Kɔ̄li̍ŋtīāŋ Di̍i̍ŋ Ndɔ̄ɔ̍ 2 - Yāu̍ Mɛ̄lɛ̄ka̍a̍

¹ Le̍la̍ŋ, I̍ kɛ̍ɛ̍si̍a̍a̍ māā I̍ hi᷅ŋ ndɛ̍ nya̍ yīlɔ̄ɔ̍ to̍sā mī lā tāmbu̍ lākɔ̄l te̍.

² Kāni̍ fo̍ndōle̍, tē I̍ to̍sa̍ pɛ̍ mī lā tāmbu̍ lākɔ̄l, mɛ̄ɛ̍ I̍ nɔ᷅ lɛ̍ wāna̍ nɛ̍ŋī ya̍ kɔ̄l te̍. Kāni̍ fo̍ndōle̍, nya̍ nɔ̍ le̍ ya̍ kɔ̄l nɛ̄ŋī wa̍ lā wā a̍ kɔ̄ltā tāmbɛ̍i̍ la̍ŋ.

³ Le̍ sa̍bū ya̍ I̍ po̍o̍nyi̍a̍a̍ yāu̍ ko̍ŋ nāa̍ nya̍ chūā le̍nde̍ wo̍ cho̍ ni̍ māā ya̍ i̍i̍ hɛ̍na̍ŋ mī i̍i̍ hu̍ŋ sɔ̍lā kɔ̄l tāmbɛ̍i̍ a̍ nya̍ wānāa̍ nɔ̍ mī lā nɛ̄ŋi̍ ya̍ kɔ̄l la̍ le̍. Ndu̍yɛ̍, I̍ si̍nā māā tē I̍ wa̍ a̍ kɔ̄l kɛ̄ndɛ̄ pɛ̍, nya̍ bɛ̍ɛ̍ lā wa̍ a̍ kɔ̄ltā kɛ̄ndɛ̄.

⁴ Yāu̍ ya̍ I̍ po̍o̍nyi̍a̍a̍ ko̍ŋ ndo̍, ō wa̍ sūɛ̍i̍ kɔ̄l tāmbɛ̍i̍ bɛ̄ndū ya̍ chōo̍ le̍ ndu̍ pōōnyīa̍a̍. Cha᷄ŋ māmɛ̍mɔ̍ɔ̍ kpe̍e̍kpe̍i̍ mi̍ cha᷅ŋ ndu̍. Kɛ̍ ndu̍yɛ̍, ō cho̍ ma̍chu̍a̍ā le̍ nya̍ kɔ̄l tɛ̄ɛ̄mbūū le̍ ya̍ po̍o̍nyi̍a̍a̍ ndu̍ le̍. I̍ po̍o̍nyi̍a̍a̍ māpōōnyīāā ndu̍ le̍ mī lā sīna̍ pɛ̄ŋgu̍ māā I̍ nɔ̍ kāālāa̍ le̍ nya̍ ta̍u̍ ta̍u̍.

Pɔ̍ɔ̍l ma̍l wānāa̍ to̍sāl ndu̍ yɔ̄ŋ wɔ̄ɔ̍ŋndo̍ wa̍

⁵ Wāna̍ hi᷅ŋ a̍ kɔ̄l tāmbɛ̍i̍yo̍ ho̍ō wo̍, sē ō cho̍ ya̍ le̍ o̍ tɛ̍ɛ̍mbu̍u̍ kɔ̄l te̍. Nya̍ kpe̍e̍kpe̍i̍ o̍ tɛ̍ɛ̍mbu̍u̍ kɔ̄l ni̍. Mbō ve̍ bɛ̍ɛ̍ nya̍ kpo̍u̍ le̍, kɛ̍ ō wa̍ bɛ̍ɛ̍ nya̍ pūm nda̍. Kɛ̍ ndu̍yɛ̍, wānā ko̍ŋ I̍ hɛ̍na̍ŋ mī I̍ hi̍u̍ sūɛ̍i̍ ka̍lɛ̄i̍ ndu̍ kīndīlā chōo̍ le̍.

⁶ Sīlā nya̍ wānāā lāāla᷄ŋnda̍ ā ka̍ ka̍ ke̍ ndu̍ wo̍ ō chō tūu̍le̍ŋ.

⁷ Mɛ̄ɛ̍ ō bɛ̄ndā ni̍ko̍ mī lā ma᷄l ndu̍ le̍ yɔ̄ŋ ndɔ̄ wɔ̍ɔ̍ŋndo̍, ndu̍yɛ̍, mī lā lo̍ o̍ ko̍ŋ mī lā dɛ̄ɛ̄ni̍a̍a̍ ndu̍ kɔ̄llo̍ ni᷄ŋ. Sa̍bū nya̍ tōsā ko̍ŋ ndo̍ cho̍ ni̍, māā yɔ̄ŋi̍ o̍ hi̍o̍u̍ la̍chi̍ a̍ kɔ̄l tāmbɛ̍i̍yo̍ te̍i̍ mbō lo̍ o̍ ko̍ŋ mbō tɛ̄ɛ̄mbu̍u̍ kɔ̄l ndɔ̄ɔ̍.

⁸ Le̍la̍ŋ, lā yāndi̍i̍, lā tōsa̍ mbō sīna̍ māā lā kāāla̍ ndu̍ lēkɛ̍ndɛ̍ī.

⁹ Tɔ̄ɔ̄nda᷄ŋndo̍ ya̍ i̍i̍ hɛ̍na̍ŋ mī tɔ̍ɔ̍nda̍ŋ nya̍ ni̍, le̍ sīnāa̍ māā tē lā chō ā chɛ̄lāā te̍le̍ŋ o̍ te̍le̍ŋ le̍ nyɛ̄ ya̍ I̍ di̍mūl nya̍ wo̍ tōsāa̍ pɛ̍. Le̍la̍ŋ ya̍ i̍ po̍o̍nyi̍a̍a̍ yāu̍ ko̍ŋ nāa̍ nya̍ chūā ni̍.

¹⁰ Ndu̍yɛ̍, wānā o̍ wāna̍ nya̍ ma᷄l le̍ yɔ̄ŋ ndɔ̄ wɔ̍ɔ̍ŋndo̍ pɛ̍, mɛ̄ɛ̍ ya̍ bɛ̍ɛ̍ mālɔ̄ɔ̍ ya̍ I̍ ma᷅l wa̍nā ko̍ŋ ni̍. Ki̍li̍tī cho̍ lēse̍ī māā tē I̍ ma̍l wāŋndo̍ le̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ o̍ to̍sa̍l la̍ pɛ̍, mɛ̄ɛ̍ I̍ ma̍l ndu̍ le̍ nya̍, tē wānā yɔ̍ŋ dɔ̍ɔ̍ ya̍ īsɔ̄ɔ̍ pɛ̍ mī I̍ nɔ̍ le̍ ndu̍ mālɔ̄ɔ̄ le̍ ndi̍.

¹¹ Le̍ yɔ̄ŋi̍ Sēta̍nā, māsa̍ nyi̍nāā wɔ̄ɔ̍ŋnda̍, ō tīu̍ na̍a̍ bā a̍ kāŋgālā ndɔ̄ɔ̍, le̍la̍ŋ ya̍ I̍ cho̍ he̍ī tōsāa̍ ni̍. Kāni̍ fo̍ndōle̍, ŋ̄ sīnā nɛ̍īla̍ ndɔ̄la̍ lākāŋgālāla̍ŋ wa̍la̍ŋ.

Pɔ̍ɔ̍l ku̍ɛ̄ To̍wāā chi̍e̍e̍

¹² O̍ ko̍ŋ kɔ̍ɔ̍lī, mɛ̄ɛ̍ ya̍ I̍ fu̍u̍lu̍u̍ To̍wāā chi̍e̍e̍ le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ a̍ Ki̍li̍tī o̍kɔ̄ɔ̄, mi̍ I̍ sa̍a̍lu᷄ŋ māā Māsānɔ̄ɔ̍ Mɛ̄lɛ̄ka̍ kūmbi̍ nɛ̄īyo̍ kpe̍e̍kpe̍i̍, le̍ mī I̍ to̍sa̍ wa̍li̍ ndɔ̄ɔ̍ lo̍ŋ.

¹³ Kɛ̍, I̍ wa̍ būūla᷄ŋndo̍, kāni̍ fo̍ndōle̍, I̍ ko̍ma̍l cha̍a̍ŋ nūu̍ Ta̍i̍tɔ̄ɔ̄ lo̍ŋ te̍. Le̍ he̍ī, mi̍ I̍ cho̍ŋgu᷄ŋ wa᷅ŋnda̍ lo̍ŋ mi̍ I̍ hi̍a̍ū Māsīdo̍o̍nīāā.

A̍ Yōōŋgū Kɛ̄ndɛ̍ Mɛ̄lɛ̄ka̍a̍ tīūwo̍ o̍kɔ̄ɔ̄

¹⁴ I̍ me̍l Mɛ̄lɛ̄ka̍ ba̍li̍ka̍, kāni̍ fu̍u̍le̍, ha̍a̍a̍ mi̍ ŋ̄ wā o̍ dīōm pīlɔ̍ɔ̍ ni᷄ŋ na̍a̍ Ki̍li̍tī wa̍ā, tē ō wa̍ kɔ̄ŋga᷄ŋ lēku̍u̍ba̍a̍ pɛ̍, kīo̍o̍ Mɛ̄lɛ̄ka̍ kē na̍a̍ fo̍ndāa̍ te̍le̍ŋ o̍ te̍le̍ŋ le̍ kɔ̄ŋga᷄ŋndo̍ na̍a̍ Ki̍li̍tī wa̍ā ni̍. Ndu̍yɛ̍, o̍ na̍a̍ ni᷄ŋ sa̍na̍a̍ Mɛ̄lɛ̄ka̍ tōsā ni̍ mī yōōŋgōo̍ a̍ Ki̍li̍tī o̍kɔ̄ɔ̄ o̍ ti̍u̍ bā o̍ bā fe̍e̍ mɛ̄ɛ̍ si̍ɛ̍ndīi̍ma̍ chūŋ kɛ̄ndīa̍ŋ mā tīū nu̍a̍ā bā o̍ bā fe̍e̍ yɛ̍.

¹⁵ Si̍ɛ̍ndīi̍ma̍ chūŋ kɛ̄ndīa̍ŋ ma᷅ŋ, ndu̍ yɔ̍nūŋ ni̍ māā wa̍li̍ na̍a̍ ŋ̄ chō ho̍ō tōsāa̍ le̍ Mɛ̄lɛ̄ka̍ wo̍, chūŋ kōŋ ō kōma̍l wānā o̍ wānā, wānāa̍ cho̍ pīōŋɔ̄ɔ̍ sɔ̄lāa̍ wa̍ ni̍ a̍ wānāa̍ cho̍ kɔ̄la̍ŋ o̍ fo̍ndāŋ nyɛ̄ pālāa̍ wa̍.

¹⁶ Ndu̍yɛ̍, wānāa̍ cho̍ ma̍ wā kɔ̄la̍ŋ o̍ fo̍ndāŋ nyɛ̄ pālāa̍ wa̍, le̍ nda̍ nda̍ chūŋ ko̍ŋ ō chō nyɛ̍ chu̍u̍ wānā pi̍ɔ̍mndo̍. Kɛ̍ ndu̍yɛ̍, le̍ wānāa̍ cho̍ pīōŋɔ̄ɔ̍ sɔ̄lāa̍ wa̍ nda̍ nda̍, ō chō nyɛ̍ chu̍u̍ wānā yo̍o̍mōo̍. Le̍la̍ŋ, ō cho̍ wa᷅ŋnda̍ fa̍ū le̍ a̍ cho̍ ā bɛ̄ndāā le̍ wa̍llo̍ ho̍ō tōsāa̍ le̍.

¹⁷ Wānāā fāŋgā fa̍ŋgā, ā sīīŋgu̍u̍ sūɛ̍i̍ Mɛ̄lɛ̄kɛ̍i̍ dīmīo̍o̍ nɛ̄ī nda̍ nūūvīāā nyɛ̄ sɔ̄lāā. Kɛ̄, na̍a̍ na̍a̍ ŋ̄ cho̍ māā wānāā wāā le̍nde̍ le̍. Na̍a̍ na̍a̍ o̍ nɛ̄ī sa̍kpōo̍ chōo̍ na̍a̍ ŋ̄ dīmūl wa᷅ŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ ni̍. Mɛ̄lɛ̄ka̍ ve᷅m na̍a̍ le̍ wa̍llo̍ ho̍ō tōsāa̍ ni̍. Mɛ̄lɛ̄ka̍ sīnā māā na̍a̍ na̍a̍ ŋ̄ chō māchūāā yōōŋgu̍ Mɛ̄lɛ̄ka̍a̍ ho̍ō dīmīo̍o̍ māā bu̍ɛ̍i̍yāa̍ Ki̍li̍tī.