Ko̍lo̍ni̍kō Di̍i̍ŋ Ndɔ̄ɔ̍ 10 - Yāu̍ Mɛ̄lɛ̄ka̍a̍

A̍ mɛ̄ɛ̍ yu̍ŋgu̍la̍ŋ I̍sɔ̄lūɛ̄ī bā lūāŋndo̍ la̍ kɛ̄ɛ̍ Lūēhōbo̍wām o̍ lēmāsā yɛ̍ o̍kɔ̄ɔ̄

¹ Mɛ̄ɛ̍ Sɔ̍lɔ̍mɔ̄ŋ o̍ vi᷅, mi̍ Lūēhōbo̍wām po̍ ndɔ̄ o̍ ku̍ā Si̍ɛ̍kɛ̄m chi̍e̍e̍, nāa̍ I̍sɔ̄lūɛ̍i̍ya̍ kpo̍u̍ ā wa̍ ā chūūŋgi̍āŋ le̍ ndu̍ kɔ̄la̍ŋ chūa̍a̍ o̍ lēmāsā wa̍.

² Ndu̍yɛ̍ a̍ te̍le̍ŋ ko̍ŋ, Chɛ̄lōbo̍wām, po̍ Ne̍ba̍tī wo̍, o̍ wa̍ wɔ̄ I̍chi̍pī o̍ nyāānɔ᷄ŋ Sɔ̍lɔ̍mɔ̄ŋ ndo̍ ni᷄ŋ. Mɛ̄ɛ̍ o̍ tu̍e̍ī a̍ sūɛ̍i̍ he̍ī o̍kɔ̄ɔ̄, ndu̍ bɛ̍ɛ̍ mbo̍ mālnu᷄ŋ nāa̍ o̍ wa̍ I̍chi̍pī wa̍ mbo̍ mīīŋgū.

³ Mɛ̄ɛ̍ o̍ mi̍i̍ŋgu̍, mi̍ I̍sɔ̄lūɛ̍i̍ya̍a̍ wa̍ bā lūāŋndo̍ wa̍ ā yōōŋgū ndu̍. Nda̍ kpo̍u̍ ma̍ cha᷄ŋ ma̍ kūā nāa̍ Lūēhōbo̍wām chu̍a̍, ma̍ kɔ̍ di̍mūl ndu̍ āā,

⁴ “Bōōndi̍i̍ fi̍nyā nūm a̍ wa̍ na̍a̍ chōo̍ ve̍, mbo̍ bɛ̄pɛ̄lā na̍a̍ bɛ̄pɛ̄lāa̍ pīla̍, a̍ wōlɔ̄ɔ̄lā lūsu̍lɛ̍i̍la̍ o̍ ha̍ndu̍ na̍a̍ chōo̍ la̍ŋ. Le̍la̍ŋ tē a̍ ye̍e̍ma̍ pɛ̍ mī ŋ̄ lūɛ̄ī nu̍m o̍ bā bɛ̄ŋgu̍, mī ŋ̄ sāāŋgi̍a̍l nu̍m, mɛ̄ɛ̍ fa̍ŋa̍ na̍a̍ wōlɔ̄ɔ̄lā lūsu̍lɛ̍i̍la̍ la̍ŋ chōo̍.”

⁵ Mi̍ Lūēhōbo̍wām o̍ mu̍lī nda̍ dīōm āā, “I̍ tu̍e̍ī, lā kɔ̍ hu᷅ŋ o̍ lēya̍a̍, mī hu̍ŋ mu̍lī nya̍ dīōm.” Mi̍ wāŋnda̍ cha᷄ŋ ma̍ mīīŋgū.

⁶ O̍ ko̍ŋ, mi̍ Māsā Bɛ̍ndōo̍ Lūēhōbo̍wām o̍ ko̍ma̍ ve̍e̍lu̍ bɛ̄ndūa̍a̍ wa̍ Sɔ̍lɔ̍mɔ̄ŋ fi̍nyā ndɔ̍ wa̍llo̍ o̍ bā bɛ̄ŋgu̍ māā wānāā ndūāā si̍lāā wa̍ ki̍nɛ̍i̍, mbo̍ nyūnā nda̍ āā, “Sīlā yɛ̄ɛ̍nɛ̍ nya̍ nɔ̄ yɛ̄ le̍ ya̍, le̍ mī mu̍li̍ wāŋnda̍ ha̍ā dīōm?”

⁷ Mi̍ bɛ̄ndūa̍a̍ ha̍ā lō o̍ ko̍ŋ ma̍ dīmūl ndu̍ āā, “Tē a̍ ye̍e̍ma̍ pɛ̍ mī wāŋnda̍ ha̍ā ā lūɛ̄ī nu̍m o̍ bā bɛ̄ŋgu̍, mā wa̍ nu̍m sāāŋgīāllo̍ le̍ te̍le̍ŋ o̍ te̍le̍ŋ, mɛ̄ɛ̍ mā wa̍ wānā kɛ̍ndɛ̄ nāa̍ nda̍ chūā, mā ke̍ nda̍ mūli̍ hi̍nī nda̍ kɔ̄lta̍ŋ ndo̍. Ko̍ŋ to̍sā ni̍, mā wa̍ bu̍ɛ̍i̍yāā nūm le̍ te̍le̍ŋ le̍ te̍le̍ŋ.”

⁸ Kɛ̍ Lūēhōbo̍wām o̍ ye̍ŋ bɛ̄ndūa̍a̍ ha̍ā lānī le̍. Mbo̍ vēēlū chūāā pīāāndūāā nda̍ chɛ᷄ŋ la̍tu̍lu̍ nda̍ nda̍ā, ma̍ sīmnu᷄ŋ ni᷅ŋ wānāā ndūāā si̍lāā wa̍ ki̍nɛ̍i̍.

⁹ Mbo̍ nyūnā nda̍ āā, “Wānāa̍ di̍mi̍ ha̍ā māā ya̍ I̍ fa̍ŋa̍ nda̍ wōlɔ̄ɔ̄lā lūsūlāālā fi̍nyā nūu̍ ha̍ndu̍ nda̍ chōo̍ la̍ŋ chōo̍ wa̍, sīlā yɛ̄ɛ̍nɛ̍ nya̍ nɔ̄ yɛ̄ le̍ ya̍ le̍ mī mu̍li̍ nda̍ dīōm?”

¹⁰ Mi̍ chūāā pīāāndūa̍a̍ ha̍ā lō o̍ ko̍ŋ ma̍ dīmūl ndu̍ āā, “Nyɛ̄ ŋ̄ dīmūl nda̍ wo̍ cho̍ ho̍ō ni̍, di̍mu̍l nda̍ āā, ‘Sūēī nīī mɛ̍ɛ̍lɛ̄i̍ ndi̍ bɛ̍ɛ̍ hi̍a̍ū ni̍ŋ che̍lu̍l a̍ chāŋāa̍ fi̍nyā nūu̍.

¹¹ Wōlɔ̄ɔ̄lā lūsu̍lɛ̍i̍la̍ fi̍nyā nūu̍ hāndu̍ nya̍ chōo̍ la̍ŋ, lā ve̍ la̍ bɔ̍ɔ̍ le̍, lā ya̍ I̍ ha̍ndū ni̍ŋ nya̍ chōo̍ la̍ŋ bɛ̍ɛ̍ la̍ hi̍a̍ū ni̍ŋ. Fi̍nyā nūu̍ ndu̍ ndu̍ a̍ kpātūēī yɔ̄ŋɛ̄i̍ ndu̍ o̍o̍ lu̍a̍ā nya̍ ni̍, kɛ̍ ya̍ ya̍ kpātūe̍i̍ nɔ̍ chīli̍ŋndo̍ŋ o̍ bōlle̍ ve̍, a̍ ndi̍ ya̍ I̍ wa᷅ ni̍ŋ nya̍ sōŋgɔ̄ɔ̍ ni̍.’ ”

¹² O̍ ko̍ŋ, mi̍ lɔ̍ɔ̍ le̍ya̍a̍ wo̍ fūūlūū. Chɛ̄lōbo̍wām a̍ wānāā tūa̍a̍ kpo̍u̍ ma̍ cha᷄ŋ ma̍ kūā nāa̍ Māsā Bɛ̍ndōo̍ Lūēhōbo̍wām chu̍a̍, mɛ̄ɛ̍ o̍ di̍mu̍l nda̍ yɛ̍.

¹³ Sīlā bɛ̄ndūa̍a̍ ha̍ā ā sīla̍ Lūēhōbo̍wām ndo̍ ō ye᷄ŋ nda̍ lānī le̍, mbo̍ mūlūl wāŋnda̍ ŋu̍a̍sū ŋūāsū.

¹⁴ Nyɛ̄ chūāā pīāāndūa̍a̍ ā dīmu̍l ndu̍ wo̍, ndu̍ ko̍ni̍ o̍ to᷅l kɔ̄ɔ̄lī ni̍. Mbo̍ dīmūl nda̍ āā, “Fi̍nyā nūu̍ hāndu̍ nya̍ wōlɔ̄ɔ̄lā lūsu̍lɛ̍i̍la̍ŋ chōo̍, kɛ̍ lā ya̍ I̍ ha̍ndū ni̍ŋ nya̍ chōo̍ la̍ŋ, la̍ŋ bɛ̍ɛ̍ la̍ hi̍a̍ū ni̍ŋ lu̍su̍l. Fi̍nyā nūu̍ ndu̍ ndu̍, a̍ kpātūēī yɔ̄ŋɛ̄i̍ ndu̍ o̍o̍ lu̍a̍ā nya̍ ni̍, kɛ̍ ya̍ ya̍, kpātūe̍i̍ nɔ̍ chīli̍ŋndo̍ŋ o̍ bōlle̍ ve̍, a̍ ndi̍ ya̍ I̍ wa᷅ ni̍ŋ nya̍ sōŋgɔ̄ɔ̍ ni̍.”

¹⁵ O̍ ko̍ŋ, mi̍ Lūēhōbo̍wām o̍ kɛ̍ɛ̄ nyɛ̄ wāŋnda̍ ā dīmu̍l ndu̍ le̍ tōsāa̍ wo̍. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ kpe̍e̍kpe̍i̍ to̍sa̍ ni̍ mi̍ he̍ī ī yɔ̄nu᷄ŋ. Kāni̍ fo̍ndōle̍, nyɛ̄ o̍ dɔ̍ū sīndɛ̄ A̍hi̍chā, wāna̍ su̍a̍ā le̍ Mɛ̄lɛ̄ka̍ wo̍ o̍ sōndō, wānā wa̍ā Si̍lɔ̄ɔ̄ chi̍e̍e̍ a̍ Chɛ̄lōbo̍wām, po̍ Ne̍ba̍tī wo̍ o̍kɔ̄ɔ̄ wo̍, ndu̍ o̍o̍ ye̍e̍ma̍ mī ndu̍ o̍o̍ chi̍ŋa̍ lāsōndō.

¹⁶ Mɛ̄ɛ̍ wāŋnda̍ I̍sɔ̄lūɛ̄ī ā chē māā Lūēhōbo̍wām o̍ kɛ̍ɛ̍ nda̍ dīōm, ma̍ dīmī chōo̍ cho̍o̍ āā, “Na̍a̍ ŋ̄ cho̍ lɛ̍ yu̍ŋgu̍ Dēēve̍ wo̍ o̍ bā bɛ̄ŋgu̍ le̍, fo̍ndōle̍, ŋ̄ nɔ̍ tɔ̍nɔ̄ o̍ tɔ̄nɔ̄ o̍ Dēēve̍ po̍ Chɛ̄ɛ̍se̍ wo̍ ni᷄ŋ te̍. Le̍la̍ŋ wāŋnda̍ I̍sɔ̄lūɛ̄ī, lā chɔ̍ŋ ŋ̄ mīīŋgu᷅ŋ o̍ lāna̍a̍ lo̍. Lūēhōbo̍wām o̍ ko̍ma̍ lo᷅ wānāā ndūa̍a̍ chōo̍.” O̍ ko̍ŋ, mi̍ I̍sɔ̄lūɛ̍i̍ya̍ ā pīli̍a̍a̍ ā kɛ̄ɛ̄ Lūēhōbo̍wām o̍ lēmāsā ma̍ cha᷄ŋ ma̍ mīīŋgu᷄ŋ o̍ cha᷄lta̍ ndāla̍ŋ.

¹⁷ Ndu̍yɛ̍, wānāā Lūēhōbo̍wām ndu̍ o̍o̍ lo̍ ni᷅ŋ chōo̍ ma̍sā wa̍, mɛ̄ɛ̍ wānāa̍ wa̍ o̍ chi̍e̍e̍ŋ wa̍ o̍ būŋgɛ̄ī Chu̍dāve̍ ni᷄ŋ nda̍.

¹⁸ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Lūēhōbo̍wām o̍ vi̍ām po̍ pi᷅lɛ̍ dīōla̍ŋ āā A̍do̍ni̍lūām, wāna̍ wa̍ wa̍lta̍ lēle̍e̍bi̍lɛ̄i̍la̍ŋ kpo̍u̍ bo᷅lle̍ŋ ndo̍, le̍ mbō kɔ̍ so̍ō nāa̍ I̍sɔ̄lūɛ̍i̍ya̍ chūā. Kɛ̍ mi̍ I̍sɔ̄lūɛ̍i̍ya̍ kɔ̍ bi̍ī ndu̍ ma̍ vīī vīī ndu̍ a̍ pōūta̍ŋ ma̍ dīī ndu̍. O̍ ko̍ŋ, mi̍ Māsā Bɛ̍ndōo̍ Lūēhōbo̍wām o̍ he᷅l o̍ nyɛ̄ ndɔ̄ nya̍a̍na᷄ŋ su̍a̍a̍ ā nāŋ ndo̍ chōo̍, mbo̍ nyāānu᷄ŋ mbo̍ mīīŋgū Chūlu̍sɛ̄lɛ̄m.

¹⁹ Chɔ̍ŋ ni᷅ŋ a̍ te̍le̍ŋ ko̍ŋ mbo̍ bīī a̍ pāa̍le̍ hāūle̍ŋ nde̍ŋ, I̍sɔ̄lūɛ̍i̍ya̍a̍ cho̍ bā lūāŋndo̍ wa̍ ki̍nɛ̍i̍, ā chɛ᷄l mī yu̍ŋgu̍ Dēēve̍ wo̍ o̍ wa̍ nda̍ chōo̍ ma̍sā le̍.