DANIEL 3 - ALLAH WENE

Nebukadnezaren ap hag angge wiruhukmu wel tuhup ulug hiyag isibag ane

¹ Welatfagma ap suwon Nebukadnezar inowen ap hag angge emas umbagpag turuk angge fam ebe hum toho 3 meter il yat toho 27 meter witil lahibareg Dura tonggoma o Babilonia kinang fam wiroho unduhuk fibag.

² Unduhuk fibareg Nebukadnezar inowen seni esetuk lit ap hag angge wiri ferikikon ino hi ruhuken wamuhup ulug otsi at iraham welatfahon, kinang ngi inap, ap sen enesug inap, ap komo eneptuk inap, uang foroho inap, unggum haltuk inap, alem onoluk inap, ap suwon arimano obog toho wol enepfag.

³ Wol enepfagma ap suwon arimano obog toho ap hag angge Nebukadnezaren witfahon ino hi ruhuk ulug luhal arik watfag.

⁴ Luhal arik watfagma ap suwon amingmingangge ekeyen ele ine roho hiyag isaruk lit, ”Nori, hit o pumbuk obog toho famon wahebon, hununggul unuk wal-wal welahebon, henele henemu-henemu uruk lahebon hunubam ap suwon ele ehekon tu holeg lamek,

⁵ ’Puhuli men pinggong men waruk men ele uruk angge winon oho enele urukmu holtihipteg ap hag angge ap suwon Nebukadnezaren emas fam wiroho unduhuk ferisiyon tu olohotma henelenggen fam hur atihipteg wel tilihip.

⁶ Ap san elenggen fam hur atlug wel timisi fug halug we itano li at ino lisoho indok ambulpul turukon fam hik isalusa,’ ehek,” ulug hiyag isibag.

⁷ Hiyag isibagma puhuli, pinggong, waruk, ele uruk angge winon oho enele urukmu holfareg itano ap o pumbuk obog toho watfahon, ununggul unuk wal-wal werehon, enele enemu-enemu urukon arimano enelenggen fam hur atfareg ap hag angge Nebukadnezaren emas fam witfahon ino wel turuk latfag.

Daniel ori hinahan itanowen ap suwon ele imbisibag ane

⁸ O ino sambil Babilonia inap winonen Yahudi inap fahet huruwe watfareg

⁹ ap suwon Nebukadnezar fam hiyag utuk lit, ”Ninikni hat ap suwon, mondabi holuk welaruhun ulug hi haptuk lahe!

¹⁰ Haren ap hiyag isaruk lit, ’Ap san puhuli, pinggong, waruk, ele uruk angge winon oho enele urukmu hol hamisi halug ap hag angge emas fam witikikon ino olohotma elenggen fam hur atuk lit wel timisi.

¹¹ Ap san elenggen fam hur atlug wel timisi fug halug indok ambulpul turukon fam hik isalusa,’ ulug hiyag isarikinon holtukuk.

¹² Yahudi inap winon haren o Babilonia pumbuk wal-wal seneg lamuhup ulug in eneptikinon ununuk te Sadrakh, Mesakh, Abednego itanowen hat ap suwonen irikin ane sobir isaruk lit haren numba ulug wel turuk lahenon fam sembahyang uk fug angge ap hag angge haren emas fam wiroho unduhuk ferikinon ino hi ruruk eleg,” ulug hiyag irik watfag.

¹³ Hiyag itfagma Nebukadnezar ino ahummu het atfagma ele olok toho otsi hiyag isaruk lit, ”Sadrakh, Mesakh, Abednego hondog enebik lalihip,” ulug mon enepfag. Mon enepfagma ap hinahan itano ap suwon wereg ambeg hondog eneplug watfagma

¹⁴ hun Nebukadnezar inowen kapal isaruk lit, ”Sadrakh, Mesakh, Abednego nori, anden numba ulug wel turuk lahiyon fam hiren sembahyang uk fug angge ap hag angge emas fam wiroho unduhuk ferikikon ino hi ruruk lahep fuhon fahet hiyag nutusa ane ari we tem ano?

¹⁵ Ketiya puhuli, pinggong, waruk, ele uruk angge winon oho enele urukmu hol halihipteg ap hag angge wiri ferikikon olohotma henelenggen fam hur atlug hi rilihip! Hi rul pelihip halug ari fano. Hi rilihip fug halug we ketiya eneg indok ambulpul turukon fam hik hisalusa. Hik hisalusama aben Allah hag toho wereg ulug wel eneptukon san an ninggikmuwen windat henebuk teg?” ulug per enepfag.

¹⁶ Per enepfagma Sadrakh, Mesakh, Abednego itanowen hebeloho Nebukadnezar hiyag utuk lit, ”Alem ari fahet nit nininggarehen ili hulul fug.

¹⁷ Allah niren tohon ubam sembahyang uruk laheyonen nit windat nenebuk teg lit halug Aren indok ambulpul turuk ambehen nit windat nenepmisireg hat ap suwon hinggikmuwen oho tel nenepmisi.

¹⁸ Windat nenepmisi fug halug oho haren numba ulug wel turuk lahenon fam niren sembahyang uk fug angge ap hag angge ninikni haren emas fam wiroho unduhuk ferikinon hi ruruk lamuhuk fug angge re hat ninikni ap suwon holuk toho welamin!” ulug hiyag itfag.

Daniel ori hinahan itano indok ambulpul turukon elma hik isibag ane

¹⁹ Hiyag itfagma Nebukadnezar ino Sadrakh, Mesakh, Abednego unubahet undama ahe laharuk lit orohole olok atfareg e yahatil lahalihipteg indok hum toho yaltihip ulug otsi hiyag isibag.

²⁰ Hiyag isibareg ap sehen seneg inap arimano eneko inine werehon unubam Sadrakh, Mesakh, Abednego ininggik unuyug hele wat eneplihipteg lisoho indok ambulpul turukon fam hik isalihip ibag.

²¹ Ibagma ap hinahan itano hele war enepfareg enesum enebemon men unuyugmuwon men ununggul asumet it enesum winonet wan teg angge indok ambulpul turukmu hik isibag.

²² Ap suwonen ine roho hiyag isibag ane hikit toho indok hum toho yalfagma ambulpul turuk lit narukmu sehen seneg inap itanowen Sadrakh, Mesakh, Abednego indok palimu hik isa larukmen inahan anggolowen sehen seneg inap itano war atfag.

²³ War atfagma Sadrakh, Mesakh, Abednego itano hele wareg angge indok ambulpul turukon elma wambibag.

²⁴ Wambibagma ap suwon Nebukadnezar ino yuk libareg folo-folo in atfareg at let turuk inap unubam ele uruk lit, ”Ap hele waroho indokma hik eseheyon enebe hinahan hik esehe ano?” ulug kapal isibagma iren, ”Ninikni, we tem ehen,” ibag.

²⁵ Ibagma aren te, ”Ap enebe uhan indok pul ke hele loleg angge larukmu indoken enenggek fugmu anden yet isarukmen uhanehon ino ubabut niren tu Allah hag toho wereg ulug wel eneptuk laheyon enemloho hag toho it inim weregma yet haruk lahi,” ibag.

Daniel ori hinahan indok elman windat enepfag ane

²⁶ Ari ibareg hun Nebukadnezar ino indok ambulpul turukon horogma libareg, ”Sadrakh, Mesakh, Abednego nori, Allah palimu werehon amingmingangge welahebon wilip atlug nambeg maniyek!” ibagma Sadrakh, Mesakh, Abednego indokman wilip atlug watfag.

²⁷ Wilip atlug watfagma Nebukadnezar otsi at iraham welatfahon, kinang ngi inap, ap sen enesug inap, ap suwon let turuk inap arimano Daniel ori wereg ambeg luhal arik watfareg ap itano enebe kim isarukmen enehap oho onoruk oho indoken nibag fug, enesum oho siyag atfag fug, enemben oho indoken narukon amben hag toho turuk latfag fugmu kim isibag.

²⁸ Ari reg latfagma Nebukadnezaren ele uruk lit, ”Sadrakh, Mesakh, Abednego it Inikni Allah anden oho wel turuk lahi! Aren amingmingangge malaikat misihen let enebukag ulug monde fehekma wahareg At umalikisi windat enebehek. At umalikisiyen we At ubam wenggel haruk lit an ap suwonen hiyag isihi ane embesehesareg nenebe fano war amul ulug hiyag nerehesa. Iren ap winonen niniknisi ulug wel eneptukon fam sembahyang uruk lit wel tuk fug angge we Allah iren tohon eneg wel turuk.

²⁹ Ari fahet, ’Ap o pumbuk obog toho werehon, ununggul unuk wal-wal werehon, enele enemu-enemu uruk inap misihen oho Sadrakh, Mesakh, Abednego Inikni Allah abug uhu halug kong-kong hik isaruk lit inibam harep pisako eleha fusuhup,’ ulug an notsiyen ap hiyag isil lahuben uruk lahi. Aben niniknisi ulug wel eneptukon misihen oho ari roho unumalikisi windat enebuk fug teg!” ibag.

³⁰ Ibareg ap suwon inowen Sadrakh, Mesakh, Abednego itano unubam o Babilonia pumbuk seneg lamuhup ulug nin palimuwap enepfag.