THRÜNTAN 11 - AMÜSÜH HÜM CL Bible (BSI)

Babel Rünchang

¹ Kheakü alomi alala thiyutha khülang tüsho rukhüh yu lakheah.

² Mihtsürübo aniakhiuklimnü yüde alachoki, arünü Shinar ching adükhün khülang ngü tüsho ju ching la.

³ Arü khülangnü khülang ki thaachih, “Arang, isanü lotaklung thsanü tüsho düshihde zünanü.” Arünü lung müthri lotaklung, tüsho alozhihzhih müthri dükhüh lu.

⁴ Tüsho arünü tha, “Arang, isanü kiuto khülang, tüsho rünchang thüning khiungde thsanü; isanü isa thsungkheak mung khülang thsanü, judü yungsho alomi alala ching isa hiumüzütabahbah.”

⁵ Tüshe mihtsürü tsührübonü athsükhi kiuto tüsho rünchang kheahpü Atungpuh aki.

⁶ Tüsho Atungpuhnü tha, “Mihtsürübo khülang ah tüsho arü alala thiyutha khülang lah, tüsho ha rhimopü tankihchoh; arünü arhimopü lümkhi thsükhi arü thsungkheaknü amukukpü mülade alabah.

⁷ Arang, isanü yükianü tüsho arü yutha yingyingde kamshihanü, junangde arü khülangnü khülang manikhitachihde alabah.”

⁸ Jumonü Atungpuhnü arübo ju chingnü alomi alala ching hiumüzütshih, tüsho arünü kiuto thsüpü tukloabah.

⁹ Jude athsükhinü ha ki Babel de ji, tümütüsho Atungpuhnü alomi yutha alala yingyingabahshih. Ju chingnü Atungpuhnü arü alomi alala ching hiumüzütshih.

Shem Tsühsoniusobo

¹⁰ Ha Shem lünkhe: Shem kam 100 azorü lakheah, tüsho keking hobah kam mahne dunglim atsührü Arphaxad lakheah.

¹¹ Arphaxad lashu, Shem kam 500 la, tüsho tsührübo le tsührübebo lakheah.

¹² Arphaxad kam 35 la, tüsho atsührü Salah lakheah.

¹³ Salah lashu, Arphaxad kam 403 la, tüsho tsührübo le tsührübebo lakheah.

¹⁴ Salah kam 30 la, tüsho atsührü Eber lakheah.

¹⁵ Eber lashu, Salah kam 403 la, tüsho tsührübo le tsührübebo lakheah.

¹⁶ Eber kam 34 la, tüsho atsührü Peleg lakheah.

¹⁷ Peleg lashu, Eber kam 430 la, tüsho tsührübo le tsührübebo lakheah.

¹⁸ Peleg kam 30 la, tüsho atsührü Reu lakheah.

¹⁹ Reu lashu, Peleg kam 209 la, tüsho tsührübo le tsührübebo lakheah.

²⁰ Reu kam 32 la, tüsho atsührü Serug lakheah.

²¹ Serug lashu, Reu kam 207 la, tüsho tsührübo le tsührübebo lakheah.

²² Serug kam 30 la, tüsho atsührü Nahor lakheah.

²³ Nahor lashu, Serug kam 200 la, tüsho tsührübo le tsührübebo lakheah.

²⁴ Nahor kam 29 la, tüsho atsührü Tera lakheah.

²⁵ Tera lashu, Nahor kam 119 la, tüsho tsührübo le tsührübebo lakheah.

²⁶ Kheakü Tera kam 70 la, tüsho atsührübo Abram, Nahor, tüsho Haran lakheah.

Tera Tsühsoniusobo

²⁷ Ha Tera lünkhe: Tera tsührübo Abram, Nahor, tüsho Haran. Haran tsührü Lot.

²⁸ Abuh Tera rhangdung lachoki, Haran a anihbuh asürü lo Kaldearü yo Ur ching sheabah.

²⁹ Judüki Abram tüsho Nahor ane niuberü lu: Abram niube mung Sarai, tüsho Nahor niube mung Iska abuh Haran tsührübe Milka lakheah.

³⁰ Tüshe Sarai aniungyüh lakheah; alibe tsührü mülakheah.

³¹ Teranü atsührü Abram le Haran tsührü Lot, tüsho atsühmeakbe Abram niube Sarai bea lu, tüsho arünü Kanan lo ching yüpü Kaldearü yo Ur chingnü wukhiuk; arünü Haran ching arü tüsho ju ching la.

³² Tera kam 205 la, tüsho Haran ching sheabah.