Ko̍lo̍ni̍kō Di̍i̍ŋ Ndɔ̄ɔ̍ 17 - Yāu̍ Mɛ̄lɛ̄ka̍a̍

A̍ māsāle̍ Chɛ̄hōsi̍a̍fa̍tī le̍ŋ o̍kɔ̄ɔ̄

¹ Mɛ̄ɛ̍ Māsāa̍ A̍sā o̍ vi᷅, mi̍ Chɛ̄hōsi̍a̍fa̍tī po̍ ndɔ̄ o̍ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍. O̍ ko̍ŋ, mbo̍ bɛ̄ɛ̄ndīa̍ŋ ndu̍ pi̍la̍ ō kālā ka̍lā māā I̍sɔ̄lūɛ̍i̍ya̍ ā ti̍ū ndu̍ bā a̍ sɔ̍ŋgɔ̄ɔ̍ le̍.

² O̍ ko̍ŋ kɔ̍ɔ̍lī, mbo̍ kɛ̄sī so̍vɛ̄i̍ya̍ ku̍ndāla̍ŋ o̍ chi̍e̍e̍ŋ wa̍ ŋ̄ bɛ̄ɛ̄ndīāā ŋ̄ kālā ka̍lā o̍ lɛ̄ŋndē Chu̍dāle̍ŋ ni᷄ŋ ndo̍ŋ, ndu̍yɛ̍ mbo̍ yɔ̄ŋ vɛ̄lɛ̄ so̍vɛ̄i̍ya̍ o̍ chi̍o̍o̍ŋ pīlɔ̍ŋ o̍ lɛ̄ŋndē Chu̍dāle̍ŋ ni᷄ŋ, a̍ o̍ chi̍e̍e̍ŋ A̍sā fi̍nyā ndɔ̄ ndu̍ o̍o̍ bi̍ī o̍ būŋgɛ̄ī E̍fi̍lūēm nde̍ ni᷄ŋ ndo̍ŋ.

³ Mɛ̄lɛ̄ka̍ Ya̍a̍wɛ̄ɛ̄ ō wa̍ Chɛ̄hōsi̍a̍fa̍tī kɔ̄ɔ̄lī. Kāni̍ fo̍ndōle̍, o̍ wa̍ sa̍kpō Mɛ̄lɛ̄ka̍ o̍ hɔ̄l mɛ̄ɛ̍ fi̍nyā ndɔ̄ wa̍ sa̍kpō Mɛ̄lɛ̄ka̍ o̍ hɔ̄l o̍ tāse̍la̍ ndɔ̄ɔ̍ yɛ̍. Ō tu᷄l Mɛ̄lɛ̄ka̍ Bāāl kɔ̄ɔ̄lī, ndu̍yɛ̍ mbō sōōlu̍u̍ ndu̍ le̍.

⁴ Kɛ̍ mbo̍ tūāl Mɛ̄lɛ̄ka̍ fi̍nyā ndɔ̄ ndu̍ o̍o̍ pi̍ɛ̍īyo̍ kɔ̄ɔ̄lī, ndu̍yɛ̍ mbo̍ chūā sāwāla̍ ndɔ̄la̍ŋ. Ō tu᷄l ka̍ālā wāŋndā I̍sɔ̄lūɛ̄ī kɔ̄ɔ̄lī le̍.

⁵ Le̍ sa̍bū kōŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ māsāle̍ ndɔ̄le̍ŋ lē sīmnu᷄ŋ ma̍sāle̍ kpāāyā bɛ̍ndū Chu̍dā. Ndu̍yɛ̍ wāŋnda̍ Chu̍dā kpo̍u̍, a̍ wa̍ hūnɔ̄ɔ̍ a̍ nyɔ̄ɔ̍ŋ mā kē ndu̍. Mbo̍ sūl sūllo̍ pīla̍, ndu̍yɛ̍ mbo̍ sɔ̄lā bɛ̄ɛ̄le̍ŋ ta̍u̍.

⁶ Mbo̍ sīmūl kɔ̄l le̍ Mɛ̄lɛ̄ka̍ Ya̍a̍wɛ̄ɛ̍ sāāŋgīāllo̍. Fo̍ndāŋndā nda̍ a̍a̍ so̍o̍lūū mɛ̍lɛ̄ka̍a̍ chēle̍ŋnda̍ la̍ŋ ki̍nɛ̍i̍, mbo̍ tɛ̄ɛ̄mbūū la̍ŋ, o̍ ko̍ŋ kɔ̍ɔ̍lī, nyɛ̄lā nda̍ a̍a̍ si̍mi̍ o̍ lɛ̄ŋndē Chu̍dāle̍ŋ ni᷄ŋ, māā māsūŋgbu̍ le̍ Mɛ̄lɛ̄ka̍ A̍si̍ɛ̍lūā sōōlūūwo̍ la̍ŋ, mbo̍ tɛ̄ɛ̄mbūū la̍ŋ kpo̍u̍.

⁷ Wɔ̄sī Māsāa̍ Chɛ̄hōsi̍a̍fa̍tī o̍ chi̍ŋa̍ wɔ̄sīla̍ŋ lā yāa̍ o̍ lēmāsā wo̍, mbo̍ vīām wānāā bɛ̄ndūa̍a̍ o̍ chi̍e̍e̍ŋ bɛ̍ndo᷄ŋ Chu̍dā, nda̍ yɔ̍nūŋ ni̍ māā, Bɛ̄ŋhe̍ēl, a̍ Ōbāda̍yā, a̍ Sɛ̄kāla̍yā, a̍ Nɛ̄ta̍a̍nīɛ̄ɛ̄l, a̍ Mīka̍yāā, le̍ mā kɔ̍ pɛ̍ɛ̍kū wāŋnda̍ sāwāla̍ Mɛ̄lɛ̄ka̍ la̍ŋ.

⁸ Mɛ̄ɛ̍ nda̍ wa̍ kɔ̄la̍ŋ, ma̍ kūā a̍ Līva̍īya̍ kɔ̄ɔ̄lī, ā ŋɔ̄ma̍hīɔ̍ɔ̍lu̍, nda̍ yɔ̍nūŋ ni̍ māā Sīɛ̄ma̍yā, a̍ Nɛ̄tāna̍yā, a̍ Sɛ̄bāda̍yā, a̍ A̍sa̍hɛ̄l, a̍ Sīɛ̄mi̍lu̍a̍mɔ̄ɔ̄, a̍ Chɛ̄hōna̍tāŋ, a̍ Ādo̍ni̍chā, a̍ To̍bi̍chā, a̍ Tɔ̄bī Ādōna̍i̍chā. O̍ ko̍ŋ kɔ̍ɔ̍lī, ma̍ kūā vɛ̄lɛ̄ a̍ wānāā sōlīāā lāsa̍lāa̍ kɔ̄ɔ̄lī ā ŋīɔ̍ɔ̍ŋ, nda̍ yɔ̍nūŋ ni̍ māā Ɛ̄līsi̍a̍mā nda̍ Chɛ̄ho̍lūām.

⁹ Ndu̍yɛ̍ ma̍ kūā a̍ yāu̍ lāsāwa̍ Mɛ̄lɛ̄ka̍ Ya̍a̍wɛ̄ɛ̄ wo̍, ma̍ bālū wāŋnda̍ pɛ̄ɛ̄kōo̍ a̍ ndu̍ o̍ chi̍e̍e̍ŋ bɛ̍ndo᷄ŋ o̍ lɛ̄ŋndē Chu̍dāle̍ŋ ni᷄ŋ kpo̍u̍.

A̍ tɔ̍ɔ̍ Chɛ̄hōsi̍a̍fa̍tī wo̍ o̍kɔ̄ɔ̄

¹⁰ Ndu̍yɛ̍ mi̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ ī bīī māsɛ̄i̍ o̍ lɛ̄ŋīi̍ ba̍lu̍ lɛ̄ŋndē Chu̍dāle̍ŋ nde̍ kpo̍u̍. Le̍ he̍ī, lɛ̄ŋnde̍ he̍ī ki̍nɛ̍i̍, ī chīŋa̍la᷅ŋ Chɛ̄hōsi̍a̍fa̍tī a̍ sɔ̍ŋgɔ̄ le̍.

¹¹ Mi̍ Fīli̍i̍tīāŋnda̍ ā ti᷄ŋ, ā hūŋ a̍ nyɔ̄ɔ̍ŋ, a̍ ka̍ni̍ŋ hu̍mbo̍ŋ ma̍ kē Chɛ̄hōsi̍a̍fa̍tī. A̍lu̍a̍būi̍ya̍ bɛ̍ɛ̍, ma̍ hūŋ a̍ chɔ̄lūa̍a̍, sāa̍ ko̍ndu̍a̍a̍ wāa̍la̍ŋ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋɔ᷄mmɛ̍ū (7,700), a̍ chūīŋāā tōōyīa̍a̍ wāa̍la̍ŋ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋɔ᷄mmɛ̍ū (7,700), ma̍ kē ndu̍.

¹² O̍ ko̍ŋ, mi̍ Chɛ̄hōsi̍a̍fa̍tī o̍ si̍mnu᷄ŋ wa᷅na̍ kpāāyā bɛ̍ndū, mbo̍ fūlā tɔ̍ɔ̍. Mbo̍ bɛ̄ɛ̄ndīa̍a̍ chi̍o̍o̍ŋ Chu̍dā ŋ̄ kālā ka̍lā. O̍ ko̍ŋ kɔ̍ɔ̍lī, mbo̍ tāŋgūl fo̍ndāŋndā kālā ka̍lā la̍ŋ, o̍ chi̍o̍o̍ŋ o̍ lɛ̄ŋndē Chu̍dāle̍ŋ ni᷄ŋ, le̍ nyɔ̄ɔ̍ŋ kɛ̄sīo̍o̍.

¹³ Ndu̍yɛ̍ mbo̍ kɛ̄sī nyɔ̄ɔ̍ŋ ta̍u̍ ta̍u̍ o̍ chi̍e̍e̍ŋ mu̍ŋ o̍ lɛ̄ŋndē Chu̍dāle̍ŋ ni᷄ŋ. Mbo̍ hɛ̄lī so̍vɛ̄i̍ya̍a̍ si̍nā a̍ sɔ̍ŋgɔ̄ɔ̍ o̍kɔ̄ɔ̄ sīnā bɛ̄ndōo̍ wa̍, mbo̍ kɛ̄sī nda̍ Chūlu̍sɛ̄lɛ̄m chi̍e̍e̍.

¹⁴ So̍vɛ̄i̍ya̍a̍ kāŋ nda̍ cho̍ ha̍ā ni̍, a̍ yu̍ŋgu̍la̍ nda̍ fūla̍ chōo̍ la̍ŋ. A̍ fu̍la̍ o̍ yu̍ŋgu̍ Chu̍dā wo̍ chōo̍, ma̍ wā so̍vɛ̄i̍ya̍ wāa̍la̍ŋ bōlle̍ wa̍, nda̍ cho̍ ha̍ā ni̍. Wāna̍ tāso̍o̍ ndu̍ wa̍ A̍di̍nāā ni̍, ndu̍ wa̍ so̍vɛ̄i̍ya̍ bōlle̍ŋ wāa̍la̍ŋ kɛ̄mɔ̄ɔ̍ lēyāa̍ (300,000).

¹⁵ Wānā di̍i̍ŋ dɔ̄ɔ̍ŋ ndu̍ cho̍ Chɛ̄hōha̍nāŋ ni̍, ndu̍ wa̍ so̍vɛ̄i̍ya̍ bōlle̍ŋ wāa̍la̍ŋ kɛ̄mɔ̄ɔ̍ lēdīi̍ŋ a̍ be̍le̍-ŋɔ̍ma̍a̍ (280,000).

¹⁶ Wānā ya̍a̍ ndɔ̄ɔ̍ ndu̍ cho̍ Āmāsi̍yā, po̍ Si̍ki̍lī wo̍ ni̍, o̍ yɔ̍ŋgu̍ŋ ndu̍ pi̍la̍ le̍ wa̍li̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍. Ndu̍ wa̍ so̍vɛ̄i̍ya̍ bōlle̍ŋ, wāa̍la̍ŋ kɛ̄mɔ̄ɔ̍ lēdīi̍ŋ (200,000).

¹⁷ A̍ fu̍la̍ o̍ yu̍ŋgu̍ Bɛ̍ŋnja̍mīŋ ndo̍ chōo̍, ma̍ wā so̍vɛ̄i̍ya̍ bōlle̍ wa̍, nda̍ cho̍ ha̍ā ni̍. Wāna̍ tāso̍o̍ ndu̍ wa̍ Ɛ̄li̍a̍a̍dā ni̍. Ndu̍yɛ̍, wāna̍ ndu̍ o̍o̍ si̍nā a̍ chɔ̄ūwo̍ o̍kɔ̄ɔ̄ sīnā bɛ̄ndōo̍ wo̍ o̍ wa̍ ni̍. Ndu̍ wa̍ so̍vɛ̄i̍ya̍ bōlle̍ŋ wāa̍la̍ŋ kɛ̄mɔ̄ɔ̍ lēdīi̍ŋ (200,000), ā nda̍ a̍a̍ sɔ̍ŋgā a̍ chīɔ̄ūla̍ŋ, ndu̍yɛ̍ a̍ nyɛ̄lā kālā ka̍lāla̍ so̍vɛ̄i̍ya̍ ā bīī o̍ lābā māā bōo̍la̍ bɛ̍ndū le̍ nda̍ māndāa̍ la̍ŋ.

¹⁸ Wānā di̍i̍ŋ ndɔ̄ɔ̍ ndu̍ wa̍ Chɛ̄hōsa̍ba̍dī ni̍. Ndu̍ wa̍ so̍vɛ̄i̍ya̍ bōlle̍ŋ wāa̍la̍ŋ kɛ̄mɛ̄ a̍ be̍le̍-ŋɔ̍ma̍a̍ (180,000), a̍ wa̍ ā bɛ̄ɛ̄ndīa̍ŋ a̍ wōlɔ̄ɔ̄lā ndāla̍ chɔ̄ūla̍ŋ le̍ sɔ̍ŋgɔ̄ɔ̍ wa̍.

¹⁹ So̍vɛ̄i̍ya̍ ha̍ā, nda̍ wa̍ īchāli̍ Chūlu̍sɛ̄lɛ̄m mā tōsā wa̍llo̍ le̍ māsā bɛ̍ndōo̍ ni̍. Ndu̍yɛ̍ ō fūla̍ o̍ nda̍ kɔ̄ɔ̄lī, mi̍ māsā bɛ̍ndōo̍ ō kɛ̄sī vɛ̄lɛ̄ so̍vɛ̄i̍ya̍ ku̍ndāla̍ŋ o̍ chi̍e̍e̍ŋ bɛ̍ndūŋ o̍ bɛ̍ɛ̍ndīa̍a̍ ŋ̄ kālā ka̍lā o̍ lɛ̄ŋndē Chu̍dāle̍ŋ ni᷄ŋ ndo̍ŋ.