Ko̍lo̍ni̍kō Di̍i̍ŋ Ndɔ̄ɔ̍ 3 - Yāu̍ Mɛ̄lɛ̄ka̍a̍

¹ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ ka̍ndū chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūllo̍ Chūlu̍sɛ̄lɛ̄m, o̍ Pēmbīī Mo̍līāāve̍ chōo̍, nāa̍ Mɛ̄lɛ̄ka̍ Ya̍a̍wɛ̄ɛ̄ ō chɔ̄mnu̍ŋ si̍ndɛ̄ Dēēve̍ fi̍nyā ndɔ̄ wa̍. Kāni̍ fu̍u̍le̍, lo̍ŋ Dēēve̍ fi̍nyā ndɔ̄ ndu̍ o̍o̍ kɛ̍ɛ̍si̍a̍a̍ le̍ chīɛ̍i̍ Mɛ̄lɛ̄ka̍a̍ tāŋgūllo̍ ni̍. Fo̍ndāŋ Sɔ̍lɔ̍mɔ̄ŋ wa̍ ko̍ŋ chīɛ̍i̍ Mɛ̄lɛ̄ka̍a̍ ta̍ŋgu̍llo̍ wo̍, lo̍ŋ Ālu̍a̍nā, wānā wa̍ā Chɛ̄bu̍sa̍i̍tī, ndu̍ o̍o̍ lu̍a̍ā tɔ̍lɔ̄ɔ̄ ndɔ̄ɔ̍ ni̍.

² Wɔ̄sī Sɔ̍lɔ̍mɔ̄ŋ o̍ chi̍ŋa̍ wɔ̄sīla̍ŋ lā hīɔ̍ɔ̍lu̍ o̍ lēmāsā wo̍, o̍ pāŋgi̍i̍ di̍i̍ŋ ndūɛ̍i̍ o̍ wɔ̄sī kōŋ ni᷄ŋ o̍ ka̍ndu̍ tāŋgūllo̍ ho̍ō ni̍.

³ Chīɛ̍i̍ Mɛ̄lɛ̄ka̍ Sɔ̍lɔ̍mɔ̄ŋ o̍ wa̍ ho̍ō tāŋgūllo̍, mɛ̄ɛ̍ ndo̍ o̍o̍ tu̍u̍ ndu̍ yɛ̍, ndu̍ cho̍ ho̍ō ni̍, chīɛ̄īyo̍ ho̍ō ō wa̍ bānde̍i̍ lēni᷄ŋ nɛ̄īyo̍ be̍le̍ ŋɔ̄ma̍hīɔ̍ɔ̍lu̍, bu̍ ndɔ̄ɔ̍, ō wa̍ nɛ̄īyo̍ be̍le̍-ya̍a̍.

⁴ Tōŋgo̍ wa̍ o̍ chīɛ̄īyo̍ ho̍ō sōndōo̍ wo̍, chɔ̍ŋ ba̍a̍ pīlɔ̍ɔ̍ mbo̍ fūūlūū bāa̍ pīlɔ̍ɔ̍, ō wa̍ bānde̍i̍ nɛ̄īyo̍ be̍le̍-ya̍a̍, hēlɔ̄ɔ̍ ō wa̍ le̍ nɛ̄īyo̍ kɛ̄mɛ̄ a̍ be̍le̍-ŋɔ̍ma̍a̍ (180). O̍ ko̍ŋ, mbo̍ bɛ̄ɛ̄ndīāā tōŋgōo̍ ho̍ō lēni᷄ŋ kpo̍u̍, a̍ ko̍o̍līi̍ŋ kɛ̄ndɛ̄ kɛ̍ndɔ᷄ŋ.

⁵ Lu̍mūi̍ wa̍ lu̍mūi̍ kpe̍e̍kpe̍i̍yo̍ o̍ chīɛ̄īyo̍ ho̍ō ni᷄ŋ ndo̍, mbo̍ bɛ̄ɛ̄ndīāā ndu̍ lēni᷄ŋ kpe̍de̍ a̍ yɔ̄mīī si̍dāāve̍. Mbo̍ mūli᷄ŋ mbo̍ kūmbū ndu̍ lēni᷄ŋ kpo̍u̍ a̍ ko̍o̍līi̍ kɛ̄ndɛ̄ kɛ̍ndɛ̄i̍. O̍ ko̍ŋ kɔ̍ɔ̍lī, mbo̍ tūūlīāā wāūwa̍ŋ a̍ yɔ̄lɔ᷄ŋ o̍ lu̍mūi̍yo̍ ho̍ō ni᷄ŋ si̍lɔ̍.

⁶ Mbo̍ bɛ̄ɛ̄ndīāā chīɛ̄īyo̍ ho̍ō lēni᷄ŋ kpo̍u̍ a̍ pōūtā ba̍ā kālāla̍ŋ. Ko̍o̍līi̍ŋ o̍ bɛ̍ɛ̍ndi̍a̍a̍ chīɛ̄īyo̍ ho̍ō wo̍ŋ, o̍ lɛ̄ŋndē Pa̍a̍vēm nde̍ŋ ni᷄ŋ ŋ̍ fu̍la̍ ni̍.

⁷ Mbo̍ kūmbū chīɛ̄īyo̍ ho̍ō lēni᷄ŋ kpo̍u̍ a̍ ko̍o̍līi̍ye̍, o̍ lūŋgbo̍ŋ ni̍, a̍ o̍ yɔ̄mīī yīndūɛ̍i̍, a̍ o̍ dīōla̍ŋ, a̍ o̍ kēe̍do᷄ŋ chōo̍ kpo̍u̍. O̍ ko̍ŋ kɔ̍ɔ̍lī, mbo̍ tūūlīāā nyāā lākūmba᷅ŋnda̍ o̍ lūŋgbu̍ŋ chīɛ̄īyo̍ ho̍ō kpo̍u̍.

⁸ O̍ ko̍ŋ kɔ̍ɔ̍lī, mbo̍ tōōsīāā fo̍ndāŋ kāsi̍ hi̍o̍ū kpo̍u̍ wo̍ o̍ chīɛ̄īyo̍ ho̍ō ni᷄ŋ. Lu̍mūi̍yo̍ ho̍ō ō wa̍ bānde̍i̍ lēni᷄ŋ nɛ̄īyo̍ be̍le̍-ya̍a̍, bu̍o̍o̍ nɛ̄īyo̍ be̍le̍-ya̍a̍. O̍ ko̍ŋ kɔ̍ɔ̍lī, mbo̍ kūmbū lu̍mūi̍yo̍ ho̍ō lēni᷄ŋ kpo̍u̍ a̍ ko̍o̍līi̍yo̍ŋ. Ko̍o̍līi̍ŋ o̍ ku̍mbū lu̍mūi̍yo̍ ho̍ō lēni᷄ŋ a̍ mu̍ŋ ndo̍ŋ, ŋ̄ wa̍ pa᷅ŋnda̍ŋ wāa̍la̍ŋ be̍le̍-hi̍ɔ̍ɔ̍lu̍ a̍ lā ŋɔ᷄mpu᷅m (46,000).

⁹ Lɔ̄ndīmɛ̄ɛ̍ŋ o̍ ta̍ŋgu̍l chīɛ̄īyo̍ ho̍ō a̍ mu̍ŋ ndo̍ŋ bɛ̍ɛ̍ a̍ ko̍o̍līi̍yo̍ŋ ŋ̍ wa̍ ŋ̄ tōōsīāā ni̍. Ko̍o̍līi̍ŋ o̍ to̍o̍si̍a̍a̍ Lɔ̄ndīmɛ̄i̍yo̍ŋ mu᷅ŋ ndo̍ŋ, ŋ̄ wa̍ pa᷅ŋndo̍ ō pīlɛ̍ a̍ tɛ̄ndāa̍ tɛ̄ɛ̄ŋ. O̍ ko̍ŋ kɔ̍ɔ̍lī, lu̍mūi̍la̍ wa̍ lēchōo̍ la̍ŋ bɛ̍ɛ̍, mbo̍ kūmbū la̍ŋ lēni᷄ŋ kpo̍u̍ a̍ ko̍o̍līi̍yo̍ŋ.

¹⁰ Mbo̍ tōōsīāā nyāā lākūmba᷅ŋnda̍ ā ŋīɔ̍ɔ̍ŋ, mbo̍ kūmbū nda̍ kpo̍u̍ a̍ ko̍o̍līi̍ye̍, mbo̍ kɛ̄sī nda̍ o̍ fo̍ndāŋ kāsi̍ hi̍o̍ū kpo̍u̍ wo̍.

^11-12 Nyāā ha̍ā, ō kɛ᷅ kɛ᷅ ndu̍ o̍o̍ nɔ̍ kūmba᷅ŋnda̍ŋ lā tīɔ̍ɔ̍ŋ. Ndu̍yɛ̍ kūmba᷅ŋ o̍ kūmba᷅ŋ ō wa̍ bānde̍i̍ le̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ. Nyāa̍ ha̍ā, mɛ̄ɛ̍ ho̍ō sīɛ̄ndi̍ kūmba᷅ŋ ndɔ̄ɔ̍ mbo̍ pīla᷄ŋ chīɛ̄īyo̍, mi̍ ho̍ō sīɛ̄ndī vɛ̄lɛ̄ kūmba᷅ŋndo̍ mbo̍ pīla᷄ŋ chi̍ɛ̍īyo̍ kpēŋgēi̍ pīlɛ̍i̍. Ndu̍yɛ̍, ma̍ sīɛ̄ndī vɛ̄lɛ̄ kūmba᷅ŋnda̍ŋ lā pīlɛ̍ la̍ŋ, ma̍ bɔ̄ŋā la̍ŋ vēllāa̍ vēllē.

¹³ Nyāa̍ ha̍ā, kūmba᷅ŋndā ndāla̍ŋ bāndi̍i̍ ndūɛ̍i̍ fa̍ū fa̍ū, ī wa̍ le̍ nɛ̄īyo̍ be̍le̍-ya̍a̍. Ndu̍yɛ̍ nda̍ ŋīɔ̍ɔ̍ŋ fa̍ū, mɛ̄ɛ̍ nda̍ si᷄m ma̍ mūlī hɔ̄lla̍ kūmbū bā dīo̍o̍.

¹⁴ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ tōōsīāā vɛ̄lɛ̄ kōla̍ ba̍ā kālāa̍ a̍ fūŋi̍i̍ yɛ̍ yɛ̍i̍, ī kɔ̄ɔ̍le̍ bu̍li̍īve̍, a̍ ī bɔ̄ɔ̄lɛ̍i̍, a̍ ī sīāŋɛ̄i̍. O̍ ko̍ŋ kɔ̍ɔ̍lī, mbo̍ tūūlīāā nyāā lākūmba᷅ŋnda̍ o̍ kōlāa̍ ho̍ō chōo̍. Mbo̍ lāndū kōlāa̍ ho̍ō o̍ dīo̍o̍ le̍ lūɛ̄īyɔ̄ɔ̍ o̍ fo̍ndā kāsi̍ hi̍o̍ū kpo̍u̍ wo̍.

A̍ sūŋgbu̍ma̍ mi̍ɔ̍ɔ̍ŋ mā nda̍ tōōsi̍a̍a̍ wa̍ŋ o̍kɔ̄ɔ̄

¹⁵ O̍ ko̍ŋ kɔ̍ɔ̍lī, mi̍ Māsāa̍ Sɔ̍lɔ̍mɔ̄ŋ si̍mī sūŋgbu̍a̍ŋ mā mīɔ̍ɔ̍ŋ o̍ chīɛ̄īyo̍ ho̍ō lāchī vēllāa̍ vēllē, nāa̍ nda̍ a̍a̍ ke̍e̍kū le̍ lūɛ̄īyɔ̄ɔ̍ chīɛ̄ī ni̍ŋ nda̍. Sūŋgbu̍a̍ŋ ma᷅ŋ lē pīlɛ̍ lē wa̍ hēlɔ̄ɔ̍ le̍ nɛ̄īyo̍ be̍le̍-ŋu̍ɛ̍ɛ̍nu̍ a̍ lēdīi̍ŋ, nyɛ̄la̍ wa̍ o̍ sūŋgbu̍a̍ŋ māŋ bōlle̍ māā lāmɔ̍si̍lta̍ŋ, ō pīla̍ wa̍ hēlɔ̄ɔ̍ nɛ̄īyo̍ lē ŋɔ᷄mmɛ̍ū a̍ tɛ̄ndāa̍ tɛ̄ɛ̄ŋ.

¹⁶ Mbo̍ tōōsīāā nyɔ̄ɔ̍ māā ŋ̄yɔ̄lɔ̄, mbo̍ kāyā kāyā ndu̍ o̍ sūŋgbu̍a̍ŋ ma᷅ŋ bōlle̍. O̍ ko̍ŋ kɔ̍ɔ̍lī, mbo̍ tūūlīāā vɛ̄lɛ̄ yɔ̄mīī kūāmɛ̄ī pɔ̄mɛ̄ki̍la̍ne̍tīi̍ye̍ kɛ̄mɛ̄ (100), o̍ yɔ̄lɔ᷄ŋ o̍ tu̍u̍li̍a̍a̍ wo̍ŋ chōo̍.

¹⁷ Sūŋgbu̍ma̍ o̍ si̍mi̍ ma̍ŋ o̍ chi̍ɛ̍īyo̍ lāchī o̍ nāa̍ ke̍i̍yāa̍ le̍ lūɛ̄īyɔ̄ɔ̍ chīɛ̄ī ni̍ŋ nda̍ŋ, le̍ wa̍ bā tōūwo̍ le̍ŋ, ma̍ kē le̍ŋ dīōla̍ŋ āā Cha̍chīŋ, ma̍ kē le̍ wa̍ bā lūāŋndo̍ le̍ŋ dīōla̍ŋ, āā Bo̍wa̍ā.