Ko̍lo̍ni̍kō Di̍i̍ŋ Ndɔ̄ɔ̍ 13 - Yāu̍ Mɛ̄lɛ̄ka̍a̍

A̍ sɔ̍ŋgɔ̍ yɔ̍nu̍ŋ A̍bi̍chā tɛ̄ɛ̄ŋ nda̍ Chɛ̄lōbo̍wām ndo̍ o̍kɔ̄ɔ̄

¹ O̍ ko̍ŋ kɔ̍ɔ̍lī, wɔ̄sī Māsā Bɛ̍ndōo̍ Chɛ̄lōbo̍wām o̍ chi̍ŋa̍ wɔ̄sīla̍ŋ tɔ̍ a̍ lā ŋɔ̄ma̍a̍ o̍ lēmāsā I̍sɔ̄lūɛ̄ī yo̍, wɔ̄sī kōŋ Ābi̍chā si̍mnu᷄ŋ māsā bɛ̍ndōo̍ Chu̍dā ni̍.

² Ndu̍yɛ̍, mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ lā yāa̍. Ābi̍chā ko̍ŋ yɛ̄, kāla̍ ndɔ̍ wa̍ Māka̍yā, chūa̍ Yu̍līɛ̄ɛ̄l wo̍ ni̍, wānā wa̍ā Ki̍bīāā. Mɛ̄ɛ̍ te̍le̍ŋ ti̍ŋ ō hīōū, mi̍ chɔ̄ūwo̍ kīōlū Ābi̍chā tɛ̄ɛ̄ŋ nda̍ Chɛ̄lōbo̍wām.

³ Mɛ̄ɛ̍ Ābi̍chā wa̍ kɔ̄la̍ŋ le̍ sɔ̍ŋgɔ̄ɔ̍ a̍ Chɛ̄lōbo̍wām, mbo̍ kūā a̍ so̍vɛ̄i̍ya̍a̍ cha̍ā sɔ̍ŋgɔ̄ɔ̍ chāā bɛ̄ndōo̍ wa̍ wāa̍la̍ŋ kɛ̄mɔ̄ɔ̍ lē hīɔ̍ɔ̍lu̍ (400,000). O̍ ko̍ŋ, Chɛ̄lōbo̍wām bɛ̍ɛ̍, mbo̍ hɛ̍lī ku̍u̍ba̍a̍ ndūa̍a̍ sɔ̍ŋgā sɔ̍ŋgɔ̄ bɛ̄ndōo̍ wa̍ wāa̍la̍ŋ kɛ̄mɔ̄ɔ̍ lē ŋɔ̄ma̍a̍ (800,000), le̍ mbo̍ kɔ̍ si̍mūl Ābi̍chā a̍ sɔ̍ŋgɔ̄ɔ̍.

⁴ O̍ ko̍ŋ kɔ̍ɔ̍lī, mi̍ Ābi̍chā kɔ̍ si̍m o̍ Pēmbīī Sɛ̍ma̍lūēmnde̍ chōo̍, o̍ lɛ̄ŋndē īpēmbūle̍ŋ E̍fi̍lūēm, mbo̍ dīmī āā, “Lā ya̍ŋ ya̍ nīla̍ŋ, nūm Māsāa̍ Chɛ̄lōbo̍wām nya̍ I̍sɔ̄lūɛ̍i̍ya̍ kpo̍u̍.

⁵ Lā sīna̍ nu̍a̍ā māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ ō chūa̍ māsāle̍ŋ I̍sɔ̄lūɛ̄ī mbo̍ kē Dēēve̍ a̍ wānāa̍ fu̍la̍ o̍ pūlālē ndɔ̄le̍ŋ chōo̍ wa̍, sa̍na̍a̍ a̍ kpe̍ma̍ fɛ̍ɛ̍ŋ fɛ̍ɛ̍ŋ o̍ yi̍i̍ a̍ Dēēve̍ wo̍ le̍?

⁶ Kɛ̍ nūm Chɛ̄lōbo̍wām, po̍ Ne̍ba̍tī wo̍, a̍ wa̍ bu̍ɛ̍ī Sɔ̍lɔ̍mɔ̄ŋ ndo̍ ō pīlɛ̍, po̍ Dēēve̍ wo̍, kɛ̍ ma̍ sīmūl māsānɔ̍ nu̍mndo̍, ndu̍ yɔ̍nūŋ māā Sɔ̍lɔ̍mɔ̄ŋ ni̍.

⁷ Mɛ̄ɛ̍ Lūēhōbo̍wām po̍ Sɔ̍lɔ̍mɔ̄ŋ ndo̍ ō sīmnu᷄ŋ Ma̍sāa̍ a̍ te̍le̍ŋ ko̍ŋ, mi̍ nūm Chɛ̄lōbo̍wām chu̍ā pūa̍a̍ fo̍ndō fo̍ndūa̍a̍, mi̍ lā sīmūl Lūēhōbo̍wām, po̍ Sɔ̍lɔ̍mɔ̄ŋ ndo̍. Kāni̍ fu̍u̍le̍, Lūēhōbo̍wām wa̍ wɔ̄ chūāāmbɔ̄ pīāāndū, ndu̍ o̍o̍ nɔ̍ wɔ̍ ta̍āsi̍ mɛ̄ɛ̍ ndu̍ o̍o̍ to̍sā mbō kpāa̍ nya̍ yɛ̍ le̍.

⁸ Ō cho̍ bɛ̍ɛ̍ ko̍ ke̍ŋ te̍, kɛ̍ ma̍ kɛ̍ɛ̍si̍a̍a̍ vɛ̄lɛ̄ le̍ mā si̍mu̍l Māsāle̍ Mɛ̄lɛ̄ka̍ Ya̍a̍wɛ̄ɛ̄ le̍ŋ a̍ sɔ̍ŋgɔ̄ɔ̍, le̍ cho̍ le᷅ŋ wānāa̍ fu̍la̍ o̍ pūlāle̍ De̍e̍ve̍le̍ŋ chōo̍ wa̍ o̍ bā le̍ŋ, le̍ mɛ̄ɛ̍ ŋ̄ nɔ̄ so̍vɛ̄i̍ya̍ ku̍ndā bɛ̄ndū bɛ̍ndōo̍, ndu̍yɛ̍ ma̍ nɔ̄ nāūwāā ŋ̄ko̍o̍līi̍ nūm Chɛ̄lōbo̍wām to̍o̍si̍a̍a̍ ma̍ sīīŋgūū nda̍ māā mɛ̄lɛ̄ka̍ā nūm nda̍ yɛ̍.

⁹ Ma̍ lō o̍ ko̍ŋ, ma̍ tūāū wānāā sōlīāā lāsa̍lāa̍ Mɛ̄lɛ̄ka̍ Ya̍a̍wɛ̄ɛ̄ wa̍, nda̍ yɔ̍nūŋ ni̍ māā wānāa̍ fu̍la̍ o̍ pūlāle̍ E̍lɔ̄ŋnde̍ŋ chōo̍ wa̍. Ndu̍yɛ̍, ma̍ tūāū vɛ̄lɛ̄ Līva̍īya̍. O̍ ko̍ŋ, mi̍ nūm pi̍la̍ chu̍ā wānāā chēle̍ŋ ma̍ sīīŋgūū nda̍ wānāā sōlīāā lāsa̍la̍, mɛ̄ɛ̍ wāŋnda̍ o̍ lɛ̄ŋīī chēle̍ŋ nde̍ ni᷄ŋ a̍ to̍sā yɛ̍. Ndu̍yɛ̍, wānā o̍ wānā ndu̍ o̍o̍ hīŋ pɛ̍ a̍ nāū tōōyōo̍, ɔ̄ɔ̄ sāā ko̍ndu̍a̍a̍ ā ŋɔ᷄mmɛ̍ū, nāa̍ nūm chu̍a̍, le̍ mbō sīmnu᷄ŋ wa̍nā so̍līāā lāsa̍lāa̍, a̍ di̍ndi̍ ndu̍ bɛ̍ɛ̍, ō sīmnu᷄ŋ wa̍nā so̍līāā lāsa̍lāa̍ o̍ mɛ̄lɛ̄ka̍ā nūm a̍ ka̍ŋ ndo̍.

¹⁰ “Kɛ̍ na̍a̍ na̍a̍, Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ Mɛ̄lɛ̄ka̍ nāa̍ ni̍. Ndu̍yɛ̍ ŋ̄ me᷅l ndu̍ le̍. Wānāa̍ fu̍la̍ o̍ pūlāle̍ E̍lɔ̄ŋnde̍ŋ chōo̍, ma̍ wā Mɛ̄lɛ̄ka̍ Ya̍a̍wɛ̄ɛ̄ sāāŋgīāllo̍ wa̍, nda̍ cho̍ wānāā nāā sōlīāā lāsa̍lāa̍ ni̍, ndu̍yɛ̍ mī Līva̍īya̍ ā mālā nda̍ o̍ wa̍li̍ ndāa̍ ni᷄ŋ.

¹¹ Īdīi̍ ni̍, īchɔ̄l ni̍, nda̍ so̍lī sa̍lālā lūāmāāla̍ŋ, a̍ sa̍lālā nyɛ̄m chūŋ kɛ̄ndɛ̄ la̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ ni̍. O̍ ko̍ŋ kɔ̍ɔ̍lī, mā kɛ̄sī bēe̍ndīi̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍ o̍ ti̍bīi̍ īko̍o̍līi̍ chōo̍. Ndu̍yɛ̍ īchɔ̄l o̍ īchɔ̄l, mā mɛ̄ndūl la̍mūi̍la̍ cho̍ lā kɛ̄sīāā o̍ nyɛ̄lā ŋ̄ko̍o̍līi̍la̍ kɛ̄sīāā la̍mūi̍la̍ŋ chōo̍ la̍ŋ. Ndu̍yɛ̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō dīmūl na̍a̍ le̍ tōsāa̍, mi̍ ŋ̄ wā ndu̍ tōsāa̍. Kɛ̍ nya̍ nya̍, mi̍ lā māl Mɛ̄lɛ̄ka̍.

¹² Na̍a̍ na̍a̍, Mɛ̄lɛ̄ka̍ chō a̍ na̍a̍ lātūlu̍, ndu̍ cho̍ na̍a̍ māsāa̍ chōo̍ ni̍. Ndu̍yɛ̍ wānāā ndūāā so̍līāā lāsa̍lāa̍ a̍ chō pūtɛ̍nɛ̍i̍la̍ chɔ̄ūla̍ŋ hɔ̄ŋ le̍ sɔ̍ŋgɔ̄ɔ̍ a̍ nya̍. Wāŋnda̍ I̍sɔ̄lūɛ̄ī, lā sɔ̍ŋgā a̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nyāā ma̍māa̍ le̍, kāni̍ fo̍ndōle̍, lā nɔ̍lā ndu̍ yōmɔ̄ɔ̄ le̍.”

¹³ A̍ te̍le̍ŋ Ābi̍chā wa̍ sūɛ̍i̍ yo̍, mi̍ Chɛ̄lōbo̍wām vi̍ām so̍vɛ̄i̍ya̍a̍ ndūa̍a̍ ā ti᷄ŋ, ma̍ kēēkū so̍vɛ̄i̍ya̍ Chu̍dā a̍ mākɔ̄ɔ̄ ma̍ kɔ̍ vi̍ŋi᷄ŋ. O̍ ko̍ŋ kɔ̍ɔ̍lī, mi̍ pūa̍a̍ Chɛ̄lōbo̍wām nda̍ ā tūa̍a̍, ā fūlā so̍vɛ̄i̍ya̍ Chu̍dā o̍ hɔ̄l le̍ nda̍ chīŋa̍la᷅ŋ ndo̍.

¹⁴ Mɛ̄ɛ̍ pūa̍a̍ Chu̍dā a̍ mu̍li̍ŋ, ma̍ sīnā māā ā dɔ̄ū nda̍ o̍ pi̍ŋndo̍ ni᷄ŋ, le̍ nda̍ chīŋa̍la᷅ŋ ndo̍. O̍ ko̍ŋ, ma̍ kōŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, le̍ mbō māla̍ nda̍. Mi̍ wānāā sōlīāā lāsa̍lāa̍ ā hūāŋ pūtɛ̍nɛ̍i̍la̍ŋ.

¹⁵ O̍ ko̍ŋ, mi̍ so̍vɛ̄i̍ya̍ Chu̍dā a̍ de̍ŋī dēŋī chɔ̄ūwo̍. Ndu̍yɛ̍ mɛ̄ɛ̍ nda̍ dēŋi̍ le̍nde̍, mi̍ Mɛ̄lɛ̄ka̍ ndāa̍ yām Chɛ̄lōbo̍wām nda̍ so̍vɛ̄i̍ya̍ I̍sɔ̄lūɛ̄ī, a̍ wa̍ sɔ̍ŋgɔ̄ɔ̍ a̍ Ābi̍chā a̍ pūa̍a̍ Chu̍dā wa̍.

¹⁶ Ndu̍yɛ̍, mi̍ so̍vɛ̄i̍ya̍ I̍sɔ̄lūɛ̄ī a̍ nya̍a̍nu᷄ŋ so̍vɛ̄i̍ya̍ Chu̍dā. Kɛ̍, mi̍ Mɛ̄lɛ̄ka̍ māl nda̍ so̍vɛ̄i̍ya̍ Chu̍dā o̍ bā, ma̍ ya᷅m nda̍.

¹⁷ O̍ ko̍ŋ, mi̍ Ābi̍chā nda̍ so̍vɛ̄i̍ya̍ Chu̍dā ā dīū nda̍ dīū wo̍ pīla̍. So̍vɛ̄i̍ya̍ I̍sɔ̄lūɛ̄ī ā nda̍ dīu̍ wa̍, ā wa̍ wāa̍la̍ŋ kɛ̄mɔ̄ɔ̍ lē ŋūɛ̍ɛ̍nu̍ (500,000).

¹⁸ Mɛ̄ɛ̍ nu̍a̍ā, nda̍ lōōku̍ so̍vɛ̄i̍ya̍ I̍sɔ̄lūɛ̄ī yōmɔ̄ɔ̍ a̍ te̍le̍ŋ ko̍ŋ ni̍. Mi̍ so̍vɛ̄i̍ya̍ Chu̍dā a̍ sɔ̍lā kpāāyāa̍, ma̍ yām pūa̍a̍ I̍sɔ̄lūɛ̄ī, kāni̍ fo̍ndōle̍, le̍ mɛ̄ɛ̍ pūa̍a̍ Chu̍dā a̍ dɔ̍ū tīīnda᷄ŋ ndāa̍ o̍ Mɛ̄lɛ̄ka̍ Ya̍a̍wɛ̄ɛ̄ ni᷄ŋ, Mɛ̄lɛ̄ka̍ fi̍nyāa̍ ndāā ma̍māa̍ yɛ̍.

¹⁹ Mi̍ Ābi̍chā nda̍ so̍vɛ̄i̍ya̍a̍ ndūa̍a̍, ā tīsā Chɛ̄lōbo̍wām kɔ̄ɔ̄lī, ma̍ bīī nda̍ chi̍o̍o̍ŋ bɛ̍ndo᷄ŋ o̍ bā, mu̍ŋ yɔ̍nūŋ ni̍ māā Bɛ̍tɛ̄ɛ̄l, a̍ Chɛ̄si̍a̍nāā, a̍ Ɛ̍fi̍lɔ̄ŋ, lātūlu̍ a̍ sɔ̄ndɔ̄kɔ̍ltā ba̍lu̍ mu̍ŋ nda̍ŋ.

²⁰ Chɛ̄lōbo̍wām o̍ ti̍u̍ lɛ̍ ba̍ mbō sɔ̄la̍ kpāāya̍ ndɔ̍ lēmāsāa̍ māā pāāndū le̍, ha̍a̍a̍ a̍ te̍le̍ŋ Ābi̍chā o̍ wa̍ māsā wo̍. Ndu̍yɛ̍ o̍ mɛ̄ɛ̄lu̍la̍ŋ kpɔ̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ tu̍sī ndu̍ dɛ̍nɛ̍ pa̍lāa̍ chōo̍, mbo̍ wū.

²¹ Kɛ̍ mi̍ Ābi̍chā o̍ chɔ̍ɔ̍lū kpāāyāa̍ sɔ̄lā ta̍u̍ ta̍u̍. Ndu̍yɛ̍, mbo̍ pūū lāāndūa̍a̍ tɔ̍ a̍ ā hīɔ̍ɔ̍lu̍. Mbo̍ vīālū pūa̍a̍ ŋ̄wāŋ bi̍dīi̍ŋ a̍ ā ŋīɔ̍ɔ̍ŋ, a̍ wāŋ lāāndūa̍a̍ tɔ̍ a̍ ā ŋɔ᷄mpu᷅m.

²² Sɔ̄ɔ̍ŋ tɔ᷅ŋ chēle̍ŋ yɔ̄nu᷄ŋ o̍ māsāle̍ Ābi̍chāle̍ŋ bɛ̄ŋgu̍ wo̍ŋ ki̍nɛ̍i̍, ndu̍yɛ̍ a̍ nyɛ̄ o̍ nyɛ̄ o̍ to̍sa̍ o̍ māsāle̍ ndɔ̄le̍ŋ ni᷄ŋ, ŋ̄ chō ŋ̄ pōōnyīāā o̍ yāu̍ sɔ̄ɔ̍ŋ pa̍a̍ndu̍ cho̍ a̍ wāna̍ su̍a̍ā le̍ Mɛ̄lɛ̄ka̍ wo̍, I̍dɔ̄ɔ̄ o̍kɔ̄ɔ̄ wo̍ŋ ni᷄ŋ.