THRÜNTAN 8 - AMÜSÜH HÜM CL Bible (BSI)

Keking Keamlokhi

¹ Judüki Thrünpuhnü Noa tüsho api lung sangkung ching rhangdung lakhi shiwüh alala lümkhit. Tüsho Thrünpuhnü alomi kumung apung yünshih tüsho kebo keamlo.

² Kenü asükbo tüsho thüning ayinripitbo rihdo, tüsho thüning chingnü tsüng tuklo.

³ Tüsho ke ju alomi chingnü arünnü keamlo. Nimung chikheak thünim akheam ching kebo ngahde tso.

⁴ Judüki khinu thüne, nimung thürükheak thünepü ching sangkung ju Ararat wung kheak keam.

⁵ Tüsho ke ju khinu thürüpü khiungde ngahde yüzah. Khinu thürü, akhuhbe nimung, müzüng mujukbo ngüde kam.

⁶ Nimung yirü dunglim Noanü anihbuhnü athsükhi sangkung ayinripit ju khimshuh,

⁷ tüsho khüyak khülang thiyia yüshih, tüsho alomi kheak ke müngahyi khiungde yüla arüla de phinde tsah.

⁸ Jushu apinü alomi kheak ke ngahkhi kheahpü müthrithrümpü khülang yüshih.

⁹ Tüshe alomi alala kheak ke lakhinü müthrithrümpü keampung mülade sangkung ching Noa kilim alode arü. Apinü akhah chungkhit tüsho müthrithrümpü ju sangkung ching beyuka lu.

¹⁰ Apinü nimung thüne aleang, tüsho kheaküshe apinü sangkung chingnü müthrithrümpü yüshih.

¹¹ Judüki müthrithrümpü arelim oliv yü khülang amün chingnü mukiua lubah arü; tüsho alomi kheaknü ke ngahdo de Noanü mükheah.

¹² Jumonü apinü nimung thüne aleang tüsho müthrithrümpü yüloshih, tüshe ju kheaküa malodarüdebah.

¹³ Noa kam 601 lachoki, akhuhbe khinu atan nipü ke ju alomi chingnü ngahabah. Noanü sangkung yihdokhi ju lokhia bah tüsho alo kungde alakhi ngü.

¹⁴ Tüsho khinu mahne, mukukheak thüne nipü alomi ju kungabah.

¹⁵ Judüki Thrünpuhnü Noa ki tha,

¹⁶ Nü le nü niube, tüsho nü tsührübo le arü niuberübo sangkung chingnü wukhiukang.

¹⁷ Nü lung rhangdung lakhi alala: wuhnubo le shiwüh tüsho alo kheak abüde atsahbe bekhitang, junangde arübo wüh bude alomi alala ching labah.

¹⁸ Jumonü Noa, api tsührübo tüsho aniube le atsührü niuberübo api lung wukhiuk.

¹⁹ Shiwüh, loriloko, alo kheak abüde atsahbe alala arü buh mungji ayannü sangkung chingnü wukhiuk.

Noanü Kingaünkhi

²⁰ Judüki Noanü Atungpuh kilim kingaün sadam khülang thsü, tüsho amüsüh shiwüh le amüsüh wuhnu aban lubah kingaün sadam kheak taka kingaün jih.

²¹ Atungpuhnü arhümthüneakhi münim tüsho api mulong chingnü tha: “Mihtsürü dünkheaknü, api azükinü mulong amütsü laa lalashe, kheaküa inü alo muthrumünean müthsü. Tüsho inü arhimokhi nangde rhangdung lakhi lorilokobo küyimkishe müdükheakshih.

²² Alomi la khiungde mükheanpü kim tüsho yimlupü, athsak tüsho alam, tsüngkam tüsho muzhu, tüsho animung le are mükheamde alabah.”