Ko̍lo̍ni̍kō Di̍i̍ŋ Ndɔ̄ɔ̍ 4 - Yāu̍ Mɛ̄lɛ̄ka̍a̍

A̍ nyɛ̄m wa̍llo̍ŋ o̍ chīɛ̍i̍ Mɛ̄lɛ̄ka̍a̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ to̍o̍sīāā vɛ̄lɛ̄ ma̍āŋndo̍ a̍ būlɔ᷄ŋsīi̍ye̍. Ma̍āŋndo̍ ho̍ō ō wa̍ bānde̍i̍ nɛ̄īyo̍ be̍le̍-ya̍a̍, bu̍o̍o̍ nɛ̄īyo̍ be̍le̍-ya̍a̍, hēlɔ̄ɔ̍ nɛ̄īyo̍ tɔ̍ a̍ lē ŋūɛ̍ɛ̍nu̍.

² O̍ ko̍ŋ kɔ̍ɔ̍lī, mbo̍ tōōsīāā vɛ̄lɛ̄ hɛ̄ŋgɛ̍i̍ bɛ̍ndū māmɛ̄ŋndo̍ a̍ būlɔ᷄ŋsīi̍ye̍. Hɛ̄ŋgɔ̍ɔ̍ ho̍ō ō wa̍ yīŋgīlāa̍ lēni᷄ŋ le̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ, tōŋgɔ̄ɔ̍ nɛ̄īyo̍ tɔ̍ a̍ lē ŋūɛ̍ɛ̍nu̍, sōndō ndɔ̄ɔ̍ bālɔ̄ɔ̍ chɛ̍chɛ̍, nɛ̄īyo̍ be̍le̍-hi̍ɔ̍ɔ̍lu̍ a̍ lē ŋūɛ̍ɛ̍nu̍.

³ Hɛ̄ŋgɔ̍ɔ̍ ho̍ō o̍ chɔ̄chɔ᷄ŋ lēbɛ̄ŋgu̍, nyɛ̄la̍ŋ lā wa̍ lā tūūlīāā lo̍ŋ māā lāhe᷄m, pūla᷄ŋ mā mīɔ̍ɔ̍ŋ chɛ̍chɛ̍, la᷅ŋ lā wa̍ lēchōo̍, la᷅ŋ lā wa̍ lēbɛ̄ŋgu̍. Nyɛ̄la̍ wa̍ la᷅ŋ lā tūūlīāā o̍ hɛ̄ŋgɔ̍ɔ̍ ho̍ō la̍ŋ, lā wa̍ lā tōōsīāā a̍ hɛ̄ŋgɔ̍ɔ̍ lātūlu̍.

⁴ Nyɛ̄lā nda̍ kɛ̄si̍ hɛ̄ŋgɔ̍ɔ̍ ho̍ō chōo̍ la̍ŋ, lā wa̍ tɔ̍ a̍ lā tīɔ̍ɔ̍ŋ, lā tōōsīāā māā nāūwāā tōōyē. Mɛ̄ɛ̍ nda̍ mūli̍ lā yāa̍ la̍ŋ hɔ̄lla̍ kūmbū lūāŋndo̍, ma̍ mūlī lā yāa̍ la̍ŋ hɔ̄lla̍ kūmbū pāa̍le̍ŋ lē dēllo̍, ma̍ mūlī vɛ̄lɛ̄ lā yāa̍la̍ŋ hɔ̄lla̍ kūmbū tōūwo̍, ma̍ mūlī lā yāa̍la̍ŋ lā pīlɛ̍la̍ŋ hɔ̄lla̍ kūmbū pāa̍le̍ŋ lē chāŋndo̍.

⁵ Ndu̍yɛ̍ hɛ̄ŋgɔ̍ɔ̍ ho̍ō, chēlu̍l ndɔ̄ɔ̍ ō wa̍ ŋ̄chi̍sīi̍la̍ŋ lā yāa̍. Hɛ̄ŋgɔ̍ɔ̍ ho̍ō, chɔ̄chɔ᷄ŋ ndɔ̄ɔ̍ŋ mɛ̄ɛ̍ tāālāa̍ wā nu̍a̍ā ō yāmāā o̍ chɔ̄chɔ᷄ŋ yɛ̍, le̍nde̍ ko̍ni̍ o̍ wa̍ ō yāmāā o̍ chɔ̄chɔ᷄ŋ ni̍. Mɛ̄ɛ̍ pɔ̄mbīa̍ŋ mā chūūlū nu̍a̍ā, mā vīōū pɛ̍ kpɛ̍ɛ̍ mā kāndu̍ sīmbūlɔ᷄ŋndo̍ o̍ bōlle̍ yɛ̍, le̍nde̍ hɛ̄ŋgɔ̍ɔ̍ ho̍ō ō wa̍ o̍ chɔ̄chɔ᷄ŋ ni̍. Hɛ̄ŋgɔ̍ɔ̍ ho̍ō, ndu̍ o̍o̍ chu̍ā mɛ̄ŋnda̍ŋ ka̍lɔ̄ŋnda̍ŋ wāa̍la̍ŋ tɔ̍ a̍ lā ŋūɛ̍ɛ̍nu̍ (15,000).

⁶ O̍ ko̍ŋ kɔ̍ɔ̍lī, mbo̍ tōōsīāā vɛ̄lɛ̄ hɛ̄ŋgɛ̍i̍la̍ŋ tɔ̍ le̍ mɛ̄ŋnda̍ŋ dɔ̄wɔ̄ɔ̍ le̍ nyɔ̄ɔ̍ŋ tɔ̄ɔ̍ lēni᷄ŋ, mbo̍ kɛ̄sī la̍ŋ o̍ chīɛ̍i̍ Mɛ̄lɛ̄ka̍a̍. Mɛ̄ɛ̍ o̍ kɛ̍si̍ lā ŋu̍ɛ̍ɛ̍nu̍ la̍ŋ bā tōūwo̍, mbo̍ kɛ̄sī lā ŋu̍ɛ̍ɛ̍nu̍ la̍ŋ bā lūāŋndo̍. Chɔ̄lūāā nda̍ a̍a̍ hu᷅ŋ le̍ sa̍lālā lūāmāāla̍ŋ sōlīo̍o̍ wa̍, vīsīŋ chɔ̄lūāā kāŋ, o̍ hɛ̄ŋgɛ̍i̍la̍ŋ ndāŋ ni᷄ŋ nda̍ a̍a̍ tu̍a̍ā mu̍ŋ ni̍. Hɛ̄ŋgɛ̍i̍ bɛ̍ndū pēē mɛ̄ŋmā īhɛ᷄llo̍, ndu̍ wa̍ le̍ mɛ̄ŋmā wānāā sōlīāā lāsa̍lāa̍ nda̍ a̍a̍ pu̍lūŋ nda̍ŋ dɔ̄wɔ̄ɔ̍ lēni᷄ŋ ni̍.

⁷ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ tōōsīāā vɛ̄lɛ̄ nyɛ̄lā kɛ̄sīāā lā la̍mūi̍la̍ŋ tɔ̍ a̍ ko̍o̍līi̍yo̍ŋ, mɛ̄ɛ̍ la̍ wa̍ lā tūūlāā le̍ tōōsīa̍a̍ yɛ̍. Mbo̍ kɛ̄sī la̍ŋ o̍ chīɛ̍i̍ Mɛ̄lɛ̄ka̍a̍ ni᷄ŋ. Mɛ̄ɛ̍ o̍ kɛ̍si̍ lā ŋūɛ̍ɛ̍nu̍ la̍ŋ bā tōūwo̍, mbo̍ kɛ̄sī lā ŋūɛ̍ɛ̍nu̍ la̍ŋ bā lūāŋndo̍.

⁸ Mbo̍ tōōsīāā vɛ̄lɛ̄ ti̍bīi̍la̍ŋ tɔ̍, mbo̍ kɛ̄sī la̍ŋ o̍ chīɛ̍i̍ Mɛ̄lɛ̄ka̍a̍ ni᷄ŋ. Mɛ̄ɛ̍ o̍ kɛ̄sī lā ŋūɛ̍ɛ̍nu̍ la̍ŋ bā tōūwo̍, mbo̍ kɛ̄sī lā ŋūɛ̍ɛ̍nu̍ la̍ŋ bā lūāŋndo̍. O̍ ko̍ŋ kɔ̍ɔ̍lī, mbo̍ tōōsīāā vɛ̄lɛ̄ hɛ̄ŋgɛ̍i̍la̍ŋ kɛ̄mɛ̄ a̍ ko̍o̍līi̍yo̍ŋ.

⁹ O̍ ko̍ŋ kɔ̍ɔ̍lī, mbo̍ tōōsīāā la̍ūwo̍ le̍ wānāa̍ sōlīāā lāsa̍lāa̍, ndu̍yɛ̍ mbo̍ tōōsīāā vɛ̄lɛ̄ la̍ū bɛ̄ndōo̍ o̍ bɛ̍ɛ̄. O̍ ko̍ŋ kɔ̍ɔ̍lī, mbo̍ tōōsīāā dīōla̍ŋ le̍ la̍ūlā tīɔ̍ɔ̍ŋnda̍ŋ nda᷅ŋ, ndu̍yɛ̍ mbo̍ kūmbū la̍ŋ kpo̍u̍ a̍ būlɔ᷄ŋsīi̍ye̍.

¹⁰ O̍ ko̍ŋ, mbo̍ kɛ̄sī hɛ̄ŋgɛ̍i̍ bɛ̍ndū pēē mɛ̄ŋmā īhɛ᷄llo̍ o̍ sɔ̍ŋgi̍le̍ chīɛ̄īyo̍, kūmbu̍ bā tōūwo̍, a̍ kūmbu̍ bā pāa̍le̍ŋ lē chāŋ ndo̍ tɛ̄ɛ̄ŋ.

¹¹ O̍ ko̍ŋ kɔ̍ɔ̍lī, mi̍ Hu̍lūām to̍o̍sīāā vɛ̄lɛ̄ kpɛ̍ɛ̍nɔ̍ŋ, a̍ si̍ɔ̍būi̍la̍ŋ, a̍ hɛ̄ŋgɛ̍i̍la̍ŋ le̍ wa̍llo̍ o̍ chīɛ̍i̍ Mɛ̄lɛ̄ka̍a̍. Nyɛ̄ o̍ nyɛ̄ Hu̍lūām ndu̍ o̍o̍ nɔ̍ le̍ tōsāa̍ o̍ chīɛ̍i̍ Mɛ̄lɛ̄ka̍a̍, le̍ Māsā Bɛ̍ndōo̍ Sɔ̍lɔ̍mɔ̄ŋ, mbo̍ chīī ndu̍ tōsā kpo̍u̍. Nyɛ̄m Hu̍lūām o̍ to̍o̍si̍a̍a̍ le̍ chīɛ̍i̍ Mɛ̄lɛ̄ka̍a̍ wo̍ŋ ki̍nɛ̍i̍,

¹² mu̍ŋ cho̍ mu᷅ŋ ni̍, sūŋgbu̍ma̍ mi̍ɔ̍ɔ̍ŋ nda̍ŋ, a̍ hɛ̄ŋgɛ̍i̍la̍ŋ, a̍ nyɛ̄lā tīīlīa̍ŋnda̍ wa̍ lā kɛ̄sīāā o̍ sūŋgbu̍ma̍ ma̍ŋ bōlle̍ŋ nda̍ŋ māā lāmɔ̍si̍l ta̍ŋ, a̍ nyɛ̄lā tīɔ̍ɔ̍ŋnda̍ wa̍ lā tūūlīāā o̍ nyɛ̄lā lāŋ a̍ chīli̍ŋi̍i̍ te̍e̍ŋgīɛ̍i̍ lā kāyā kāyāā māā ŋ̄yɔ̄lɔ̄ la̍ŋ,

¹³ a̍ kōmɔ̄ɔ̄ pɔ̄mɛ̄ki̍la̍ne̍tīi̍ kɛ̍mɛ̄ le̍ hi̍ɔ̍ɔ̍lu̍ (400), wa̍ ō tūūlīāā o̍ nyɛ̍ cho̍ ko̍ŋ māā ŋ̄yɔ̄lɔ̄ wo̍ chōo̍ bālɔ̄ɔ̍ chɛ̍chɛ̍ pūla᷄ŋ mā mīɔ̍ɔ̍ŋ mi̍ɔ̍ɔ̍ŋ ndo̍,

¹⁴ a̍ nyɛ̄lā nda̍ tōōsi̍a̍a̍ le̍ hɛ̄ŋgɛ̍i̍la̍ māmɛ̄ŋnda̍ŋ kɛ̄sīo̍o̍ lēchōo̍ la̍ŋ, a̍ hɛ̄ŋgɛ̍i̍la̍ māmɛ̄ŋnda̍ŋ,

¹⁵ a̍ hɛ̄ŋgɛ̍i̍ bɛ̍ndū pēē mɛ̄ŋmā īhɛ᷄llo̍, a̍ nāūwāā tōōyīāā tɔ̍ a̍ ā ŋīɔ̍ɔ̍ŋāā nda̍ tōōsi̍a̍a̍ mi̍ hɛ̄ŋgɛ̍i̍ bɛ̍ndū kōŋ ō wā ō kɛ̄sīāā lēchōo̍ wa̍,

¹⁶ a̍ kpɛ̍ɛ̍nɔ̍ŋ, a̍ si̍ɔ̍būi̍la̍ŋ, a̍ chūlā sa̍ŋgi̍la̍ŋ, o̍ ko̍ŋ kɔ̍ɔ̍lī, a̍ nyɛ̄ o̍ nyɛ̄ Hɔ̍lūām o̍ to̍o̍si̍a̍l Māsā Bɛ̍ndōo̍ Sɔ̍lɔ̍mɔ̄ŋ a̍ būlɔ᷄ŋsīi̍yo̍ŋ, le̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍.

¹⁷ O̍ dɛ̍ŋgbɔ̍ɔ̍ Chɔ̍ɔ̍dāŋ, nāa̍ pūūlu̍ chu̍a̍u̍wāā ŋ̄kpɛ̍ɛ̍nɔ̍ɔ̍ wa̍ Su̍kɔ̍tī chi̍e̍e̍ a̍ Sa̍lu̍ɛ̍tāŋ chi̍e̍e̍ tɛ̍ɛ̄ŋ nda̍, lo̍ŋ Māsā Bɛ̍ndōo̍ Sɔ̍lɔ̍mɔ̄ŋ o̍ bɛ̄ɛ̄ndi̍a̍a̍ nyɔ̄ɔ̍ŋ mu᷅ŋ kpo̍u̍ ni̍.

¹⁸ Mi̍ Sɔ̍lɔ̍mɔ̄ŋ o̍ to̍o̍sīāā nyɔ̄ɔ̍ŋ ta̍u̍ ta̍u̍ a̍ būlɔ̍ŋsīi̍yo̍ŋ. Būlɔ᷄ŋsīi̍ŋ Sɔ̍lɔ̍mɔ̄ŋ o̍ tōōsi̍a̍a̍ nyɔ̄ɔ̍ŋ mu᷅ŋ ndo̍ŋ, ŋ̄ wa̍ ha̍a̍a̍ wānā a̍a̍ nɔ̄la̍ mā sīna̍ mɛ̄ɛ̍ kpɛ̍ ŋ̍ wa̍ lūsu̍llo̍ yɛ̍ le̍.

¹⁹ O̍ ko̍ŋ kɔ̍ɔ̍lī, nyɛ̄ o̍ nyɛ̄ Sɔ̍lɔ̍mɔ̄ŋ ndu̍ o̍o̍ kɛ̍ɛ̍si̍a̍a̍ le̍ tōsāa̍ o̍ chīɛ̍i̍ Mɛ̄lɛ̄ka̍a̍ ho̍ō, mbo̍ tōōsīāā mu̍ŋ kpo̍u̍. Nyɛ̄m o̍ to̍o̍si̍a̍a̍ wo̍ŋ mu̍ŋ cho̍ mu᷅ŋ ni̍. Ma̍āŋ ŋ̄ko̍o̍līi̍yo̍, a̍ ti̍bīi̍ nda̍ kɛ̄sī be̍e̍dīi̍ chɔ᷅m māā Mɛ̄lɛ̄ka̍ chō a̍ nda̍ lātūlu̍ wo̍,

²⁰ a̍ nyɛ̄lā kɛ̄sīāālā la̍mbūi̍la̍ŋ, a̍ la̍mbūi̍la̍ nda̍ tōōsi̍a̍a̍ a̍ ko̍o̍līi̍ kɛ̍ndɛ̄ kɛ̍ndɛ̄i̍, le̍ mī lā wa̍ sānde̍i̍ o̍ fo̍nda᷄ŋ kāsi̍ hi̍o̍ū kpo̍u̍ wo̍, mɛ̄ɛ̍ i̍ wa̍ ī tūwāā yɛ̍ la̍ŋ,

²¹ a̍ nyɛ̄la̍ wa̍ māā bīl lāpe̍e̍ŋge̍ le̍ kɛ̄sīo̍o̍ chīɛ̄ī ni᷄ŋ le̍ chīɛ̄īyo̍ nɛ̄ŋīo̍o̍ la̍ŋ, a̍ la̍mbūi̍la̍ŋ, a̍ kpānya̍la̍ŋ,

²² a̍ wōlɔ̄ɔ̄lā la̍mbūi̍la̍ŋ, a̍ hɛ̄ŋgɛ̍i̍la̍ŋ, a̍ hɛ̄ŋgɛ̍i̍la̍ŋ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēni᷄ŋ, a̍ hɛ̄ŋgɛ̍i̍la̍ chu̍a̍ā lēyīŋnda̍ŋ. Ndu̍yɛ̍ nyɔ̄ɔ̍ŋ mu᷅ŋ kpo̍u̍ a̍ ko̍o̍līi̍ŋ kɛ̍ndɛ̄ kɛ̍ndɔ᷄ŋ nda̍ tōōsi̍a̍a̍ mu̍ŋ ni̍. Dīōla̍ wa̍ bā bɛ̍ɛ̄ o̍ chīɛ̍i̍ Mɛ̄lɛ̄ka̍a̍ la̍ŋ, a̍ dīōla̍ wa̍ o̍ fo̍ndā kāsi̍ hi̍o̍ū kpo̍u̍ wo̍ la̍ŋ, ma̍ kūmbū la̍ŋ kpo̍u̍ a̍ ko̍o̍līi̍yo̍ŋ.