄mmɛ̍ū (700) mbo̍ kīndī kīndī le̍ mī ndu̍ o̍o̍ sɔ̍la̍ nɛ̄īyo̍ kūmbū māsāa̍ I̍dɔ̄m nda̍ so̍vɛ̄i̍ya̍a̍ ndūa̍a̍ a̍ wa̍ wo̍, le̍ mī ndu̍ o̍o̍ nya̍a̍nu̍ŋ, kɛ̍ ō sɔ̄la̍ fo̍ndā o̍ fo̍ndā le̍.

²⁷ Mɛ̄ɛ̍ o̍ che᷅ le̍nde̍, mbo̍ bīī po̍ ndɔ̍ tāso̍o̍, ō ndu̍ o̍o̍ nɔ̍ mbō mīīŋgu̍ māsāa̍ o̍ fōōfo̍ ndɔ̄ɔ̍ wo̍, mbo̍ sōlī ndu̍ sa̍lā lūāmāa̍ o̍ chīyīī sāāsa̍ chi̍o̍o̍. O̍ ko̍ŋ, mi̍ sīōōŋīī bɛ̄ndūe̍i̍ bīī I̍sɔ̄lūɛ̍i̍ya̍, ma̍ māl, ma̍ mīīŋgu᷄ŋ o̍ lɛ̄ŋndē ndāle̍ŋ ni᷄ŋ.