Ko̍lo̍ni̍kō Di̍i̍ŋ Ndɔ̄ɔ̍ 15 - Yāu̍ Mɛ̄lɛ̄ka̍a̍

A̍ mɛ̄ɛ̍ A̍sā tɛ̍ɛ̍mbu̍u̍ nyɛ̄m chēle̍ŋ wāŋnda̍ nda̍ a̍a̍ so̍o̍lūū Chu̍dā māā mɛ̄lɛ̄ka̍a̍ ndā wo̍ŋ yɛ̍ o̍kɔ̄ɔ̄

¹ Ō wa̍ a̍ te̍le̍ŋ pi᷅lɛ̍, mi̍ nyi̍na̍ Mɛ̄lɛ̄ka̍a̍ ō tūāl Āsālu̍i̍yā po̍ O̍dɛ̄ɛ̄ wo̍ kɔ̄ɔ̄lī.

² Mi̍ Āsālu̍i̍yā o̍ cha̍ŋ mbo̍ kōmāl Māsāa̍ Bɛ̍ndōo̍ A̍sā. Mbo̍ dīmūl ndu̍ āā, “Māsāa̍ A̍sā, nūm ni̍, a̍ wāŋnda̍ Chu̍dā, a̍ wāŋnda̍ Bɛ̍ŋnja̍mīŋ kpo̍u̍, lā ya᷄ŋ ni᷅la̍ŋ mī lā tūēī nyɛ̄ ya̍ I̍ cho̍ nya̍ dīmūllo̍. Ha̍a̍a̍ mi̍ lā wā a̍ Mɛ̄lɛ̄ka̍ Ya̍a̍wɛ̄ɛ̄ la̍tu̍lu̍, ndu̍ bɛ̍ɛ̍ ō chō a̍ nya̍ la̍tu̍lu̍. Tē lā nūūvi̍a̍a̍ ndu̍ pɛ̍, lā chō ndu̍ sāālɔ᷄ŋ, kɛ̍ tē lā kɛ̄ɛ̍ ndu̍ pɛ̍, ndu̍ bɛ̍ɛ̍ ō chō nya̍ kɛ̄ɛ̄.

³ Le̍ te̍le̍ŋ vi̍lɛ̄ī, wāŋnda̍ I̍sɔ̄lūɛ̄ī a̍ ve̍ Mɛ̄lɛ̄ka̍ kpe̍e̍kpe̍i̍yo̍ pīɛ̄ī le̍, ndu̍yɛ̍ nda̍ a̍a̍ nɔ̍ wa̍nāā sōlīāā lāsa̍lā le̍ nda̍ pɛ̍ɛ̍kū le̍, ndu̍yɛ̍ vɛ̍lɛ̄ ā ve̍ sāwāla̍ Mɛ̄lɛ̄ka̍ la̍ŋ chūā le̍.

⁴ Kɛ̍ a̍ ko̍ŋ kpo̍u̍, tē dɛ̍nɛ̍ pa̍lāa̍ ndu̍ o̍o̍ ko̍ma̍l nda̍ pɛ̍, ā mūli̍ŋ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ lo̍ le̍ mālāa̍. Ndu̍yɛ̍ tē nda̍ a̍a̍ nu̍u̍va̍ ndu̍ pɛ̍, ā sāālu̍ŋ ndu̍.

⁵ A̍ te̍le̍ŋ ko̍ŋ, ō wa̍ sūɛ̍i̍ ka̍lā le̍ mī wānā ndu̍ o̍o̍ ba̍lu̍ o̍ lɛ̄ŋndē I̍sɔ̄lūɛ̍i̍ ni᷄ŋ yɛ̍lɛ̍kɛ̍lɛ̍ɛ̍ nyɛ̄ yɔ̍nūŋ nu̍m te̍. Kāni̍ fo̍ndōle̍, lɛ̄ŋndē I̍sɔ̄lūɛ̍i̍le̍ŋ lē ve̍ o̍ bā ndɔ̄ cho̍o̍ le̍, lē wa̍ o̍ nyɛ̄ pālāā bɛ̄ndōo̍ ni᷄ŋ.

⁶ Wāŋnda̍ ā wa̍ tɛ̄ɛ̄mba᷅ŋndo̍ vēllāa̍ vēllē, ndu̍yɛ̍, chi̍e̍e̍ŋ bɛ̍ndo̍ŋ bɛ̍ɛ̍, o̍ cha᷅ŋ ko̍ ō kɔ̍ de᷅l ho̍ō chōo̍ ō tɛ̄ɛ̄mbūū ndu̍. Lɛ̄ŋnde̍ cha᷅ŋ ko̍ lē kɔ̍ de᷅l le᷅ŋ chōo̍ lē tɛ̄ɛ̄mbu̍u̍ le̍ŋ. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ wa̍ nda̍ nyɛ̄ pālāā bɛ̄ndōo̍ tūsīo̍o̍ chōo̍, mbo̍ tōsā kɔ̄l nyūlū o̍ kɔ̄l nyūlū ō ve̍ lɛ̍ nda̍ tɛ̄ɛ̄ŋ te̍.

⁷ Kɛ̍ nya̍ wāŋnda̍ Chu̍dā, lā sīmu̍l kɔ᷅lta̍ŋ, lā wu᷅ ŋ̄dīāl te̍. Wa̍li̍ o̍ wa̍li̍ nya̍ chō tōsāa̍, lā chō hūnɔ̄ɔ̄ fāndāa̍ sɔ̄lā le̍ ndu̍.”

⁸ Mɛ̄ɛ̍ Māsāa̍ A̍sā o̍ tu̍e̍ī sɔ̄ɔ̍ŋ wa̍ā lāchīŋ wāna̍ su̍a̍ā le̍ Mɛ̄lɛ̄ka̍ wo̍ Āsālu̍i̍yā po̍ O̍dɛ̄ɛ̄ wo̍, ō dīmu̍l ndu̍ wo̍ŋ, mbo̍ sīmūl kɔ̄l. O̍ ko̍ŋ, nyɛ̄m chēle̍ŋ wāŋnda̍ nda̍ a̍a̍ so̍o̍lūū māā mɛ̄lɛ̄ka̍a̍ nda̍ o̍ būŋgɛ̄ī Chu̍dāve̍ ni᷄ŋ, a̍ o̍ būŋgɛ̄ī Bɛ̍ŋnja̍mīŋ nde̍ ni᷄ŋ, a̍ o̍ chi̍e̍e̍ŋ bɛ̍ndūŋ o̍ bi̍u̍ o̍ lɛ̄ŋndē īpēmbūle̍ŋ E̍fi̍lūēm ndo̍ŋ, nyɛ̄m Mɛ̄lɛ̄ka̍ ndu̍ o̍o̍ tu̍l yɛ̄le̍ŋ tūl bɛ̄ndōo̍ wo̍ŋ, mbo̍ tɛ̄ɛ̄mbūū mu̍ŋ kpo̍u̍. O̍ ko̍ŋ kɔ̍ɔ̍lī, ma̍āŋ nda̍ a̍a̍ so̍lī sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ wa̍ o̍ la̍u̍ ba̍lu̍ chīɛ̍i̍ Mɛ̄lɛ̄ka̍a̍ wo̍ wo̍, mbo̍ mīŋgī ma̍āŋ kōŋ tāŋgūl.

⁹ Ndu̍yɛ̍ I̍sɔ̄lūɛ̍i̍ya̍ a̍ bɔ̍ɔ̍ bɔ̍ɔ̍, fūlāa̍ o̍ yu̍ŋgu̍ E̍fi̍lūēmndo̍ chōo̍, a̍ yu̍ŋgu̍ Mānāa̍sē wo̍, a̍ yu̍ŋgu̍ Si̍mīɔ̄ŋ ndo̍ mɛ̄ɛ̍ nda̍ chē māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ Māsāa̍ A̍sā kɔ̄ɔ̄lī, ma̍ fāŋa᷄ŋ I̍sɔ̄lūɛ̄ī, ma̍ hu᷄ŋ cha᷅l ndu̍ o̍ bā bɛ̄ŋgu̍. Mi̍ Māsāa̍ A̍sā o̍ chu̍u̍ŋgīāā wānāa̍ wa̍ o̍ būŋgɛ̄ī Chu̍dāve̍ ni᷄ŋ, a̍ o̍ būŋgɛ̄ī Bɛ̍ŋnja̍mīŋnde̍, ndu̍yɛ̍ a̍ wānāa̍ hu̍ŋ cha᷅l ndu̍ ha̍ā o̍ bɛ̄ŋgu̍ chōo̍ wa̍ nāa̍ pi᷅lɛ̍ kpo̍u̍.

¹⁰ Wɔ̄sī Māsāa̍ A̍sā o̍ chi̍ŋa̍ wɔ̄sīla̍ŋ tɔ̍ a̍ lā ŋūɛ̍ɛ̍nu̍ o̍ lēmāsā wo̍, pāŋgi̍i̍ ŋgāa̍ ndūɛ̍i̍ o̍ wɔ̄sī kōŋ ni᷄ŋ, o̍ chu̍u̍ŋgi̍a̍a̍ wāŋnda̍ ha̍ā kpo̍u̍ Chūlu̍sɛ̄lɛ̄m ni̍.

¹¹ O̍ pāa̍le̍ le̍ŋ chōo̍, chɔ̄lūāā wāŋnda̍ Chu̍dā a̍ kɔ̍ pu̍ŋgā o̍ chɔ̄ūwo̍ ma̍ hūŋ a̍ nda̍ wa̍, ma̍ sōlī nda̍ sa̍lāla̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍. Nāūwāā tōōyīa̍a̍ kɛ̄mɔ̄ɔ̍ lē ŋɔ᷄mmɛ̍ū (700), a̍ sāa̍ wāa̍la̍ŋ lā ŋɔ᷄mmɛ̍ū (7,000).

¹² O̍ ko̍ŋ kɔ̍ɔ̍lī, ma̍ yīī kpe̍ma̍a̍ a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍. Ma̍ chɛ̄la᷅ŋ le̍ mā wa̍ ndu̍ pīɛ̄īyo̍ a̍ kɔ̄ltā ndāla̍ŋ, ndu̍yɛ̍ a̍ yīya᷄ŋnda̍ ndāla̍ŋ kpo̍u̍.

¹³ Ndu̍yɛ̍, ma̍ chɛ̄la᷅ŋ māā wānā o̍ wāna̍ kɛ̍ɛ̍ le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ pīɛ̄īyo̍ pɛ̍, ō wa̍ ka̍a̍so̍ŋnɔ̍, ō wa̍ chu̍a̍a̍mbɔ̄ pɔ̄mbɔ̍, ɔ̄ɔ̄ ō wa̍ wa̍nā pɔ̍nɔ̍, ō wa̍ wa̍nā la̍nɔ̍, māā wānā ko̍ŋ ō nɔ̄ mbō sɔ̄la̍ pīɔ̍mndo̍.

¹⁴ Nda̍ kpo̍u̍ ma̍ dēŋī chōo̍ cho̍o̍ di̍ōm pīlɛ̍, ma̍ chūā būŋgɛ̄i̍ ī kālā ka̍lā, ma̍ mēna᷄ŋ Mɛ̄lɛ̄ka̍ Ya̍a̍wɛ̄ɛ̄ o̍ hɔ̄l. O̍ ko̍ŋ kɔ̍ɔ̍lī, ma̍ hɔ̄ŋ pūtɛ̍nɛ̍i̍la̍ŋ chōo̍ cho̍o̍ kpu̍ū bɛ̄ndū.

¹⁵ Wāŋnda̍ Chu̍dā kpo̍u̍ ma̍ dūāūnu᷄ŋ nya̍a̍le̍, le̍ kpe̍ma̍ nda̍ yīi̍ ko̍ŋ ma̍ mēna᷄ŋ a̍ kɔ̄ltā ndāla̍ŋ kpo̍u̍ wo̍. Ndu̍yɛ̍ nda̍ kpo̍u̍, ā wa̍ a̍ kɔ̄ltā kɛ̄ndɛ̄ le̍ Mɛ̄lɛ̄ka̍ Ya̍a̍wɛ̄ɛ̍ sōōlūūwo̍. Le̍ he̍ī, mi̍ Mɛ̄lɛ̄ka̍ chɛ̄l nda̍, mbo̍ tōsā mi̍ kɔ̄l nyūlū ō wā o̍ lɛ̄ŋndē ndāle̍ŋ ni᷄ŋ kpo̍u̍.

¹⁶ Māsā Bɛ̍ndōo̍ A̍sā, māma̍ ndɔ̄, ndu̍ yɔ̍nūŋ māā Ma̍a̍kāā ni̍, ndu̍ o̍o̍ nɔ̍ nyɛ̄ ndu̍ o̍o̍ to̍o̍si̍a̍a̍ vēla̍ŋ mɛ̄lɛ̄ka̍ ndɔ̄ɔ̍ A̍si̍ɛ̍lūā wo̍, ō Mɛ̄lɛ̄ka̍ ndu̍ o̍o̍ tu̍l yɛ̄le̍ŋ tūl bɛ̄ndōo̍ wo̍. Mi̍ Māsāa̍ A̍sā chu̍ā nyɛ̄ kōŋ mbo̍ kɔ̍ lo᷅m ndu̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Ki̍di̍lɔ̄ŋ. O̍ ko̍ŋ kɔ̍ɔ̍lī, mbo̍ fāŋā māma̍ ndɔ̄ ko̍ŋ o̍ fo̍ndāŋ ndu̍ o̍o̍ nɔ̍ māā kālāa̍ māsā bɛ̍ndōo̍ wo̍.

¹⁷ Mi̍ chē bɛ̍ɛ̍ māā fo̍ndāŋndā wāŋndā nda̍ a̍a̍ so̍o̍lūū mɛ̍lɛ̄ka̍ā ndāa̍ ka̍ŋ nda̍, A̍sā o̍ chi̍i̍ la̍ŋ tɛ̄ɛ̄mbūū kpo̍u̍ le̍ ni̍, kɛ̍ ndu̍yɛ̍ A̍sā o̍ fe̍ŋa̍ŋ o̍ tīīnda᷄ŋ o̍ dɔ̍ū o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ ndo̍ chōo̍ le̍. Mi̍ A̍sā lo̍ o̍ tīīnda᷄ŋ ndɔ̄ ko̍ŋ chōo̍ ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ.

¹⁸ Ndu̍yɛ̍, nyɛ̄ o̍ nyɛ̍ fi̍nyā ndɔ̄ A̍bi̍chā ndu̍ o̍o̍ yɔ̍ŋgu̍ le̍ wa̍li̍ Mɛ̄lɛ̄ka̍a̍, lātūlu̍ a̍ nyɛ̄m ndu̍ pi̍la̍ o̍ yɔ̍ŋgu̍ wo̍ŋ, nyɛ̄m lāāndo᷄ŋ ni̍, ka̍ni̍ŋ hu̍mbo̍ŋ ni̍, a̍ ko̍o̍līi̍yo̍ŋ, mbo̍ chūā mu̍ŋ kpo̍u̍, mbo̍ kūā a̍ mu̍ŋ o̍ chīɛ̍i̍ Mɛ̄lɛ̄ka̍a̍.

¹⁹ O̍ ko̍ŋ, mi̍ kɔ̄l nyūlōo̍ ō mīīŋgū o̍ lɛ̄ŋndē Chu̍dāle̍ŋ ni᷄ŋ. Ndu̍yɛ̍ chɔ̍ŋ ha̍a̍a̍ a̍ wɔ̄sīlā be̍le̍-ya̍a̍ a̍ lā ŋūɛ̍ɛ̍nu̍ A̍sā o̍ chi̍i̍ o̍ lēmāsā Chu̍dā la̍ŋ, chɔ̄ū o̍ chɔ̄ū chēle̍ŋ ō lūe̍i̍ lɛ̍ o̍ lɛ̄ŋndē Chu̍dāle̍ŋ ni᷄ŋ te̍.