Ko̍lo̍ni̍kō Di̍i̍ŋ Ndɔ̄ɔ̍ 2 - Yāu̍ Mɛ̄lɛ̄ka̍a̍

A̍ mɛ̄ɛ̍ Sɔ̍lɔ̍mɔ̄ŋ bɛ̍ɛ̍ndi̍a̍ŋ le̍ chīɛ̍i̍ Mɛ̄lɛ̄ka̍a̍ tāŋgūllo̍ yɛ̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ bɛ̍ɛ̍ndīa̍ŋ le̍ chīɛ̍i̍ Mɛ̄lɛ̄ka̍a̍ tāŋgūllo̍, ndu̍yɛ̍ a̍ chīɛ̄ī lēmāsāa̍ le̍ ndu̍ pi̍la̍.

² O̍ ko̍ŋ, mbo̍ hɛ̍lī pūa̍a̍ wāa̍la̍ŋ be̍le̍-ŋɔ̍mmɛ̍ū (70,000), le̍ mī nda̍ a̍a̍ wa̍ le̍ wōlɔ̄ɔ̄la̍ wa̍lta̍ŋ vīlīo̍o̍. O̍ ko̍ŋ, mbo̍ hɛ̄lī vɛ̄lɛ̄ pūa̍a̍ wāa̍la̍ŋ be̍le̍-ŋɔ̍ma̍a̍ (80,000), mbo̍ yɔ̄ŋ nda̍ o̍ lɛ̄ŋndē īpēmbūle̍ŋ, le̍ pōūtā tāŋgūlāā la̍ŋ sīɔ̄lɔ̄ɔ̍. O̍ ko̍ŋ kɔ̍ɔ̍lī, mbo̍ hɛ̄lī vɛ̄lɛ̄ pūa̍a̍ wāa̍la̍ŋ lā yāa̍ a̍ kɛ̄mɔ̄ɔ̍ lē ŋɔ᷄mpu᷅m (3,600), mbo̍ kɛ̄sī nda̍ wānāā wa̍li̍a̍a̍ ka̍ŋ kpo̍u̍ bo̍lle̍ŋ le̍ mā wa̍ nda̍ bālɔ̄ɔ̍ chōo̍.

³ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ yɔ᷅ŋ dīōmnde̍ŋ nāa̍ Māsā Bɛ̍ndōo̍ Hi̍lūām chu̍a̍, o̍ wa̍ māsāa̍ le̍ Ta̍a̍yā wo̍, mbo̍ dīmūl ndu̍ āā, “I̍ ye̍e̍ma̍ mī ŋ̄ tōsa̍ yākōle̍ŋ na̍a̍ nūm, mɛ̄ɛ̍ nya̍ a̍a̍ tōsa̍ nya̍ fi̍nyā nūu̍ Dēēve̍, mī nūm o̍o̍ yɔ᷅ŋ ndu̍ yɔ̄mīī si̍dāāve̍ le̍ chīɛ̄ī ndɔ̍ ndu̍ pi̍la̍a̍ tāŋgūllo̍ yɛ̍.

⁴ I̍ bɛ̍ɛ̍ndi̍a̍ŋ le̍ mi̍ ta̍ŋgu̍l chīɛ̄īyo̍ le̍ wāa̍ Mɛ̄lɛ̄ka̍ Ya̍a̍wɛ̄ɛ̍ nūu̍ sōōlūūwo̍ lo̍ŋ. Ndu̍yɛ̍ chīɛ̄īyo̍ ho̍ō chō wā fo̍ndāŋ kāsī Mɛ̄lɛ̄ka̍a̍, nāa̍ ya̍ a̍ wānāā nīa̍a̍ chō ndu̍ wā sōōlūūwo̍ wa̍. Lo̍ŋ na̍a̍ ŋ̄ wā ni̍ŋ nyɛ᷅m chūŋ kɛ̍ndɔ᷄ŋ lōmɔ̄ɔ̍ ni̍, mī ŋ̄ wa̍ bēe̍dīi̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ wo̍ yɔ̄ŋgōo̍, a̍ sa̍lālā lūāmāālā na̍a̍ ŋ̄ sōlī īdīi̍ a̍ īchɔ̄l, ndu̍yɛ̍ a̍ o̍ pālɛ̍i̍ nɛ̄ī pɛ̍ŋgīɛ̍i̍ chōo̍ la̍ŋ. Bɔ̄ŋa᷅ŋndā pāŋgi̍i̍ sɛ̍nɛ̄ī la̍ŋ, a̍ bɔ̄ŋa᷅ŋndā chēle̍ŋ ndā Mɛ̄lɛ̄ka̍ Ya̍a̍wɛ̄ɛ̍ nāa̍ ō tūu̍ le̍ I̍sɔ̄lūɛ̍i̍ya̍ le̍ fɛ̍ɛ̍ŋ a̍ fɛ̍ɛ̍ŋ nda̍ŋ, lo̍ŋ na̍a̍ ŋ̄ wā ni̍ŋ nda̍ŋ bīyɔ̄ɔ̍ ni̍.

⁵ Chīɛ̄ī ya̍ I̍ cho̍ hūnɔ̄ɔ̄ tāŋgūllo̍, ō chō wā chīɛ̄ī tɔ̍ɔ̍ma̍ bɛ̄ndū. Kāni̍ fo̍ndōle̍, Mɛ̄lɛ̄ka̍ nāa̍, ō ya̍ cho̍ chīɛ̄īyo̍ ho̍ō tēŋgūllo̍ wo̍, ō chō ō bɛ̄ndū mbo̍ hīāū mɛ̄lɛ̄ka̍a̍ chēle̍ŋ nda̍ kpo̍u̍.

⁶ Kɛ̍, ō nɛ̄ɛ̍nɛ̍ ti̍ū yɛ̍ bā mbo̍ tēŋgu̍l ndu̍ chīɛ̄īyo̍, kāni̍ fo̍ndōle̍, ɛ̄chɛ̍nɛ̄ bɛ̍ɛ̍ ō su᷅l le̍ni᷄ŋ te̍. Wāna̍ māāvɛ̄ɛ̄ ya̍ cho̍ yɛ̍ mī te̍ŋgu̍l ndu̍ chīɛ̄īyo̍, mɛ̄ɛ̍ bɛ̍ɛ̍ le̍ fo̍ndāŋ na̍a̍ ŋ̄ lūām sa̍lālā la̍ŋ nāa̍ ndu̍ chu̍a̍ wo̍ mī te̍ŋgu̍l ndu̍.

⁷ Le̍la̍ŋ, yɔ̍ŋ ya̍ wāŋndo̍ o̍ cha̍ā wa̍llo̍ a̍ ko̍o̍līi̍yo̍ŋ, a̍ ka̍ni̍ŋ hu̍mbo᷄ŋ, a̍ būlɔ᷄ŋsīi̍yo̍ŋ, a̍ chīli̍ŋndo̍ŋ ndo̍, wāna̍ cha̍ā vɛ̍lɛ̄ kōlāla̍ ba̍ā kālāla̍ŋ tōōsīa̍a̍ wo̍, lā kɔ̄ɔ̍le̍ būli̍īla̍ŋ, a̍ lā bɔ̍ɔ̄la̍ā la̍ŋ, a̍ lā sīāŋāla̍ŋ ndo̍. Wāna̍ cha̍ā vɛ̍lɛ̄ nyɔ̄ɔ̍ŋ tūūlīa̍a̍ a̍ lābā wo̍, mbō hu᷄ŋ tōsa̍ wa̍llo̍ nda̍ wānāā nīa̍a̍ cha̍ā nyɛ᷅ a̍ lābā, mā wa̍ ya̍ o̍ bā Chu̍dā a̍ Chūlu̍sɛ̄lɛ̄m nda̍, wānāā Dēēve̍ fi̍nyā nī ndu̍ o̍o̍ hɛ̄li̍ wa̍.

⁸ Mā yɔ̍ŋ ya̍ vɛ̄lɛ̄ yɔ̄mīī si̍dāāve̍, a̍ yɔ̄mīī sa̍i̍pu̍lūɛ̄ɛ̄ve̍, a̍ yɔ̄mīī chu̍ni̍pāve̍, fūlāa̍ Le̍ba̍nɔ̄ŋ. Kāni̍ fu̍u̍le̍, I̍ si̍nā māā bu̍ɛ̍i̍yāa̍ nūmnda̍, nda̍ cha̍ā yɔ̍mīī tāŋgūlɛ̄i̍ he̍ī Le̍ba̍nɔ̄ŋ kīōlɔ̄ɔ̍ ni̍. Bu̍ɛ̍i̍yāa̍ nīa̍a̍ chō wā lo̍ŋ lātūlu̍ a̍ bu̍ɛ̍i̍yāā nūmnda̍,

⁹ le̍ nda̍ mālāa̍ mā kīlu̍l la̍ yɔ̄mīī tāŋgūlɛ̄i̍ hɔ̍lɔ̄bi̍, kāni̍ fu̍u̍le̍, chīɛ̍i̍ Mɛ̄lɛ̄ka̍ ya̍ I̍ cho̍ hūnɔ̄ɔ̄ tāŋgūllo̍, ō chō wā chīɛ̄ī tɔ̍ɔ̍ma̍ kɛ̄ndɛ̄ bɛ̄ndū.

¹⁰ Le̍ bu̍ɛ̍i̍yāā nu̍m a̍ cho̍ wa̍ yɔ̄mīī tāŋgūlɛ̄ī kēŋ kīōlɔ̄ɔ̍ wa̍, I̍ cho̍ wi̍tīi̍yo̍ŋ yɔ̄ŋgū bu̍sɛ̄la̍ŋ wāa̍la̍ŋ kɛ̄mɛ̄ (100,000), a̍ ba̍a̍līi̍yo̍ŋ bu̍sɛ̄la̍ŋ wāa̍la̍ŋ kɛ̄mɛ̄ (100,000), a̍ mūɛ̄īmā kīle̍pīi̍ya̍ŋ ka̍lɔ̄ŋnda̍ŋ wāa̍la̍ŋ kɛ̄mɛ̄ a̍ tɔ̍ (110,000), a̍ chūɛ̄īmā ɔ̍li̍fīi̍ya̍ŋ ka̍lɔ̄ŋnda̍ŋ wāa̍la̍ŋ kɛ̄mɛ̄ a̍ tɔ̍ (110,000.)”

¹¹ O̍ ko̍ŋ, mi̍ Māsā Bɛ̄ndōo̍ Hi̍lūām, māsāa̍ le̍ Ta̍a̍yā, o̍ po̍o̍nyīāā yāu̍wo̍ nāa̍ Sɔ̍lɔ̍mɔ̄ŋ chu̍a̍, mbo̍ mūlī Sɔ̍lɔ̍mɔ̄ŋ dīōm āā, “Le̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ kāāla̍ wānāā ndūa̍a̍ yɛ̍, le̍la̍ŋ o̍ si̍i̍ŋgu̍u̍ nu̍m māsā bɛ̍ndōo̍ nda̍ chōo̍ ni̍.”

¹² Mi̍ Māsāa̍ Hi̍lūām hi̍a̍ū lāchī a̍ sūɛ̍i̍, mbo̍ dīmī āā, “Sāŋgālāa̍ chō nāa̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ chūā, o̍ to̍o̍si̍a̍a̍ ɛ̄chɛ̍nɛ̄ a̍ chi̍e̍ēŋndo̍ wo̍, o̍ ke̍ Māsā Bɛ̍ndōo̍ Dēēve̍ po̍ kɔ̄l kālo̍o̍, mbo̍ nɔ̄ tāāsi̍o̍o̍ a̍ sīnā pɛ̄ŋgo̍o̍, ndu̍yɛ̍ mbo̍ kɛ̄ɛ̄sīāā le̍ mbō hu̍ŋ ta̍ŋgūl chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, ndu̍yɛ̍ a̍ chīɛ̄ī lēmāsāa̍ le̍ ndu̍ pi̍la̍ wo̍.”

¹³ “Le̍la̍ŋ, I̍ cho̍ nu̍m Hu̍lūām yɔ̄ŋ, o̍ si̍na̍ a̍ nyɔ̄ɔ̍ŋ tōōsīa̍a̍ o̍kɔ̄ɔ̄ sīnā bɛ̄ndōo̍ wo̍.

¹⁴ Hɔ̍lūām ndo̍ ho̍ō, o̍ yu̍ŋgu̍ Da᷅ŋndo̍ chōo̍ kāla̍ ndɔ̄ fu̍la̍ ni̍. Fi̍nyā ndɔ̄ yɛ̍, pi̍la̍ chi̍e̍e̍ wa̍ā Ta̍a̍yā o̍ wa̍ ni̍. Hɔ̍lūām ndo̍ ho̍ō yɛ̍, wāna̍ pɛ̄ɛ̄ku̍ le̍ wa̍llo̍ a̍ ko̍o̍līi̍yo̍ŋ, a̍ ka̍ni̍ŋ hu̍mbo᷄ŋ, a̍ būlɔ̍ŋsīi̍yo̍ŋ, a̍ chīli̍ŋndo̍ŋ, a̍ pōūta̍ŋ, a̍ yɔ̄mnde̍ wo̍ o̍ cho̍ ni̍, ndu̍yɛ̍ vɛ̍lɛ̄, ō pɛ̄ɛ̄ku̍ le̍ wa̍llo̍ a̍ kōlāla̍ ba̍ā kālā la̍ŋ, kōlāla̍ kɔ̄ɔ̍le̍ būli̍īla̍ŋ, a̍ lā bɔ̍ɔ̄la̍ā la̍ŋ, a̍ la̍ sīāŋā la̍ŋ, a̍ lā ba̍ā kālālā chēle̍ŋ nda̍ŋ. O̍ ko̍ŋ kɔ̍ɔ̍lī, ō chāā vɛ̍lɛ̄ nyɔ̄ɔ̍ŋ tūūlīa̍a̍ a̍ lābā. Nyɛ̄ o̍ nyɛ̄ ŋ̄ dīmu̍l ndu̍ pɛ̍ le̍ mbō tūūla̍ ō nɔ̄lā mbō tūūla̍ ndu̍. Le̍la̍ŋ ā che̍ŋ ndu̍ mā tōsa̍ wa̍llo̍ lātūlu̍ nda̍ wānāā nūm a̍a̍ cha̍ā nyɛ̍ a̍ lābā wa̍, a̍ wa̍ wa̍llo̍ le̍ Māsānɔ̍ nūu̍, Dēēve̍ fi̍nyā nūm nda̍.

¹⁵ Le̍la̍ŋ, Māsānɔ̍ nūu̍, yɔ̍ŋ ni̍ko̍ nyɛ᷅m ŋ̄ dīmi̍ le̍ yɔ̄ŋgōo̍ le̍ bu̍ɛ̍i̍yāā nīa̍a̍ wo̍ŋ, wi̍tīi̍yo̍ŋ, a̍ ba̍a̍līi̍yo̍ŋ, a̍ chūɛ̄īmā ɔ̍li̍fīi̍ya̍ŋ, a̍ mūɛ̄īmā kīle̍pīi̍ya̍ŋ.

¹⁶ Ndu̍yɛ̍ yɔ̄m o̍ yɔ̄m tāŋgūlāā ŋ̄ yēēma̍ o̍ pēmbūŋ Le̍ba̍nɔ̄ŋ ndo̍ŋ chōo̍, I̍ cho̍ wānāā nīa̍a̍ wa̍lla̍ di̍mūl mā kīlu̍l nu̍m, mā yīū yi̍u̍ ndi̍ a̍ ku̍ndāla̍ŋ, mā tūsi̍ ndi̍ o̍ Pēē Mɛ̄ŋmā Īhɛ᷄llo̍ kɔ̄ŋgɔ̍ Cho̍pā. O̍ ko̍ŋ, ā nɔ̄lā ni᷅ŋ mā chu̍a̍ ndi̍ mā kūɛ̄ a̍ ndi̍ Chūlu̍sɛ̄lɛ̄m.”

A̍ mɛ̄ɛ̍ Sɔ̍lɔ̍mɔ̄ŋ ka̍ndu̍ chīɛ̍i̍ Mɛ̄lɛ̄ka̍a̍ tāŋgūllo̍ yɛ̍ o̍kɔ̄ɔ̄

¹⁷ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ chɔ᷅m wānāā lēkāa̍ wa̍, a̍ wa̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ nda̍ kpo̍u̍, lē sīnāa̍ mɛ̄ɛ̍ nda̍ chō bōllē pīlɛ̍ yɛ̍, mɛ̄ɛ̍ Dēēve̍ fi̍nyā ndɔ̄ ō chɔ̍m nda̍ pāāndu̍ yɛ̍. Ndu̍yɛ̍, mɛ̄ɛ̍ o̍ chi̍i̍ nda̍ chɔ̄m, mbo̍ sāālu̍ŋ māā wāŋnda̍ ha̍ā ā wa̍ fa̍ū fa̍ū wāa̍la̍ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ a̍ lā yāa̍, a̍ kɛ̄mɔ̄ɔ̍ lē ŋɔ᷄mpu᷅m (153,600).

¹⁸ O̍ ko̍ŋ, mbo̍ hɛ̄lī nda̍ wāa̍la̍ŋ be̍le̍ ŋɔ᷄mmɛ̍ū (70,000), mbo̍ yūlū nda̍ le̍ wōlɔ̄ɔ̄lā tāŋgūlāā la̍ŋ vīlīo̍o̍. Mbo̍ hɛ̄lī vɛ̄lɛ̄ ha̍ā wāa̍la̍ŋ be̍le̍-ŋɔ̍ma̍a̍ (80,000) le̍ pōūta̍ŋ sīɔ̄lɔ̄ɔ̍ o̍ pēmbo᷄ŋ chōo̍. Mbo̍ hɛ̄lī vɛ̄lɛ̄ ha̍ā wāa̍la̍ŋ lā yāa̍ a̍ kɛ̄mɔ̄ɔ̍ lē ŋɔ᷄mpu᷅m (3,600), le̍ mā wa̍ nda̍ bālɔ̄ɔ̍ chōo̍ le̍ mā chē māā wa̍llo̍ chō tōsa᷄ŋndo̍.