Ko̍lo̍ni̍kō Di̍i̍ŋ Ndɔ̄ɔ̍ 6 - Yāu̍ Mɛ̄lɛ̄ka̍a̍

Sɔ̍lɔ̍mɔ̄ŋ so̍ō nāa̍ wāŋnda̍ I̍sɔ̄lūɛ̄ī chu̍a̍

¹ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ pi̍ɛ̍ī Mɛ̄lɛ̄ka̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, a̍ di̍mi̍ māā, o̍ nyūmmā tīŋgīsi̍ma̍ bɛ̍ndūa̍ŋ ni᷄ŋ nāa̍ nu̍m a̍a̍ chālāa̍ ā chō ni̍.

² Kɛ̍ I̍ te̍ŋgu̍l nu̍m chīɛ̄ī tɔ̍ɔ̍ma̍a̍, fo̍ndāŋ ŋ̄ nɔ̄ mā wa̍ lēni᷄ŋ le̍ fɛ̍ɛ̍ŋ a̍ fɛ̍ɛ̍ŋ ndo̍.”

³ O̍ ko̍ŋ, mi̍ Māsā Bɛ̍ndōo̍ Sɔ̍lɔ̍mɔ̄ŋ mu̍li᷄ŋ ku̍mbū wāŋnda̍ I̍sɔ̄lūɛ̄ī a̍ wa̍ īsīsi̍ wo̍, mbo̍ dūāū nda̍ sa̍lā.

⁴ Mbo̍ dīmī āā, “Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, ō pēēlu̍ būŋgɛ̄ī ndūɛ̍i̍ o̍ chu̍e̍l sīndɛ̄ Dēēve̍ fi̍nyā nī ve̍. Mi̍ Mɛ̄lɛ̄ka̍ dīmūl Dēēve̍ fi̍nyā nī a̍ te̍le̍ŋ ko̍ŋ āā,

⁵ ‘Chɔ̍ŋ a̍ te̍le̍ŋ ya̍ I̍ so̍li̍ wānāā nīa̍a̍ o̍ chɛ̄le̍ŋ ni᷄ŋ o̍ I̍chi̍pī wo̍, mbo̍ bīya᷅ŋ a̍ te̍le̍ŋndo̍ ho̍ō, I̍ hɛ̍li̍ wɔ̍ chi̍e̍e̍ o̍ chi̍e̍e̍ bɛ̍ndū o̍ yu̍ŋgu̍la̍ I̍sɔ̄lūɛ̍i̍ya̍ tɛ̄ɛ̄ŋ le̍ mā tēŋgu̍l la̍ chīɛ̄ī nda̍ sōōlūū ya̍ wo̍ le̍. Ndu̍yɛ̍ I̍ hɛ̍li̍ wɔ̍ wānā o̍ wānā mī si̍i̍ŋgu̍u̍ ndu̍ māsā wānāā nīa̍a̍ I̍sɔ̄lūɛ̄ī chōo̍ le̍.

⁶ Kɛ̍ mi̍ I̍ hɛ̍lī Chūlu̍sɛ̄lɛ̄m le̍ mbō wa̍ chi̍e̍e̍ nda̍ sōōlūū ya̍ wo̍. Ndu̍yɛ̍, mi̍ hɛ̍lī nūm Dēēve̍ mi̍ kɛ̍sī nu̍m wānāā nīa̍a̍, I̍sɔ̄lūɛ̄ī chōo̍.’ ”

⁷ Mi̍ Sɔ̍lɔ̍mɔ̄ŋ hi̍a̍ū lāchī a̍ sūɛ̍i̍, mbo̍ dīmī āā, “Mi̍ Dēēve̍ fi̍nyā nī ndu̍ o̍o̍ kɛ̍ɛ̍sīāā le̍ mī ndu̍ o̍o̍ ta̍ŋgu̍l chīɛ̄īyo̍ le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ sōōlūūwo̍.

⁸ Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl Dēēve̍ fi̍nyā nī, āā, ‘Yīya᷄ŋ kɛ̍ndɔ̄ɔ̍ pīla̍ ŋ̄ yīya̍ŋ ko̍ŋ o̍ kɔ̄l nūmndo̍ ni᷄ŋ le̍ ya̍ chīɛ̄ī nda̍ sōōlūū ya̍ lēni᷄ŋ ndō tēŋgūllo̍ ni̍. A̍ to̍sa̍ īkɛ̄ndɛ̄ le̍ yīya᷄ŋ wa̍ā le̍nde̍ nɔ̄ɔ̍ o̍ kɔ̄l nūmndo̍ ni᷄ŋ.

⁹ Kɛ̍ ō cho̍ nu᷅m te̍ nɔ̍ mā ta̍ŋgu̍l chīɛ̄īyo̍ le̍ ya̍ sōōlūūwo̍ le̍. Po̍ nu̍m ŋ̄ chō hūnɔ̄ɔ̄ vīōlɔ̄ɔ̄ wo̍, ndu̍ nɔ̍ ni̍ mbō tāŋgu̍l chīɛ̄īyo̍ ho̍ō le̍ ya̍.’ ”

¹⁰ Mi̍ Sɔ̍lɔ̍mɔ̄ŋ hi̍a̍ū lāchī a̍ sūɛ̍i̍, mbo̍ dīmī āā, “Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ ō chu̍a̍ būngɛ̄i̍ le̍ tōsāa̍, ō chīŋa̍ lāsōndō. Ō tōsa̍ mi̍ mi̍i̍ŋgū māsāa̍ I̍sɔ̍lūɛ̄ī, o̍ fōōfo̍ Dēēve̍ fi̍nyā nī wo̍, mɛ̄ɛ̍ ndu̍ Mɛ̄lɛ̄ka̍ Ya̍a̍wɛ̄ɛ̄ o̍ chu̍a̍ būŋgɛ̄i̍ yɛ̍. O̍ ko̍ŋ kɔ̍ɔ̍lī, mi̍ te̍ŋgūl ndu̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ chīɛ̄īyo̍, le̍ ndu̍ sōōlūūwo̍ lēni᷄ŋ.

¹¹ Ndu̍yɛ̍ o̍ chīɛ̄ī kōŋ ni᷄ŋ ya̍ I̍ bɛ̍ɛ̍ndi̍a̍a̍ fo̍ndāŋndo̍ le̍ kɔ̍fū kpe̍ma̍ Mɛ̄lɛ̄ka̍ Ya̍a̍wɛ̄ɛ̄ wo̍ kɛ̄sīo̍o̍ ni̍. Bōōndi̍i̍ wāŋnda̍ I̍sɔ̄lūɛ̄ī a̍ fu̍la̍ sīndɛ̄ I̍chi̍pī ve̍, kpe̍ma̍ Mɛ̍lɛ̄ka̍ yīi̍ a̍ nda̍ wo̍, o̍ kɔ̍fōo̍ ho̍ō ni᷄ŋ kpe̍ma̍ ko̍ŋ ō chō ni̍.”

Sɔ̍lɔ̍mɔ̄ŋ pi̍ɛ̍i̍ Mɛ̄lɛ̄ka̍

¹² O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ kɔ̍ si᷅m o̍ ma̍āŋ Mɛ̄lɛ̄ka̍ Ya̍a̍wɛ̄ɛ̄ wo̍ lāchī, I̍sɔ̄lūɛ̍i̍ya̍a̍ nda̍ a̍a̍ chu̍u̍ŋgi̍āŋ lo̍ŋ nda̍ kpo̍u̍ o̍ hɔ̄l. Mbo̍ he̍e̍lū bāla̍ŋ chōo̍ cho̍o̍ mbo̍ pīɛ̄ī Mɛ̄lɛ̄ka̍.

¹³ (Ndu̍yɛ̍, nāa̍ si̍māā Sɔ̍lɔ̍mɔ̄ŋ o̍ to̍o̍si̍a̍a̍ a̍ būlɔ᷄ŋsīi̍ye̍ o̍ la̍ūwo̍ tɛ̄ɛ̄ŋ nda̍, lēchōo̍ Sɔ̍lɔ̍mɔ̄ŋ o̍ wa̍ īsīsi̍ ni̍. Nāa̍ si̍māa̍ ha̍ā, bu̍o̍o̍ ni̍, bānde̍i̍ ni̍ ō wa̍ nyɛ̄ pīlɛ̍ kpe̍, nɛ̄īyo̍ lē ŋɔ̄ma̍a̍, hēlɔ̄ɔ̍ nɛ̄īyo̍ lē ŋūɛ̍ɛ̍nu̍. O̍ ko̍ŋ, mbo̍ bāŋ wūla̍ŋ o̍ nyɛ̄ kōŋ chōo̍ I̍sɔ̄lūɛ̍i̍ya̍a̍ chu̍u̍ŋgi̍āŋ lo̍ŋ nda̍ kpo̍u̍ o̍ hɔ̄l, mbo̍ hēēlū bāla̍ŋ chōo̍ cho̍o̍.)

¹⁴ Mbo̍ pīɛ̄ī Mɛ̄lɛ̄ka̍ mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, nu᷄m pīlɛ̍ kpe̍ cho̍ Mɛ̄lɛ̄ka̍ ni̍. Ɛ̄chɛ̍nɛ̄ ni̍, o̍ chi̍e̍ēŋndo̍ ho̍ō chōo̍ ni̍, Mɛ̄lɛ̄ka̍ o̍ Mɛ̄lɛ̄ka̍ chēle̍ŋ cho᷄ le̍. A̍ cho̍ wa᷅na̍ fa̍ŋa̍ŋ o̍ lē dīōm chōo̍ le̍. Tē a̍ yi̍i̍ kpe̍ma̍a̍ a̍ wānā o̍ wānā pɛ̍, mī wānā ko̍ŋ tūsi̍ŋ o̍ dīōm nūmndo̍ bɛ̄ŋgu̍, mbō tōsa̍ nyɛ̄ ŋ̄ dīmūl ndu̍ wo̍ a̍ kɔ̄l ndɔ̄ɔ̍ pɛ̍, lōo̍ ŋ̄ lō o̍ kpe̍ma̍ nu̍m kōŋ chōo̍ ni̍, mā chɔ̍m ndu̍ māā a̍ ka̍a̍la̍ ndu̍.

¹⁵ Būŋgɛ̄ī ŋ̄ chūe̍l bu̍ɛ̍ī nūmndo̍ Dēēve̍ fi̍nyā ni̍ ve̍, ma̍ pēēlū būŋgɛ̄ī kēŋ. Ndu̍yɛ̍ nyɛ̄ ŋ̄ chūe̍l ndu̍ būŋgɛ̄i̍ yo̍, ō chīŋa̍ hāū la̍so̍ndō.

¹⁶ Le̍la̍ŋ, o̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, hi̍o̍u̍ ni̍ko̍ la̍chi̍ a̍ būŋgāŋ ŋ̄ chūe̍l bu̍ɛ̍ī nūmndo̍ Dēēve̍ fi̍nyā nī wo̍ŋ pēēlōo̍. Mā to̍sa̍ mɛ̄ɛ̍ ŋ̄ dīmi̍ yɛ̍. Ma̍ chūēl ndu̍ sīndɛ̄ būŋgɛ̄i̍, māā tē wānāa̍ fu̍la̍ o̍ pūlāle̍ ndɔ̄le̍ŋ chōo̍ wa̍ ā tōsa̍ nyɛ̄ ŋ̄ dīmūl nda̍ wo̍ pɛ̍, ndu̍yɛ̍ mā chu̍a̍ sāwāla̍ nu̍mnda̍ŋ, mā wa̍ nu̍m o̍ hɔ̄l sa̍kpō māā Dēēve̍ fi̍nyā nda̍, māā ā chō tōsā mī māsāle̍ŋ I̍sɔ̄lūɛ̄ī le̍ hi̍o̍ū lāchī a̍ wāa̍ o̍ ndu̍ lo̍ chi̍ɛ̍ī ni᷄ŋ le̍ fɛ̍ɛ̍ŋ a̍ fɛ̍ɛ̍ŋ.

¹⁷ Le̍la̍ŋ, o̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, būŋgɛ̄ī ŋ̄ chūe̍l ke̍ŋ bu̍ɛ̍ī nūmndo̍ Dēēve̍ fi̍nyā nī ve̍, pe̍e̍lu̍ būŋgɛ̄ī kēŋ mā to̍sa̍ nyɛ̄ ŋ̄ dīmu̍l ndu̍ wo̍.

¹⁸ “Kɛ̍ nūm Mɛ̄lɛ̄ka̍, ɛ̄chɛ̍nɛ̄ bɛ̍ɛ̍ kpo̍u̍, ō cho̍ le̍tu̍u̍ le̍ mā su̍l lo̍ŋ te̍. Ɔ̍ɔ̄ ni᷅ŋ chīɛ̄ī ya̍ I̍ ta̍ŋgu̍l ho̍ō le̍ nūm ndo̍, vɛ̄ɛ̍nɛ̍ ŋ̄ lōōkū yɛ̍ mā su̍l lēni᷄ŋ mā wa̍ wāŋndā chīe̍e̍ya̍ tɛ̄ɛ̄ŋ o̍ chi̍e̍ēŋndo̍ ho̍ō ni᷄ŋ?

¹⁹ O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, bu̍ɛ̍ī nūmndo̍ ya̍ I̍ cho̍ ni̍. Le̍la̍ŋ, ya̍ŋ ni᷅la̍ŋ o̍ pīɛ̄īlē ya̍ I̍ cho̍ nu̍m nde̍ŋ, ndu̍yɛ̍ mā mu̍li̍ ya̍ dīōm.

²⁰ Hɔ̄ltē nūmnde̍ŋ lē wa̍ chi̍ɛ̍īyo̍ ho̍ō chōo̍ īdīi̍ a̍ īchɔ̄l. Nyɛ̄ o̍ nyɛ̄ ya̍ I̍ hu̍ŋ nyu̍nā nu̍m dīōm o̍ chīɛ̄īyo̍ ho̍ō ni᷄ŋ le̍ ndu̍ pɛ̍, yāndi̍i̍ tu̍e̍i̍ ya̍ dīōm. Kāni̍ fo̍ndōle̍, a̍ chu̍a̍ būŋgɛ̄i̍ māā o̍ chīɛ̄ī nūmndo̍ ho̍ō ni᷄ŋ na̍nu᷄ŋ na̍a̍ ŋ̄ chō nu̍m wā sōōlūūwo̍ ni̍.

²¹ Ndu̍yɛ̍, ya̍ ni̍, wānāā nūmnda̍ I̍sɔ̄lūɛ̄ī ni̍, lēpīɛ̄ī o̍ lēpīɛ̄ī na̍a̍ ŋ̄ hu᷄ŋ pi̍ɛ̍ī nu̍m o̍ chīɛ̄īyo̍ ho̍ō ni᷄ŋ pɛ̍, tu̍e̍i̍ pi̍ɛ̍īlē lēŋ, nāa̍ ŋ̄ chō īchāli̍ ɛ̄chɛ̍nɛ̄ wa̍, mā ma̍l na̍a̍ le̍ yɔ̄ŋndā nāāla̍ wɔ̄ɔ̍ŋnda̍ŋ.

²² “Tē ō wa̍ pɛ̍ mī wāŋndo̍ ho̍l chāa̍ŋ ndɔ̍ sūɛ̍i̍, mī chāa̍ŋ ndɔ̍ ko̍ŋ hīŋ mēna᷄ŋndo̍ o̍ ma̍āŋ cho̍ ho̍ō o̍ nūmndo̍ chi̍ɛ̍ī ni̍ŋ ndo̍ hɔ̄lndɔ̄, le̍ chɔ̄m ndo̍ māā ō cho̍ ndu̍ le̍ to̍sa̍ sūɛ̍i̍ ke̍ŋ te̍ pɛ̍,

²³ nūm pi̍la̍ tu̍e̍i̍ nāa̍ ŋ̄ chō īchāli̍ ɛ̄chɛ̍nɛ̄ wa̍, mā to̍sa̍ īsɔ̄ɔ̍ a̍ ndi̍ o̍kɔ̄ɔ̄, mā kēlū yāmɛ̍i̍ nda̍ tɛ̄ɛ̄ŋ, mā ke̍ wāna̍ nɔ̍ di̍o̍o̍ wo̍ di̍ ndɔ̄ɔ̍, mā tu̍si̍ wāna̍ tɛ̄ɛ̄mbūūwo̍ nyɛ̄ pālāā chōo̍.

²⁴ “A̍ yɔ̍ŋ bɛ̍ɛ̍ mī wānāā nūmnda̍ I̍sɔ̄lūɛ̄ī mī ya̍a̍mɔ̍ɔ̍wa̍a̍ ndāa̍ ā yēm nda̍, le̍ mɛ̄ɛ̍ nda̍ tōsa̍ yɔ̄ŋ wɔ̍ɔ̍ŋndo̍ a̍ nūm yɛ̍, kɛ̍ tē ā sīna̍ pɛ̍ māā ā tɛ̄ɛ̄mbu̍u̍ a̍ nūm mā tūsi̍ŋ, mā mūlu̍l yɔ̄ŋndā ndāla̍ wɔ̍ɔ̍ŋnda̍ŋ kɔ̄ɔ̍, mā hīŋ o̍ chīɛ̄ī nūmndo̍ ho̍ō ni᷄ŋ, mā hu̍ŋ nyu̍na̍ le̍ mā ma̍l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ pɛ̍,

²⁵ yāndi̍i̍ Mɛ̄lɛ̄ka̍, tu̍e̍i̍ pīɛ̄īlē ndāle̍ŋ ɛ̄chɛ̍nɛ̄ wa̍, mā ma̍l wānāā nūmnda̍ I̍sɔ̄lūɛ̄ī le̍ yɔ̄ŋndā ndāla̍ wɔ̄ɔ̍ŋnda̍ŋ. Ndu̍yɛ̍ mā mi̍ŋgi̍ nda̍ o̍ lɛ̍ŋndēlēŋ lēŋ ni᷄ŋ, lɛ̄ŋndē ŋ̄ chūe̍l sīndɛ̄ fi̍nyāā ndāā ma̍māa̍ būŋgɛ̄i̍ māā a̍ chō nda̍ kē le̍ŋ.

²⁶ “Ā yɔ̍ŋ bɛ̍ɛ̍ mā ku̍u̍na̍ pīɔ̍ɔ̍ māā ō si̍ā le̍, le̍ mɛ̄ɛ̍ wānāā nūmnda̍ ā to̍sa̍ yɔ̄ŋ wɔ̄ɔ̍ŋndo̍ a̍ nūm yɛ̍, kɛ̍ tē ā mūlu̍l yɔ̄ŋndā ndāla̍ wɔ̍ɔ̍ŋnda̍ŋ kɔ̄ɔ̍ pɛ̍ le̍ mɛ̄ɛ̍ ŋ̄ tūsi̍ nda̍ nyɛ̄ pālāa̍ chōo̍ yɛ̍, mā tūsi̍ŋ mā hu̍ŋ so̍o̍lūū nu̍m o̍ chīɛ̄ī nūmndo̍ ho̍ō ni᷄ŋ pɛ̍,

²⁷ yāndi̍i̍, tu̍e̍i̍ pi̍ɛ̍īlē ndāle̍ŋ ɛ̄chɛ̍nɛ̄, mā ma̍l wāŋnda̍ I̍sɔ̄lūɛ̄ī, bu̍ɛ̍i̍yāā nūmnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ. Ndu̍yɛ̍ mā pɛ̍ɛ̍ku̍ nda̍ mā tōsa̍ nyɛ̍ bɛ̍nda̍ le̍ tōsāa̍ wo̍. O̍o̍ Mɛ̄lɛ̄ka̍ Ya̍a̍wɛ̄ɛ̄, tē bu̍ɛ̍i̍yāā nūmnda̍ tōsa̍ he̍ī pɛ̍, to̍sa̍ mī pīɔ̍ɔ̍ ō sīa̍ o̍ lɛ̄ŋnde̍ŋ nde᷅ŋ ni᷄ŋ, lɛ̄ŋndē ŋ̄ ke̍ le᷅ŋ wānāā nūmnda̍ mi̍ lē wā nyɛ̄m nda̍ ŋ̄kɛ᷅ le̍ŋ.

²⁸ “Tē ō wa̍ pɛ̍ mī yīmā bɛ̄ndūa̍ŋ mā de᷄l o̍ lɛ̄ŋnde̍ŋ nde᷅ŋ ni᷄ŋ, ɔ̄ɔ̄ mī nāa̍ tɛ̍ɛ̍mbūū tɔ̍lɔ̄ɔ̄la̍ŋ ndo̍ ō de᷄l tɔ̄lɔ̄ɔ̄la̍ŋ chōo̍, ɔ̄ɔ̄ mī kɛ̍ŋgɛ̍ŋgu̍lu̍ma̍a̍ ō tɛ̄ɛ̄mbu̍u̍ tɔ̄lɔ̄ɔ̄la̍ŋ, ɔ̄ɔ̄ mī hūēīyīī tūū bɛ̄ndūe̍i̍ ī tɛ̄ɛ̄mbu̍u̍ tɔ̄lɔ̄ɔ̄la̍ŋ, ɔ̄ɔ̄ mī so̍o̍nu̍a̍a̍ ā hīŋ ku̍ndā bɛ̄ndōo̍, ɔ̄ɔ̄ dɛ̄lūa̍a̍ mā hu᷄ŋ tɛ̍ɛ̍mbūū tɔ̄lɔ̄ɔ̄la̍ŋ, ɔ̄ɔ̄ mī ya̍a̍mɔ̍ɔ̍wa̍ ā hu᷄ŋ de᷅l wānāā nūmnda̍ chōo̍ a̍ sɔ̍ŋgɔ̄ɔ̍, ɔ̄ɔ̄ mī kpūndɛ̍la̍ŋ, ɔ̄ɔ̄ nāāla̍ŋ lā de᷄l wānāā nūmnda̍ chōo̍ pɛ̄,

²⁹ ndu̍yɛ̍ mā nyu̍na̍ nu̍m o̍ pīɛ̄īlē ni᷄ŋ pɛ̍, ya̍ŋ ni᷅la̍ŋ o̍ pīɛ̄īlē ndāle̍ŋ. Wānāā nūmnda̍ I̍sɔ̄lūɛ̄ī tē ō kɛ̍ kɛ̍ si̍na̍ tɛ̄ɛ̄mbūū ndɔ̄ɔ̍ pɛ̍, mbō hīŋ a̍ kɔ̄l īmɔ̍nɔ̍ɔ̍, mbō hu̍ŋ he̍e̍lū bāla̍ŋ o̍ chīɛ̄īyo̍ ho̍ō ni᷄ŋ o̍ pīɛ̄īle̍ŋ ni᷄ŋ pɛ̍,

³⁰ ya̍ŋ ni᷅la̍ŋ o̍ pi̍ɛ̍īlē ndɔ̄le̍ŋ ɛ̄chɛ̍nɛ̄. Mā ma̍l ndu̍ le̍ nyɛ̄ o̍ to̍sa̍ wo̍. Nu̍m pīlɛ̍ kpe̍ nɔ̍lā ni̍ mā chē yīya᷄ŋ wāna̍ chi̍o̍o̍ nɔ̄ o̍ kɔ̄l ndɔ̄ɔ̍ ni᷄ŋ ndo̍. Le̍la̍ŋ mɛ̍ɛ̍nda̍ŋ ke̍lālā ndāla̍ŋ mā bīī wānā o̍ wānā mɛ̄ɛ̍ kūɛ̍ɛ̍la̍ ndɔ̄la̍ŋ lā chō yɛ̍.

³¹ Ko̍ŋ to̍sā ni̍ mī wānāā nūmnda̍ a̍ ke̍ nu̍m bɛ̄ɛ̄le̍ŋ, mā hīōū lāchī a̍ nyɛ̄ ŋ̄ dīmūl nda̍ wo̍ tōsāa̍, o̍ lɛ̄ŋndē ŋ̄ ke̍ le᷅ŋ fi̍nyāā nāā ma̍māa̍ le̍ŋ ni᷄ŋ.

³² “O̍ ko̍ŋ, wānāa̍ cho̍ bɛ̍ɛ̍ o̍ lɛ̄ŋīī lēvīlle̍ ni᷄ŋ ā cho̍ a̍ I̍sɔ̄lūɛ̍i̍ le̍ wa̍, ā chō tūēīyɔ̄ɔ̄ a̍ dīōlā nūmnda̍ tɔ̍ɔ̍ma̍ la̍ŋ o̍kɔ̄ɔ̄, mā tūēī a̍ wa̍lta̍ kɔ̄ndɔ̄fi̍ltā ŋ̄ chō tōsāa̍ wānāā nūmnda̍ tɛ̄ɛ̄ŋ nda̍ŋ. Wāŋnda̍ ha̍ā, tē ō pīlɛ̍ bɛ̍ɛ̍ tu̍e̍ī a̍ nu̍m o̍kɔ̄ɔ̄ pɛ̍, mbō hu᷄ŋ so̍o̍lūū nu̍m o̍ chīɛ̄īyo̍ ho̍ō ni᷄ŋ,

³³ yāndi̍i̍ tu̍e̍i̍ pi̍ɛ̍īlē ndɔ̄le̍ŋ ɛ̄chɛ̍nɛ̄. Ko̍ŋ to̍sā ni̍, wāŋnda̍ o̍ chi̍e̍ēŋndo̍ ni᷄ŋ kpo̍u̍ mā nɔ̄ sīōōŋnde̍ le̍ nūm, ndu̍yɛ̍ mā ke̍ nu̍m bɛ̄ɛ̄le̍ŋ, mɛ̄ɛ̍ wānāā nūmnda̍ I̍sɔ̄lūɛ̄ī a̍ nɔ̍ bɛ̄ɛ̄le̍ŋ le̍ nūm yɛ̍. Ndu̍yɛ̍ mā sīna̍ māā le̍ nu̍m sōōlūūwo̍ ya̍ I̍ ta̍ŋgu̍l chīɛ̄īyo̍ ho̍ō ni̍.

³⁴ “Mɛ̄lɛ̄ka̍, tē wānāā nūmnda̍ kūɛ̄ le̍ sɔ̍ŋgɔ̄ɔ̍ a̍ ya̍a̍mɔ̍ɔ̍wa̍a̍ ndāa̍ pɛ̍, mā nyūna̍ nu̍m le̍ mālāa̍, ndu̍yɛ̍ mā pīɛ̍i̍ nu̍m o̍ chīɛ̄ī nu̍m ya̍ I̍ te̍ŋgu̍l nu̍m ho̍ō o̍ chi̍e̍e̍ ŋ̄ hɛ̄li̍ ho̍ō wo̍ ni᷄ŋ, le̍ nu̍m sōōlūūwo̍ wo̍ pɛ̍,

³⁵ yāndi̍i̍ tu̍e̍i̍ pi̍ɛ̍īlē ndāle̍ŋ ɛ̄chɛ̍nɛ̄, mā to̍sa̍ mā yēm ya̍a̍mɔ̍ɔ̍wa̍a̍ ndāa̍.

^36-38 “Mɛ̄lɛ̄ka̍, wānā o̍ wānā cho̍ mbō kɛ̄ɛ̍ yɔ̄ŋ wɔ̄ɔ̍ŋndo̍ tōsā le̍. Le̍la̍ŋ, tē wāŋnda̍ ha̍ā ā tōsa̍ yɔ̄ŋ wɔ̄ɔ̍ŋndo̍ a̍ nūm pɛ̍, mā dɔ̄ɔ̄nu᷄ŋ tu̍mbe̍ a̍ nda̍, mā māl nda̍ ya̍a̍mɔ̍ɔ̍wa̍ o̍ bā mā sɛ̄ŋi̍ŋ a̍ nda̍ o̍ bīyɔ̄ɔ̍ ni᷄ŋ o̍ lɛ̄ŋīī chēle̍ŋnde̍ ni᷄ŋ, ā yɔ᷄ŋ bɛ̍ɛ̍ mī ī wa̍ lēvīl, kɛ̍ ndu̍yɛ̍, mā yīya̍ŋ le̍ mā nyūna̍ nu̍m le̍ nda̍ mālɔ̄ɔ̍ le̍ yɔ̄ŋndā ndāla̍ wɔ̍ɔ̍ŋnda̍ŋ, nāa̍ nda̍ chō ka̍ŋ o̍ bīyɔ̄ɔ̍ ni᷄ŋ nda̍, mā chɔ̄ɔ̄mu̍u̍ yɔ̄ŋndā ndāla̍ wɔ̍ɔ̍ŋnda̍ŋ, mā mūli̍ŋ nāa̍ nūm chu̍a̍ a̍ kɔ̄ltā ndāla̍ŋ, ndu̍yɛ̍ a̍ yīya̍ŋ ndāla̍ŋ kpo̍u̍ pɛ̍, mā mūli̍ hɔ̄lla̍ kūmbū lɛ̄ŋndē ŋ̄ ke᷄ le᷅ŋ fi̍nyāā ndāā ma̍māa̍ le̍ŋ, o̍ chi̍e̍e̍ ŋ̄ hɛ̄li̍ ho̍ō mi̍ chīɛ̄ī nu̍mndo̍ ō wā lo̍ŋ le̍ nu̍m sōōlūūwo̍ wo̍, mā pīɛ̍i̍ nu̍m pɛ̍,

³⁹ yāndi̍i̍ tu̍e̍i̍ pi̍ɛ̍īlē ndāle̍ŋ ɛ̄chɛ̍nɛ̄, mā ma̍l wānāā nu̍mnda̍ le̍ yɔ̄ŋndā wɔ̍ɔ̍ŋndā nda̍ tōsa̍ a̍ nu̍m nda̍ŋ, mā to̍sa̍l nda̍ nyɛ̄ nda̍ nyūna̍ nu̍m le̍ ndu̍ wo̍.

⁴⁰ “O̍o̍ Mɛ̄lɛ̄ka̍, hɔ̄ltē nūmnde̍ŋ lē wa̍ na̍a̍ chōo̍, mā ya̍ŋ ni᷅la̍ŋ nyɛ̄ kɛ̄ndɛ̄ ye̍ke̍ŋ, mā tūēī lēpīɛ̄ī o̍ lēpīɛ̄ī na̍a̍ ŋ̄ pīɛ̍i̍ nu̍m pɛ̍ o̍ fo̍ndāa̍ ho̍ō.

⁴¹ O̍o̍ Mɛ̄lɛ̄ka̍ Ya̍a̍wɛ̄ɛ̄, hu̍ŋ mā hu̍ŋ lu̍ɛ̍ī o̍ fo̍ndāŋ nūm pɛ̍ŋgīa̍a̍ mā wa̍ lo̍ŋ. Lu̍ɛ̍i̍ la̍tu̍lu̍ a̍ kɔ̍fu̍ kpe̍ma̍ nu̍mndo̍, o̍ chɔ᷅m mɛ̄ɛ̍ ŋ̄ chō wāna̍ kpāāyā bɛ̍ndū yɛ̍ wo̍. Wānāā nūm a̍ so̍līāā lāsa̍lāa̍ ā tōsa̍ ni̍ko̍ nyɛ̍ cho̍ sa̍kpō nu̍m o̍ hɔ̄llo̍, le̍ te̍le̍ŋ o̍ te̍le̍ŋ. Ndu̍yɛ̍ to̍sa̍ mī wānāā nūm a̍ sa̍kpūa̍a̍ ā dɔ̄ɔ̄nu᷄ŋ nya̍a̍le̍, mā dēŋi̍ chōo̍ cho̍o̍ a̍ kɔ̄l kɛ̄ndɔ̄ɔ̍.

⁴² O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ kɛ̍ɛ̄ bu̍ɛ̍ī nu̍m ŋ̄ tāla̍ chūɛ̄īya̍ŋ o̍ lēbōl, ma̍ sīīŋgūū ndu̍ māsā bɛ̍ndōo̍ le̍ lɛ̄ŋndē I̍sɔ̄lūɛ̍i̍le̍ŋ ndo̍ le̍. Lo̍o̍nu̍ŋ a̍ kāālā nu̍m ŋ̄ chɔ᷄m bu̍ɛ̍ī nūmndo̍ Dēēve̍ wo̍.”