DANIEL 5 - ALLAH WENE

Ap suwon ibam ubahat fam haharegma hibag ane

¹ Ap suwon raja Belsyazar inowen otsi ununuk suwon enebe teng numen 1.000 fahet seni humon esetfag. Esetuk lit ap teng numen itano inim wereg lit ik olokon nibag.

² Ik olokon nibareg nenek turuk lit Belsyazar inowen, ”Kubag umbagpag turukon emas men perak men fam wirihon Allah ibam o Yerusalem forohoman nikni Nebukadnezaren o Babel hilalug watfahon arimano walug watlihipmu an nori men nuhesi yuhon men hiyap winon an men werehon ninim kubag arimano fam ik nulen wak lalihip,” ulug ap mon enepfag.

³ Mon enepfagma kubag emas men perak men fam wirihon Allah ibam o Yerusalem forohoman huhulangge wibahon arimano walug watfagma ap suwon ori, uhesi yuhon, hiyap winon at men welatfahon arimanowen kubag arimano fam ik olokon hinanggoho nibag.

⁴ Ik olokon naruk lit usangge iren tohon lebe ruruk eleg angge emas, perak, tembaga, besi men e men helep men fam wirihon arimano wel eneptuk latfag.

⁵ Wel eneptuk lit yet harukmen ap inggik amlo hag anggeyen ap suwon ibam ubahatma iral umbagpag fam hahatuk latfag. Inggik emberim inam atukmu ap suwonen seleg toho yet hibareg

⁶ akolen orohole hisilfareg indi anggin toho wenggeltuk lit uwag elek-elek angge turuk latfag.

⁷ Ari roho turuk lit ap suwon inowen ele ine roho uruk lit, ”Hal inap men fulu roho turuk inap men suhal alem onoluk inap men an nolohotma wamusan hondog enebik lalihip,” ulug ap mon enepfag. Watfagma ap suwon inowen alem onoluk inap o Babilonia werehon arimano unubam ele uruk lit, ”Ap san haharehon aru imisireg alem tu fahet hahareg ulug hiyag nitmisi halug ap suwonen wan turuk asum lahabeg lit aliliyangge umbagpag turukon anggolopma wan teg lit kinang tu seneg laruhuwen an men ap let naptukon ino men nit niniraham welaruhu,” ulug hiyag isibag.

⁸ Hiyag isibagma ap watfahon arimano misihen oho haharehon ino kim halug alem tu fahet hahareg ulug ap suwon fam hiyag um fug teg latfag.

⁹ Hiyag um fug teg latfagma ap suwon Belsyazar ino indi anggin atfareg akolen orohole amu atukmu ori arimano oho inindi su atfag.

¹⁰ Enekolen enele anggolo urukmu ap suwon ino isingan hol hibareg seni esetuk ambeg kik watfareg amloho fam ele uruk lit, ”Hat ap suwon mondabi holuk welaruhun ulug hi haptuk lahi. Hindimu anggolo wenggeltuk lit hakolen horohole hisiluk fug!

¹¹ Kinang haren tohon aru fam ap niren nunumbasi ulug wel eneptuk laheyon enehime indimu werehon misig an noluk. Indam hat hikni oluk weregma ap ariyen nunumbasi ulug wel eneptuk laheyon arimano inindi anggat teg hag toho ap ino oho indi anggat teg lit alem obog toho fahet seleg toho hiyag isa reg latfag. Hikni ap suwon Nebukadnezaren ap ino ubam, ’Hat ap inindi anggat teg inap, hal inap, alem onoluk inap, suhal alem onoluk inap fahet inikni welaruhun,’ ulug lahapfag.

¹² Ap ino unuk te Daniel hat hikniyen unuk keron Beltsazar suwalfahon ino hime fanowon undama weregma mun ane man ane oluk teg lit indi anggat tehen nei waruk ane fahet fag toho hiyag isa reg, alem hirahowon oho inamap tuk teg, alem anggin tohon oho selehap tuk teg lit wereg. Ari fahet Daniel ino hondohik lalusama at watmisireg haharehon alem tu fahet hahareg ulug seleg toho hiyag hitmisi,” ulug isingan Belsyazar hiyag itfag.

Danielen ubahat fam haharehon selehap tibag ane

¹³ Hiyag itfagma Daniel ap suwon olohotma hondoholug watfagma ap suwon inowen Daniel fam umung haruk lit, ”Hit Yehuda hinap famen an nikni ap suwon Nebukadnezar inowen hininggik lisoho hunumbahik watfahon arimano sehelimuwon hat Daniel aru welahen ano?” ulug kapal hibareg,

¹⁴ ”Aben hat fahet niren nunumbasi ulug wel eneptuk laheyon enehime undama weregma mun ane man ane oluk teg lit indi anggat tehen alem obog toho fahet seleg toho hiyag isa reg lit wereg urukmu holtikik.

¹⁵ Ap alem onoluk inap men hal inap menen haharehon aru kim halusareg alem tu fahet hahareg ulug hiyag nirik wamusa ulug wol eneptikikmu nambeg waharusa angge famen ap arimano misihen oho seleg toho hiyag num fug teg latusa.

¹⁶ Hiyag num fug teg latusama anden hat fahet aren eneg alem mapmu rehon fag toho hiyag isa reg lit alem anggin tohon selehap tuk teg lit wereg urukmu holtikik. Ari fahet haharehon aru kim hamihinteg alem tu fahet hahareg ulug an nubam seleg toho imihin halug anden sum ap suwonen tohon lahap habuhukteg ilembani hag angge emas fam wirihon hanggolop ke wan habuhukmu kinang tu seneg lit an men ap let naptukon ino men nit niniraham welaruhun,” ulug hiyag itfag.

¹⁷ Hiyag itfagma Danielen ele uruk lit, ”Onggo nikni haren an nubam og hitmin ehenon ari ap winon og isahun. An te haharehon aru we saplangge hat hiline kim haminteg tu fahet hahareg ulug seleg toho hiyag hitmin.

¹⁸ Nikni hat ap suwon, Allah palimu werehon inowen hat hikni Nebukadnezar ap suwon welaruhun ulug lahapfareg at unuk palimuwap tibagma aben at suwon ulug wel turuk latfag.

¹⁹ Allahn palimuwap tibagma at fahet ap o pumbuk obog toho werehon, ununggul unuk wal-wal wereg lit enele enemu-enemu urukon arimano enekolen inindi elek turuk lit welatfag. Weregma aren ap tu watmin perukon watuk lit tu oluk welamag perukon embeseruk latfag. Ap tu suwon welaruhu perukon lahaptuk lit tu toron welamag perukon apmayap turuk latfag.

²⁰ Ari roho eneg turuk lit an eneg palimu welahi ulug wel taruk lit aren olok peruk ane eneg ine roho turuk latfagma ap suwon welaruhun fug ulug ap suwon heriyeg ambehen pilapfagma palimu welatfag ane eleg atfag.

²¹ Hat hikni Nebukadnezar ino ap wereg ambehen yanggalfagma ubabut wam pak unubabut hag toho atuk lit mene farema werehon sehelimu welatfag. Weregma wam sapi naruk angge og isaruk hag toho inggilangge og utukmu hibilil poholman ubam wambik waharukmu ebe filik turuk latfag. Ari turuk latfareg itano Allah palimu werehon inowen ap kinang seneg inap ki enesug lit ap tu men tu menen kinang seneg lamuhup ulug mumalehon eneg lahap eneptukon fahet hat hikniyen oluk atfag.

²² Hat hikniyen turuk latfag ane obog toho holuk angge famen nungge fahet hat hinggareg hindi apmayap taruk lahen fug?

²³ Nikni, hat hinggarehen Ninikni poholma werehon olohotma palimuwap taruk lahen: Kubag umbagpag turukon Allah ibamen foroho latfahon arimano hat hambeg walug wahasama hat hori men huhesi yuhon men hiyap winon hat men werehonet kubag arimano fam ik olokon hinanggoho naruk lit usangge perak, emas, tembaga, besi men e men helep men fam wirihon inilen yet haruk elehon, inisanggowen holtuk elehon, nungge-nungge enepelehon arimano nunumbasi ulug wel eneptuk lahep angge famen Allah sat haren tohon seneg lit mun ane man ane hat hubam atukon At inggikmu werehon ino hambolmayap tebesehen.

²⁴ Ari fahet Allahn peruk ane roho haharehon tu inggik yet hehenon fam hahar aha.

²⁵ Haharehon ari ’mene, mene, tekel, peres’ uruk.

²⁶ Aram inap enele roho urukon ari alem seleg toho uruk ane tu: ’Mene’ urukon te tu fahet uruk: Hat ap suwon welaruhun ane hili noenam welaruhun ane fahet Allahn winag harisireg hat pilap habuhuwon horog teg.

²⁷ ’Tekel’ urukon te tu fahet uruk: Aben suburu suwon eneg eneko hilaruk lit toron embeseruk hag toho hat hubabut siyagma hiyarusareg humbahakup.

²⁸ ’Peres’ urukon te tu fahet uruk: Kinang haren seneg lahenon aru minggiroho pirenap tuhupteg Media inap men Persia inap menen seneg lamuhuben og isahup,” ulug Danielen ap suwon ino hiyag itfag.

²⁹ Hiyag itfagma Belsyazar inowen ibag ane hikit toho Daniel ino ap suwonen wan turuk asum lahabe fisibareg ilembani hag angge emas fam wirihon anggolop ke wan tibisibag. Wan tibisibagma Daniel an men ap let naptukon men nit niniraham wereg lit kinang tu seneg laruhu ulug ap hiyag isibag.

³⁰ Hiyag isibag sambil ino hup atfagma Babilonia inap inikni Belsyazar ino aben ware fisibag.