Kɔ̄li̍ŋtīāŋ Di̍i̍ŋ Ndɔ̄ɔ̍ 4 - Yāu̍ Mɛ̄lɛ̄ka̍a̍

Na̍a̍ ŋ̍ nɔ̍ yōōŋgū kɛ̄ndɔ̄ɔ̍ ho̍ō wa̍ ŋ̄ cho̍ nyɛ᷅ o̍ nyɛ̄ le̍

¹ Mɛ̄lɛ̄ka̍ mūli̍ māmūlīāā kɔ̄llo̍ o̍ na̍a̍ lo̍, le̍ he̍ī o̍ chu̍a̍ wa̍llo̍ ho̍ō chɔ̍ ni̍ mbo̍ kē na̍a̍ le̍ tōsāa̍. Le̍la̍ŋ, ŋ̄ vi᷅ ŋ̍di̍a̍l kpo̍so̍ŋ te̍.

² Ndu̍yɛ̍, sɔ̄ɔ̍ŋ lāsi̍ɔ̍mbu̍ŋ wāŋnda̍ tōsā o̍ vīōŋnɔ᷄ŋndo̍ ni᷄ŋ ndo̍ŋ, na̍a̍ na̍a̍ bālā nāāla̍ cho̍ o̍ mu̍ŋ ni̍ŋ te̍. Na̍a̍ na̍a̍ ŋ̄ chɛ᷅l mī ŋ̄ hūi̍ wānā o̍ wānā le̍. Ndu̍yɛ̍, ŋ̄ chɛ᷅l mī ŋ̄ māŋga̍la̍ sūɛ̍i̍ Mɛ̄lɛ̄kɛ̍i̍ o̍ nɛ̄ī o̍ nɛ̄ī che᷅le̍ŋ ni᷄ŋ te̍. Mɛ̄lɛ̄ka̍ pi̍la̍ sīnā māā tōnya̍a̍ na̍a̍ ŋ̄ chō wāŋnda̍ dīmūllo̍ kpe̍nde̍ke̍le̍ ni̍. Le̍ he̍ī, ŋ̄ nɔ̄ o̍ kɔ̄l māā wānā o̍ wānā nɔ̍lā mbō tɛ̄nda̍ se̍īlē kɛ̄ndɛ̄ a̍ na̍a̍ o̍kɔ̄ɔ̄.

³ Le̍la̍ŋ, Yōōŋgū Kɛ̄ndɛ̍ Mɛ̄lɛ̄ka̍ na̍a̍ ŋ̄ chō ho̍ō dīmīo̍o̍ wo̍ chō kpe̍nde̍ke̍le̍. Kɛ̍, tē ō wa̍ yɛ̄ sūɛ̍i̍ cho̍ ī kūmbāā wānā o̍ hɔ̄l pɛ̍, mɛ̄ɛ̍ dɔ̍ɔ̍ mbō wa̍ wānāa̍ cho̍ kɔ̄la̍ŋ o̍ fo̍ndāŋ nyɛ̄ pālāa̍ wa̍ su̍e̍e̍ o̍ hɔ̄l.

⁴ Wāŋnda̍ ha̍ā, nda̍ yɔ̍nūŋ ni̍ māā wānāa̍ nɔ̍ la̍a̍la᷄ŋ a̍ yōōŋgū kɛ̄ndɔ̄ɔ̍ ho̍ō le̍ wa̍. Sēta̍nā o̍ cho̍ mɛ̄lɛ̄ka̍ le̍ chi̍e̍ēŋ yɔ̄ŋ wɔ̄ɔ̍ŋndo̍ ho̍ō wo̍ ō tōsa̍ ā si̍nā su̍ɛ̍i̍ Mɛ̄lɛ̄kɛ̍i̍ pɛ̄ŋgu̍ le̍. Ndu̍yɛ̍, ō tōsa̍ mātōsāā he̍ī yɔ̄ŋi̍ nda̍ chɔ̍ nyɛ᷅ wa̍wo̍ŋ cho̍ nda̍ dīōndɔ̄ɔ̍ chōo̍ wo̍. Ndu̍ yɔ̍nūŋ ni̍ māā Ki̍li̍tī o̍ cho̍ Mɛ̄lɛ̄ka̍ vēla᷅ŋ ndɔ̄ kpe̍e̍kpe̍i̍yo̍ wo̍ yōōŋgū kɛ̄ndɔ̄ɔ̍ a̍ nāŋɔ̄ɔ̄ ndɔ̄ɔ̍ o̍kɔ̄ɔ̄.

⁵ O̍ yōōŋgū kɛ̄ndɔ̄ɔ̍ ho̍ō dīmīo̍o̍ ni᷄ŋ, ŋ̄ chɔ᷄m na̍a̍ pi̍la̍ le̍. Chi̍i̍sū Ki̍li̍tī ndu̍ na̍a̍ ŋ̄ chō wāŋnda̍ chɔ̄mndo̍ ni̍ māā ndu̍ cho̍ Māsānɔ̄ɔ̍ Mɛ̄lɛ̄ka̍ ni̍. Nyɛ̄ na̍a̍ ŋ̄ nɔ̄ mī ŋ̄ dīmi̍ a̍ na̍a̍ pi̍la̍ o̍kɔ̄ɔ̄ wo̍ ndu̍ ko̍ cho̍ ni̍ māā bu̍ɛ̍īyāā nyāa̍ na̍a̍ ŋ̄ chō ni̍, kāni̍ fu̍u̍le̍ le̍ sa̍bu̍ Chi̍i̍sōo̍.

⁶ Mɛ̄lɛ̄ka̍ o̍ di̍mi̍ ho̍ō āā, “Nyɛ̄ wa̍wo̍ŋndo̍ ō dīōndu̍ nāa̍ nyūmnda̍ŋ mā chō wa̍” wo̍, ndu̍ to̍sa̍ ni̍ mi̍ nyɛ̄ wa̍wo̍ŋndo̍ ho̍ō hūŋ o̍ kɔ̄ltā nāāla̍ŋ ni᷄ŋ. Ndu̍yɛ̍, he̍ī yɔ̄nu̍ŋ le̍ mī nyɛ̄ wa̍wo̍ŋndo̍ ho̍ō tōsa̍ mī ŋ̄ sīna̍ nāŋɔ̄ɔ̍ Mɛ̄lɛ̄ka̍a̍ o̍ cho̍ dīōndɔ̄ɔ̍ Ki̍li̍tī o̍ hɔ̄l lo̍.

⁷ Kɛ̍ ndu̍yɛ̍, na̍a̍ sūllo̍ ho̍ō chō o̍ bā wa̍, ŋ̄ chō māchūāā mɛ̄ɛ̍ kpɛ̍ɛ̍nɛ̍ŋ pūūlo᷄ŋ chō yɛ̍, ŋ̄ cho̍ nyɛ᷅ o̍ nyɛ̄ le̍. Le̍ sa̍bū i̍ cho̍ le̍nde̍ wo̍ cho̍ ni̍, māā le̍ chɔ̄mndo̍ wa̍la̍ŋ māā kpāāyā bɛ̍ndu̍ cho̍ o̍ yōōŋgū kɛ̄ndɔ̄ɔ̍ ho̍ō ni᷄ŋ ndo̍, māā Mɛ̄lɛ̄ka̍ nɔ̍ ndu̍ ni̍, māā ō cho̍ na̍a̍ le̍.

⁸ Le̍ lɔ̍ɔ̍ lɔ̍ɔ̍, ā chō na̍a̍ nyɛ̄ kīndīlāa̍ hāndɔ̄ɔ̍ chōo̍ mā tōsā mī sɔ̄ɔ̍ŋ pālā na̍a̍, kɛ̍ ndu̍yɛ̍, mu᷅ŋ kpo̍u̍ ŋ̄ nɔ̍lā mī ŋ̄ bɛ̄ɛ̄vi̍a̍a̍ na̍a̍ le̍. Mī sɔ̄ɔ̍ŋ ŋ̄ yɔ̄nu̍ŋ na̍a̍ ŋ̄ si̍nā sa̍bū ko̍ŋ pɛ̄ŋgu̍ le̍, kɛ̍ ndu̍yɛ̍, ŋ̄ te̍mbū kɔ̍l te̍.

⁹ Le̍ lɔ̍ɔ̍ lɔ̍ɔ̍, ā chō na̍a̍ nyɛ̄ pālāa̍ tūsīo̍o̍ chōo̍, kɛ̍ Mɛ̄lɛ̄ka̍ ndu̍ ndu̍ me᷅l na̍a̍ kpo̍so̍ŋ te̍. Te̍le̍ŋnda̍ŋ lā pūm mā chūū na̍a̍, kɛ̍ ā nɔ̍lā na̍a̍ tɛ̄ɛ̄mbūū le̍.

¹⁰ Mɛ̄ɛ̍ Chi̍i̍sū sɔ̍la̍ pīɔ̍mndo̍ yɛ̍, le̍nde̍ ko̍ni̍ dīāllūŋ nāa̍ŋ mu᷅ŋ ŋ̄ chō o̍ pīɔ̍mndo̍ hɔ̄lndɔ̄ te̍le̍ŋ o̍ te̍le̍ŋ ni̍. Ndu̍yɛ̍, he̍ī yɔ̄nu̍ŋ le̍ mī wāŋnda̍ nɔ̄la̍ mā chē yōōmu̍ Chi̍i̍sōo̍ o̍ na̍a̍ ni᷄ŋ.

¹¹ A̍ bōōndi̍i̍ na̍a̍ ŋ̄ chō yōōmū ve̍ ki̍nɛ̍i̍, o̍ pīɔ̍mndo̍ hɔ̄lndɔ̄ yōōmūlā nāāla̍ŋ lā chō lɔ̍ɔ̍ lɔ̍ɔ̍ le̍ Chi̍i̍sū ni̍, le̍ hāli̍ kpe̍ŋ mī wāŋnda̍ sāālu̍ŋ yōōmū Chi̍i̍sōo̍ o̍ dīāllūŋ nāa̍ŋ ŋ̍ nɔ̍ mu᷅ŋ mī ŋ̄ vī wo̍ŋ ni᷄ŋ.

¹² Le̍ lɔ̍ɔ̍ lɔ̍ɔ̍, yōōmūlā nāāla̍ŋ lā chō pīɔ̍m kɔ̍ŋgɔ̍, kɛ̍ ndu̍yɛ̍ o̍ he̍ī ni᷄ŋ, mi̍ nya̍ wā yōōmū kpe̍e̍kpe̍i̍yo̍ sɔ̄lāa̍.

¹³ Mi̍ wānā pi᷅lɛ̍ dīmī dīōmnda̍ cho̍ la᷅ŋ o̍ Yāu̍ Mɛ̄lɛ̄ka̍a̍ ni᷄ŋ nda̍ŋ āā, “Le̍ mɛ̄ɛ̍ ya̍ I̍ la̍a̍la̍ŋ a̍ nyɛ̄ Mɛ̄lɛ̄ka̍ dīmi̍ wo̍ yɛ̍, le̍la̍ŋ ya̍ I̍ di̍mi̍ a̍ ndu̍ o̍kɔ̄ɔ̄ ni̍.” Ha̍a̍a̍ mi̍ ŋ̄ nɔ̄ lāāla᷄ŋndo̍ mɛ̄ɛ̍ wāŋndo̍ ho̍ō lāāla̍ŋ yɛ̍, ndu̍yɛ̍, mi̍ ŋ̄ wā nyɛ̄ na̍a̍ ŋ̄ lāāla̍ŋ ndo̍ dīmīo̍o̍,

¹⁴ ŋ̄ sīnā māā Mɛ̄lɛ̄ka̍ o̍ mi̍ŋgi̍ Māsānɔ̄ɔ̍ Chi̍i̍su̍ yōōmū wo̍, māā na̍a̍ bɛ̍ɛ̍ ō chō na̍a̍ mīŋgī yōōmū mɛ̄ɛ̍ o̍ mi̍ŋgi̍ Chi̍i̍su̍ yōōmū yɛ̍. O̍ ko̍ŋ kɔ̍ɔ̍lī, tē ō mīŋgi̍ na̍a̍ yōōmū pɛ̍, na̍a̍ ni̍, nya̍ ni̍, ō kūɛ̄ a̍ na̍a̍ nāa̍ Chi̍i̍sū chu̍a̍.

¹⁵ Le̍ dɛ̍nɛ̍ nya̍ kɛ̄ndɔ̄ɔ̍ sɔ̄ɔ̍ŋ mu᷅ŋ kpo̍u̍ ŋ̍ cho̍ yɔ̄nɔ᷄ŋndo̍ ni̍. Ndu̍yɛ̍, mɛ̄ɛ̍ kpɛ̍ wāŋnda̍ ta̍u̍ a̍ hi̍a̍ū la̍chi̍ a̍ kɛ̄ndɛ̄i̍ Mɛ̄lɛ̄kɛ̍i̍ sɔ̄lāa̍, mā sɔ̄lā pi̍ŋīo̍o̍ yɛ̍, le̍nde̍ ko̍ni̍, ba̍li̍ka̍a̍ hīāū la̍chi̍ a̍ yɔ̄ŋgɔ᷄ŋndo̍ nāa̍ Mɛ̄lɛ̄ka̍ chūā ni̍. O̍ he̍ī ni᷄ŋ, mī Mɛ̄lɛ̄ka̍ sɔ̄la̍ sāŋgālāa̍.

Nyɛ̄m na̍a̍ ŋ̄ cho̍ chɔ᷅ le̍ wo̍ŋ, mu̍ŋ na̍a̍ ŋ̄ chō lēhɔ̄l ni̍

¹⁶ Le̍ sa̍bū kōŋ dīāllūŋ vi᷅ na̍a̍ le̍. Mi̍ chē bɛ̍ɛ̍ mi̍ kɛ̍ndi̍a̍a̍ nāa̍ ŋ̄dīāllo̍ ō wā fāŋa᷄ŋndo̍ lēchōo̍ te̍le̍ŋ o̍ te̍le̍ŋ ni̍, kɛ̍ ndu̍yɛ̍ nyi̍nāā nāa̍ nda̍ nda̍, lēpāla̍ o̍ lēpāla̍, ā chō dīāllūŋ kālāŋ sɛ̄nɛ̄īyo̍ŋ sɔ̄lāa̍.

¹⁷ Ndu̍yɛ̍, nyɛ̄ nɛ̄īyāa̍ cho̍ ho̍ō na̍a̍ chōo̍ wo̍, le̍ te̍le̍ŋ bi̍ŋgī ko̍ni̍ o̍ cho̍ ni̍. Ndu̍yɛ̍, nyɛ̄ nɛ̄īyāa̍ ho̍ō chō na̍a̍ nyɛ̄ kɛ̄ndɛ̄ bɛ̄ndū chūū. Tē ō wa̍ nyɛ̄ tūwāā pɛ̍, nyɛ̄ kɛ̄ndɛ̄ Mɛ̄lɛ̄ka̍ tōsāl na̍a̍ ni̍ŋ ndo̍, ndu̍ hi̍o̍ū po̍lo̍ŋ po̍lo̍ŋ, a̍ nyɛ̄ nɛ̄īyāa̍ cho̍ ho̍ō na̍a̍ chōo̍ wo̍. Nyɛ̄ kɛ̄ndɛ̄ kōŋ ndu̍ ndu̍, le̍ fɛ̍ɛ̍ŋ a̍ fɛ̍ɛ̍ŋ o̍ cho̍ ni̍.

¹⁸ Le̍la̍ŋ, nyɛ̄m na̍a̍ ŋ̄ chō mu᷅ŋ chɔ̄ɔ̍ wo̍ŋ, ō cho̍ mu̍ŋ te̍ na̍a̍ ŋ̄ chō lēhɔ̄l te̍. Nyɛ̄m na̍a̍ ŋ̄ cho̍ chɔ᷅ le̍ wo̍ŋ, mu̍ŋ na̍a̍ ŋ̄ chō lēhɔ̄l ni̍. Kāni̍ fo̍ndōle̍, nyɛ̄m na̍a̍ ŋ̄ chō mu᷅ŋ chɔ̄ɔ̍ wo̍ŋ, mu̍ŋ mu̍ŋ le̍ te̍le̍ŋ bi̍ŋgī ko̍ni̍ ŋ̍ cho̍ ni̍. Kɛ̍, nyɛ̄m na̍a̍ ŋ̄ cho̍ chɔ᷅ le̍ wo̍ŋ, mu̍ŋ mu̍ŋ le̍ fɛ̍ɛ̍ŋ a̍ fɛ̍ɛ̍ŋ ŋ̍ cho̍ ni̍.