Ko̍lo̍ni̍kō Di̍i̍ŋ Ndɔ̄ɔ̍ 20 - Yāu̍ Mɛ̄lɛ̄ka̍a̍

A̍ sɔ̍ŋgɔ̍ yɔ̍nu̍ŋ I̍dɔ̄m ndo̍ o̍kɔ̄ɔ̄

¹ Mɛ̄ɛ̍ te̍le̍ŋ ti᷄ŋ ō hīōū, mi̍ so̍vɛ̄i̍ya̍ o̍ lɛ̄ŋndē Mo̍wa̍bīle̍ŋ ni᷄ŋ, a̍ lɛ̄ŋndē A̍mɔ᷅ŋ nde̍ŋ, lātūlu̍ a̍ so̍vɛ̄i̍ya̍ a̍ ti᷄ŋ, fūlāa̍ o̍ lɛ̄ŋndē Mɛ̍yu̍na̍i̍tīi̍le̍ŋ ni᷄ŋ, ma̍ kūā le̍ Māsā Bɛ̍ndōo̍ Chɛ̄hōsi̍a̍fa̍tī chīŋa̍la᷅ŋndo̍ a̍ sɔ̍ŋgɔ̄ɔ̍.

² O̍ ko̍ŋ, mi̍ pūa̍a̍ pūm ā kūā nāa̍ Chɛ̄hōsi̍a̍fa̍tī chu̍a̍ ma̍ kɔ̍ dīmūl ndu̍ āā, “So̍vɛ̄i̍ya̍ ā chō hūnɔ̄ɔ̍ fāŋgā bɛ̍ndōo̍ fūlāa̍ I̍dɔ̄m, o̍ Pēē Mɛ̄ŋmā īhɛ᷄llo̍ lēkɔ̍ɔ̍līo̍o̍ le̍ hūnɔ̄ɔ̍ sɔ̍ŋgɔ̄ɔ̍ a̍ nūm, a̍ chīi̍ ni᷅ŋ bɛ̍ɛ̍ Hāsāsɔ̄ŋ Ta̍māā bīyɔ̄ɔ̄.” (Hāsāsɔ̄ŋ Ta̍māā ko̍ŋ ndu̍ nda̍ vēēlū vɛ̍lɛ̄ ni̍ āā Ɛ̄nīkɛ̍dī.)

³ Mɛ̄ɛ̍ Chɛ̄hōsi̍a̍fa̍tī tu̍e̍ī le̍nde̍, mi̍ sīōōŋnde̍ bīī ndu̍. O̍ ko̍ŋ, mbo̍ pīɛ̄ī Mɛ̄lɛ̄ka̍ Ya̍a̍wɛ̄ɛ̄ le̍ mbō chɔ᷅m ndu̍ nyɛ̄ o̍ to̍sa̍ wo̍. Mbo̍ dīmūl wāŋnda̍ o̍ lɛ̄ŋndē Chu̍dāle̍ŋ ni᷄ŋ kpo̍u̍ le̍ mā bīī su᷅mndo̍.

⁴ Ndu̍yɛ̍, mi̍ wāŋnda̍ o̍ chi̍e̍e̍ŋ bɛ̍ndo᷄ŋ o̍ lɛ̄ŋndē Chu̍dāle̍ŋ ni᷄ŋ kpo̍u̍, a̍ chu̍u̍ŋgi̍āŋ na̍a̍ pi᷅lɛ̍, ma̍ nyūna̍ Mɛ̄lɛ̄ka̍ Ya̍a̍wɛ̄ɛ̄ le̍ mbō māla̍ nda̍.

⁵ O̍ ko̍ŋ kɔ̍ɔ̍lī, mi̍ Māsāa̍ Chɛ̄hōsi̍a̍fa̍tī o̍ si᷅m wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m, a̍ chu̍u̍ŋgi̍āŋ ka̍ŋ nda̍ lāchī, o̍ la̍ū sɛ̄nɛ̄i̍ wa̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍,

⁶ mbo̍ pīɛ̄ī Mɛ̄lɛ̄ka̍ chōo̍ cho̍o̍ kpe̍le̍ŋ, mbo̍ dīmī āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nāā ma̍māa̍, nu᷄m cho̍ Māsāa̍ ɛ̄chɛ̍nɛ̄ ni̍, ndu̍yɛ̍ lɛ̄ŋnde̍ o̍ chi̍e̍ēŋndo̍ chōo̍ kpo̍u̍, nu̍m cho̍ ndi̍ chōo̍ Māsāa̍ ni̍. Mɛ̄lɛ̄ka̍ nɔ̍ dīāllūŋ kāla᷄ŋ, ndu̍yɛ̍ ma̍ nɔ̄ kpāāyā bɛ̍ndōo̍ wo̍ ŋ̄ chō ni̍, wānā o̍ wānā o̍ nɔ̍lā mbō sīmu̍l nu̍m te̍.

⁷ Nu̍m cho̍ Mɛ̄lɛ̄ka̍ nāa̍ ni̍. Mɛ̄ɛ̍ wānāā nūmnda̍ I̍sɔ̄lūɛ̄ī, a̍ hi᷅ŋ o̍ lɛ̄ŋnde̍ŋ nde᷅ŋ ni᷄ŋ, nu̍m to̍ū wānāa̍ wa̍ īchāli̍ o̍ lɛ̄ŋnde̍ŋ nde᷅ŋ ni᷄ŋ nda̍ lāchī wa̍ ni̍. Ndu̍yɛ̍ ma̍ chūā lɛ̄ŋnde̍ŋ nde᷅ŋ, ma̍ kē wānāa̍ fu̍la̍ o̍ pūlāle̍ E̍bīlāha᷅m chāa̍ŋ nūm nde̍ŋ chōo̍ wa̍, le̍ mi̍ lē sīmnu᷄ŋ nyɛ̄ ndā le̍ fɛ̍ɛ̍ŋ a̍ fɛ̍ɛ̍ŋ.

⁸ Ndu̍yɛ̍, ma̍ cha᷅l o̍ lɛ̄ŋnde̍ŋ nde᷅ŋ ni᷄ŋ, o̍ ko̍ŋ kɔ̍ɔ̍lī, ma̍ tāŋgūl chīɛ̄īyo̍ o̍ lɛ̄ŋnde̍ŋ nde᷅ŋ ni᷄ŋ, le̍ nu̍m sōōlūūwo̍. Ma̍ dīmī māā,

⁹ ‘Tē dɛ̍nɛ̍ pa̍lāā o̍ dɛ̍nɛ̍ pa̍lāā kōma̍l na̍a̍ pɛ̍, mbō wa̍ māā chɔ̄ū, ɔ̄ɔ̄ mī nāā wɔ̄ɔ̍ŋ ō kōma̍l na̍a̍, ɔ̄ɔ̄ mī yīmā bɛ̄ndūa̍ŋ mā de᷄l na̍a̍ chōo̍ pɛ̍, ŋ̄ chō hūnɔ̄ɔ̄ lāsīsi̍ chi̍ɛ̍īyo̍ ho̍ō lāchī, na̍a̍ na̍a̍ sōōlūū nu̍m nda̍, mī ŋ̄ nyūna̍ nu̍m le̍ mālāa̍. Tē kpūndɛ̍ o̍ kpūndɛ̍ kōma̍l na̍a̍ pɛ̍, o̍ chīɛ̄īyo̍ ho̍ō ni᷄ŋ na̍a̍ ŋ̄ chō nu̍m hūnɔ̄ɔ̄ pīɛ̄ī ni̍, ndu̍yɛ̍ mā tūēī pīɛ̄īlē nāā le̍ŋ, mā ba̍ŋa̍ na̍a̍ o̍ kpūndɛ̍ ko̍ŋ ni᷄ŋ.’

¹⁰ “Kɛ̍, so̍vɛ̄i̍ya̍ A̍mɔ᷅ŋ, a̍ Mo̍wa̍bī, a̍ I̍dɔ̄m, ā hīŋ ma̍ hu᷄ŋ de᷅l na̍a̍ chōo̍ a̍ sɔ̍ŋgɔ̄ɔ̍. Ndu̍yɛ̍ te̍le̍ŋ fi̍nyāā nāā ma̍māa̍ ā fūla̍ o̍ lɛ̄ŋndē I̍chi̍pīle̍ŋ ni᷄ŋ ma̍ wā hūnɔ̄ɔ̍ wo̍, a̍ chɛ̍l mā de̍l lɛ̄ŋnde̍ he̍ī chōo̍ a̍ sɔ̍ŋgɔ̄ɔ̍ le̍. Ma̍ kpɛ̄kpɛ̄lā lɛ̄ŋnde̍ he̍ī ma̍ hīāū, ā tɛ̄ɛ̄mbu̍u̍ ndi̍ le̍.

¹¹ Ā chē ni̍ko̍ kɛ̍ndɛ̄i̍ nda̍ chō na̍a̍ mīŋgūllo̍ ve̍, ā hīŋ le̍ mā sōli̍ na̍a̍ o̍ lɛ̄ŋndē ŋ̄ ke̍ le̍ŋ na̍a̍ māā nyɛ̄ nāā le̍ŋ ni᷄ŋ.

¹² O̍o̍ Mɛ̄lɛ̄ka̍ nāa̍, a̍ ki̍lūl nda̍ yāmɛ̍i̍ mā tu̍si̍ nda̍ dɛ̍nɛ̍ pa̍lāa̍ chōo̍ le̍? So̍vɛ̄i̍ya̍a̍ cho̍ ha̍ā hūnɔ̄ɔ̍ ku̍ndā bɛ̄ndōo̍ le̍ sɔ̍ŋgɔ̄ɔ̍ a̍ na̍a̍ wa̍, ŋ̄ nɔ̍ kpa̍a̍yā na̍a̍ ŋ̄ sɔ̄ŋga̍ a̍ nda̍ le̍. Ndu̍yɛ̍ ŋ̄ si̍nā nyɛ᷅ o̍ nyɛ̄ na̍a̍ ŋ̄ tōsā lē. Nūm ko̍ni̍ na̍a̍ ŋ̄ tīīnda̍ŋ ni̍ le̍ mā ma̍la̍ na̍a̍.”

¹³ Ndu̍yɛ̍ pūa̍a̍ kpo̍u̍ o̍ lɛ̍ŋndē Chu̍dāle̍ŋ ni᷄ŋ, a̍ chūāūwāā ndāa̍, a̍ lāāndāā ndāa̍, ā wa̍ īsīsi̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ lāchī.

¹⁴ Po̍ pi᷅lɛ̍ wa̍ dīōla̍ŋ āā Cha̍ha̍sīɛ̄ɛ̄, fi̍nyā ndɔ̍ dīōla̍ŋ āā Sɛ̄kāla̍yā, fūlāa̍ o̍ ku̍nda̍ A̍sa̍fī wo̍ chōo̍. Sɛ̄kāla̍yā yɛ̍, fi̍nyā ndɔ̍ wa̍ Bɛ̄na̍yā ni̍. Bɛ̄na̍yā fi̍nyā ndɔ̍ wa̍ Chɛ̍yɛ̄ɛ̄ ni̍. Chɛ̍yɛ̄ɛ̄ yɛ̍, fi̍nyā ndɔ̍ wa̍ Mātāni̍yāā ni̍. Cha̍ha̍sīɛ̄ɛ̄ wo̍ ho̍ō yɛ̍, Li̍va̍īnɔ̍ɔ̍ o̍ wa̍ ni̍. Ō lo̍ īsīsi̍ ku̍ndā chūūŋgi̍āŋ ko̍ŋ ndo̍ tɛ̄ɛ̄ŋ, o̍ lēpīlɛ̍ ni᷄ŋ kpe̍, mi̍ nyi̍na̍ Mɛ̄lɛ̄ka̍a̍ Ya̍a̍wɛ̄ɛ̄ wo̍ ō tūāl ndu̍ kɔ̄ɔ̄lī.

¹⁵ O̍ ko̍ŋ, mi̍ Cha̍ha̍sīɛ̄ɛ̄ o̍ di̍mūl Māsāa̍ Chɛ̄hōsi̍a̍fa̍tī āā, “Nūm Māsāa̍ Chɛ̄hōsi̍a̍fa̍tī ni̍, a̍ wāŋnda̍ Chu̍dā, a̍ Chūlu̍sɛ̄lɛ̄m kpo̍u̍, Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, ‘La̍ yɔ̍ŋ īsīōōŋ, ndu̍yɛ̍ mī lā tāmbu̍ lākɔ̄l le̍ so̍vɛ̄i̍ya̍a̍ fāŋgā bɛ̍ndūa̍a̍ cho̍ ka̍ŋ hūnɔ̄ɔ̍ le̍ sɔ̍ŋgɔ̄ɔ̍ a̍ nya̍ wa̍ le̍. Chɔ̄u̍ cho̍ ko̍ŋ hu̍nɔ̄ɔ̍ wo̍, ō cho̍ chɔ̍ū nya̍ pi̍la̍ sɔ̄ŋga̍ le̍ o̍ cho̍ le̍, Mɛ̄lɛ̄ka̍ pi̍la̍ cho̍ sɔ̍ŋgā le̍ nya̍ ni̍.

¹⁶ Tē pāa̍le̍ŋ lē sɛ̄ sīɔ̄dīi̍ pɛ̍, lā kɔ̍ chi᷅ŋa̍la̍ŋ nda̍. Ā chō wā kēēkōo̍ Si̍sī. Ā chō wā o̍ po̍llo̍ ni᷄ŋ, o̍ mɛ̄ɛ̄lu̍la̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Chɛ̍lūɛ̄ɛ̄, kūmbū pāa̍le̍ŋ lē chāŋ ndo̍.

¹⁷ Kɛ̍, lā sɔ̍ŋgā a̍ nda̍ le̍. Lā kūɛ̄ pɛ̍, lā kɔ̍ si᷅m o̍ fo̍ndāŋnda̍ŋ nyāla̍ŋ kpɛ̍ kpɛ̍ ā bɛ̄ɛ̄ndīa̍ŋ le̍ sɔ̍ŋgɔ̄ɔ̍. Lā si᷄m yi̍, mī lā chē mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ nda̍ yōmɔ̄ɔ̄, le̍ nya̍ wa᷅ŋnda̍ Chu̍dā, a̍ wāŋnda̍ Chūlu̍sɛ̄lɛ̄m yɛ̍. Le̍la̍ŋ lā ta̍mbū lākɔ̄l mī lā yɔ᷄ŋ īsīōōŋ te̍. Lā kɔ̍ si̍ɔ̍dīi̍ mī lā wa̍ ā bɛ̄ɛ̄ndīa̍ŋnda̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ wā lātūlu̍ a̍ nya̍.’ ”

¹⁸ O̍ ko̍ŋ, mi̍ Māsā Bɛ̍ndōo̍ Chɛ̄hōsi̍a̍fa̍tī o̍ ba᷅ŋ wūla̍ŋ mbo̍ fūūlūū hɔ̄lla̍ lɛ̄ŋ mɛ̍ɛ̄. Ndu̍yɛ̍, wāŋnda̍ Chu̍dā ni̍, a̍ wāŋnda̍ Chūlu̍sɛ̄lɛ̄m kpo̍u̍, nda̍ bɛ̍ɛ̍ ma̍ bāŋ wūla̍ŋ Mɛ̄lɛ̄ka̍ Ya̍a̍wɛ̄ɛ̄ lāchī, ma̍ sōōlūū ndu̍.

¹⁹ Mi̍ Līva̍īya̍, fūlāa̍ o̍ yu̍ŋgu̍ Ko̍ha̍tī wo̍ chōo̍, a̍ yu̍ŋgu̍ Ko̍lūā wo̍, ma̍ sīm ma̍ sāŋgālā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ chōo̍ cho̍o̍ kpe̍le̍ŋ.

²⁰ Mɛ̄ɛ̍ pāa̍le̍ŋ lē sɛ̄ dīi̍māndɔ̄ɔ̍, ma̍ cha᷄ŋ i̍di̍i̍yo̍ pu̍u̍ŋ, ma̍ kūā o̍ lɛ̄ŋndē po̍lte̍ŋ Tɛ̄ko̍wā i̍kɛ̍i̍. Mɛ̄ɛ̍ nda̍ kūɛ̄, mi̍ Chɛ̄hōsi̍a̍fa̍tī si᷅m mbo̍ dīmī āā, “Wāŋnda̍ Chu̍dā, a̍ wāŋnda̍ Chūlu̍sɛ̄lɛ̄m, lā ya᷄ŋ ya̍ nīla̍ŋ. Lā dɔ̄ū ti̍i̍ndāŋ nyāa̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni᷄ŋ, ō chō tōsā mī lā sīmu̍l kɔ̄lta̍ŋ yi̍. Lā lāāla̍ŋ nyɛ᷅ wānāa̍ su̍a̍ā le̍ Mɛ̄lɛ̄ka̍ wa̍ ā dīmu̍l nya̍ wo̍, ko̍ŋ to̍sā ni̍ mī lā tīu̍ chɔ̄ūwo̍ ho̍ō bā.”

²¹ Mɛ̄ɛ̍ Māsāa̍ Chɛ̄hōsi̍a̍fa̍tī o̍ ku̍ɛ̄ mbo̍ nyūnā lāŋgba̍ā kālla̍ dīōm, mbo̍ hɛ̄lī wānāā ŋ̄chōndu̍a̍a̍, mbo̍ dīmūl nda̍ le̍ mā wōōnu᷄ŋ do᷅māla̍ nda̍ wōōnūŋ le̍ Mɛ̄lɛ̄ka̍ dīōmndo̍ nyūnāa̍ la̍ŋ, mā si᷄m so̍vɛ̄i̍ya̍ lāchī mā kūā a̍ chōndo̍ŋ sōlīo̍o̍ mā dīmī āā, “Lā ŋ̄ mēlnu᷅ŋ Mɛ̄lɛ̄ka̍ Ya̍a̍wɛ̄ɛ̍ ba̍li̍ka̍a̍, kāālā ndɔ̄ɔ̍ ō chō le̍ fɛ̍ɛ̍ŋ a̍ fɛ̍ɛ̍ŋ.”

²² Mɛ̄ɛ̍ nda̍ kāndu̍ chōndo̍ŋ sōlīo̍o̍ mā sāŋgālā Mɛ̄lɛ̄ka̍, so̍vɛ̄i̍ya̍a̍ hi᷅ŋ ka̍ŋ wāŋnda̍ Chu̍dā chīŋa̍la᷅ŋndo̍ wa̍, pūa̍a̍ A̍mɔ᷅ŋ, a̍ pūa̍a̍ Mo̍wa̍bī, a̍ pūa̍a̍ I̍dɔ̄m, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ kɔ̄lta̍ŋ lā lāka̍si̍a̍ŋ nda̍.

²³ Mi̍ so̍vɛ̄i̍ya̍ A̍mɔ᷅ŋ, a̍ pūa̍a̍ Mo̍wa̍bī, a̍ mūlu̍la᷅ŋ so̍vɛ̄i̍ya̍ I̍dɔ̄m a̍ sɔ̍ŋgɔ̄ɔ̍, ndu̍yɛ̍ ma̍ dīū so̍vɛ̄i̍ya̍ I̍dɔ̄m, ma̍ chīī nda̍ kpo̍u̍. Mɛ̄ɛ̍ nda̍ chīi̍ nda̍ dīū, mi̍ nda̍ pi̍la̍ mūlu̍la᷅ŋ vɛ̍lɛ̄ vēllāa̍ vēllē, ma̍ dīūwa᷅ŋ.

²⁴ Mɛ̄ɛ̍, so̍vɛ̄i̍ya̍ Chu̍dā a̍ ku̍ɛ̄ ma̍ sīm o̍ chīɛ̄ī vīlɛ̄i̍ wa̍ o̍ po̍llo̍ ni᷄ŋ, mi̍ wāŋnda̍ ā sīm le̍cho̍o̍ le̍ mɛ̄ŋgɛ̄lāa̍ wo̍, ma̍ tōfā kūmbū so̍vɛ̄i̍ya̍a̍ sɛ̍lɛ̍ bɛ̍ndūāā kāŋ ā wa̍ wo̍, ma̍ chā nda̍ īhīni̍ lɛ᷅ŋ a̍ vīlɛ̍i̍ya̍ lɛ̍ɛ̍si̍ɛ̍ŋ, ō pīlɛ̍ bɛ̍ɛ̍ ō nɔ̄la̍ mbō hɛ̄lu᷄ŋ te̍.

²⁵ O̍ ko̍ŋ, mi̍ Chɛ̄hōsi̍a̍fa̍tī nda̍ so̍vɛ̄i̍ya̍a̍ ndūa̍a̍ ā kūā le̍ nyɛ̄m ya̍a̍mɔ̍ɔ̍wa̍a̍ ndāa̍ ha̍ā pūŋgāa̍. Ndu̍yɛ̍ ma̍ sāālu᷄ŋ chɔ̍lūa̍a̍ ta̍u̍ ta̍u̍, a̍ nyɛ̄m chēle̍ŋndo̍ŋ, a̍ nyɛ̄m chūɛ̄ɛ̄na᷄ŋndo̍ŋ, a̍ nyɛ̄m ba̍ā kāla᷄ŋ. Le̍ pālɛ̍i̍ ī yāa̍ kpu̍lu̍ku̍u̍ ā wa̍ nyɔ̄ɔ̍ŋ mu᷅ŋ pūŋgāa̍. Ndu̍yɛ̍ ā pūŋga̍ mu̍ŋ fe̍e̍e̍, ā nɔ̄la̍ mā chīi̍ lākɔ̄ a̍ mu̍ŋ te̍.

²⁶ O̍ pāa̍le̍ hi̍ɔ̍ɔ̍lu̍le̍ŋ chōo̍, ma̍ chūūŋgi̍āŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Bɛ̄lu̍a̍kā. Mā sāŋgālā Mɛ̄lɛ̄ka̍ Ya̍a̍wɛ̄ɛ̄ le̍ nyɛ̄ o̍ nyɛ̄ o̍ to̍sa̍l nda̍. Mɛ̄ɛ̍ nyɛ̄ ko̍ŋ to̍sa̍ ni̍ ma̍ kē fo̍ndāŋ kōŋ dīōla̍ŋ āā, Dɛ̍ŋgbɔ̍ɔ̍ Bɛ̄lu̍a̍kā, ndu̍yɛ̍ a̍ pāa̍le̍ hāūle̍ŋ nde᷅ŋ bɛ̍ɛ̍, le̍nde̍ nda̍ vēēlū fo̍ndāŋ kōŋ ni̍.

²⁷ O̍ ko̍ŋ kɔ̍ɔ̍lī, mi̍ Chɛ̄hōsi̍a̍fa̍tī o̍ si᷅m so̍vɛ̄i̍ya̍a̍ ndūa̍a̍, ha̍ā Chu̍dā, a̍ ha̍ā Chūlu̍sɛ̄lɛ̄m lāchī, ma̍ mīīŋgū Chūlu̍sɛ̄lɛ̄m a̍ nya̍a̍lo̍o̍. Kāni̍ fo̍ndōle̍, le̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ ō ma̍la̍ nda̍ ma̍ yām ya̍a̍mɔ̍ɔ̍wa̍a̍ ndāa̍ yɛ̍.

²⁸ Mɛ̄ɛ̍ nda̍ fūūlu̍u̍ Chūlu̍sɛ̄lɛ̄m, ma̍ kūā o̍ chīɛ̍i̍ Mɛ̄lɛ̄ka̍a̍, a̍ tōwāla̍ŋ lɔ̄ɔ̍ ndu̍yɛ̍ mā hɔ̄ŋ pu᷅tɛ̍nɛ̍i̍la̍ŋ.

²⁹ Māsɛ̄i̍ o̍ lɛ̄ŋnde̍ ni᷄ŋ kpo̍u̍, mɛ̄ɛ̍ nda̍ tūēī māā Mɛ̄lɛ̄ka̍ Ya̍a̍wɛ̄ɛ̄ o̍ sɔ̍ŋga̍ a̍ ya̍a̍mɔ̍ɔ̍wa̍a̍ I̍sɔ̄lūɛ̍i̍ya̍, mbo̍ yām nda̍, mi̍ sīōōŋīī bɛ̄ndūe̍i̍ bīī nda̍.

³⁰ O̍ ko̍ŋ, mi̍ Māsāa̍ Chɛ̄hōsi̍a̍fa̍tī, o̍ wa᷅ ni̍ko̍ o̍ māsāle̍ ndɔ̄le̍ŋ chōo̍ a̍ kɔ̄l nyūlū. Mi̍ Mɛ̄lɛ̄ka̍ ndɔ̄ɔ̍ māndā ndu̍ mbo̍ wānu᷄ŋ ya̍a̍mɔ̍ɔ̍wa̍a̍ ndūa̍a̍ tɛ̄ɛ̄ŋ yɛ̍lɛ̍kɛ̍lɛ̍ɛ̍.

A̍ mɛ̄ɛ̄lu̍la̍ māsāle̍ Chɛ̄hōsi̍a̍fa̍tī le̍ŋ o̍kɔ̄ɔ̄

³¹ Māsā Bɛ̍ndōo̍ Chɛ̄hōsi̍a̍fa̍tī o̍ wa̍ wɔ̄sīla̍ŋ be̍le̍-ya̍a̍ a̍ lā ŋūɛ̍ɛ̍nu̍, mbo̍ sīmnu᷄ŋ ma̍sāa̍ Chu̍dā. Ndu̍yɛ̍ mbo̍ to̍sā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ bi̍dīi̍ŋ a̍ lā ŋūɛ̍ɛ̍nu̍. Ndu̍yɛ̍ Chɛ̄hōsi̍a̍fa̍tī ko̍ŋ, kāla̍ ndɔ̍ wa̍ Āsu̍bā, chu̍a̍ Si̍li̍hī wo̍ ni̍.

³² Ndu̍yɛ̍ Chɛ̄hōsi̍a̍fa̍tī ō wa̍ sa̍kpō Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. Ka̍ā A̍sā fi̍nyā ndɔ̄ o̍ wa̍ chōo̍ wo̍, ndu̍ bɛ̍ɛ̍ ndu̍ ko̍ni̍ o̍ to᷅l kɔ̄ɔ̄lī ni̍.

³³ Kɛ̍ ndu̍yɛ̍, fo̍ndāŋndā wāŋnda̍ nda̍ a̍a̍ so̍o̍lūū mɛ̄lɛ̄ka̍ā chēle̍ŋnde̍ la̍ŋ ki̍nɛ̍i̍, ō tɛ̄ɛ̄mbu̍u̍ la̍ŋ te̍. Kāni̍ fo̍ndōle̍, wāŋnda̍ nda̍ a̍a̍ yɔ̍ŋgu̍ŋ ndɔ̍ nāa̍ Mɛ̄lɛ̄ka̍ fi̍nyāā ndāa̍ chūā a̍ kɔ̄ltā ndāla̍ŋ kpe̍de̍ le̍.

³⁴ Sɔ̄ɔ̍ŋ tɔ᷅ŋ chēle̍ŋ yɔ̍nu̍ŋ o̍ māsāle̍ Māsāa̍ Chɛ̄hōsi̍a̍fa̍tī le̍ŋ bɛ̄ŋgu̍ wo̍ŋ ki̍nɛ̍i̍, chɔ̍ŋ o̍ māsāle̍ ndɔ̄le̍ŋ kāndɔ᷄ŋndo̍ mbo̍ fūūlūū o̍ mɛ̄ɛ̄lu̍la̍ŋ, mu̍ŋ kpo̍u̍ ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ Chɛ̍hū, po̍ Ha̍na̍nī wo̍ ō pōōnyi̍a̍a̍ wo̍ ni᷄ŋ, ndu̍yɛ̍ mi̍ ŋ̄ wā vɛ̄lɛ̄ ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ Māsāā Bɛ̍ndūa̍a̍ I̍sɔ̄lūɛ̄ī o̍kɔ̄ɔ̄ wo̍ ni᷄ŋ.

³⁵ Mɛ̄ɛ̍ te̍le̍ŋ ti̍ŋ hīōū, mi̍ Chɛ̄hōsi̍a̍fa̍tī, māsāa̍ Chu̍dā o̍ to̍sā nāāŋa᷅ŋndo̍ nda̍ Āhāsa̍yā, māsā bɛ̍ndōo̍ le̍ I̍sɔ̄lūɛ̄ī, ō ndu̍ o̍o̍ to̍sa̍ sɔ̄ɔ̍ŋ wɔ̍ɔ̍ŋndo̍ŋ ta̍u̍ ta̍u̍ wo̍.

³⁶ O̍ ko̍ŋ, mi̍ Māsāa̍ Chɛ̄hōsi̍a̍fa̍tī, o̍ to̍sā chɛ̄la᷅ŋndo̍ nda̍ Māsāa̍ Āhāsa̍yā le̍ mā tāŋgu̍l dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ, le̍ mā wa̍ kɔ̄la̍ŋ yākōle̍ŋ tōsāa̍ Ta̍a̍sī. Ndu̍yɛ̍ ma̍ tāŋgūl dɛ̄ndɛ̄la̍ŋ nda᷅ŋ Ɛ̄sāyɔ̄ŋkɛ̍bɛ̄ chi̍e̍e̍.

³⁷ Kɛ̍ mi̍ Īlīɛ̍ɛ̍sā, po̍ Dōda̍va̍hū wo̍, wānā wa̍ā Mālu̍ɛ̍sīāā chi̍e̍e̍, mbo̍ dīmūl Chɛ̄hōsi̍a̍fa̍tī yōōŋgū Mɛ̄lɛ̄ka̍ ke̍ ndu̍ wo̍. Mbo̍ dīmī āā, “Le̍ mɛ̄ɛ̍ ŋ̄ tōsa̍ chɛ̄la᷅ŋndo̍ nya̍ Āhāsa̍yā yɛ̍, Mɛ̄lɛ̄ka̍ Ya̍a̍wɛ̄ɛ̄ ō chō dɛ̄ndɛ̄la̍ ŋ̄ tōōsi̍a̍a̍ la̍ŋ tɛ̄ɛ̄mbūū.” Ndu̍yɛ̍, mi̍ dɛ̄ndɛ̄la̍ la̍ŋ lā tāmbū, ā tīu̍ lɛ̍ bā mā kūɛ̄ a̍ la̍ŋ Ta̍a̍sī le̍.