Ko̍lo̍ni̍kō Di̍i̍ŋ Ndɔ̄ɔ̍ 9 - Yāu̍ Mɛ̄lɛ̄ka̍a̍

A̍ mɛ̄ɛ̍ Wānā La̍nɔ̍ Māsā Bɛ̍ndōo̍ o̍ lɛ̄ŋndē Si̍ɛ̍bāle̍ŋ ni᷄ŋ ō ku̍ɛ̄ Sɔ̍lɔ̍mɔ̄ŋ yīlɔ̄ɔ̍ yɛ̍ o̍kɔ̄ɔ̄

¹ Mɛ̄ɛ̍ Wānā la̍nɔ̍ wa̍ māsa̍ bɛ̍ndōo̍ le̍ lɛ̄ŋndē Si̍ɛ̍bāle̍ŋ ndo̍ ō tu̍e̍ī a̍ mɛ̄ɛ̍ Sɔ̍lɔ̍mɔ̄ŋ ndu̍ o̍o̍ fu̍la̍ tɔ̍ɔ̍ yɛ̍, mbō kūā Chūlu̍sɛ̄lɛ̄m le̍ mbō kɔ̍ tɔ̍ɔ̍ŋnda᷄ŋ Sɔ̍lɔ̍mɔ̄ŋ a̍ nyūūnīāālā kālā ka̍lāla̍ŋ. Mɛ̄ɛ̍ o̍ wa̍ kɔ̄la̍ŋ, mbo̍ chūā pōūtā ba̍ā kālālā bɛ̄ndūla̍ŋ, a̍ nyɛ̄m yɛ̍ yɛ̍ŋ nda̍ dūāū o̍ nyɛ̄ dīa̍a̍ ni᷄ŋ ndo̍ŋ, a̍ ko̍o̍līi̍yo̍ŋ ta̍u̍, mbo̍ dōvī nyɔ̍mi̍a̍a̍ ndūa̍a̍ o̍ lākɔ̄ɔ̄, le̍ kɔ̄la̍ŋ Sɔ̍lɔ̍mɔ̄ŋ yīlɔ̄ɔ̍. Ndu̍yɛ̍, mbo̍ hūŋ a̍ wāŋnda̍ kɔ̄ɔ̄lī ku̍ndā bɛ̄ndōo̍. Mɛ̄ɛ̍ o̍ hi᷅ŋ o̍ Sɔ̍lɔ̍mɔ̄ŋ ndo̍, mbo̍ dīmūl ndu̍ nyɛ̄ o̍ nyɛ̄ ndu̍ o̍o̍ nɔ̍ o̍ kɔ̄l.

² Ndu̍yɛ̍, mi̍ Sɔ̍lɔ̍mɔ̄ŋ mu̍lī nyūnīāālā ndɔ̄la̍ŋ kpo̍u̍. Nyūūnīāālā lāŋ ki̍nɛ̍i̍, ō pīlɛ̍ bɛ̍ɛ̍ Sɔ̍lɔ̍mɔ̄ŋ o̍ bu̍mba̍ ndu̍ mūlī le̍.

³ Mɛ̄ɛ̍ chūā Māsa̍ fu̍la̍ ko̍ŋ Si̍ɛ̍bā wo̍ ō chē tāāsi̍ bɛ̍ndū Sɔ̍lɔ̍mɔ̄ŋ o̍ nɔ̍ wo̍, o̍ ko̍ŋ kɔ̍ɔ̍lī mbo̍ chā chīɛ̄ī lēmāsā o̍ ta̍ŋgu̍llo̍,

⁴ mbo̍ chā nyɛ̄ dīa̍a̍ di̍a̍nūŋ o̍ ti̍bīi̍ Sɔ̍lɔ̍mɔ̄ŋ ndo̍ chōo̍ wo̍, mbo̍ chā nāa̍ māsāa̍ ndūa̍a̍ ā chāl la̍, a̍ bu̍ɛ̍i̍yāa̍ wa̍ ndu̍ o̍ bā chīɛ̄ī ni̍ŋ nda̍, a̍ nyɛ̄lā kɛ̄ndɛ̄lā bu̍ɛ̍i̍yāā kāŋ ā wōōnūŋ nda̍ŋ, a̍ wānāa̍ ta̍lāl ndu̍ mūɛ̄īmā kīle̍pīi̍ya̍ŋ nda̍, a̍ nyɛ̄lā kɛ̄ndɛ̄lā wānāā kāŋ ā wōōnūŋ nda̍ŋ, a̍ sa̍lālā lūāmāālā o̍ so̍lī o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ la̍ŋ, mi̍ yōōmūa̍ŋ mā fūlā ndu̍ po̍.

⁵ O̍ ko̍ŋ, mbo̍ dīmūl Māsā Bɛ̍ndōo̍ Sɔ̍lɔ̍mɔ̄ŋ āā, “Nyɛ̄ o̍ nyɛ̄ ya̍ I̍ tu̍e̍ī o̍ lɛ̄ŋndē nīle̍ŋ ni᷄ŋ a̍ nūm, ndu̍yɛ̍ a̍ tāāsi̍ ŋ̄ nɔ̄ wo̍ o̍kɔ̄ɔ̄,

⁶ ya̍ i̍i̍ la̍a̍la̍ŋ māā tōnya̍ le̍ o̍ cho̍ le̍, kɛ̍ I̍ la̍a̍la̍ŋ ni᷅ŋ. Kāni̍, ya̍ pi̍la̍ hi᷅ŋ ni᷅ŋ, mi̍ hu̍ŋ chɔ᷅ a̍ hɔ̄ltē nīla̍ŋ pɛ̍ɛ̍ŋ. Ndu̍yɛ̍ nyɛ̄ ya̍ I̍ hu̍ŋ chɔ᷅ wo̍, wānā tu̍ū ndu̍ bɛ̍ɛ̍ a̍ nyɛ̄ ya̍ I̍ tu̍e̍ī a̍ nūm o̍kɔ̄ɔ̄ wo̍ le̍. Nyɛ̄ ya̍ I̍ hu̍ŋ chɔ᷅ wo̍ ndu̍ hi̍o̍ū po̍lo̍ŋ. Tāāsi̍ ŋ̄ nɔ̄ wo̍, a̍ sūl ŋ̄ sūllo̍, tē ō wa̍ māā yɔ̄ŋɔ̄ɔ̄ pɛ̍, tɛ̄ndāa̍ tɛ̄ɛ̄ŋ bɛ̍ɛ̍ I̍ tu̍i̍i̍ a̍ ndu̍ o̍kɔ̄ɔ̄ le̍.

⁷ Mbɔ̄ lāāndāā nūmnda̍, a̍ bu̍ɛ̍i̍yāa̍ cho̍ nu̍m wa̍llo̍ o̍ bā bɛ̄ŋgu̍ wa̍ ā pɛ̄l tɔ̄nɔ̄ɔ̍, kāni̍ fo̍ndōle̍, nda̍ nda̍ le̍ te̍le̍ŋ o̍ te̍le̍ŋ ā chō la̍tu̍lu̍ a̍ nūm, mā tūɛ̄ī di̍ōmndā kɔ̄l kālu̍la̍ ŋ̄ dīmī la̍ŋ.

⁸ Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūmndo̍. Mɛ̄lɛ̄ka̍ hi̍ni̍ māhīnīāā kɔ̄l a̍ nūm, mbo̍ sīīŋgūū nu̍m Māsā Bɛ̍ndōo̍, le̍ mā wa̍ Māsāa̍ o̍ dīōlā ndɔ̄la̍ŋ ni᷄ŋ. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ wānāā ndūa̍a̍ I̍sɔ̄lūɛ̄ī, ndu̍yɛ̍ ō yēēma̍ mī māsāle̍ŋ nde᷅ŋ lē hīōū lāchī a̍ wāa̍ le̍ fɛ̍ɛ̍ŋ a̍ fɛ̍ɛ̍ŋ. Ō sīīŋgu̍u̍ nu̍m māsāa̍ nda̍ chōo̍, le̍ mā wa̍ nda̍ tɛ̄ɛ̄ŋ sa̍kpō, mā wa̍ sɔ̄ɔ̍ŋ tōsāa̍ o̍ nɛ̄i̍ tōnya̍a̍ chōo̍.”

⁹ O̍ ko̍ŋ kɔ̍ɔ̍lī, mi̍ wānā la̍nɔ̍ ma̍sāa̍ ho̍ō bīī ko̍o̍līi̍yo̍ŋ, pa᷅ŋnda̍ŋ wāa̍la̍ŋ lā ŋɔ̄ma̍hīɔ̍ɔ̍lū (9,000), a̍ nyɛ̄m yɛ̍ yɛ̍ŋ nda̍ dūāū o̍ nyɛ̄ dīa̍a̍ ni᷄ŋ ndo̍ŋ ta̍u̍, a̍ pōūtā ba̍ā kālāla̍ŋ ta̍u̍, mbo̍ kē Māsā Bɛ̍ndōo̍ Sɔ̍lɔ̍mɔ̄ŋ. Nyɛ̄m yɛ̍ yɛ̍ŋ o̍ chu̍u̍ Sɔ̍lɔ̍mɔ̄ŋ le̍ dɔ̄wɔ̄ɔ̍ o̍ nyɛ̄ dīa̍a̍ ni᷄ŋ ndo̍ŋ, kāni̍ bɛ̍ɛ̍, wānā o̍ wānā ndu̍ o̍o̍ chu̍u̍ wɔ̍ nyɛ̄m kɛ̄ndɛ̄ŋ wāā le̍nde̍ le̍.

¹⁰ (Bōōndi̍i̍ wānāa̍ ku̍ā a̍ dɛ̄ndɛ̄la̍ bɛ̍ndūla̍ Māsā Bɛ̍ndōo̍ Hi̍lūām, a̍ Māsā Bɛ̍ndōo̍ Sɔ̍lɔ̍mɔ̄ŋ nda̍, ā kūɛ̄ o̍ lɛ̄ŋndē O̍fɛ̄ɛ̄le̍ŋ ni᷄ŋ nde̍, ma̍ kɔ̍ hu᷅ŋ a̍ ko̍o̍līi̍yo̍ŋ, a̍ yɔ̄mīī chu̍ni̍pāve̍, ndu̍yɛ̍ a̍ pōūtā ba̍ā kālāla̍ŋ.

¹¹ Ndu̍yɛ̍ bi᷅ŋnda̍ wa̍ o̍ chi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ nda̍ŋ ni̍, a̍ bi᷅ŋnda̍ wa̍ o̍ chīɛ̄ī lēmāsa̍ Sɔ̍lɔ̍mɔ̄ŋ ndo̍ la̍ŋ, a̍ yɔ̄mīī kēŋ Sɔ̍lɔ̍mɔ̄ŋ o̍ to̍o̍si̍a̍a̍ la̍ŋ ni̍. Ndu̍yɛ̍, a̍ yɔ̄mīī kēŋ ko̍ni̍ Sɔ̍lɔ̍mɔ̄ŋ o̍ to̍o̍si̍a̍a̍ vɛ̄lɛ̄ tōwāla̍ŋ, a̍ nyɛ̄m chāāŋ īyōō chēle̍ŋndo̍ŋ le̍ wānāā ndūa̍a̍ nyɛ̄ chāa̍ ni̍. Ndu̍yɛ̍, kāni̍ bɛ̍ɛ̍, nyɛ̄m kɛ̄ndɛ̄ŋ wāā le̍nde̍ mu̍ŋ chi̍ŋnu̍ŋ ndɔ̍ o̍ lɛ̍ŋndē Chu̍dāle̍ŋ ni᷄ŋ te̍.)

¹² O̍ ko̍ŋ kɔ̍ɔ̍lī, Māsā Bɛ̍ndōo̍ Sɔ̍lɔ̍mɔ̄ŋ bɛ̍ɛ̍, mbo̍ kē Wānā La̍nɔ̍ ma̍sa̍ fu̍la̍ ho̍ō Si̍ɛ̍bā wo̍ nyɔ̄ɔ̍ŋ ta̍u̍ ta̍u̍. Nyɛ̄ o̍ nyɛ̄ o̍ nyu̍na̍ Sɔ̍lɔ̍mɔ̄ŋ le̍ ndu̍, mi̍ Sɔ̍lɔ̍mɔ̄ŋ ke᷅ ndu̍. Nyɛ̄m Sɔ̍lɔ̍mɔ̄ŋ o̍ ke̍ ndu̍ wo̍ŋ, mu̍ŋ bɛ̍ɛ̍ mu̍ŋ hi̍o̍ū wā nyɛ̄m ba̍ā kālā, a̍ nyɛ̄m ndu̍ ke̍ Sɔ̍lɔ̍mɔ̄ŋ ndo̍ŋ. O̍ ko̍ŋ kɔ̍ɔ̍lī, mi̍ Wānā La̍nɔ̍ Māsāa̍ ho̍ō ō chūā bu̍ɛ̍i̍yāā o̍ hi᷅ŋ kɔ̄ɔ̄lī wa̍ ma̍ mīīŋgū o̍ lɛ̄ŋndē ndāle̍ŋ ni᷄ŋ Si̍ɛ̍bā.

A̍ sūlta̍ Sɔ̍lɔ̍mɔ̄ŋ nda̍ŋ o̍kɔ̄ɔ̄

¹³ Īwɔ̄sī o̍ īwɔ̄sī ko̍o̍līi̍ŋ Sɔ̍lɔ̍mɔ̄ŋ ndu̍ o̍o̍ sɔ̍lā o̍ māsāle̍ ndɔ̄le̍ŋ ni᷄ŋ ndo̍ŋ, mu᷅ŋ wa᷅ le̍ pa᷅ŋnda̍ŋ wāa̍la̍ŋ be̍le̍-ŋu̍ɛ̍ɛ̍nu̍ (50,000).

¹⁴ Ndu̍yɛ̍ ō fūla̍ o̍ ko̍ŋ kɔ̍ɔ̍lī, ō wa̍ vɛ̄lɛ̄ nyɛ̄ sɔ̄lāā sɔ̄lāa̍ o̍ nɛ̄īla̍ che̍le̍ŋ ni᷄ŋ. Ō wa̍ sɔ̄lāa̍ o̍ yākōle̍ŋ ni᷄ŋ, ndu̍yɛ̍ ō wa̍ vɛ̄lɛ̄ sɔ̄lāa̍ wānāā lēyākūāā chēle̍ŋnda̍ o̍ lābā. O̍ ko̍ŋ kɔ̍ɔ̍lī, māsāā bɛ̍ndūa̍a̍ Ālu̍e̍e̍bīāā ni̍, a̍ māsāa̍ ŋ̄būŋgāa̍ o̍ kɛ̍si̍ lɛ̄ŋnde̍ŋ chīla̍ŋ nda̍, ā wa᷄ hūnɔ̄ɔ̍ a̍ ko̍o̍līi̍yo̍ŋ ndu̍yɛ̍ a̍ ka̍ni̍ŋ hu̍mbo᷄ŋ nāa̍ ndu̍ chu̍a̍.

¹⁵ Nyɛ̄lā kālā ka̍lālā so̍vɛ̄i̍ya̍ nda̍ a̍a̍ bi̍ī o̍ lābā māā bōo̍la̍ bɛ̍ndū le̍ nda̍ māndāa̍ la̍ŋ, Sɔ̍lɔ̍mɔ̄ŋ ndu̍ o̍o̍ nɔ̍ la̍ŋ kɛ̄mɔ̄ɔ̍ lēdīi̍ŋ (200). Ndu̍yɛ̍ nyɛ̄la̍ŋ nda᷅ŋ lā wa᷄ lā kūmbāā a̍ ko̍o̍līi̍ye̍ kpo̍u̍. Ko̍o̍līi̍ nda̍ kūmbū nyɛ̄la̍ŋ nda᷅ŋ ō pīlɛ̍ wo̍ ndi̍ i̍i̍ wa᷅ le̍ pa᷅ŋnda̍ŋ tɔ̍ a̍ lā ŋūɛ̍ɛ̍nu̍.

¹⁶ O̍ ko̍ŋ kɔ̍ɔ̍lī, mbo̍ tōōsīāā vɛ̄lɛ̄ lā pɔ̄mbɔ̄lā chēle̍ŋ kɛ̄mɔ̄ɔ̍ le̍ yāa̍ (300). Ndu̍yɛ̍ la̍ŋ bɛ̍ɛ̍ mbo̍ kūmbū la̍ŋ a̍ ko̍o̍līi̍ye̍ kpo̍u̍. Ko̍o̍līi̍ nda̍ kūmbū nyɛ̄la̍ŋ nda᷅ŋ ō pīlɛ̍ wo̍ ndi̍ i̍i̍ wa᷅ le̍ pa᷅ŋnda̍ŋ lā ŋɔ̄ma̍a̍. Nyɛ̄lā lāŋ kpo̍u̍, mi̍ Sɔ̍lɔ̍mɔ̄ŋ o̍ chu̍ā la̍ŋ mbo̍ kūā a̍ la̍ŋ mbo̍ kɔ̍ kɛ̍sī la̍ŋ o̍ chīɛ̍i̍ nda̍ vēēlū āā Būndɔ̍ɔ̍ Le̍ba̍nɔ̄ŋ ndo̍ ni᷄ŋ.

¹⁷ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ to̍o̍sīāā vɛ̄lɛ̄ kpe̍ŋgbe̍i̍ lēmāsāa̍ a̍ chīŋīī kāmɛ̄i̍, mbo̍ kūmbū ndu̍ kpo̍u̍ a̍ ko̍o̍līi̍ kɛ̍ndɛ̄ kɛ̍ndɛ̄i̍.

¹⁸ Kpe̍ŋgbe̍i̍yo̍ ho̍ō, nāa̍ ndu̍ o̍o̍ kɛ̍sī ba̍la̍ŋ nda̍, kpɔ̍kūŋnda̍ wa̍ ā tūūlāā lo̍ŋ a̍ ŋi̍ɔ̍ɔ̍ŋ, ho̍ō wa̍ ba̍ā, ho̍ō wa̍ ba̍ā. Ndu̍yɛ̍ nāa̍ ndūāā kɛ̍sīāā ŋ̄pēlūa̍a̍, a̍ ko̍o̍līi̍ye̍ kpo̍sōŋ o̍ wa̍ ō tōōsīa̍a̍ ni̍, ō mɔ̄ɔ̄sa᷅ŋ a̍ kpe̍ŋgbe̍i̍yo̍ lātūlu̍. Le̍ hēlɔ̄ɔ̍ nāa̍ kpe̍ŋgbe̍i̍ ko̍ŋ ō wa̍ wa̍, bi᷅ŋnda̍ŋ lā ŋɔ᷄mpu᷅m wānā a̍a̍ he᷅l ni̍.

¹⁹ Ndu̍yɛ̍ bi᷅ŋndā ŋɔ᷄mpu᷅mndā lāŋ kpo̍u̍, o̍ bi᷅ŋ o̍ bi᷅ŋ kpɔ̍kūŋnda̍ wa̍ ā tūūlīāā lo̍ŋ a̍ ŋi̍ɔ̍ɔ̍ŋ, ho̍ō wa̍ ba̍ā, ho̍ō wa̍ bāa̍. Mɛ̄ɛ̍ fa̍u̍ fa̍u̍ kpɔ̍kūŋnda̍ tɔ̍ a̍ ā ŋīɔ̍ɔ̍ŋ a̍ wa̍ ā tūūlīāā o̍ bi᷅ŋndā lāŋ ni̍. Māsɛ̄i̍ o̍ chi̍e̍ēŋndo̍ ni᷄ŋ ki̍nɛ̍i̍, lēmāsā o̍ lēmāsā le̍e̍ nɔ̍ kpe̍ŋgbe̍i̍ lēmāsā wāā le̍nde̍ le̍.

²⁰ Tāālāla̍ Sɔ̍lɔ̍mɔ̄ŋ ndu̍ o̍o̍ ko᷅l le̍ni̍ŋ nda̍ŋ, a̍ ko̍o̍līi̍ye̍ kpo̍sōŋ la̍ wa̍ lā tōōsīāā ni̍. Chīɛ̄ī bɛ̄ndu̍ ndu̍ o̍o̍ nɔ̍ dīōla̍ŋ āā Būndɔ̍ɔ̍ Le̍ba̍nɔ̄ŋ ndo̍, nyɛ̄m lāāndu᷄ŋ wa̍ o̍ chīɛ̄ī kōŋ ni᷄ŋ ndo̍ŋ ki̍nɛ̍i̍, mu̍ŋ bɛ̍ɛ̍ a̍ ko̍o̍līi̍ kɛ̍ndɛ̄ kɛ̍ndɛ̄i̍ kpo̍so̍ŋ ŋ̍ wa̍ ŋ̄ tōōsīāā ni̍. Nyɛ̄ o̍ nyɛ̄ ve̍ lo̍ŋ mbō wa̍ ō tōōsīāā a̍ ka̍ni̍i̍ hu̍mbū le̍, fo̍ndōle̍, o̍ māsāle̍ Sɔ̍lɔ̍mɔ̄ŋ nde̍ŋ bɛ̄ŋgu̍, ka̍ni̍ŋ hu̍mbo̍ŋ mu̍ŋ nɔ̍ ba̍ā le̍.

²¹ Māsāa̍ Sɔ̍lɔ̍mɔ̄ŋ ndu̍ o̍o̍ nɔ̍ dɛ̄ndɛ̄la̍ bɛ̍ndūlā la̍a̍ ku̍ā o̍ mɛ̄ŋnda̍ŋ chōo̍ la̍ŋ. Bu̍ɛ̍i̍yāa̍ Māsāa̍ Hi̍lūām nda̍, nda̍ nda̍ a̍a̍ ku̍ā a̍ dɛ̄ndɛ̄la̍ŋ nda᷅ŋ ni̍. A̍ la̍ŋ Māsāa̍ Sɔ̍lɔ̍mɔ̄ŋ ndu̍ o̍o̍ to̍sā ya̍kōle̍ŋ ni̍. Te̍le̍ŋ o̍ te̍le̍ŋ, tē wɔ̄sīo̍o̍ŋ ŋ̄ hi̍o̍ū pɛ̍ ŋ̄gāa̍, dɛ̄ndɛ̄la̍ŋ nda᷅ŋ la̍a̍ ku̍ɛ̄ Ta̍a̍sī, lā kɔ̍ hu᷅ŋ a̍ ko̍o̍līi̍yo̍ŋ, a̍ ka̍ni̍ŋ hu̍mbo̍ŋ, a̍ chīŋūŋ kāma᷄ŋ, a̍ tɔ̍kpūa̍a̍, ndu̍yɛ̍ a̍ tɔ᷄mnda̍.

²² Mi̍ Māsāa̍ Sɔ̍lɔ̍mɔ̄ŋ o̍ su᷅l, ndu̍yɛ̍ mbo̍ nɔ̄ tāāsi̍o̍o̍ mbo̍ hīāū māsāā bɛ̍ndūa̍a̍ o̍ chi̍e̍ēŋndo̍ ni᷄ŋ kpo̍u̍.

²³ Ndu̍yɛ̍ māsāā bɛ̍ndūa̍a̍ o̍ chi̍e̍ēŋndo̍ chōo̍ kpo̍u̍, hūnɔ̄ɔ̍ nāa̍ Sɔ̍lɔ̍mɔ̄ŋ chu̍a̍, le̍ mā tūēī sɔ̄ɔ̍ŋ kɔ̄l kālu̍ŋ bɛ̍ndū Mɛ̄lɛ̄ka̍ ke̍ ndu̍ wo̍ŋ.

²⁴ Ndu̍yɛ̍ wānā o̍ wāna̍ ndu̍ o̍o̍ wa̍ hūnɔ̄ɔ̍ pɛ̍, mɛ̄ɛ̍ mī ndu̍ o̍o̍ hi᷅ŋ a̍ nyɔ̄ɔ̍ŋ le̍ Sɔ̍lɔ̍mɔ̄ŋ kīo̍o̍. Wāŋnda̍ hūnɔ̄ɔ̍ a̍ ko̍o̍līi̍yo̍ŋ, a̍ ka̍ni̍ŋ hu̍mbo᷄ŋ, a̍ dōmāla̍ tɔ̍ɔ̍ma̍lā bɛ̄ndūla̍ŋ, a̍ nyɛ̄m chɔ̄ūwo̍ŋ, a̍ nyɛ̄m chūŋ kɛ̄ndɔ᷄ŋ, o̍ ko̍ŋ kɔ̍ɔ̍lī a̍ su̍a̍a̍, ndu̍yɛ̍ a̍ chɔ̄lūāā yɛ̄yi̍i̍ mu̍ūli̍āŋnda̍. Ndu̍yɛ̍ īwɔ̄sī o̍ īwɔ̄sī wāŋnda̍ wa̍ he̍ī tōsāa̍.

²⁵ O̍ ko̍ŋ kɔ̍ɔ̍lī, Sɔ̍lɔ̍mɔ̄ŋ ndu̍ o̍o̍ nɔ̍ fo̍ndāŋndā nda̍ a̍a̍ kɛ̍sī su̍a̍a̍ la̍ŋ wāa̍la̍ŋ lā hīɔ̍ɔ̍lu̍ (4,000), le̍ su̍a̍a̍ ndūa̍a̍, ndu̍yɛ̍ a̍ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ. Ndu̍ o̍o̍ nɔ̍ vɛ̄lɛ̄ pūa̍a̍ nda̍ a̍a̍ sɔ̍ŋgā o̍ su̍a̍a̍ chōo̍ wa̍, wāa̍la̍ŋ tɔ̍ a̍ lā tīɔ̍ɔ̍ŋ (12,000). Ndu̍yɛ̍ mbo̍ kɛ̄sī nda̍ o̍ chi̍o̍o̍ŋ kpɛ̍ kpɛ̍. Mɛ̄ɛ̍ o̍ kɛ̍si̍ ā ti᷄ŋ o̍ chi̍e̍e̍ŋ mu̍ŋ nɔ̍ nyɛ̄lā nyāāna᷄ŋnda̍ su̍a̍a̍ ā nāŋnda̍ŋ ndo̍ŋ, mbo̍ kɛ̄sī ā ti᷄ŋ Chūlu̍sɛ̄lɛ̄m chi̍e̍e̍, nāa̍ ndu̍ pi̍la̍ wa̍ īchāli̍ wa̍.

²⁶ Chɔ̍ŋ a̍ Pēē Bɛ̍ndōo̍ Yūfi̍lu̍a̍tīī, mbo̍ kūā a̍ pɛ̄ŋgu̍la̍ŋ a̍ lɛ̄ŋndē Fīli̍i̍tīāŋnde̍ŋ, mbo̍ kūā a̍ pɛ̄ŋgu̍la̍ lɛ̄ŋndē I̍chi̍pīle̍ŋ, būŋga᷄ŋ wa̍ o̍ fo̍ndāŋndā lāŋ tɛ̄ɛ̄ŋ ndo̍ŋ ki̍nɛ̍i̍, māsāa̍ wa̍ lo̍ŋ nda̍, Sɔ̍lɔ̍mɔ̄ŋ o̍ bā bɛ̄ŋgu̍ nda̍ wa̍ ni̍.

²⁷ O̍ māsāle̍ Sɔ̍lɔ̍mɔ̄ŋ nde̍ŋ bɛ̄ŋgu̍, mi̍ Sɔ̍lɔ̍mɔ̄ŋ to̍sā mi̍ ka̍ni̍ŋ hu̍mbo᷄ŋ ŋ̄ hɔ̄bā Chūlu̍sɛ̄lɛ̄m, mɛ̄ɛ̍ pōūta̍ŋ lā wā nu̍a̍ā lɛ̄ŋ yɛ̍. O̍ ko̍ŋ kɔ̍ɔ̍lī, mbo̍ tōsā mi̍ yɔ̄mīī si̍dāāve̍ i̍ kūī Chūlu̍sɛ̄lɛ̄m mi̍ ī yɔ̄nu̍ŋ mɛ̄ɛ̍ yɔ̄mīī si̍ka̍mɔ̄ɔ̄ ī yɔ̄ŋɛ̄i̍ ī chō nu̍a̍ā ta̍u̍ ta̍u̍ o̍ pēmbo᷄ŋ Chu̍dā bɛ̍ŋgu̍ yɛ̍.

²⁸ Su̍a̍ā Sɔ̍lɔ̍mɔ̄ŋ ndu̍ o̍o̍ nɔ̍ ki̍nɛ̍i̍ ya̍, o̍ lɛ̄ŋndē I̍chi̍pīle̍ŋ, a̍ o̍ lɛ̄ŋīī chēle̍ŋnde̍ ni᷄ŋ nda̍ a̍a̍ pi̍a̍ndū nda̍ ni̍.

A̍ mɛ̄ɛ̄lu̍la̍ māsāle̍ Sɔ̍lɔ̍mɔ̄ŋ nde̍ŋ o̍kɔ̄ɔ̄

²⁹ Bōōndi̍i̍ Sɔ̍lɔ̍mɔ̄ŋ o̍ wa̍ māsāa̍ ve̍, sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ ndɔ̄le̍ŋ ni᷄ŋ, chɔ̍ŋ o̍ ka̍ndɔ᷄ŋndo̍ ha̍a̍a̍ mbo̍ fūūlūū o̍ mɛ̄ɛ̄lu̍la̍ŋ ndo̍ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndū Ne̍ta̍ŋ wāna̍ su̍a̍ā le̍ Mɛ̄lɛ̄ka̍ wo̍ ō pōōnyi̍a̍a̍ wo̍ ni᷄ŋ, ndu̍yɛ̍ mi̍ ŋ̄ wā vɛ̄lɛ̄ ŋ̄ pōōnyīāā o̍ sɔ̄ɔ̍ŋ wa̍ā lāchīŋ A̍hi̍chā, Si̍lo̍na̍i̍tīi̍nɔ̍, wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ wo̍ŋ ni᷄ŋ, mi̍ ŋ̄ wā vɛ̄lɛ̄ ŋ̄ pōōnyīāā o̍ yi̍lāŋndā I̍dɔ̄ɔ̄, wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ a̍ Chɛ̄lōbo̍wām, po̍ Ne̍ba̍tī wo̍ o̍kɔ̄ɔ̄ wo̍ ni᷄ŋ.

³⁰ Sɔ̍lɔ̍mɔ̄ŋ to̍sa̍ māsāle̍ŋ lɛ̄ŋndē I̍sɔ̄lūɛ̍i̍le̍ŋ chōo̍ kpo̍u̍, le̍ wɔ̄sīla̍ŋ be̍le̍-hi̍ɔ̍ɔ̍lu̍ (40), Chūlu̍sɛ̄lɛ̄m chi̍e̍e̍.

³¹ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ wu᷅, ndu̍yɛ̍ mā chɔ̄ ndu̍ o̍ chi̍e̍e̍ bɛ̍ndu̍ Dēēve̍ fi̍nyā ndɔ̄ wo̍ ni᷄ŋ. Mɛ̄ɛ̍ Sɔ̍lɔ̍mɔ̄ŋ o̍ vi᷅, mi̍ Lūēhōbo̍wām po̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.