Ko̍lo̍ni̍kō Di̍i̍ŋ Ndɔ̄ɔ̍ 11 - Yāu̍ Mɛ̄lɛ̄ka̍a̍

A̍ yōōŋgu̍ Mɛ̄lɛ̄ka̍ ke̍ Sīɛ̄ma̍yā le̍ Māsā Bɛ̍ndōo̍ Lūēhōbo̍wām ndo̍ o̍kɔ̄ɔ̄

¹ Mɛ̄ɛ̍ Māsā Bɛ̍ndōo̍ Lūēhōbo̍wām o̍ fu̍u̍lu̍u̍ Chūlu̍sɛ̄lɛ̄m, mbo̍ chūūŋgīāā so̍vɛ̄i̍ya̍a̍ cha̍ā sɔ̍ŋgɔ̄ɔ̍ chāā bɛ̄ndōo̍ wa̍, fūlāa̍ o̍ yu̍ŋgu̍ Chu̍dā wo̍ chōo̍, a̍ yu̍ŋgu̍ Bɛ̍ŋnja̍mīŋ ndo̍, wāa̍la̍ŋ kɛ̄mɛ̄ a̍ be̍le̍-ŋɔ̍ma̍a̍ (180,000). Ndu̍ o̍o̍ ye̍e̍ma̍ le̍ kɔ̄la̍ŋ sɔ̍ŋgɔ̄ɔ̍ a̍ yu̍ŋgu̍la̍ŋ I̍sɔ̄lūɛ̄ī, la̍ wa̍ bā lūāŋndo̍ la̍ŋ, le̍ mī nda̍ a̍a̍ mi̍i̍ŋgu̍ ndu̍ o̍ bā bɛ̄ŋgu̍.

² Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ ke᷅ Sīɛ̄ma̍yā, wāna̍ su̍a̍ā le̍ Mɛ̄lɛ̄ka̍ yōōŋgōo̍.

³ Mbo̍ dīmūl ndu̍ ma̍a̍, o̍ di̍mu̍l Lūēhōbo̍wām, po̍ Sɔ̍lɔ̍mɔ̄ŋ ndo̍, o̍ cho̍ Māsā Bɛ̍ndōo̍ Chu̍dā wo̍, a̍ I̍sɔ̄lūɛ̄ī tūa̍a̍ a̍ cho̍ o̍ būŋgɛ̄ī Chu̍dāve̍, a̍ o̍ būŋgɛ̄ī Bɛ̍ŋnja̍mīŋ ni᷄ŋ nda̍ māā,

⁴ Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “La̍ ku̍ā mī lā sɔ̍ŋgā a̍ wānāya᷅ŋ nyāa̍ŋ te̍. Kāni̍ fo̍ndōle̍, ya̍ Mɛ̍lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ to̍sa̍ ni̍ mi̍ he̍ī yɔ̄nu᷄ŋ. Le̍la̍ŋ, wānā o̍ wānā lā mīīŋgu̍ o̍ lā nya̍lo̍.” Ndu̍yɛ̍ ma̍ chɛ̄l nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mu̍l nda̍ wo̍, wānā o̍ wānā ku̍e̍ lɛ̍ mbō sɔ̄ŋga̍ a̍ Chɛ̄lōbo̍wām te̍.

Lūēhōbo̍wām ma̍nda̍ chi̍o̍o̍ŋ ŋ̄ kālā ka̍lā

⁵ Ndu̍yɛ̍, bōōndi̍i̍ Lūēhōbo̍wām o̍ wa̍ īchāli̍ Chūlu̍sɛ̄lɛ̄m nde̍, mbo̍ tāŋgūl chi̍o̍o̍ŋ, mbo̍ bɛ̄ɛ̄ndīāā mu̍ŋ ŋ̄ kālā ka̍lā le̍ būŋgɛ̄ī Chu̍dāve̍, a̍ būŋgɛ̄ī Bɛ̍ŋnja̍mīŋnde̍ māndāa̍. Chi̍e̍e̍ŋ mu̍ŋ cho̍ mu᷅ŋ ni̍.

⁶ Bɛ̍ti̍lɛ̍hɛ̄m, a̍ I̍tām, a̍ Tɛ̄ko̍wā,

⁷ a̍ Bɛ̄tīsɔ̍ɔ̄, a̍ So̍kō, a̍ A̍du̍lām,

⁸ a̍ Ka̍a̍tī, a̍ Mālu̍ɛ̍sīāā, a̍ Si̍fī,

⁹ a̍ A̍do̍lūēm, a̍ La̍ki̍sī, a̍ Āsi̍kāā,

¹⁰ a̍ So̍lūā, a̍ A̍i̍cha̍lɔ̄ŋ, a̍ Hi̍būlɔ̄ŋ. Chi̍o̍o̍ŋ mu᷅ŋ o̍ ta̍ŋgu̍l ni̍ mbo̍ bɛ̄ɛ̄ndīāā mu̍ŋ ŋ̄ kālā ka̍lā.

¹¹ Ndu̍yɛ̍, mɛ̄ɛ̍ o̍ bɛ̄ɛ̄ndīāā mu̍ŋ mbo̍ kɛ̄sī bōlīī so̍vɛ̄i̍ya̍ lo̍ŋ kpɛ̍ kpɛ̍. O̍ ko̍ŋ kɔ̍ɔ̍lī, mbo̍ kɛ̄sī nyɛ̄ dīa̍a̍, a̍ chūɛ̄īmā ɔ̄li̍fīi̍ya̍ŋ, a̍ mūɛ̄īmā kīle̍pīi̍ya̍ŋ o̍ chi̍o̍o̍ŋ mu᷅ŋ kpɛ̍ kpɛ̍.

¹² O̍ ko̍ŋ kɔ̍ɔ̍lī, mbo̍ kɛ̄sī vɛ̄lɛ̄ nyɛ̄lā so̍vɛ̄i̍ya̍ ā bīī o̍ lābā māā bo̍o̍la̍ bɛ̍ndu̍ le̍ nda̍ māndāa̍ o̍ la̍ŋ, a̍ ba̍lta̍ŋ o̍ chi̍o̍o̍ŋ mu᷅ŋ kpo̍u̍. Mbo̍ bɛ̄ɛ̄ndīāā chi̍o̍o̍ŋ mu᷅ŋ ŋ̄ kālā ka̍lā. O̍ ko̍ŋ, mi̍ būŋgɛ̄ī Chu̍dāve̍, a̍ būŋgɛ̄ī Bɛ̍ŋnja̍mīŋnde̍ ŋ̄ wa̍ ndu̍ ni̍ko̍ o̍ bā bɛ̄ŋgu̍.

A̍ mɛ̄ɛ̍ wānāā sōlīāā lāsa̍lāa̍ a̍ Līva̍īya̍ hīŋ Chu̍dā yɛ̍ o̍kɔ̄ɔ̄

¹³ O̍ ko̍ŋ kɔ̍ɔ̍lī, mi̍ wānāā sōlīāā lāsa̍lāa̍ a̍ Līva̍īya̍, a̍ wa̍ īchāli̍ I̍sɔ̄lūɛ̍i̍ya̍ kpo̍u̍, ā māl ma̍ kūānu᷄ŋ Chu̍dā, nāa̍ Lūēhōbo̍wām chu̍a̍.

¹⁴ Kāni̍ fo̍ndōle̍, mi̍ Chɛ̄lōbo̍wām nda̍ pūa̍a̍ ndūa̍a̍ ā kɛ̄ɛ̄lū Līva̍īya̍ māā ā to̍sā lɛ̄ kpe̍ku̍ nda̍ a̍a̍ nɔ̍ le̍ tōsāa̍ māā wānāā sōlīāā lāsa̍lā le̍ Mɛ̄lɛ̄ka̍ Ya̍a̍wɛ̄ɛ̄ wo̍ le̍. Le̍ sa̍bū kōŋ nda̍ ma᷄l ni̍, ma̍ kūānu᷄ŋ Chu̍dā a̍ Chūlu̍sɛ̄lɛ̄m.

¹⁵ O̍ ko̍ŋ, mi̍ Chɛ̄lōbo̍wām o̍ hɛ̄lī wānāā sōlīāā lāsa̍lāa̍ a̍ bā ndɔ̄, mbo̍ kɛ̄sī nda̍ o̍ fo̍ndāŋndā lāsōōlu̍u̍la̍ o̍ to̍o̍si̍a̍a̍ la̍ŋ, le̍ chūīŋnda̍ a̍ nāūwāā fɔ̍ŋndu̍a̍a̍ o̍ to̍o̍si̍a̍a̍ māā mɛ̄lɛ̄ka̍ā ndɔ̄ wa̍ sōōlūūwo̍.

¹⁶ Kɛ̍, I̍sɔ̄lūɛ̍i̍ya̍ ā ti᷄ŋ, ā nda̍ a̍a̍ yɔ̍ŋgu̍ kɔ̄ltā ndāla̍ŋ kpo̍u̍, le̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍ tōlɔ̄ɔ̍ kɔ̄ɔ̄lī wa̍, mi̍ nda̍ tūāl Līva̍īya̍ kɔ̄ɔ̄lī, ma̍ kūā nda̍ nda̍ā Chūlu̍sɛ̄lɛ̄m, ma̍ kɔ᷄ wa᷅ sa̍lāla̍ŋ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā ndāā ma̍māa̍ lo̍.

¹⁷ Le̍ wɔ̄sīla̍ŋ lā yāa̍ ā wa̍ īchāli̍ Chu̍dā, Māsāa̍ Lūēhōbo̍wām, po̍ Sɔ̍lɔ̍mɔ̄ŋ ndo̍ o̍ bā bɛ̄ŋgu̍. O̍ ko̍ŋ, ma̍ tōsā mi̍ māsāle̍ ndɔ̄le̍ŋ lē sɔ̄lā kpāāyāa̍, ndu̍yɛ̍ ma̍ dīīku᷄ŋ ndu̍ o̍ māsāle̍ ndɔ̄le̍ŋ ni᷄ŋ, mɛ̄ɛ̍ nda̍ dīīku̍ŋ Dēēve̍ nda̍ Sɔ̍lɔ̍mɔ̄ŋ o̍ māsāle̍ ndā le̍ŋ bɛ̄ŋgu̍ yɛ̍.

A̍ Yu̍ŋgu̍ Māsāa̍ Lūēhōbo̍wām ndo̍ o̍kɔ̄ɔ̄

¹⁸ Mi̍ ī yɔ̄nu᷄ŋ, mi̍ Lūēhōbo̍wām o̍ chu̍ā Māhāla̍tī, chūa̍ Chɛ̄lūīmo̍tī wo̍ o̍ nɔ̄ɔ̍ ni᷄ŋ. Chɛ̄lūīmo̍tī ko̍ŋ yɛ̄, Dēēve̍ ndu̍ o̍o̍ ve̍lū ndu̍ ni̍. Kāla̍ ndɔ̍ wa̍ A̍bi̍hēē, chūa̍ Ɛ̄li̍a̍a̍bī wo̍ ni̍. A̍bi̍hēē yɛ̍, fi̍nyā ndɔ̄ ma̍mā wa̍ Chɛ̄ɛ̍se̍ ni̍.

¹⁹ Mi̍ Māhāla̍tī o̍ vi̍lūl Lūēhōbo̍wām pūa̍a̍ ā yāa̍, nda̍ yɔ̍nūŋ ni̍ māā, Chɛ̍hu̍sī, a̍ Sīɛ̄mālu̍a̍yā, a̍ Sa̍hām.

²⁰ O̍ ko̍ŋ kɔ̄ɔ̄lī, mi̍ Lūēhōbo̍wām o̍ chu̍ā vɛ̄lɛ̄ la̍nɔ̍ che̍le̍ŋ dīōla̍ŋ āā, Ma̍a̍kāā, chūa̍ A̍bi̍sa̍lɔ̄m ndo̍. Mi̍ ndu̍ vīlūl ndu̍ pūa̍a̍ ā hīɔ̍ɔ̍lu̍, nda̍ yɔ̍nūŋ ni̍ māā, Ābi̍chā, a̍ A̍tāī, a̍ Si̍sā, a̍ Sīɛ̄lo̍mi̍tī.

²¹ Fa̍u̍ fa̍u̍, Lūēhōbo̍wām ndu̍ o̍o̍ nɔ̍ lāāndūa̍a̍ tɔ̍ a̍ ā ŋɔ̄ma̍a̍, a̍ lāāndūāā pɔ̄mbūa̍a̍ be̍le̍-ŋɔ̍mpu᷅m (60). Ndu̍yɛ̍ mbo̍ vīālū pūa̍a̍ bi̍dīi̍ŋ a̍ ā ŋɔ̄ma̍a̍, a̍ wāŋ lāāndūa̍a̍ be̍le̍-ŋɔ̍mpu᷅m (60). Ndu̍yɛ̍ lāāndūa̍a̍ Lūēhōbo̍wām nda̍, a̍ lāāndāā ndūāā pɔ̍mbūa̍a̍ kpo̍u̍, Ma̍a̍kāā ndu̍ o̍o̍ hi̍o̍ū kāālā.

²² Mi̍ Lūēhōbo̍wām o̍ hɛ̍lī Ābi̍chā, po̍ Ma̍a̍kāā wo̍, mbo̍ hāndū ndu̍ pūa̍a̍ ndūa̍a̍ ā pīli̍a̍a̍ kpo̍u̍ chi᷅la̍ŋ, le̍ mī ndu̍ o̍o̍ hu̍ŋ mīīŋgū māsāa̍ o̍ fōōfo̍ ndɔ̄ɔ̍.

²³ Mi̍ Lūēhōbo̍wām o̍ to̍sā kɔ̄l kālo̍o̍, mbo̍ kē pūa̍a̍ ndūāā vi̍a̍lāa̍ kpe̍ku̍la̍ŋ, mbo̍ pīɔ̄ū nda̍ o̍ fo̍ndāŋndā yɛ̍ yɛ̍la̍ŋ o̍ būŋgɛ̄ī Chu̍dāve̍, a̍ o̍ būŋgɛ̄ī Bɛ̍ŋnja̍mīŋnde̍ŋ ni᷄ŋ, o̍ chi̍e̍e̍ŋ bɛ̍ndūŋ o̍ bɛ̍ɛ̍ndi̍a̍a̍ ŋ̄ kālā ka̍lā wo̍ŋ. Ndu̍yɛ̍, nyɛ̄ o̍ nyɛ̄ nda̍ a̍a̍ ye̍e̍ma̍ o̍ chi̍o̍o̍ŋ mu̍ŋ, mbo̍ kē nda̍. O̍ ko̍ŋ kɔ̍ɔ̍lī, mbo̍ pūūlūl nda̍ lāāndūa̍a̍ ta̍u̍.