DANIEL 4 - ALLAH WENE

Hun Nebukadnezar inowen inggik pireneg angge nei wibag ane

¹ Ap suwon Nebukadnezar inowen ap o pumbuk obog toho, ununggul unuk wal taneg werehon, enele enemu-enemu uruk inap kinang atogman atogma werehon unubam ele uruk lit, ”Numalikisi, likiya hupmu henehiyeg toho welamuhup ulug hi heneptuk lahi.

² Allah palimu werehonen An wel nabukag ulug enehangge an nubam tirisi ane nahiyehen hiyag hisaruk lahi.

³ We tem toho Allahn enehangge suwon wal haruk lit fano ane aben fog turukon turuk. Kinang Aren ngi roho seneg lit ap enebe oho Aren fet enesugmen eneg mondabi welaruhu!” ibag.

⁴ Ibareg nin eke hiyag isaruk lit, ”An nunuk Nebukadnezar nindi yuwag toho wereg lit nibam fanowon fam nahiyeg toho weregman

⁵ Nei waruk lit nakol atisi. Nohoruk ambehen nei fam yet harikik ane fahet nindi anggin atisi.

⁶ Ari fahet alem onoluk inap obog toho o Babel walinggoho werehon an nolohotma wamuhupteg nei warikik ane fahet alem tu ulug hiyag nirik wamuhuben wol enebik lalihip ulug notsi hiyag isarikik.

⁷ Hiyag isarikikmu inindi anggat teg inap men hal inap men fulu roho turuk inap men suhal alem nonoluk teg peruk inap arimano nolohotma waharusama anden nei warikik ane hiyag isarikik angge famen alem tu fahet warikin ulug iren seleg toho hiyag num fug teg latusa.

⁸ Hiyag nutusa fugmu it onombolim Daniel unuk keron numba anden wel turuk lahiyon unuk hag toho Beltsazar suwaltuson ino an nalukema waharisi. At ino nunumbasi ulug wel turuk laheyon enehime ubam werehon ino nambeg waharisimu nei warikik ane hiyag itikikon te tu,

⁹ ’Beltsazar nare, alem onoluk inap inikni hat welahenon hi haptuk lahi! Nunumbasi ulug wel eneptuk laheyon enehime hubam weregma alem hirahowon misig oho anggin teg peruk lahen fuhon an noluk. Ari fahet anden nei fam yet harikik ane hiyag hitminmu haren alem tu fahet warikin ulug fag toho hiyag nitmihin.

¹⁰ An nibalma nohoruk lit yet harukmen kinang pik-pulmu e yaron weregma yet harikik.

¹¹ E ino yat toho laharisireg ine atisi. Ondomi pohol men hunduhukmu ap kinang atogman atogma werehon arimanowen yet haruk latusa.

¹² E ino inggila fano reg lit anggen anggolo yihik ferukmu onoluk wereg angge obog tohowen anggen tahanoho na waharuk latusa. E ino alma wam pak mene farema werehon sakoma kurukmu suwe pohol ke larukonen e inggikmu ei wirik waharuk latusama lebe ruruk angge obog tohowen e ino anggen narukmu yet harikik.

¹³ Nohoruk lit nin yet harukmen malaikat ap pen isil norukon misig poholman wambik waharukmu yet harikik.

¹⁴ Malaikat inowen ele ine roho uruk lit, ’E aru muhuk felug inggik kong-kong laha feselug inggila lebeg-lebeg embeseruk lit anggen tahanoho hik-hak isahup. Hik-hak isahupmu wam pak mene alma werehon wilip-walap ukag, suwe inggikmu nohorukon oho wilip amag!

¹⁵ E irat ari hele ineyon besi men tembaga men fam wirihonen pug toho kinangma umbusuhupmu anggenma welaruhu. Ap ubabut hag toho wereg ahen ino hibilil poholman ubam wamburukmu filik turuk lit wam pak mene men mangno roho hoholangge sehelimu welamag!

¹⁶ Ap ubabut ino nin atuk lit wam pak unubabut hag amag! Ari roho weregman eneg mo sabirenam lahu,’ ulug ap poholmon inowen hiyag nitisi.

¹⁷ Hiyag nitisireg nin eke nubam ele uruk lit, ’Alem hiyag hirihiyon ino nit ap pen isil noruk ninaben kong toho emberukuk ane hikit toho teko lahu. Teko lahu ane alem ari: Allah palimu werehon inowen ap kinang seneg inap obog toho sen enesug lit ap tu men tu menen kinang seneg lamuhup ulug mumalehon eneg lahap eneptuk lit ap toron oho lahabuk teg angge re ap obog tohowen onoluk aruhu,’ ulug ap poholmon inowen hiyag nitisi.

¹⁸ Nei fam hiyag nitisiyon tu an suwon, Nebukadnezar inowen hiyag hirihimu hat Beltsazaren alem tu fahet warikin ulug hiyag nimin. Alem onoluk inap obog toho an nangginang fam werehonen hiyag num fug tegma nunumbasi ulug wel eneptuk laheyon enehime hat hubam weregma alem tu ulug fag toho hiyag num teg lahen,’ ulug an Nebukadnezaren Daniel fam hiyag itikik.”

Danielen nei pirenon fahet Nebukadnezar seleg toho hiyag itfag ane

¹⁹ ”Hiyag itikikmu Daniel unuk keron Beltsazar suwaltuson ino in atisireg yihi peruk lit tot indi anggin toho weregman an Nebukadnezaren ubam nele uruk lit, ’Beltsazar nare, nei warikik ane alem nungge fahet warisi ulug hat hindi anggin toho welam fug!’ irikikmu Beltsazar inowen hebeloho nubam ele uruk lit, ’Nikni, teko lahu ane nei fam warikinon hat nikni men seli roho werehon unubam teko lelep halug ari fano peruk lahi.

²⁰ Haren yet harikinon ari: E misig yat toho laharisireg ine atisi. Ondomi pohol men hunduhukmu ap kinang atogman atogma werehon arimanowen yet haruk latusa.

²¹ E ino inggila fano reg lit anggen anggolo yihik ferukmu kinangma onoluk wereg angge obog tohowen anggen tahanoho na waharuk latusa. E ino alma wam pak mene farema werehon sakoma kurukmu suwe pohol ke larukonen inggikmu ei wirik waharuk latusa ahen ino

²² nikni hat ap suwon hinggareg fahet warikin. E ari hag toho nikni har oho hebe su atuk lit hine atisimu hebe yat toho poholma laharikinteg kinang atogman atogma seneg lahen.

²³ Nin eke nikni hat suwonen yet harikinon te tu: Malaikat pen isil norukon misig poholman wambik waharisireg ele uruk lit, ’E aru muhuk felug siyahap tuhupteg irat hele ineyon besi men tembaga men fam wirihonen pug toho kinangma umbusuhupmu anggenma wereg lit hibilil poholman ubam waharukmu filik turuk lit wam pak mene farema werehon men mangno roho welamag. Ari roho weregman eneg mo sabirenam lahu,’ irisiyon ari obog toho haren nei fam yet harikin.

²⁴ Nikni hat ap suwonen yet harikinon ino alem Allah palimu werehon inowen hat hubam aruhu ulug kong toho emberisiyon fahet tu imin:

²⁵ Hat ap wereg ambehen yanggal habuhupmu pak mene farema werehon sehelimu welaruhun. Hat naruk angge wam sapi og isaruk hag toho inggilangge og hutukmu hibilil poholman hubam wambik waharukmu filik turuk laruhun. Ari roho weregman eneg mo sabirenam lahu. Lahumu itano Allah palimu werehon inowen ap kinang seneg inap obog toho sen enesug lit ap tu men tu menen kinang seneg lamuhup ulug mumalehon eneg lahap eneptuk ulug holuk aruhu.

²⁶ E irat kinangma umbusuhup irisi ane ari alem tu fahet irisi: Allah poholma werehon inowen mun ane man ane seneg lit wereg ulug nikni haren fag toho uhun sambil ino haren tam ap sen enesug latikin hag toho hebeloho sen enesug laruhun.

²⁷ Nikni, hat ap suwon, komo hapmin ane hindimu hahiyeg toho holeg lamin: Ap let eneptuk laruhun ane ariyen siyag angge nikni hubam werehon ari eleg aruhu. Siyahon hambolma embeselug ap inine elehon hindi enesug laruhun halug likiya hupmu hahiyeg toho welaruhun,’ ulug Daniel inowen komo naptisi.

²⁸ Danielen hiyag nitisi ane ari hikit toho an ap suwon Nebukadnezar nubam atisiyon ari:

²⁹ Pikalem nisanggowen larisimu an nibam o Babel werehon ino unggama laharikikteg

³⁰ nele uruk lit, ’Yihi, o Babel pumbuk suwon ari anden nine roho seneg lit nibam mondabi suwon amag ulug suwap tirikik angge re at ino mondabi palimu wereg ulug aben wel naptuk lamuhup,’ irikik.

³¹ Anden nele obog toho uk fugmen ap ekeyen poholman ele uruk lit, ’Nebukadnezar, hat ap suwon welahen ane obog atisi ulug hiyag hutuk lahi.

³² Hat ap wereg ambehen yanggal habuhupmu pak mene farema werehon sehelimu welaruhun. Hat naruk angge wam sapi og isaruk hag toho inggilangge og hutuk lamuhup. Ari roho weregman eneg mo sabirenam lahu. Lahumu Allah palimu werehon inowen ap kinang seneg inap sen enesug lit ap tu men tu menen kinang seneg lamuhup ulug mumalehon eneg lahap eneptuk ane fahet haren fag toho uhun,’ irisimu

³³ an Nebukadnezaren hol harikik. Irisi ane ari hikit toho nubam atukmu ap wereg ambehen yanggal naptusama wam sapi hag toho inggilangge naruk lit hibilil poholman nubam wambik waharukmu nebe filik turuk lit noruk suwe kut oruk yaron hag atisireg ninggik nuyug ahap suwe uyug ahap hag atisi,” ulug Nebukadnezar inowen ibag.

Hun Nebukadnezar inowen Allah wel tibag ane

³⁴ Nebukadnezaren nin ele uruk lit, ”Malaikat inowen sali emberisi ane hikit toho mo sabirenam atisimu an Nebukadnezaren poholma lahap harukmen aben fano wenggeltuk ane hebeloho nubam waharisi. Waharisimu anden Allah palimu werehon ino wel turuk lit At mondabi oluk werehon ino eneg suwon ulug emberimuwap tirikik. Aren kinang tu mondabi seneg lit ap oho fet enesugmen eneg welaruhu.

³⁵ Ap kinangma werehon obog toho fahet Aren te toron eneg wereg peruk. Otsi poholma werehon men ap kinangma werehon men fahet Allahn peruk ane eneg unubam turukmu ap misihen oho At ubam kapal haruk lit, ’Nangginoho turuk lahen?’ ulug At inggiken turuk ane miyaluk fug teg.

³⁶ Aben fano wenggeltuk ane hebeloho an nubam waharisimu nin ap suwon laharuk lit aben we at eneg ine wereg ulug wel nabuhuben palimu atikik. Ap let naptukon men ap suwon-suwon winon arimano menen hondog naplug waharusareg nin ninikni suwon welaruhun ulug lahap naptusama tam tot apma welatikik angge re ketiya mondabi palimu atikik.

³⁷ Ari fahet ketiya an Nebukadnezaren Allah suwon poholma werehon ino wel turuk lit At eneg suwon ulug palimuwap turuk lahi. Yabuk Aren witil larukon obog toho tem toho fano teko larukmu ap ininggareg wel taruk inap Aren apmayap enebuk teg,” ulug Nebukadnezaren Allah wel tibag.