Ko̍lo̍ni̍kō Di̍i̍ŋ Ndɔ̄ɔ̍ 12 - Yāu̍ Mɛ̄lɛ̄ka̍a̍

Wāŋnda̍ I̍chi̍pī a̍ kɔ̍ de᷅l lɛ̄ŋndē Chu̍dāle̍ŋ chōo̍ a̍ sɔ̍ŋgɔ̄ɔ̍

¹ Dīmīo̍o̍ nu̍a̍ā mi̍ Lūēhōbo̍wām o̍ si̍mnu᷄ŋ ma̍sāa̍ Chūlu̍sɛ̄lɛ̄m, ndu̍yɛ̍ mi̍ māsāle̍ ndɔ̄le̍ŋ lē sɔ̄lā kpāāyāa̍, ndu̍ ni̍, a̍ I̍sɔ̄lūɛ̍i̍ya̍a̍ wa̍ ndu̍ kɔ̄ɔ̄lī wa̍ kpo̍u̍ ma̍ māl sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ.

² Le̍ mɛ̄ɛ̍ Māsāa̍ Lūēhōbo̍wām o̍ kɛ̍ɛ̍ wāa̍ sa̍kpō a̍ Mɛ̄lɛ̄ka̍ Ya̍a̍wɛ̄ɛ̄ yɛ̍, mi̍ dɛ̍nɛ̍ pa̍lāa̍ tūāl ndu̍ chōo̍. Wɔ̄sī o̍ chi̍ŋa̍ wɔ̄sīla̍ŋ lā ŋūɛ̍ɛ̍nu̍ o̍ lēmāsā wo̍, mi̍ Māsā Bɛ̍ndōo̍ Si̍sa̍kī, ho̍ō I̍chi̍pī ō kɔ̍ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍.

³ Mɛ̄ɛ̍ Māsā Bɛ̍ndōo̍ Si̍sa̍kī o̍ wa̍ kɔ̄la̍ŋ le̍ Chūlu̍sɛ̄lɛ̄m dēlɔ̄ɔ̍ chōo̍, mbo̍ kūā a̍ nyɛ̄lā chɔ̄ūlā su̍a̍a̍ ā nāŋ nda̍ŋ wāa̍ ō pi᷅lɛ̍ a̍ kɛ̄mɔ̄ɔ̍ lēdīi̍ŋ (1,200), la̍tūlu̍ a̍ so̍vɛ̄i̍ya̍, a̍ sɔ̍ŋgā o̍ su̍a̍a̍ chōo̍ wa̍, wāa̍la̍ŋ be̍le̍-ŋɔ̍mpu᷅m (60,000). Ō fu̍la̍ o̍ ka̍ŋ kɔ̍ɔ̍lī, mbo̍ kūā vɛ̄lɛ̄ a̍ so̍vɛ̄i̍ya̍a̍ chēle̍ŋ, fūlāa̍ o̍ lɛ̄ŋndē Li̍bīāāle̍ŋ ni᷄ŋ, a̍ lɛ̄ŋndē Su̍ki̍tīle̍ŋ, a̍ o̍ lɛ̄ŋndē Īto̍o̍pīāāle̍ŋ ni᷄ŋ. So̍vɛ̄i̍ya̍a̍ o̍ ku̍ɛ̄ kɔ̄ɔ̄lī wa̍, ā wa̍ ha̍a̍a̍ nda̍ a̍a̍ chu̍ū chɔ᷅m te̍.

⁴ Mɛ̄ɛ̍ o̍ wa̍ Chūlu̍sɛ̄lɛ̄m kɔ̄la̍ŋ chīŋa̍la᷅ŋndo̍, mbo̍ kēī chi̍e̍e̍ŋ bɛ̍ndu᷄ŋ wa̍ Chu̍dā ŋ̄ bɛ̄ɛ̄ndīāā ŋ̄ kālā ka̍lā wo̍ŋ dēlɔ̄ɔ̍ chōo̍, ma̍lāŋ o̍ kɔ̍ chi᷅ŋa̍la᷅ŋ Chūlu̍sɛ̄lɛ̄m.

⁵ O̍ ko̍ŋ kɔ̍ɔ̍lī, mi̍ Sīɛ̄ma̍yā wāna̍ su̍a̍ā le̍ Mɛ̄lɛ̄ka̍ wo̍ ō kūā nāa̍ Lūēhōbo̍wām chu̍a̍, a̍ wānāā bɛ̍ndūa̍a̍ Chu̍dā, ā nda̍ a̍a̍ nya̍a̍nu̍ŋ Ma̍sā Bɛ̍ndōo̍ Si̍sa̍kī, ma̍ wā o̍ vīōŋnɔ᷄ŋndo̍ ni᷄ŋ Chūlu̍sɛ̄lɛ̄m nda̍. Mbo̍ dīmūl nda̍ āā, “Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, ‘Le̍ mɛ̄ɛ̍ nya̍ ma᷅l la̍ yɛ̄, le̍la̍ŋ ya̍ I̍ ma̍l nya̍ Māsāa̍ Si̍sa̍kī o̍ bā ni̍.’ ”

⁶ O̍ ko̍ŋ, mi̍ Māsā Bɛ̍ndōo̍ Lūēhōbo̍wām, ā wānāā bɛ̄ndūa̍a̍ I̍sɔ̄lūɛ̄ī kpo̍u̍, ma̍ tu̍si᷄ŋ, ma̍ chɛ̄l ndi̍ a̍ tōnya̍ māā ā tōsa̍ yɔ̄ŋ wɔ̄ɔ̍ŋndo̍. Ma̍ dīmī āā, “Mɛ̄lɛ̄ka̍ Ya̍a̍wɛ̄ɛ̄ nɔ̍ di̍ mbō tōsa̍ le̍nde̍.”

⁷ Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ che᷅ māā ā tūsi̍ŋ, mbo̍ dīmūl Sīɛ̄ma̍yā āā, “Le̍ mɛ̄ɛ̄ wāŋnda̍ ha̍ā ā chɛ᷄l māā ā tōsa̍ yɔ̄ŋ wɔ̄ɔ̍ŋndo̍ yɛ̍, I̍ cho̍ lɛ̍ nda̍ tɛ̄ɛ̄mbūū le̍. Mi̍ chē bɛ̍ɛ̍ mi̍ Māsāa̍ Si̍sa̍kī o̍ hu̍ŋ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍ ni̍, kɛ̍ I̍ cho̍ chɛ̍lɔ̄ɔ̄ mī Chūlu̍sɛ̄lɛ̄m o̍ ta̍mbu̍ kpo̍u̍ le̍. I̍ do̍o̍nūŋ ndɛ̍ tu̍mbe̍ a̍ nda̍ o̍ ka̍lā ka̍lā, mī I̍ tu̍si̍ Chūlu̍sɛ̄lɛ̄m nyɛ̄ pālāa̍ chōo̍ le̍.

⁸ Kɛ̍ ndu̍yɛ̍, ā chō wā Māsāa̍ Si̍sa̍kī o̍ bā bɛ̄ŋgu̍, le̍ mā sīna̍ yɛ̍ yɔ̍ɔ̍ le̍ wāa̍ o̍ māsāle̍ wāna̍ chi̍o̍o̍ bɛ̄ŋgu̍, a̍ wāa̍ o̍ māsāle̍ nīle̍ŋ bɛ̄ŋgu̍.”

⁹ Ndu̍yɛ̍, te̍le̍ŋ Māsā Bɛ̍ndōo̍ Si̍sa̍kī, ho̍ō I̍chi̍pī o̍ kɔ̍ de᷅l ko̍ŋ Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍ wo̍, nyɛ̄ o̍ nyɛ̄ ba̍ā kālā wa̍ ō kɛ̄sīāā o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ, a̍ o̍ chīɛ̄ī lēmāsāa̍ ni᷄ŋ, mbo̍ chūā mu̍ŋ kpo̍u̍ mbo̍ kūānu᷄ŋ a̍ mu̍ŋ. Nyɛ̄lā kālā ka̍lā lā so̍vɛ̄i̍ya̍ ā bīī o̍ lābā le̍ nda̍ māndāa̍ la̍ŋ, lā Sɔ̍lɔ̍mɔ̄ŋ ndu̍ o̍o̍ to̍o̍sīāā a̍ ko̍o̍līi̍yo̍ŋ nda̍ŋ bɛ̍ɛ̍, mbo̍ chūā la̍ŋ kpo̍u̍ mbo̍ kūānu᷄ŋ a̍ la̍ŋ.

¹⁰ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Lūēhōbo̍wām o̍ mi̍ŋgī lā chēle̍ŋ tōōsīāā sɔ̍ŋgɔ̍ ko̍ŋ a̍ būlɔ̍ŋsīi̍ye̍. Mɛ̄ɛ̍ o̍ to̍o̍si̍a̍a̍ la̍ŋ, mbo̍ yɔ̄ŋgū wānāā bɛ̄ndūāā nda̍ a̍a̍ ma̍ndā di̍o̍o̍ le̍ lūɛ̄īyɔ̄ɔ̍ o̍ chīɛ̄ī lēmāsāa̍ wa̍.

¹¹ Le̍ te̍le̍ŋ o̍ te̍le̍ŋ, tē Māsā Bɛ̍ndōo̍ Lūēhōbo̍wām ndu̍ o̍o̍ wa̍ kɔ̄la̍ŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ pɛ̍, pūa̍a̍ nda̍ a̍a̍ ma̍ndā di̍ō lēmāsāa̍ wa̍, ā chu̍a̍ nyɛ̄lā lāŋ ā kūɛ̄ a̍ la̍ŋ le̍ ndu̍ māndāa̍. Tē ō chīi̍ nyɛ̄ o̍ ku̍ɛ̄ to̍sāa̍ wo̍ tōsā pɛ̍, mbō fūla̍, pūa̍a̍ ha̍ā ā mīīŋgu̍ a̍ nyɛ̄lā lāŋ ā kɔ̍ kɛ̍sī o̍ lu̍mūi̍ nda̍ māndā la̍ŋ ndo̍ ni᷄ŋ.

¹² Ndu̍yɛ̍, mɛ̄ɛ̍ Lūēhōbo̍wām o̍ tu̍si̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ pɔ̍lūl kɔ̄l, ō tu̍si̍ lɛ̍ nda̍ dɛ̍nɛ̍ pa̍lāa̍ chōo̍ mɛ̄ɛ̍ ndu̍ o̍o̍ kɛ̍ɛ̍si̍a̍a̍ yɛ̍, mbō tɛ̄ɛ̄mbu̍u̍ nda̍ kpo̍u̍ le̍. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ tōsā mi̍ sɔ̄ɔ̍ŋ mīīŋgū wā ŋ̄ kɛ̄ndɛ̄ o̍ lɛ̄ŋndē Chu̍dā le̍ŋ ni᷄ŋ.

A̍ mɛ̄ɛ̄lu̍la̍ māsāle̍ Lūēhōbo̍wām nde̍ŋ o̍kɔ̄ɔ̄

¹³ O̍ ko̍ŋ, mi̍ Māsā Bɛ̍ndōo̍ Lūēhōbo̍wām o̍ to̍sā mi̍ māsāle̍ ndɔ̄le̍ŋ lē sīmnu᷄ŋ ma̍sāle̍ kpāāyā bɛ̍ndū Chūlu̍sɛ̄lɛ̄m. Lūēhōbo̍wām wa̍ wɔ̄sīla̍ŋ be̍le̍-hi̍ɔ̍ɔ̍lu̍ a̍ ō pīlɛ̍ mbo̍ sīmnu᷄ŋ māsāa̍. Ndu̍yɛ̍ mbo̍ tōsā māsāle̍ŋ Chūlu̍sɛ̄lɛ̄m le̍ wɔ̄sīla̍ŋ tɔ̍ a̍ lā ŋɔ᷄mmɛ̍ū, chi̍e̍e̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ hɛ̍li̍ o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍ le̍ ndu̍ wāa̍ sōōlūūwo̍ lo̍ŋ ndo̍. Lūēhōbo̍wām ko̍ŋ, kālā ndɔ̍ wa̍ Na̍a̍mā ni̍, fūlāa̍ o̍ lɛ̄ŋndē A̍mɔ᷅nde̍ŋ.

¹⁴ Mi̍ Māsāa̍ Lūēhōbo̍wām o̍ tōsā yɔ̄ŋ wɔ̄ɔ̍ŋndo̍, kāni̍ fu̍u̍le̍ ō kīndi̍ le̍ mbō tōsa̍ nyɛ᷅ hi̍ni̍ Mɛ̄lɛ̄ka̍ Ya̍a̍wɛ̄ɛ̄ kɔ̄llo̍ le̍.

¹⁵ Sɔ̍ɔ̍ŋ yɔ̍nu̍ŋ o̍ māsāle̍ Lūēhōbo̍wām nde̍ŋ bɛ̄ŋgu̍ wo̍ŋ, chɔ̍ŋ o̍ kāndɔ᷄ŋndo̍ mbo̍ fūūlūū o̍ mɛ̄ɛ̄lu̍la̍ŋ, ŋ̄ chō ŋ̄ pōōnyīāā o̍ yāu̍la̍ lāko̍na̍ wānāa̍ su̍a̍ā le̍ Mɛ̄lɛ̄ka̍ wa̍, Sīɛ̄ma̍yā nda̍ I̍dɔ̄ɔ̄ wo̍ ni᷄ŋ. Ndu̍yɛ̍, bōōndi̍i̍ Lūēhōbo̍wām wa̍ māsā ve̍, sɔ̍ŋgɔ̄ɔ̍ wa̍ nda̍ tɛ̄ɛ̄ŋ le̍ te̍le̍ŋ o̍ te̍le̍ŋ nda̍ Māsāa̍ Chɛ̄lōbo̍wām.

¹⁶ O̍ ko̍ŋ kɔ̍ɔ̍lī, mi̍ Lūēhōbo̍wām o̍ wu᷅. Ma̍ chɔ̄ ndu̍ o̍ sɛ̄i̍ nda̍ yu̍ŋgu̍ lēmāsāa̍ ni᷄ŋ, o̍ chi̍e̍e̍ Dēēvi̍o̍o̍. Ndu̍yɛ̍, mi̍ Ābi̍chā po̍ ndɔ̍, o̍ mi̍i̍ŋgū māsā bɛ̍ndōo̍ o̍ fōōfo̍ ndɔ̄ɔ̍.