Māsāā Bɛ̍ndūāā Di̍i̍ŋ Ndūa̍a̍ 2 - Yāu̍ Mɛ̄lɛ̄ka̍a̍

A̍ mɛ̄ɛ̍ Mɛ̄lɛ̄ka̍ ō he᷄l a̍ Īla̍a̍chā ɛ̄chɛ̍nɛ̄ yɛ̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ te̍le̍ŋndo̍ fūūlūū le̍ mī Mɛ̄lɛ̄ka̍ Ya̍a̍wɛ̄ɛ̄ o̍ chu̍a̍ Īla̍a̍chā o̍ hūēīyīī bɛ̄ndūe̍i̍ ni᷄ŋ, mbō kūɛ̄nu᷄ŋ a̍ ndu̍ ɛ̄chɛ̍nɛ̄. Pa̍a̍le̍ pi᷅lɛ̍, mi̍ Īla̍a̍chā nda̍ wāna̍ ndɔ̄ ma̍lāa̍ Īla̍a̍sīā a̍ ma̍l Ki̍lkāl chi̍e̍e̍ ma̍ bīī kɔ̄la̍ŋ. Mɛ̄ɛ̍ nda̍ kūɛ̄ ti᷄ŋ si̍ī,

² mi̍ Īla̍a̍chā di̍mūl Īla̍a̍sīā āā, “Īla̍a̍sīā, chu̍m ya̍ pɔ̍ɔ̍ na̍nu᷄ŋ, Mɛ̄lɛ̄ka̍ Ya̍a̍wɛ̄ɛ̄ vēm ya̍ Bɛ̍tɛ̄ɛ̄l.” Kɛ̍ mi̍ Īla̍a̍sīā di̍mūl ndu̍ āā, “Fāllo̍, I̍ me̍na̍ŋ po̍, ha̍a̍a̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ yōōmū le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ mi̍ nūm bɛ̍ɛ̍ wa᷅ wɔ̄ yōōmū, bā o̍ bā ŋ̄ kɔ̍ na̍a̍ nu᷄m ku̍ā ni̍, I̍ me̍l nu̍m te̍.” O̍ ko̍ŋ, ma̍ kūā nda̍ ndu̍ Bɛ̍tɛ̄ɛ̄l.

³ Mɛ̄ɛ̍ nda̍ fūūlu̍u̍ Bɛ̍tɛ̄ɛ̄l chi̍e̍e̍, mi̍ wānāa̍ su̍a̍ā le̍ Mɛ̄lɛ̄ka̍ wa̍ Bɛ̍tɛ̄ɛ̄l lo̍ŋ a̍ vēēlū Īla̍a̍sīā. Ma̍ nyūnā ndu̍ āā, “Īla̍a̍sīā, ā sīnā pa̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ hāū ma̍sānɔ̍ nu̍mndo̍ chūā mbō kūɛ̄nu᷄ŋ a̍ ndu̍ ɛ̄chɛ̍nɛ̄?” Mi̍ Īla̍a̍sīā di̍mūl nda̍ āā, “I̍ si̍nā, kɛ̍ I̍ ye̍e̍ma̍ mī lā sōō a̍ ndi̍ o̍kɔ̄ɔ̄ le̍.”

⁴ O̍ ko̍ŋ kɔ̍ɔ̍lī, mi̍ Īla̍a̍chā di̍mūl vɛ̄lɛ̄ Īla̍a̍sīā āā, “Chu̍m ya̍ pɔ̍ɔ̍ na̍nu᷄ŋ, Mɛ̄lɛ̄ka̍ Ya̍a̍wɛ̄ɛ̄ o̍ ve᷅m ya̍ Chɛ̄lu̍i̍kō chi̍e̍e̍.” Mi̍ Īla̍a̍sīā di̍mūl ndu̍ āā, “Fāllo̍, I̍ me̍na̍ŋ po̍, ha̍a̍a̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ yōōmū le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ mi̍ nūm bɛ̍ɛ̍ wa᷅ wɔ̄ yōōmū bā o̍ bā ŋ̄ kɔ̍ na̍a̍ nu̍m ku̍ā ni̍, I̍ me᷅l nu̍m te̍.” O̍ ko̍ŋ kɔ̍ɔ̍lī, ma̍ kūā nda̍ ndu̍ Chɛ̄lu̍i̍kō.

⁵ Mɛ̄ɛ̍ nda̍ fūūlu̍u̍ Chɛ̄lu̍i̍kō chi̍e̍e̍, mi̍ wānāa̍ su̍a̍ā le̍ Mɛ̄lɛ̄ka̍ wa̍ Chɛ̄lu̍i̍kō a̍ vēēlū Īla̍a̍sīā ma̍ nyūnā ndu̍ āā, “Īla̍a̍sīā, ā sīnā pa̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ hāū ma̍sānɔ̍ nu̍mndo̍ chūā mbō kūɛ̄nu᷄ŋ a̍ ndu̍ ɛ̄chɛ̍nɛ̄?” Mi̍ Īla̍a̍sīā di̍mūl nda̍ āā, “I̍ si̍nā, kɛ̍ I̍ ye̍e̍ma̍ mī lā sōō a̍ ndi̍ o̍kɔ̄ɔ̄ le̍.”

⁶ O̍ ko̍ŋ kɔ̍ɔ̍lī, mi̍ Īla̍a̍chā di̍mūl vɛ̄lɛ̄ Īla̍a̍sīā āā, “Chu̍m ya̍ pɔ̍ɔ̍ na̍nu᷄ŋ. Mɛ̄lɛ̄ka̍ Ya̍a̍wɛ̄ɛ̄ o̍ ve᷅m ya̍ Chɔ̍ɔ̍dāŋ o̍ pēēlo̍.” Kɛ̍ mi̍ Īla̍a̍sīā di̍mūl ndu̍ āā, “I̍ me̍na̍ŋ po̍, ha̍a̍a̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ yōōmū le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ mi̍ nūm bɛ̍ɛ̍ wa᷅ wɔ̄ yōōmū, bā o̍ bā ŋ̄ kɔ̍ na̍a̍ nu̍m ku̍ā ni̍, I̍ me̍l nu̍m te̍.” O̍ ko̍ŋ, ma̍ hīāū lāchī a̍ kɔ̄la̍ŋ nda̍ ndu̍.

⁷ O̍ ko̍ŋ kɔ̍ɔ̍lī, mi̍ wānāa̍ su̍a̍ā le̍ Mɛ̄lɛ̄ka̍ wa̍ ŋ̄wāŋ be̍le̍-ŋu̍ɛ̍ɛ̍nu̍ a̍ tu̍āl nda̍ kɔ̄ɔ̄lī. Mɛ̄ɛ̍ nda̍ wa̍ fūūlūūwo̍ Chɔ̍ɔ̍dāŋ o̍ pēēlo̍, mi̍ wānāa̍ su̍a̍ā le̍ Mɛ̄lɛ̄ka̍ wa̍ ā lō ti᷄ŋ kɔ̄ɔ̄lī mā nūā nda̍ kɔ̄ɔ̄lī kɔ̄ɔ̄lī. Īla̍a̍chā ni̍ a̍ Īla̍a̍sīā ma̍ fūūlūū o̍ pēēlo̍.

⁸ Mɛ̄ɛ̍ nda̍ fūūlu̍u̍, mi̍ Īla̍a̍chā so̍li᷄ŋ do᷅ma̍ ndɔ̄ le̍cho̍o̍ wo̍ lēkɔ̄ɔ̍. Mbo̍ sīmbūl ndu̍ mbo̍ lūāā mɛ̄ŋnda̍ŋ o̍ pēēlo̍ a̍ ndu̍, mi̍ mɛ̄ŋnda̍ŋ mā kīōlū tɛ̄ɛ̄ŋ mi̍ ma᷅ŋ mā hēl ba̍ā mi̍ ma᷅ŋ mā hēl ba̍ā. O̍ ko̍ŋ, nda̍ ŋi̍ɔ̍ɔ̍ŋ ma̍ kēēkū o̍ lɛ̄ŋndē vēsɛ̍i̍le̍ŋ chōo̍ ma̍ tāŋ.

⁹ Mɛ̄ɛ̍ nda̍ ta᷄ŋ, mi̍ Īla̍a̍chā nyu̍nā Īla̍a̍sīā āā, “Lɔ̍ɔ̍ pa̍ mī ku̍ɛ̄ ō yɛ̄ɛ̍nɛ̍ ŋ̄ yēēma̍ yɛ̄ ya̍ mī to̍sa̍l nu̍m?” Mi̍ Īla̍a̍sīā di̍mūl ndu̍ āā, “I̍ ye̍e̍ma̍ mā tōsa̍ mī sɔ̄la̍ nyi̍na̍ Mɛ̄lɛ̄ka̍a̍ mbō wa̍ yā kɔ̄ɔ̄lī, mɛ̄ɛ̍ o̍ wa̍ nu̍m kɔ̄ɔ̄lī yɛ̍.”

¹⁰ Mi̍ Īla̍a̍chā di̍mūl ndu̍ āā, “Sūɛ̍i̍ ka̍lā ka̍lɛ̄i̍ pi̍la̍ ŋ̄ nyūna̍ ke̍ŋ ni̍. Kɛ̍ bōōndi̍i̍ ya̍ I̍ cho̍ wā kɔ̄la̍ŋ nde̍, tē ā chē ya̍ o̍ kɔ̄la̍ŋ pɛ̍, mɛ̄ɛ̍ ā chō nyi̍nā Mɛ̄lɛ̄ka̍ ŋ̄ nyūna̍ le̍ mbō wa̍ nu̍m kɔ̄ɔ̄lī wo̍ sɔ̄lā. Kɛ̍ tē a̍ chi̍ ya̍ o̍ kɔ̄la̍ŋ te̍, mɛ̄ɛ̍ a̍ sɔ̍lā ni̍ŋ ndu̍ le̍.”

¹¹ Ā lo̍ kɔ̄la̍ŋ a̍ sūūki̍āŋ ndo̍, o̍ lē pīlɛ̍ ni᷄ŋ kpe̍, mi̍ su̍a̍a̍ ā hūŋ a̍ nyɛ̄lā su̍a̍a̍ ā nāŋ nda̍ŋ mi̍ lā lūɛ̄ī nda̍ tɛ̄ɛ̄ŋ. Yīŋnde̍ŋ lē wa̍ nyɛ̄lā lāŋ lē kūmbāā a̍ su̍a̍ā kāŋ lātūlu̍. O̍ ko̍ŋ, mi̍ hūēīyīī bɛ̄ndūe̍i̍ chūā Īla̍a̍chā mi̍ ī hēlnu᷄ŋ a̍ ndu̍ ɛ̄chɛ̍nɛ̄.

¹² Mɛ̄ɛ̍ Īla̍a̍sīā che᷅ ndu̍ hēlnɔ᷄ŋndo̍ o̍ hūēīye̍ ni᷄ŋ, mbo̍ kōŋūl chōo̍ cho̍o̍ kpe̍le̍ŋ āā, “O̍o̍ fi̍nyā nūu̍, fi̍nyā nūu̍ kūɛ̄nu᷄ŋ fɔ̍. Ku̍u̍ba̍nɔ̍ sɔ̍ŋgā le̍ I̍sɔ̄lūɛ̍i̍ya̍ o̍ nyɛ̄lā su̍a̍ā ā nāŋ nda̍ŋ chōo̍ wo̍ ō kūɛ̄nu᷄ŋ ha̍ū fɔ̍.” Mɛ̄ɛ̍ Īla̍a̍chā nyu̍m mūndū, mi̍ Īla̍a̍sīā sɛ̍ɛ̍sīa̍ŋ do᷅māa̍ lēkɔ̄ɔ̍ a̍ kɔ̄l tāmbɛ̍i̍yo̍.

¹³ O̍ ko̍ŋ kɔ̍ɔ̍lī, mi̍ Īla̍a̍sīā chu̍ā dōma̍ Īla̍a̍chā de̍l lo̍, mbo̍ bīī mīīŋgōo̍. Mɛ̄ɛ̍ o̍ fu̍u̍lu̍u̍ Chɔ̍ɔ̍dāŋ o̍ pēēlo̍, mbo̍ sīm o̍ pīo̍o̍ kɔ̄ŋgɔ̍.

¹⁴ Mbo̍ lūāā mɛ̄ŋnda̍ŋ o̍ pēēlo̍ a̍ dōma̍ Īla̍a̍chā wa̍ ndu̍ ko̍ŋ o̍ bā wo̍. Mɛ̄ɛ̍ o̍ wa̍ mɛ̄ŋnda̍ŋ lɔ̄ɔ̍, mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ Īla̍a̍chā wo̍, kūɛ̍ɛ̍nɛ̍ ŋ̄ chō yɛ̍? O̍ ko̍ŋ, mi̍ mɛ̄ŋnda̍ŋ mā kīōlū tɛ̄ɛ̄ŋ mbo̍ tāŋ lēe̍lo̍ō.”

¹⁵ Mɛ̄ɛ̍ o̍ ta̍ŋ, mi̍ wānāa̍ su̍a̍ā le̍ Mɛ̄lɛ̄ka̍ wa̍, a̍ chɛ̍ŋ Chɛ̄lu̍i̍kō ma̍ chā nyɛ̄ Īla̍a̍sīā o̍ to̍sa̍ wo̍ wa̍ ā dīmī āā, “Nyi̍na̍ Mɛ̄lɛ̄ka̍ wa̍ Īla̍a̍chā kɔ̄ɔ̄lī wo̍ ō tōl Īla̍a̍sīā kɔ̄ɔ̄lī.” O̍ ko̍ŋ, ma̍ kɔ̍ bɔ̍ŋā ndu̍, ma̍ bāŋ ndu̍ wūla̍ŋ o̍ lābɛ̄ŋgu̍ ni᷄ŋ.

¹⁶ Ma̍ lō o̍ ko̍ŋ ma̍ dīmūl Īla̍a̍sīā āā, “Ŋ̄ nɔ̄ pūa̍a̍ ŋ̄wāŋ be̍le̍-ŋu̍ɛ̍ɛ̍nu̍ na̍nu᷄ŋ, ndu̍yɛ̍ nda̍ kpo̍u̍ wānāā dīāllūŋ kālāa̍ pīla̍ nda̍ chō ni̍. Ŋ̄ vīōmnu᷅ŋ ndɔ̄ nda̍ mā kɔ̍ nu̍u̍wā māsānɔ̄ nu̍mndo̍. Kɛ̄lɛ̄ŋgāā mī nyi̍na̍ Mɛ̄lɛ̄ka̍ Ya̍a̍wɛ̄ɛ̄ wo̍ ō chu̍a̍ ndu̍ dɔ̍ɔ̍ mbō kūɛ̄nu᷄ŋ a̍ ndu̍ o̍ pēmbīī pīlɛ̍ chōo̍, ɔ̄ɔ̄ o̍ kpōlōŋ kpo̍lōŋ pīlɛ̍ ni᷄ŋ mbō wānu̍ŋ ndo̍ŋ.” Mi̍ Īla̍a̍sīā di̍mūl nda̍ āā, “Lā vi̍ām wānā o̍ wānā le̍ ndu̍ nūūwā le̍.”

¹⁷ Kɛ̍ mi̍ wāŋnda̍ ha̍a̍a̍ hīāū lāchī a̍ ndi̍ kīndīlāa̍. O̍ ko̍ŋ, mi̍ si̍ɔ̍mbu̍la̍ŋ lā bīī Īla̍a̍sīā, mbō chɛ᷅l nda̍ dīōm mbo̍ dīmūl nda̍ āā, “Mɛ̄ɛ̍ lā vīo̍m nda̍.” Ma̍ vīām pūa̍a̍ ŋ̍wa᷅ŋ be̍le̍-ŋu̍ɛ̍ɛ̍nu̍a̍a̍ ha̍ā le̍ mā kɔ̍ nu̍u̍vīāā Īla̍a̍chā. Pālɛ̍i̍ ī yāa̍ ā chō ndu̍ nūūwāa̍, kɛ̍ ā sēēlu̍ŋ ndu̍ le̍.

¹⁸ Ma̍ cha᷄ŋ ma̍ mīīŋgū Chɛ̄lu̍i̍kō nāa̍ Īla̍a̍sīā o̍ wa̍ wa̍. Mbo̍ di̍mūl nda̍ āā, “I̍ di̍mu̍l nya̍ māā lā vi̍ām wānā o̍ wānā le̍, mi̍ lā sɛ̄ɛ̄ŋgīāā.”

A̍ Sɔ̄ɔ̍ŋ kɔ̄ndɔ̄fi̍li̍ŋ Īla̍a̍sīā to̍sa̍ wo̍ŋ o̍kɔ̄ɔ̄

¹⁹ O̍ ko̍ŋ kɔ̍ɔ̍lī, mi̍ wāŋnda̍ Chɛ̄lu̍i̍kō a̍ cha̍ŋ ma̍ kūā nāa̍ Īla̍a̍sīā chu̍a̍. Ma̍ kɔ̍ di̍mūl ndu̍ āā, “Fāllo̍, chi̍e̍e̍ nāa̍ ho̍ō mɛ̄ɛ̍ nūm pi̍la̍ cha᷅ nu̍a̍ā yɛ̍, chi̍e̍e̍ kɛ̍ndɔ̄ɔ̍ pi̍la̍ o̍ cho̍ ni̍. Kɛ̍ mɛ̄ŋmā na̍a̍ ŋ̄ nɔ̄ na̍nu᷄ŋ nda̍ŋ mā bɛ̄nda̍ le̍. Le̍ he̍ī tɔ̄lɔ̄ɔ̄ o̍ tɔ̄lɔ̄ɔ̄ ō ni᷅ŋ lɛ᷅ŋnde̍ŋ nde᷅ŋ te̍.”

²⁰ Mi̍ Īla̍a̍sīā di̍mūl nda̍ āā, “Lā dɔ̄u̍ hɛ̍lle̍ o̍ hɛ̄ŋgɛ̍i̍ kpa̍yāŋndo̍ ni᷄ŋ mī lā chūu̍ ya̍.” Mi̍ wāŋnda̍ kɔ̍ dɔ̍ū hɛ᷄lle̍ ma̍ chūū ndu̍.

²¹ O̍ ko̍ŋ, mi̍ Īla̍a̍sīā ku̍ā o̍ pēēlo̍ mbo̍ kɔ̍ wu̍ū hɛ̄li̍i̍ ke̍ŋ o̍ mɛ̄ŋnda̍ŋ ni᷄ŋ, mbo̍ dīmī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍, ō dīmī āā, ‘Chɔ̍ŋ a̍ hāū I̍ si̍i̍ŋgu̍u̍ mɛ̄ŋnda̍ŋ na̍nu᷄ŋ mɛ̄ŋmā kɛ̄ndɛ̄. Chɔ̍ŋ ni᷅ŋ a̍ hāū mbō kūɛ̄ a̍ lāchī kɛ᷅, pīɔ̍m o̍ pīɔ̍m yɔ̍nūŋ ndɛ̍ o̍ chi̍o̍o̍ ho̍ō ni᷄ŋ le̍ sa̍bū mɛ̄ŋnda̍ŋ ma᷅ŋ te̍. Ndu̍yɛ̍ tɔ̄lɔ̄ɔ̄la̍ŋ bɛ̍ɛ̍ lā kɛ̍ɛ̄ lɛ̍ nāŋɔ̄ɔ̍ o̍ lɛ̄ŋnde̍ŋ nde᷅ŋ ni᷄ŋ le̍ sa̍bū mɛ̄ŋnda̍ŋ ma᷅ŋ te̍.’ ”

²² Ndu̍yɛ̍ mi̍ ī yɔ̄nu᷄ŋ mɛ̄ɛ̍ Īla̍a̍sīā di̍mi̍ yɛ̍, mi̍ mɛ̄ŋnda̍ŋ ma᷅ŋ mā sīmnu᷄ŋ mɛ̄ŋmā kɛ̄ndɛ̄. Ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍ mā chō wɔ̄ o̍ bā kōŋ chōo̍.

²³ O̍ ko̍ŋ kɔ̍ɔ̍lī, mi̍ Īla̍a̍sīā ma᷅l Chɛ̄lu̍i̍kō mbo̍ bīī kɔ̄la̍ŋ Bɛ̍tɛ̄ɛ̄l. Mɛ̄ɛ̍ o̍ fu̍la̍ chi̍e̍e̍ pu᷅m mbo̍ wā hīōūwɔ̄ɔ̍, mi̍ pūa̍a̍mbūa̍a̍ o̍ chi̍e̍e̍ ko̍ŋ ni᷄ŋ a̍ tu̍āl ndu̍ kɔ̄ɔ̄lī, mā kūā a̍ ndu̍ māmɔ̄ɔ̍ mā dīmī āā, “Fāl te̍mbe̍llo̍ fa̍ŋa̍ŋ o̍ na̍a̍ lo̍ chi̍e̍e̍ na̍nu᷄ŋ. Ŋ̄ yēēma̍ nu̍m na̍nu᷄ŋ te̍, kɔ̍.”

²⁴ Mi̍ Īla̍a̍sīā mu̍li᷄ŋ mbo̍ tōfā nda̍ hɔ̄lla̍, mbo̍ tōsā mi̍ Mɛ̄lɛ̄ka̍ Ya̍a̍wɛ̄ɛ̍ o̍ tu̍sī nda̍ nyɛ̄ pālāa̍ chōo̍. Mi̍ su̍lu̍ku̍a̍ā lāāndūa̍a̍ fūlā yōndōo̍ ni᷄ŋ nda̍ ŋi̍ɔ̍ɔ̍ŋ, ma̍ hu᷄ŋ de᷅l pūa̍a̍mbūa̍a̍ ha̍ā chōo̍, ma̍ sɛ̄ɛ̄sīāā ŋ̄wāŋ be̍le̍ hi̍ɔ̍ɔ̍lu̍ a̍ wānāā ŋīɔ̍ɔ̍ŋ nda̍ tɛ̄ɛ̄ŋ, ma̍ dīū nda̍.

²⁵ O̍ ko̍ŋ kɔ̍ɔ̍lī, mi̍ Īla̍a̍sīā ma᷅l lo̍ŋ mbo̍ kūā o̍ Pēmbīī Ka̍mɛ̄lve̍ chōo̍. Mɛ̄ɛ̍ o̍ chɛ̍ŋ ndo̍ŋ, mbo̍ mīīŋgū Sāme̍e̍līāā chi̍e̍e̍.