Kɔ̄li̍ŋtīāŋ Di̍i̍ŋ Ndɔ̄ɔ̍ 5 - Yāu̍ Mɛ̄lɛ̄ka̍a̍

¹ Ŋ̄ sīnā māā Tɛ̍ndīi̍ na̍a̍ ŋ̄ chō ho̍ō lēni᷄ŋ ndo̍, ndu̍ yɔ̍nūŋ māā dīāllūŋ na̍a̍ ŋ̄ nɔ̄ mu᷅ŋ ndo̍ŋ ni̍, tē ō tāmbu̍ pɛ̍, Mɛ̄lɛ̄ka̍ nɔ̄ chīɛ̄īyo̍ le̍ na̍a̍ o̍ fo̍ndāŋ ndɔ̄ɔ̍ ō ndu̍ pi̍la̍ to̍o̍si̍a̍a̍ wo̍. Ndu̍yɛ̍, ndu̍ ndu̍ le̍ fɛ̍ɛ̍ŋ a̍ fɛ̍ɛ̍ŋ ō te̍mbū le̍.

² Bōōnde̍i̍ he̍ī ā sāŋgāā na̍a̍ ŋ̄ chō ni᷅ŋ a̍ dīāllūŋ na̍a̍ ŋ̄ nɔ̄ mu᷅ŋ chi̍e̍ēŋ na̍ŋ ndo̍ŋ ni̍. Yēēmɛ̍i̍ chō ni᷅ŋ na̍a̍ ta̍u̍ ta̍u̍ māā ŋ̄ sɔ̄la̍ ni᷅ŋ bɛ̍ɛ̍ ko̍ di̍a̍llūŋ Mɛ̄lɛ̄ka̍ nɔ̄ mu̍ŋ le̍ na̍a̍ ɛ̄chɛ̍nɛ̄ wo̍ŋ, mī ŋ̄ wōūnu̍ŋ mu̍ŋ.

³ Mu̍ŋ mu̍ŋ tē ŋ̄ wōūnu̍ŋ mu̍ŋ pɛ̍, fɛ̍li̍ ve᷅ lɛ̍ na̍a̍ le̍.

⁴ Ŋ̄ chō ni᷅ŋ ā sāŋgāā yɔ᷅kɔ̍ɔ̄ a̍ wōlɔ̄ɔ̄ lūsu̍lɛ̍i̍ dīāllo̍ŋ mu᷅ŋ chi̍e̍ēŋ na̍ŋ. Kɛ̍ ndu̍yɛ̍, ō cho̍ ma̍chu̍a̍ā mī ŋ̄ yēēma̍ māyēēmāā le̍ dīāllūŋ mu᷅ŋ fāŋā le̍. Nyɛ̄ na̍a̍ ŋ̄ yēēma̍ wo̍ ndu̍ cho̍ ni̍ māā Mɛ̄lɛ̄ka̍ ō chu̍a̍ ko̍ di̍a̍llūŋ o̍ to̍o̍si̍a̍a̍ le̍ na̍a̍ hūnɔ̄ɔ̄ ki̍o̍o̍ fɛ̍ɛ̍ŋ ɛ̄chɛ̍nɛ̄ wo̍ŋ, mbō wōu̍ na̍a̍ mu̍ŋ o̍ dīāllūŋ na̍a̍ ŋ̄ nɔ̄ mu᷅ŋ chi̍e̍ēŋ na̍ŋ ndo̍ŋ chōo̍. Ŋ̄ hɛ̄na̍ŋ mbō wōu̍ na̍a̍ mu̍ŋ le̍ mī dīāllūŋ na̍a̍ ŋ̄ nɔ̄ mu᷅ŋ chi̍e̍ēŋ na̍ŋ ndo̍ŋ, ŋ̍ nɔ̍ mu᷅ŋ mī ŋ̄ vī wo̍ŋ, mī yōōmu̍ nɔ̍ la̍mɛ̍ɛ̍lu̍ le̍ wo̍ ō māŋga̍la̍ mu̍ŋ.

⁵ Mɛ̄lɛ̄ka̍ pi̍la̍ ndu̍ bɛ̍ɛ̍ndi̍a̍a̍ na̍a̍ le̍ mbō hu᷄ŋ ma̍ŋgālā na̍a̍ o̍ nɛ̄īyo̍ ho̍ō ni᷄ŋ ni̍. Ndu̍yɛ̍, ō vēm Nyi̍nā ndɔ̄ɔ̍ le̍ mbō wa̍ na̍a̍ kɔ̄ɔ̄lī le̍ wāa̍ tāāmāsi̍o̍o̍ le̍ nyɛ̄ o̍ nyɛ̄ o̍ kɛ̍si̍ le̍ na̍a̍.

⁶ Le̍la̍ŋ, te̍le̍ŋ o̍ te̍le̍ŋ kɔ̄ltā nāāla̍ŋ lā chō lā sīmūlāā yi̍. Na̍a̍ ŋ̄ sīnā māā tē ŋ̄ nɔ̄ wɔ̄ dīāllo̍ŋ mu᷅ŋ chi̍e̍ēŋ na̍ŋ pɛ̍, mɛ̄ɛ̍ ŋ̄ chō wɔ̄ ā pīɔ̄ūwa᷅ŋ tɛ̍ɛ̄ŋ a̍ ɛ̄chɛ̍nɛ̄.

⁷ Le̍la̍ŋ, yōōmū su̍u̍ na̍a̍ wānāā lāāla᷄ŋnda̍ ŋ̄ chō ho̍ō ni᷄ŋ ndo̍, ō cho̍ su̍ɛ̍i̍ sɔ̍lāā nyɛ̄m wānā cha᷅ a̍ lēhɔ̄l te̍. Ō chō māchūāā sūɛ̍i̍ wānā nɔ̍ mā dɔ̄ū tīīnda᷄ŋndo̍ o̍ Mɛ̄lɛ̄ka̍ ni᷄ŋ le̍ nyɛ̄m wānā cho̍ chɔ᷅ le̍ wo̍ŋ.

⁸ Kɔ̄ltā nāāla̍ŋ lā chō lā sīmūlāā yi̍. Nyɛ̄ na̍a̍ ŋ̄ yēēma̍ wo̍ cho̍ ni̍ māā dīāllūŋ na̍a̍ ŋ̄ nɔ̄ mu᷅ŋ chi̍e̍ēŋ na̍ŋ ndo̍ŋ māā mu̍ŋ fa̍ŋa̍ŋ ni᷅ŋ ko̍ mī ŋ̄ kūɛ̄nu᷄ŋ nāa̍ Māsānɔ̄ɔ̍ Mɛ̄lɛ̄ka̍ chūā.

⁹ Kɛ̍ ndu̍yɛ̍, ō wa̍ bɛ̍ɛ̍ mī ŋ̄ wa̍ chi̍e̍ēŋ na̍nu᷄ŋ, kɛ̄lɛ̄ŋgāā mī ŋ̄ fāŋa̍ŋ chi̍e̍ēŋ na̍nu᷄ŋ, nyɛ̄ na̍a̍ ŋ̄ yēēma̍ mbo̍ hīāū nyɛ̄ o̍ nyɛ̄ fe̍e̍ wo̍, ndu̍ cho̍ ni̍ māā ŋ̄ tōsa̍ nyɛ᷅ Mɛ̄lɛ̄ka̍ ō nāŋ kɔ̍l lo̍.

¹⁰ Kāni̍ fu̍u̍le̍, na̍a̍ kpo̍u̍ ŋ̄ chō lākɔ̄ lāsīsi̍ Ki̍li̍tī o̍ hɔ̄l mbō kɔ̄ɔ̄sa̍ a̍ na̍a̍. Bōōndi̍i̍ ke̍ŋ Mɛ̄lɛ̄ka̍ chō wānā o̍ wānā nyɛ᷅ o̍ nɔ̍ le̍ sɔ̄lāa̍ wo̍ ke̍ ni̍. Ndu̍yɛ̍, mɛ̄ɛ̍ kūɛ̍i̍la̍ nu̍mnda̍ŋ o̍ chi̍e̍ēŋndo̍ chōo̍ la̍ wa᷅ yɛ̍, le̍nde̍ ŋ̄ sɔ̄lā ni̍. Tē ō kɛ̄ndɔ̄ɔ̍ ŋ̄ tōsa̍ ni̍, ō ke̍ nu̍m ō kɛ̄ndɔ̄ɔ̍. Tē ō wɔ̄ɔ̍ŋndo̍ ŋ̄ tōsa̍ ni̍, a̍ sɔ̍la̍ ō wɔ̄ɔ̍ŋndo̍.

Nyɛ̄ Chi̍i̍sū to̍sa̍l na̍a̍ wo̍ sīīŋgu̍u̍ na̍a̍ ndi̍a̍a̍mɔ̍ɔ̍wa̍a̍ Mɛ̄lɛ̄ka̍

¹¹ Le̍la̍ŋ, mɛ̄ɛ̍ na̍a̍ ŋ̄ nɔ̄ sīōōŋīi̍ Māsānɔ̄ɔ̍ Mɛ̄lɛ̄kɛ̍i̍ yɛ̍, le̍la̍ŋ na̍a̍ ŋ̄ chō kīndīo̍o̍ o̍ nɛ̄i̍ o̍ nɛ̄ī ni̍ŋ ni̍, le̍ mī ŋ̄ tōsa̍ mī wāŋnda̍ mūli̍ŋ o̍ Mɛ̄lɛ̄ka̍ lo̍. Ndu̍yɛ̍, nyɛ̄ o̍ nyɛ̄ fe̍e̍ cho̍ o̍ kɔ̄ltā nāāla̍ŋ ni᷄ŋ Mɛ̄lɛ̄ka̍ sīnā. Ndu̍yɛ̍, I̍ la̍a̍la̍ŋ māā nya̍ bɛ̍ɛ̍ lā sīnā o̍ kɔ̄ltā nyāla̍ŋ ni᷄ŋ wānāā su̍u̍ na̍a̍ ŋ̍ chō wa̍.

¹² Kɛ̍ ndu̍yɛ̍, dīōmndā ya̍ I̍ cho̍ la᷅ŋ dīmīo̍o̍ la̍ŋ, ō cho̍ yo̍ŋgā le̍ na̍a̍ ŋ̄ chō vɛ̄lɛ̄ kīōlɔ̄ɔ̍ a̍ na̍a̍ pi̍la̍ o̍kɔ̄ɔ̄ le̍. Nyɛ̄ na̍a̍ ŋ̄ hɛ̄na̍ŋ ndo̍ ndu̍ cho̍ ni̍ māā mī lā nɔ̄ nyɛ̄ kpe̍e̍kpe̍i̍ nya̍ nɔ̄lā mī lā kēlū yōŋgā a̍ na̍a̍ o̍kɔ̄ɔ̄ wo̍. Ko̍ŋ to̍sā ni̍ mī lā nɔ̄ dīōm nya̍ mūlūl wa᷅ŋnda̍ ha̍ā wo̍, nda̍ yɔ̍nūŋ ni̍ māā wānāa̍ nu̍ā wāŋndo̍ o̍ hɔ̄lla̍, ā bu̍u̍lāŋ a̍ mɛ̄ɛ̍ kɔ̄l ndɔ̄ɔ̍ ō chō yɛ̍ le̍, kɛ̍ mā chīi̍ bɛ̍ɛ̍ yo̍ŋgāa̍ kīōlɔ̄ɔ̄ a̍ ndu̍ o̍kɔ̄ɔ̄ māā ō chō wānā kɛ̍ndɛ̄ wa̍.

¹³ Wāŋnda̍ ā pūm ā chu̍a̍ na̍a̍ māā sēēmāa̍ na̍a̍ ŋ̄ sēēma̍ ni̍. Tē ō wa̍ yɛ̄ sēēmāa̍ lēkɛ̍ndɛ̍ī pɛ̍, mɛ̄ɛ̍ le̍ Mɛ̄lɛ̄ka̍ na̍a̍ ŋ̄ sēēma̍ ni̍. Kɛ̍, tē ō wa̍ yɛ̄ pɛ̍ māā ŋ̄ sēēma̍ le̍, mɛ̄ɛ̍ le̍ nya̍ na̍a̍ ŋ̄ chō le̍nde̍ ni̍.

¹⁴ Kāni̍ fu̍u̍le̍, kāālā Ki̍li̍tī ka̍a̍la̍ na̍a̍ wo̍ ndu̍ cho̍ wa̍llo̍ a̍ na̍a̍ ni̍. Ndu̍yɛ̍, he̍ī yɔ̄nu̍ŋ, kāni̍ fu̍u̍le̍, ŋ̄ bīī ndi̍ tōnya̍ māā wānā pi᷅lɛ̍ sɔ̍la̍ pīɔ̍mndo̍ le̍ ŋ̄wāŋndā chīe̍e̍ kpo̍u̍ ni̍. Le̍la̍ŋ, tē ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ pīɔ̍m o̍ sɔ̍la̍ ko̍ŋ ndo̍ mɛ̄ɛ̍ wāŋnda̍ kpo̍u̍ a̍ vi᷅ wu̍ ko̍ŋ ni̍.

¹⁵ Ō sɔ̄la̍ pīɔ̍mndo̍ le̍ ŋ̄wāŋndā chīe̍e̍ kpo̍u̍ le̍ mī wānāa̍ cho̍ yōōmū wa̍ ā ma᷄l fāfa̍la̍ tɔ̄nɔ̍ nda̍ pi̍la̍a̍. O̍ ko̍ŋ kɔ̍ɔ̍lī, Ki̍li̍tī o̍ vi᷅ le̍ nda̍ mbo̍ mīīŋgū yōōmū le̍ nda̍ wo̍, mā fāfa̍la̍ le̍ tɔ̄nɔ̍ ndɔ̄ɔ̍.

¹⁶ Le̍la̍ŋ, chɔ̍ŋ ni᷅ŋ a̍ bōōnde̍i̍ he̍ī mbō kūɛ̄ a̍ lāchī kɛ᷅, ŋ̄ nu̍ē lɛ̍ wāŋndo̍ o̍ nɛ̄i̍ īwāna̍ chi̍e̍e̍ya̍ chōo̍ le̍. O̍ tāse̍la̍ ndɔ̄ɔ̍, o̍ nɛ̄i̍ īwāna̍ chi̍e̍e̍ya̍a̍ chōo̍ ko̍ na̍a̍ ŋ̄ wa̍ Ki̍li̍tī nūa̍a̍ ni̍. Kɛ̍ ndu̍yɛ̍, ō cho̍ lɛ̍ o̍ nɛ̄ī ko̍ŋ chōo̍ le̍ na̍a̍ ŋ̄ nūā lɛ̍ ndu̍ le̍.

¹⁷ Le̍la̍ŋ, wānā o̍ wāna̍ wa̍ pɛ̍ di̍ōm pīlɛ̍ nda̍ Ki̍li̍tī, wānā ko̍ŋ ō sīmnu᷄ŋ wa̍nā sɛ̍nɛ̄ī. Mī wāna̍ chi̍e̍e̍yɛ̍ī ndūɛ̄ī pa̍a̍ndūe̍i̍ ndi̍ fa̍ŋa̍ŋ mbo̍ sɔ̄lā wāna̍ chi̍e̍e̍yɛ̍ī sɛ̄nɛ̄īye̍.

¹⁸ Mɛ̄lɛ̄ka̍ pi̍la̍ ndu̍ to̍sa̍ sūɛ̍i̍ he̍ī ni̍. Ō tōsa̍ mi̍ ŋ̄ mīīŋgū dīōm pīlɛ̍ na̍a̍ nda̍ā. Ndu̍yɛ̍, o̍ sa̍bu̍ Ki̍li̍tīo̍o̍ ni᷄ŋ o̍ to̍sa̍ he̍ī ni̍. O̍ ko̍ŋ kɔ̍ɔ̍lī, mbo̍ kē na̍a̍ wa̍llo̍ le̍ tōsāa̍, ndu̍ yɔ̍nūŋ ni̍ māā na̍a̍ bɛ̍ɛ̍ mī ŋ̄ tōsa̍ mī wāŋnda̍ ā pīli̍a̍a̍ ā mīīŋgu̍ dīōm pīlɛ̍ a̍ ndu̍.

¹⁹ Ko̍ŋ cho̍ ni̍, yōōŋgū na̍a̍ ŋ̄ dīmu̍l wāŋnda̍ wo̍, ndu̍ cho̍ ni̍ māā Mɛ̄lɛ̄ka̍ chō tōsā o̍ sa̍bu̍ Ki̍li̍tīo̍o̍ ni᷄ŋ sa̍na̍a̍ mā mīīŋgu̍ dīōm pīlɛ̍ nda̍ ŋ̄wāŋndā chīe̍e̍ kpo̍u̍. Yɔ̄ŋndā wɔ̄ɔ̍ŋndā nda̍ tōsa̍ la̍ŋ, Mɛ̄lɛ̄ka̍ ō chɔ᷄m nda̍ la̍ŋ chōo̍ le̍. Ndu̍yɛ̍, mbo̍ vīām na̍a̍ a̍ yōōŋgōo̍ ho̍ō le̍ mī ŋ̄ dīmu̍l wāŋnda̍ mɛ̄ɛ̍ ndu̍ Mɛ̄lɛ̄ka̍ ō tōsā mā mīīŋgu̍ dīōm pīlɛ̍ nda̍ ŋ̄wāŋndā chīe̍e̍ yɛ̍.

²⁰ Le̍la̍ŋ, wānāā Ki̍li̍tī ve᷅m sɔ̍ŋgɔ̍ ndɔ̄ɔ̍ wa̍ na̍a̍ ŋ̄ chō ni̍. Tē ō wa̍ māā yɔ̄ŋɔ̄ɔ̄ pɛ̍, Mɛ̄lɛ̄ka̍ pi̍la̍ cho̍ māchūāā nya̍ dɛ̄ɛ̄nīa̍a̍ o̍ sa̍bū nāa̍ ni᷄ŋ. Le̍la̍ŋ, ŋ̄ chō nya̍ nyɔ̄ɔ̄lōo̍ sɔ̍ŋgɔ̍ Ki̍li̍tīo̍o̍ māā lā chɛ᷄l mī Mɛ̄lɛ̄ka̍ tōsa̍ mī lā mīīŋgu̍ dīōm pīlɛ̍ nya̍ nda̍ā.

²¹ Ki̍li̍tī to̍sa̍ yɔ᷅ŋ o̍ yɔ̄ŋ wɔ̄ɔ̍ŋ te̍. Kɛ̍ ndu̍yɛ̍, mi̍ Mɛ̄lɛ̄ka̍ hāndū ndu̍ yɔ̄ŋndā nāāla̍ wɔ̍ɔ̍ŋnda̍ŋ chōo̍ le̍ dɛ̍nɛ̍ nāā kɛ̍ndɔ̄ɔ̍. He̍ī yɔ̄nu̍ŋ le̍ mī Mɛ̄lɛ̄ka̍ tōsa̍ mī ŋ̄ sīmnu᷄ŋ wa̍nāā sa̍kpō ndu̍ pi̍la̍ o̍ hɔ̄l sa̍na̍a̍ o̍ sa̍bu̍ Ki̍li̍tīo̍o̍ ni᷄ŋ.