DANIEL 2 - ALLAH WENE

Hun Nebukadnezar inowen nei tamon wibag ane

¹ Hun Nebukadnezar ap suwon weregman mo piren libagma Nebukadnezar inowen nei wibareg indi anggin atfagma fano roho nohoruk latfag fug.

² Indi anggin toho wereg lit nei wihi ane fahet seleg toho hiyag numusan inindi anggat teg inap men hal inap men usa inap men fulu roho turuk inap men hondog enebik lalihip ulug ap mon enepfagma watfareg ap suwon olohotma in arik watfag.

³ In arik watfagma ap suwon inowen ap arimano unubam hiyag isaruk lit, ”Anden nei wihi ane fahet nindimu anggin toho wereg lit hiren seleg toho hiyag nitlihipmu holmin ulug wol henebihi,” ibag.

⁴ Ibagma ap watfahon arimanowen ap suwon fam Aram inap enele roho hiyag utuk lit, ”Ninikni ap suwon, hat mondabi welaruhun ulug hi haptuk lahe! Haren nei wehenon nit hamingmingangge nunubam hiyag nisamihinmu niren alem ti roho ulug seleg toho hiyag humul,” ibag angge famen

⁵ ap suwon inowen hiyag isaruk lit, ”Hiren nei wihi ane tam ilihipteg alem tu fahet nei wehen ulug hiyag nitlihip. Hiyag nitlihip fug halug hit henebe pal-pal hik hisaruk lit hinibam harep pisako hunusuhubon fahet kong toho imbihi.

⁶ Fuki roho hiyag nitlihip halug anden onggo anggolo og hisaruk lit palimuwap henebuhuk. Ari fahet nei wihi ane ilihipteg alem tu fahet wehen ulug hiyag nitlihip,” ibag.

⁷ Ibagma iren hebeloho uruk lit, ”Ninikni ap suwon, haren nei og hehen ane nit hamingmingangge nunubam tam hiyag nisamihinmu hol hulteg eneg alem tu fahet og hehen ulug hiyag humul,” ibag.

^8-9 Ibagma ap suwon inowen ele uruk lit, ”Henele anggolo il wil larukmen amusunap naptuk lahep ane ari an noluk. Hiren nei wihi ane fahet fag toho hiyag nitlihip fug halug alem angginon misig henebe wal taneg hunubam aruhuwon fahet kong toho imbihiyon honoluk aha. Honoluk teg lit nenele si ane amusun toho hiyag umulmu nit welamul ane fano atmisi ano pehepteg uruk lahep ane ari an noluk. Ari fahet nei wihiyon tam hiyag nitlihip. Hiyag nutukmu hol haminteg eneg nei alem tu fahet wehen ulug tem toho hiyag num teg lahep ulug noluk atmisi,” ibag.

¹⁰ Ari ibagma ap arimanowen, ”Ap kinangmon misihen oho ninikni ap suwon haren heng ehen ane ari hiyag hum fug teg. Ap suwon palimuwon winonen oho ap inindi anggat teg inap men hal inap men fulu roho turuk inap men unubam ari roho heng eneptuson yet isarukuk fug.

¹¹ Ninikni suwon haren heng ehenon ari anggin anggolowen ap misihen oho ti roho ulug ninikni suwon hubam hiyag hum fug teg. We ap enehime fanowon ap iniraham wereg elehon yatma werehonen eneg hiyag hum teg lalep,” ibag.

¹² Ari ibagma ap suwon ino indimu het atfagma oloken alem onoluk inap o Babel werehon obog toho unusuhup ulug otsi hiyag isibag.

¹³ Hiyag isibag ane ari o kema-kema hiyag isil libareg Daniel ori men oho unusuhuk ulug yami enebik laruk latfag.

Nei wibag ane fahet Allahn Daniel hiyag itfag ane

¹⁴ Hun Ariokh ap suwon foroho inap milal eneptukon ino alem onoluk inap o Babel werehon arimano unusimin ulug larukmu Daniel ambeg libareg indi anggat toho wenggel haruk lit

¹⁵ hun Ariokh ino fam, ”Nungge fahet ap suwonen unusuhuk ulug ele olok toho irisi?” ulug kapal hibag. Kapal hibagma Ariokh inowen ap suwonen ibag ane fahet Daniel hiyag itfag.

¹⁶ Hiyag itfagma Daniel ino ap suwon ambeg libareg heng turuk lit, ”Haren nei warikin ane fahet alem tu ulug fobik anden hiyag huruhuk. Ari fahet tot welaruhunteg waruhun ulug hiyag nimin,” ibag.

¹⁷ Ari ibareg Daniel ino ori Hananya, Misael, Azarya inibam weregma libareg ap suwon fam ibag ane hiyag isaruk lit,

¹⁸ ”Ap alem onoluk inap o Babel werehon arimano unusuruk lit nir oho nunusuhup tohon Allah poholmon fam hinine roho heng turuk lamuhupmu Aren indi nenesug lit ap suwonen nei warisi ane alem hirahowon tu ulug seleg toho hiyag nisahu,” ulug hiyag isibag.

¹⁹ Hiyag isibareg Daniel hubanggo fulu roho yet harukmen alem hirahowon ino fag atukmu yet hibag. Yet hibareg Danielen Allah poholmon wel turuk lit,

²⁰ ”Ketiya famen tulug fobik oho mondabi Allah unuk eneg wel turuk lamuhup! Allah eneg alem obog toho oluk teg lit ine roho wereg!

²¹ Hup atuk ane men sakan turuk ane men Allah famen eneg teko laruk. Mun angge man angge anggen urukon li waharuk ane Allah famen eneg waharuk. Ap suwon eke lahap eneptuk lit eke pilap eneptuk ane Allahn eneg turuk. At famen eneg ap onoluk atuk lit inindi anggar atuk.

²² Aren eneg alem undama hirahowon inamap turuk. Hik tegma werehon oho At oluk, seleg oho At ubam eneg wereg.

²³ Nikni Allah, an numbasi Inikni Hat welahen, anden Hat eneg palimu welahen ulug wel Haptuk lahi. Haren nindi anggarap naptuk lit nineyap naptuk lahen. Ketiya niren Hat hubam heng Haptuk latukukon hikit toho hiyag nerehen. Ap suwonen alem ari fahet hiyag netlep peruk ane Haren seleg toho hiyag nerehen,” ulug Danielen Allah wel tibag.

Ap suwonen nei wibag ane Danielen selehap tibag ane

²⁴ Allah wel tibareg Daniel ino hun Ariokh ap suwonen alem onoluk inap o Babel werehon unusuhun ulug hiyag itfahon ino ambeg libareg ele uruk lit, ”Nare, alem onoluk inap o Babel werehon arimano unusuhun fug! An ap suwon ambeg hondog naplug lamihinmu anden nei warikin ane alem tu ulug ap suwon ubam hiyag itmin,” ibag.

²⁵ Ibagma Ariokh inowen folo-folo Daniel ap suwon ambeg hondoholug libareg ap suwon ino fam hiyag utuk lit, ”Yehuda inap famen ininggik lisoho hondog eneplug watfahon sehelimuwon misig nei warikin ane fahet hiyag hitmisiyen hiyahalug wahi,” ibag.

²⁶ Ibagma ap suwon inowen Daniel unuk keron Beltsazar fam kapal haruk lit, ”Anden nei warikik ane tam imihinteg alem tu fahet warikin ulug hiyag nerehen ha reg lahen?” ulug umung hibagma

²⁷ Danielen, ”Inindi anggat teg inap, hal inap, alem nonoluk teg peruk inap, suhal alem onoluk inap misihen oho haren nei warikin ane undama hirahowon fahet hat ap suwon hubam hiyag hum fug teg angge famen

^28-29 Allah alem mapmu rehon selehap turukon poholma wereg. Aren fobik teko lahu ane fahet hat hubam hiyag hitisi. Nikni, hat nohorukmu Aren alem hirahowon seleg toho hiyag isarukon inowen nei fam teko lahu ane ari hiyag hitisi.

³⁰ Nei warikin ane undama hirahowon fahet an nubam eneg seleg toho hiyag nitisi angge famen ap obog toho inindi anggat teg elegma we hun aru eneg indi anggat tehen alem hirahowon ino oluk atisi puk fug! Nei warikinteg wenggel haruk lahenon fahet hat ap suwon hindi anggar amag ulug Allahn hiyag nitisimu ketiya anden hiyag hitmin.

³¹ Nikni, hat ap suwonen fulu roho yet harukmen ap hag toho wirihon humon yet harikin. Ap hag angge yaron umbagpag turukon hat ap suwon holohotma unduhuk latisiyon ino fahet ap obog toho enekol haruk latusa.

³² Ap hag angge ino unggul emas umbagpag turuk angge mondabi fanowon fam, amig men inggik men perak ili ruruk angge fanowon fam, ahum men alunggu men tembaga we tot ili rurukon fam,

³³ uyug besi ineyon ili ruruk elehon fam, uyug indanggen besi ineyonet kinang huluwon wirahowonet fam mangno roho wirigmu yet harikin.

³⁴ Nikni, haren yet harukmen helep misig aben elel ha fugmen amu kobog tulug imbil-imbil wamburuk lit ap hag angge ino uyug besiyet kinang huluwon wirahowonet fam wirihon ino helep inowen kik turuk lit halog toho lin irisi.

³⁵ Lin uruk lit besiyet kinang huluwonet tembaga we tot ili rurukonet perak fanowonet emas mondabi fanowonet obog toho misihim heleben siyahap tirisimu indok abulolo hag atisireg homhomowen fu isarisimu eleg atisi angge famen helep ap hag angge kik tirisiyon ino tom humon atisireg kinang obog toho hondo reg latisimu yet harikin.

³⁶ Nikni, haren nei warikinon fahet ari hiyag hirihireg ketiya alem tu fahet warikin ulug anden hiyag hitmin:

³⁷ Nikni hat ap suwon, ap suwon obog toho onowe welahenon, Allah poholmonen kinang tu hine roho seneg lit ap fet enesug laruhun ulug palimuwap haptisi.

³⁸ Ap kinangmon obog toho o kema-kema werehon men wam mene pak farema werehon men suwe pohol ke larukon obog toho fet enesug laruhun ulug Allahn hat hinggikmu emberisi angge re nikni, hat ap hag angge unggul emas fam wirihon ino hag toho welahen.

³⁹ Ari roho welahen angge famen ap suwon kinang o winama senehon wamuhupteg apmayap haptuk lit kinang tu it ngi amuhup angge famen hat ap suwonen seneg lahen hag toho inine roho seneg lamuhup fug. It eleg amuhupmu hinahanehon ap suwon winon eke wamuhupteg kinang obog toho walinggoho seneg lamuhup. Haren nei fam ahum men alunggu men tembaga fam wirihon ino it fahet yet harikin.

⁴⁰ It hinahanehon arimano eleg amuhupmu uhanehon kinang tu seneg inap lahakup. Lahakupteg yaha besi fam wirihonen mun angge man angge kong toho elehap turukon hag toho it lahakubon arimano besi ineyon hag toho wereg lit kinang tu fam werehon obog toho halog toho siyahap turuk lamuhup.

⁴¹ Hat ap suwonen nei fam uyug amlo men winon kinang huluwon siyahon fam, winon besi fam wirigmu yet harikinon hikit toho it lahakubon arimano minggiroho winon besi ineyon hag toho inine roho welamuhupmu

⁴² winon inine eleg aruhu.

⁴³ Hat ap suwon besi men kinang men mangno roho wirigmu yet harikinon ari hikit toho ap arimanowen hiyap o winamon hilaruk lamuhup angge famen besi men kinang men mangno ruk fug teg hag toho ir oho unuhesi men mangno roho welam fug teg lamuhup.

⁴⁴ It ap suwon lahakubon arimano welamuhup li Allah poholmonen ap fet enesug ane keron inamap tuhu. At inggarehen ap fet enesugmen eneg weregma ap winonen mun angge man angge Aren senehon arimano wa fug teg lamuhup. At fet enesug laruhuwon inowen ap suwon kinang seneg inap obog toho apmayap eneptuk lit elehap enebuhureg ap fet enesug ane keron ino amu mondabi welaruhu.

⁴⁵ Hiyag hirihi ane ari obog toho nikni haren yet harukmen helep misig aben elel ha fugmen amu kobog tulug imbil-imbil wamburuk lit ap hag angge besi tembaga kinang perak emas fam wirihon ino halog toho siyahap turukmu yet harikinon hikit toho teko lahu. Fobik teko lahu ane ari Allah palimu werehon inowen nikni hat ap suwon hiyag hitisi. Nei warikinon tem toho warikinmu alem hiyag hirihiyon ari fano roho hiyag nerehek ulug wenggel haruk laruhun,” ulug Danielen ap suwon Nebukadnezar hiyag itfag.

Ap suwonen Daniel onggo og itfag ane

⁴⁶ Hiyag itfagma ap suwon Nebukadnezar ino orohole han kinangma ying atuk lit Daniel hi ribareg at fahet amben fano-fano angge yaltuk lit naruk angge embelihip ulug otsi hiyag isibag.

⁴⁷ Hiyag isibareg hun Nebukadnezar inowen Daniel ubam ele uruk lit, ”Haren nei warikikon undama hirahowon seleg toho hiyag nerehen. Hiyag nerehenon ariyen an nindimuwen we tik-tem toho aben niniknisi ulug wel eneptukon obog toho we tot tegma Allah haren tohon mondabi palimu wereg ulug noluk aha. At inowen ap suwon obog toho sen enesug lit alem hirahowon oho inamap turuk,” ibag.

⁴⁸ Ari ibareg ap suwon inowen Daniel onggo anggolo og itfareg alem onoluk inap o Babel werehon obog toho inikni hag toho hat wereg lit o Babilonia kinang obog toho seneg laruhun ulug lahapfag.

⁴⁹ Lahapfareg Danielen heng tibag ane hikit toho ap suwon inowen Daniel ori Sadrakh men Mesakh men Abednego menen o Babilonia pumbuk wal-wal seneg lamuhup ulug in enepfagma Daniel inggareg te ap suwon wereg ambeg welatfag.