Kɔ̄li̍ŋtīāŋ Tāso̍o̍ 2 - Yāu̍ Mɛ̄lɛ̄ka̍a̍

Mɛ̄ɛ̍ Pɔ̍ɔ̍l di̍mu̍l wāŋnda̍ yōōŋgu̍ Mɛ̄lɛ̄ka̍a̍ yɛ̍

¹ Chāāŋāā nīa̍a̍, kɔ̄lā ya̍ I̍ ku̍ɛ̄ le̍ nya̍ yōōŋgu̍ Mɛ̄lɛ̄ka̍ wa̍ ho̍ō ō kūmbāā wo̍ dīmūllo̍ la̍ŋ, I̍ ku̍e̍ mī I̍ to᷅l sɔ̄ɔ̍ŋ cha̍ā mī di̍mu̍l nya̍ ndu̍ o̍ kɔ̄l kālu̍ īwāna̍ chi̍e̍e̍ya̍ ni᷄ŋ te̍.

² Kāni̍ fu̍u̍le̍, mi̍ I̍ kɛ̍ɛ̍sīāā o̍ kɔ̄l nūu̍ ni᷄ŋ māā nyɛ̄ ya̍ I̍ la̍ndu̍ŋ kɔ̍l le̍ tōsāa̍ wo̍ ndu̍ su̍e̍e̍ wa̍ wāŋnda̍ dīmūllo̍ a̍ Chi̍i̍sū Ki̍li̍tī o̍kɔ̄ɔ̄ ni̍, tāāma̍ dīmūllo̍ nda̍ a̍ pīɔ̍m o̍ sɔ̍la̍ o̍ yɔ̄m sīŋgāfīlāa̍ chōo̍ wo̍ o̍kɔ̄ɔ̄.

³ Kɔ̄lā ya̍ I̍ ku̍ɛ̄ nāa̍ nya̍ chūā la̍ŋ, dīāllo̍ŋ ŋ̄ wa̍ ya̍ ŋ̄ vīlɛ̍i̍ pɔ̍lī bɛ̍ndū. O̍ yōōŋgōo̍ ho̍ō dīmīo̍o̍ ni᷄ŋ, I̍ wa̍ nyīīyāa̍ kpa᷅ kpā bɛ̄ndū a̍ sīōōŋīi̍ wa̍ ya̍ ve̍.

⁴ Nyɛ̄ o̍ nyɛ̄ ya̍ I̍ pɛ̍ɛ̍ku̍ nya̍ a̍ yōōŋgū ya̍ I̍ di̍mu̍l nya̍ wo̍, ō ve̍ su̍ɛ̍i̍ ya̍ I̍ to̍sa̍ o̍ sɔ̄ɔ̍ŋ cha̍ā ni᷄ŋ, kɛ̄lɛ̄ŋgāā o̍ kɔ̄l kālu̍ īwāna̍ chi̍e̍e̍ya̍ ni᷄ŋ te̍. Nɛ̄i̍ ya̍ I̍ chu̍u̍ nya̍ yōōŋgōo̍ ho̍ō wo̍, ō wa̍ māwāā nɛ̄i̍ chɔ̍m kpe̍e̍kpe̍i̍ kpa̍a̍yā bɛ̍ndū Nyi̍na̍ Kāsi̍ Mɛ̄lɛ̄ka̍a̍ ō nɔ̄ wo̍.

⁵ Sa̍bū ya̍ I̍ to̍sa̍ le̍nde̍ wo̍ cho̍ ni̍ māā, le̍ mī lāāla᷄ŋ nyāa̍ ō wa̍ sūɛ̍i̍ cho̍ tōsa᷄ŋ o̍ kpāāya̍ Mɛ̄lɛ̄ka̍a̍ ni᷄ŋ, yɔ̄ŋi̍ i̍ si̍mnu̍ŋ su̍ɛ̍i̍ wa̍ā o̍ kɔ̄l kālu̍ īwāna̍ chi̍e̍e̍ya̍ ni᷄ŋ.

Nyi̍na̍ Kāsi̍ Mɛ̄lɛ̄ka̍a̍ ndu̍ ke᷅ wa̍nā kɔ̍l kālu̍ Mɛ̄lɛ̄ka̍a̍ ni̍

⁶ Kɛ̍ ndu̍yɛ̍, yōōŋgū kɔ̄l kālo̍o̍ yōōŋgōo̍ ho̍ō chō ni̍. Yōōŋgū kɔ̄l kālo̍o̍ o̍ cho̍ le̍ wānāa̍ nɔ̍ ni᷅ŋ tāāsi̍o̍o̍ o̍ sɔ̄ɔ̍ŋ cho̍ a̍ Mɛ̄lɛ̄ka̍ o̍kɔ̄ɔ̄ wo̍ŋ nda̍ ni̍. Kɛ̍, kɔ̄l kālu̍ ka̍lāa̍, ō cho̍ kɔ̍l kālu̍ wa̍ā chi̍e̍ēŋ na̍nu᷄ŋ te̍. Ndu̍yɛ̍ ō cho̍ kɔ̍l kālu̍ wānāa̍ nɔ̍ kpāāyāa̍ ma̍ wā chi̍e̍ēŋndo̍ ho̍ō bōlle̍ŋ nda̍ ā nɔ̄ wo̍ le̍. Kāni̍ fo̍ndōle̍, nda̍ nda̍ kpāāya̍ ndāa̍ chūwɔ̄ɔ̍ ko̍ni̍ o̍ cho̍ ni᷅ŋ nu̍a̍ā ni̍.

⁷ Kɔ̄l kālu̍ na̍a̍ ŋ̄ chō ho̍ō sūɛ̍i̍ a̍ ndu̍ o̍kɔ̄ɔ̄ wo̍, ndu̍ cho̍ māchūāā ni̍, kɔ̄l kālu̍ Mɛ̄lɛ̄ka̍a̍ o̍ wa̍ ō kūmbāā wo̍. Kɔ̄l kālo̍o̍ ho̍ō, ō wa̍ ō vīāŋna᷄ŋ ŋ̄wāŋndā chīe̍e̍. Ndu̍yɛ̍, Mɛ̄lɛ̄ka̍ kɛ̄ɛ̄si̍a̍a̍ mākɛ̄ɛ̄sīāā sūɛ̍i̍ he̍ī le̍ dɛ̍nɛ̍ nāā kɛ̍ndɔ̄ɔ̍, lɔ̍ɔ̍pa̍ bɛ̍ɛ̍ chi̍e̍ēŋndo̍ ō kāndūŋ.

⁸ Wānāa̍ nɔ̍ kpāāyāa̍, ma̍ wā chi̍e̍ēŋndo̍ ho̍ō bōlle̍ŋ nda̍, ā nɔ̍ si̍nā pɛ̄ŋgu̍ a̍ kɔ̄l kālo̍o̍ ho̍ō o̍kɔ̄ɔ̄ le̍. Tē nda̍ a̍a̍ nɔ̍ sīnā pɛ̄ŋgo̍o̍ a̍ ndu̍ o̍kɔ̄ɔ̄ pɛ̍, ā ve̍ Ma̍sānɔ̄ɔ̍ Mɛ̄lɛ̄ka̍ o̍ cho̍ o̍ nāŋɔ̄ɔ̍ Mɛ̄lɛ̄ka̍a̍ ni᷄ŋ ndo̍ dīyɔ̄ɔ̄ o̍ yɔ̄m sīŋgāfīlāa̍ chōo̍ le̍.

⁹ Kɛ̍ ndu̍yɛ̍, mi̍ Yāu̍ Mɛ̄lɛ̄ka̍a̍ dīmī āā, “Wānāa̍ ka̍a̍la̍ Mɛ̄lɛ̄ka̍ wa̍, nyɛ̄ Mɛ̄lɛ̄ka̍ bɛ̄ɛ̄ndi̍a̍a̍ le̍ nda̍ wo̍, wānā o̍ wānā chi̍ wɔ̍ ndu̍ lē pīlɛ̍ bɛ̍ɛ̍ le̍. Wānā o̍ wānā tu̍i̍i̍ yɔ̍ bɛ̍ɛ̍ a̍ ndu̍ o̍kɔ̄ɔ̄ le̍. Ndu̍yɛ̍, wānā bɛ̍ɛ̍ sɔ̍l lɔ̍ bɛ̍ɛ̍ nyɛ̍ wāā le̍nde̍ ma̍lɔ̍ le̍.”

¹⁰ Kɛ̍ na̍a̍ na̍a̍, mi̍ Mɛ̄lɛ̄ka̍ chɔ̄m na̍a̍ kɔ̄l kālo̍o̍ ho̍ō sa̍na̍a̍ a̍ Nyi̍nā Kāsī ndɔ̄ɔ̍. Kāni̍ fu̍u̍le̍, Nyi̍na̍ Kāsi̍ Mɛ̄lɛ̄ka̍a̍ ndu̍ ya̍a̍sīāā i̍sɔ̍ɔ̍ o̍ īsɔ̄ɔ̍ fe̍e̍ ni̍, ā yɔ᷄ŋ bɛ̍ɛ̍ āā sɔ̄ɔ̍ŋ Mɛ̄lɛ̄ka̍ kɛ̄ɛ̄si̍a̍a̍ le̍ tōsāa̍ mi̍ ŋ̄ wā wɔ̄ ŋ̄ vīāŋna᷄ŋ kpi̍ŋ kpi̍ŋ ndo̍ŋ ni̍.

¹¹ Wānā o̍ wānā a̍ si̍nā nyɛ̍ wa᷅ wa᷅ŋndo̍ o̍ kɔ̄l lo̍ le̍, mɛ̄ɛ̍ wānā ko̍ŋ nyi̍nā ndɔ̄ɔ̍. Le̍nde̍ ko̍ni̍, wānā o̍ wānā a̍ si̍nā nyɛ̍ cho̍ Mɛ̄lɛ̄ka̍ o̍ kɔ̄l lo̍ le̍ mɛ̄ɛ̍ Nyi̍na̍ Kāsi̍ Mɛ̄lɛ̄ka̍a̍.

¹² Na̍a̍ na̍a̍, ō cho̍ nyi̍na̍ cho̍ wānāā chi̍e̍ēŋnda̍ kɔ̄ɔ̄lī wo̍ le̍ o̍ cho̍ na̍a̍ kɔ̄ɔ̄lī le̍. Nyi̍nā Kāsi̍ Mɛ̄lɛ̄ka̍ pi̍la̍ ve᷅m ndo̍, ndu̍ cho̍ na̍a̍ kɔ̄ɔ̄lī ni̍ le̍ mbō tōsa̍ mī ŋ̄ sīna̍ nyɛ̄ Mɛ̄lɛ̄ka̍ ke̍ na̍a̍ wo̍ pɛ̄ŋgu̍.

¹³ Le̍la̍ŋ, tē ŋ̄ wa̍ wāŋnda̍ īsɔ̄ɔ̍ chɔ᷅m a̍ he̍ī o̍kɔ̄ɔ̄ pɛ̍, ŋ̄ chɔ᷅m nda̍ ndi̍ a̍ dīōmndā wāŋnda̍ pɛ̄ɛ̄ku̍ na̍a̍ o̍ kɔ̄l kālu̍ īwāna̍ chi̍e̍e̍ya̍a̍ ni̍ŋ nda̍ŋ te̍. Dīōmndā Nyi̍na̍ Kāsi̍ Mɛ̄lɛ̄ka̍a̍ ō pɛ̄ɛ̄ku̍ na̍a̍ la̍ŋ a̍ la̍ŋ na̍a̍ ŋ̄ chɔ̄m nda̍ ndi̍ ni̍. Ndu̍yɛ̍, wānāā Nyi̍na̍ Kāsi̍ Mɛ̄lɛ̄ka̍a̍ chō kɔ̄ɔ̄lī wa̍, nda̍ na̍a̍ ŋ̄ tɛ̄ɛ̄sīāl to᷅nya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ ni̍.

¹⁴ Wānā o̍ wāna̍ Nyi̍na̍ Kāsi̍ Mɛ̄lɛ̄ka̍a̍ ō ve̍ kɔ̍ɔ̍lī le̍, ō chɛ᷅l nyɛ᷅m Nyi̍na̍ Kāsi̍ Mɛ̄lɛ̄ka̍a̍ ō kē wa̍nā wo̍ŋ te̍. Kāni̍ fu̍u̍le̍, ō chā mu̍ŋ ko̍ māā sɔ̄ɔ̍ŋ ŋ̄dīɔ̄m. Ndu̍yɛ̍, ō si̍nā le̍ sa̍bū ŋ̍ si̍m ndo̍ le̍. Kāni̍ fu̍u̍le̍, mɛ̄ɛ̍ mī Nyi̍na̍ Kāsi̍ Mɛ̄lɛ̄ka̍a̍ ō wa̍ wāŋndo̍ kɔ̍ɔ̍lī mālāŋ o̍ si̍nā le̍ sa̍bū nyɛ̄m mu᷅ŋ ŋ̄ si᷄m kpe̍e̍kpe̍i̍ yo̍.

¹⁵ Wāna̍ Nyi̍na̍ Kāsi̍ Mɛ̄lɛ̄ka̍a̍ ō chō kɔ̄ɔ̄lī wo̍, ō nɔ̄lā mbō sīna̍ le̍ sa̍bū nyɛ̄ o̍ nyɛ̄ fe̍e̍ o̍ si̍m ndo̍. Ndu̍yɛ̍ wānā o̍ wānā nɔ̍lā mbō kɔ̄ɔ̄sa̍ a̍ ndu̍ le̍.

¹⁶ Mi̍ Yāu̍ Mɛ̄lɛ̄ka̍a̍ dīmī āā, “Wānā o̍ wānā nɔ̍lā mbō sīna̍ nyɛ̍ cho̍ Māsānɔ̄ɔ̍ Mɛ̄lɛ̄ka̍ o̍ kɔ̄l lo̍ le̍. Ndu̍yɛ̍, wānā o̍ wānā nɔ̍lā mbō pɛ̄ɛ̄ku̍ Mɛ̄lɛ̄ka̍ nyɛ̄ o̍ nyɛ̄ le̍.” Kɛ̍ na̍a̍ na̍a̍ yīya᷄ŋ na̍a̍ ŋ̄ nɔ̄ wo̍ chō ō chɛ̄la᷅ŋ a̍ yīya᷄ŋ Ki̍li̍tīo̍o̍.