THRÜNTAN 6 - AMÜSÜH HÜM CL Bible (BSI)

Mihtsürü Mihbukmuyukkhi

¹ Küyimki alomi ching mihtsürü wüh bupü tankihde aliberübo zübekhea,

² Thrünpuh tsührübonü mihtsürü tsührü liberübo jaktsüde ngü; tüsho arünü amürühkhi yamkhün thsü.

³ Tüsho Atungpuhnü tha, “Inü mihtsürü lünnü alapü mümülüjih, tümüde api shih ah; api kam 120 labah.”

⁴ Judüki alomi ching Nephilimrübo lakheah, tüsho ju dunglim Thrünpuh tsührübonü mihtsürü tsührübebo kheak müyam tüsho arü kilim tsührübo zübejih. Jurübo adüsonü athrungrü tüsho mungkhung mihtsürübo lakheah.

⁵ Judüki alomi ching mihtsürü mihbukmuyuk tode alakhi Atungpuhnü ngü, tüsho api mulong ching lümkhi alala mutuklode amütsü lakheah.

⁶ Tüsho apinü alomi kheak mihtsürü thrünkhi dünkheak Atungpuhnü mulong ashide lüm, tüsho api mulong rozhakde alakheah.

⁷ Jumonü Atungpuhnü tha, “Inü athrünkhi mihtsürü tüsho shiwüh, alo ching tsahbe lorilokobo tüsho thüning wuhnubo alomi chingnü adükheakshihbah, tümüde inü arü thrünkhi lakshi thsüdo.”

⁸ Tüshe Noa a Atungpuh miki amüthsüm ngü.

Noa

⁹ Ha Noa lün ah. Noa ju api lünbo ching thiyuro-lungki, khiukdahkhi mihtsürü lakheah, tüsho apinü Thrünpuh lung tsah.

¹⁰ Tüsho Noa tsührü 3 lakheah: Shem, Ham, tüsho Japheth.

¹¹ Alomi ju Thrünpuh miki amütsü tüsho athsümünimnü mide alakheah.

¹² Junangde Thrünpuhnü alomi thsümünima ngü; tümüde mihtsürü alalanü alomi kheak arü lalim athsümünim lakheah.

¹³ Thrünpuhnü Noa ki tha, “Mihtsürü alala kheampü I miki arüdo, tümüde alomi ju arü hode athsümünimnü mia lah; tüsho kheahang, inü arübo alomi chingnü adükheakshihbah.

¹⁴ Nü thsungkheak gofer sangnü sangkung khülang thsang; sangkung ching akhiungshakbo thsang, tüsho alunglim le aleanglim dükhühnü müjimdoang.

¹⁵ Tüsho nünü hanangde athsübah: sangkung ayunglim khahnap 300, atolim khahnap 50, tüsho achanglim khahnap 30 labah.

¹⁶ Nünü sangkung thsungkheak ayinripit khülang thsang, tüsho ju akulim khahnap 1 dükeaknü thsang; tüsho ju rheang lim sangkung khimdopü yukang. Nünü abobe, aphulungbe tüsho akube khinkihde thsang.

¹⁷ Inü thüning bukkhüp rhangdung sheak lakhi loriloko alala dükheakshihpü alomi kheak keking arüshihbah; alomi kheak lüpdükhi ashebah.

¹⁸ Tüshe inü nü kheak tangzüng zobah; tüsho nü tsührübo, nü niube, tüsho nü tsührübo niuberübo nü lung sangkung ching yüzahbah.

¹⁹ Tüsho rhangdung lakhi lüpdükhi nü lung arhang lapü thsüde mungji aban mahnene nünü sangkung ching beyukang; arübo pung tüsho dre labah.

²⁰ Wuhnu mungji, shiwüh mungji, tüsho alo ching abüde atsahbe mungji aban arhang lashihpü mahnene nü kilim arübah.

²¹ Atsühpü thsüde tsühyungbe mungji aban nünü lubah nü tüsho arübo thsungkheak tsanglunga zoang.”

²² Thrünpuhnü api ki thiyukhüm jihkhi nangde Noanü lüpdükhi rhimo.