Ko̍lo̍ni̍kō Di̍i̍ŋ Ndɔ̄ɔ̍ 14 - Yāu̍ Mɛ̄lɛ̄ka̍a̍

A̍ mɛ̄ɛ̍ Māsā Bɛ̍ndōo̍ A̍sā o̍ ye᷅m Īto̍o̍pīāāŋnda̍ yɛ̍ o̍kɔ̄ɔ̄

¹ O̍ ko̍ŋ, mi̍ Ābi̍chā o̍ wu᷅, ma̍ chɔ̄ ndu̍ o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ Chūlu̍sɛ̄lɛ̄m, o̍ chi̍e̍e̍ bɛ̍ndu̍ Dēēve̍ wo̍. O̍ ko̍ŋ kɔ̍ɔ̍lī, mi̍ A̍sā po̍ ndɔ̄ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍. Ndu̍yɛ̍ o̍ māsāle̍ A̍sāle̍ŋ bɛ̄ŋgu̍, mi̍ lɛ̄ŋndē Chu̍dāle̍ŋ lē sɔ̄lā kɔ̄l nyūlōo̍ le̍ wɔ̄sīla̍ŋ tɔ̍.

² Ndu̍yɛ̍, mi̍ A̍sā tōsā nyɛ̄ cho̍ sa̍kpō, ndu̍yɛ̍ mbo̍ wā ō kɛ̄ndɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ o̍ hɔ̄l lo̍.

³ Ma̍āŋndā chēle̍ŋndā nda̍ a̍a̍ so̍lī sa̍lāla̍ŋ lēchōo̍ la̍ŋ ki̍nɛ̍i̍, a̍ fo̍ndāŋndā nda̍ a̍a̍ so̍o̍lūū mɛ̄lɛ̄ka̍a̍ chēle̍ŋ nda̍ la̍ŋ, mbo̍ tɛ̄ɛ̄mbūū la̍ŋ kpo̍u̍. O̍ ko̍ŋ kɔ̍ɔ̍lī, nyɛ̍ nda̍ tūūla̍ māā vēla᷅ŋ Mɛ̄lɛ̄ka̍ ndāa̍ A̍si̍ɛ̍lūā wo̍, mbo̍ pēsī pēsī ndu̍ kpo̍u̍.

⁴ O̍ ko̍ŋ kɔ̍ɔ̍lī, mbo̍ dīmūl wāŋnda̍ Chu̍dā le̍ mā tōsa̍ nyɛ̍ hi̍nī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ kɔ̄llo̍ wo̍, ndu̍yɛ̍ mā tōsa̍ nyɛ̄ sāwāla̍ ndɔ̄la̍ŋ, a̍ pɛ̄ɛ̄kūlā ndɔ̄la̍ŋ lā dīmi̍ wo̍.

⁵ Chi̍e̍e̍ o̍ chi̍e̍e̍ wa̍ Chu̍dā, mbo̍ nɔ̄ fo̍ndāŋndā nda̍ a̍a̍ so̍o̍lūū mɛ̍lɛ̄ka̍a̍ chēle̍ŋ nda̍ lo̍ŋ nda̍ŋ, a̍ ma̍āŋndā nda̍ a̍a̍ lu̍ām nyɛ̄m chūŋ kɛ̄ndɔ᷄ŋ lēchōo̍ la̍ŋ, mbo̍ tɛ̄ɛ̄mbūū la̍ŋ kpo̍u̍. O̍ ko̍ŋ, mi̍ kɔ̄l nyūlōo̍ mīīŋgū o̍ Māsāle̍ ndɔ̄le̍ŋ bɛ̄ŋgu̍.

⁶ Te̍le̍ŋ kɔ̄l nyūlōo̍ wa̍ ko̍ŋ o̍ lɛ̄ŋnde̍ŋ ni᷄ŋ ndo̍, mi̍ Māsāa̍ A̍sā o̍ bɛ̍ɛ̍ndīāā chi̍o̍o̍ŋ bɛ̍ndo᷄ŋ ŋ̄ kālā ka̍lā o̍ lɛ̄ŋndē Chu̍dāle̍ŋ ni᷄ŋ kpo̍u̍. Ndu̍yɛ̍, wānā o̍ wānā nɔ̍la̍ lɛ̍ mbō sīmu̍l ndu̍ o̍ wɔ̄sīŋ mu᷅ŋ ni᷄ŋ te̍, kāni̍ fu̍u̍le̍, mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ kɔ̄l nyūlōo̍ ō wa̍ o̍ lɛ̄ŋndē lēŋ ni᷄ŋ.

⁷ Mbo̍ dīmūl wāŋnda̍ Chu̍dā āā, “Lā ŋ̄ bɛ̄ɛ̄ndi̍a̍a̍ chi̍o̍o̍ŋ mu᷅ŋ ŋ̄ kālā ka̍lā. Ŋ̄ bālu̍ŋ mu̍ŋ a̍ sāāsāla̍ŋ, mī ŋ̄ tāŋgu̍l fo̍ndāŋndā vīlɛ̄īla̍ŋ le̍ wānāā mɛ̄ŋgɛ̄lāa̍ cha᷄lle̍, ndu̍yɛ̍ mī ŋ̄ dɔ̄ɔ̄nūŋ dīōla̍ŋ o̍ sāāsāla̍ŋ nda᷅ŋ le̍ la̍ŋ kīīndīa̍a̍ a̍ yɔ̄mīī vīlɛ̄īye̍. Lɛ̄ŋnde̍ŋ lē chō ni᷅ŋ na̍a̍ o̍ bā bɛ̄ŋgu̍, kāni̍ fo̍ndōle̍, le̍ mɛ̄ɛ̍ na̍a̍ ŋ̄ tōsa̍ nyɛ᷄ hi̍nī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ kɔ̄llo̍ wo̍ yɛ̍. Mɛ̄lɛ̄ka̍ mānda̍ na̍a̍ o̍ īsɔ̄ɔ̍ o̍ īsɔ̄ɔ̍ ni̍ŋ, ndu̍yɛ̍ mbo̍ tōsā mī ŋ̄ wānu᷄ŋ o̍ bā nāa̍ chōo̍ yɛ̍lɛ̍kɛ̍lɛ̍ɛ̍.” O̍ ko̍ŋ, ma̍ bɛ̄ɛ̄ndīāā chi̍o̍o̍ŋ mu᷅ŋ ŋ̄ kālā ka̍lā, ndu̍yɛ̍ mi̍ nyɛ̄ o̍ nyɛ̄ wā ō kɛ̄ndɛ̄ a̍ nda̍.

⁸ Ndu̍yɛ̍ Māsā Bɛ̍ndōo̍ A̍sā ndu̍ o̍o̍ nɔ̍ so̍vɛ̄i̍ya̍ wāa̍la̍ŋ kɛ̄mɔ̄ɔ̍ lēyāa̍ (300,000), fūlāa̍ o̍ yu̍ŋgu̍ Chu̍dā wo̍ chōo̍, ā nda̍ a̍a̍ nɔ̍ nyɛ̄la̍ so̍vɛ̄i̍ya̍ ā bīī o̍ lābā māā bo̍o̍la̍ bɛ̍ndū le̍ nda̍ māndāa̍, ndu̍yɛ̍ ma̍ nɔ̄ vɛ̄lɛ̄ ba̍lta̍ŋ nda̍. O̍ ko̍ŋ kɔ̍ɔ̍lī, ndu̍ o̍o̍ nɔ̍ vɛ̄lɛ̄ so̍vɛ̄i̍ya̍ wāa̍la̍ŋ kɛ̄mɔ̄ɔ̍ lēdīi̍ŋ a̍ be̍le̍-ŋɔ̍ma̍a̍ (280,000), fūlāa̍ o̍ yu̍ŋgu̍ Bɛ̍ŋnja̍mīŋndo̍ chōo̍. Nda̍ bɛ̍ɛ̍ nda̍ a̍a̍ nɔ̍ nyɛ̄lā so̍vɛ̄i̍ya̍ ā bīī o̍ lābā le̍ nda̍ māndāa̍ la̍ŋ, a̍ chīɔ̄ūla̍ŋ. Ndu̍yɛ̍ nda̍ kpo̍u̍ pūa̍a̍ nda̍ a̍a̍ nɔ̍ kpāāyāa̍, ndu̍yɛ̍ ma̍ nɔ̄ kɔ̄l sīmūlāa̍ le̍ sɔ̍ŋgɔ̄ɔ̍ wa̍ nda̍ wa̍ ni̍.

⁹ Po̍ pi᷅lɛ̍ wa̍ dīōla̍ŋ āā Sɛ̍lūā, wānā wa̍ā Īto̍o̍pīāā. Ō wa᷄ a̍ te̍le̍ŋ pi᷅lɛ̍, mi̍ pōo̍ ho̍ō ō chūā so̍vɛ̄i̍ya̍a̍ ndūa̍a̍ mi̍i̍līɔ̄ŋndo̍ ō pīlɛ̍, lātūlu̍ a̍ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ, kɛ̄mɔ̄ɔ̍ lēyāa̍ (300), mbo̍ hūŋ le̍ wāŋnda̍ Chu̍dā chīŋa̍la᷅ŋndo̍ ā sɔ̍ŋgɔ̄ɔ̍, mbo̍ hūŋ ha̍a̍a̍ mbo̍ fūūlūū Ma̍lu̍ɛ̍sīā chi̍e̍e̍.

¹⁰ O̍ ko̍ŋ kɔ̍ɔ̍lī, mi̍ A̍sā, Māsāa̍ Chu̍dā, ndu̍ bɛ̍ɛ̍ mbo̍ chūā so̍vɛ̄i̍ya̍a̍ ndūa̍a̍ mbo̍ ku̍ā le̍ mbo̍ sɔ̄ŋga̍ a̍ ndu̍. Ma̍ bɔ̄ŋa᷅ŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Sɛ̄fa̍tāā, Mālu̍ɛ̍sīāā īkɛ̄i̍, ma̍ sīmu̍la᷅ŋ vēllāa̍ vēllē le̍ sɔ̍ŋgɔ̄ɔ̍.

¹¹ O̍ ko̍ŋ, mi̍ A̍sā pi̍ɛ̍ī Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, wānā o̍ wānā cho̍ māā nūm, mbō māla̍ wa̍nāa̍ nɔ̍ kpa̍a̍yā le̍ wa̍, mbō pīŋi̍ nda̍ wānāā kpāāyāā bɛ̄ndūa̍a̍ o̍ bā le̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, nūm na̍a̍ ŋ̄ tīīnda̍ŋ ni̍, le̍la̍ŋ ma̍la̍ na̍a̍. Ndu̍yɛ̍ o̍ dīōlā nūmnda̍ŋ ni᷄ŋ na̍a̍ ŋ̄ hīŋ ni̍, le̍ mī ŋ̄ sɔ̄ŋga̍ a̍ so̍vɛ̄i̍ya̍a̍ cho̍ ha̍ā sɛ̍lɛ̍ bɛ̍ndōo̍ wa̍. O̍o̍ Mɛ̄lɛ̄ka̍ Ya̍a̍wɛ̄ɛ̄, nu̍m cho̍ Mɛ̄lɛ̄ka̍ nāa̍ ni̍. Chɛ᷅l mī wāna̍ chi̍o̍o̍ ō yēm nu̍m te̍.”

¹² O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ya᷅m wāŋnda̍ Īto̍o̍pīāā, a̍ wa̍ sɔ̍ŋgɔ̄ɔ̍ a̍ A̍sā, a̍ wāŋnda̍ Chu̍dā wa̍. Mi̍ wāŋnda̍ Īto̍o̍pīāā a̍ nya̍a̍nu᷄ŋ.

¹³ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ A̍sā nda̍ so̍vɛ̄i̍ya̍a̍ ndūa̍a̍ ā tīsā nda̍ kɔ̄ɔ̄lī, ma̍ lō nda̍ tōūwɔ̄ɔ̍ ma̍ fūūlūū a̍ nda̍ Kɛ̍lūā di̍. Ndu̍yɛ̍ ma̍ yām wāŋnda̍ Īto̍o̍pīāā ma̍ dīū nda̍ kpo̍u̍, ō pīlɛ̍ bɛ̍ɛ̍ ā mɛ̄i̍ yo̍o̍mū le̍. Mɛ̄ɛ̍ nu̍a̍ā Mɛ̄lɛ̄ka̍ Ya̍a̍wɛ̄ɛ̄ pi̍la̍ nda̍ so̍vɛ̄i̍ya̍a̍ ndūa̍a̍ ā yām wāŋnda̍ Īto̍o̍pīāā ni̍. Ndu̍yɛ̍ mi̍ pūa̍a̍ Chu̍dā a̍ pu̍ŋgā nyɛ̄m wāŋnda̍ Īto̍o̍pīāā ta̍u̍ ta̍u̍, ma̍ kūānu᷄ŋ a̍ mu̍ŋ.

¹⁴ O̍ ko̍ŋ kɔ̍ɔ̍lī, chi̍e̍e̍ŋ bɛ̍ndu᷄ŋ wa̍ Kɛ̍lūā ŋ̄ bālāā wo̍ŋ kpo̍u̍, mi̍ wāŋnda̍ Chu̍dā a̍ tɛ̍ɛ̍mbūū mu̍ŋ. Kāni̍ fo̍ndōle̍, wānā o̍ wāna̍ wa̍ o̍ chi̍e̍e̍ŋ mu̍ŋ, mi̍ sīōōŋīī bɛ̄ndūe̍i̍ bīī nda̍ a̍ Mɛ̄lɛ̄ka̍ Ya̍a̍wɛ̄ɛ̄. Ndu̍yɛ̍ chi̍o̍o̍ŋ mu᷅ŋ nyɔ̄ɔ̍ŋ wa̍ ŋ̄ pīāā lēni᷄ŋ cha̍ cha̍. Mi̍ so̍vɛ̄i̍ya̍ Chu̍dā a̍ pu̍ŋgā nyɛ̄m mu᷅ŋ kpo̍u̍ ma̍ kūānu᷄ŋ a̍ mu̍ŋ.

¹⁵ O̍ ko̍ŋ kɔ̍ɔ̍lī, mi̍ so̍vɛ̄i̍ya̍ Chu̍dā a̍ kɔ̍ de᷅l vɛ̄lɛ̄ fo̍ndāŋndā wānāā māndāā lāchɔ̄lūa̍a̍ lā pūm chōo̍, ndu̍yɛ̍ ma̍ bīū sāa̍ ndāa̍, a̍ nyɔ̍mi̍a̍a̍ ndāa̍ ta̍u̍ ta̍u̍, ma̍ mīīŋgu᷄ŋ Chūlu̍sɛ̄lɛ̄m.