NEHEMIA 3 - AMÜSÜH HÜM CL Bible (BSI)

Jirusalem Chipi Thsülokhi

¹ Kiuto chipi ju ha ruk thsülokheah. Achangbe Amükeambuh Eliashib tüsho amüyamrü amükeamrübonü Namfimihnu Chipiripit thsübah müsükhit tüsho ripitbo awopung ching wo. Chipi ju Chi Aheangsadam tüsho Hananel Aheangsadam khiungde thsülo.

² Ju khin Jirikhorü, Imri tsührü Zakkurnü thsü;

³ Hassenaa tsührübonü Thüngüh Chipiripit thsü. Arünü abinkiu yuk tüsho ripitbo awopung ching wo tüsho akhrihbe yukde thsüjih.

⁴ Ju khin Hakkoz tsührü Uria tsührü Meremothnü thsü. Ju khin Meshezabel tsührü Berekia tsührü Meshullamnü thsü. Ju khin Baana tsührü Zadoknü thsü.

⁵ Ju khin Tekoarübonü thsü, tüshe kiuto ching azorübonü arü limthorünü athiyikhi ching arü sühdukde mürhimorung.

⁶ Pasea tsührü Joiada tüsho Besodeia tsührü Meshullam anenü Jeshana Awün Chipiripit thsülo. Arünü abinkiu yuk tüsho ripitbo awopung ching wo, tüsho chipi rihpü akhrihbe thsakham.

⁷ Ju khin Aniyüzahlim Euphra kovünor bukkhüp larü Gibeonrü Melatia, Meronothrü Jadon tüsho Gibeon le Mizparübonü thsü.

⁸ Harhaia tsührü Uzziel, sunakingbuhnü ju khin thsü. Rhümthüneabe moli thsübuh Hananianü ju khin thsü; tüsho arünü Jirusalem chipi aküngküng khiungde thsü.

⁹ Hur tsührü Rephaia, Jirusalem lokhüm chamkhüh yakzanshuhbuhnü ju khin thsü.

¹⁰ Harumaph tsührü Jedaianü ju khin, ayam phünide alakheanü thsü. Hashabneia tsührü Hattushnü ju khin thsü.

¹¹ Harim tsührü Malkhija tüsho Moabrü Pahath tsührü Hasshub bünenü ju khin tüsho Ovens Aheangsadam thsü.

¹² Hallohesh tsührü Shallum, Jirusalem lokhüm chamkhüh yakzanshuhbuhnü ju khin thsü (atsührübebonü she rhimorung).

¹³ Hanunnü bebah Zanoa ching larübonü she Jindükhün Chipiripit thsü. Arünü ripitbo awopung ching wode akhrihbe yuk, tüsho Müneanmuru Chipiripit khiungde chipi she limthrip 440nü thsülo.

¹⁴ Rekab tsührü Malkhija, Beth-hakkerem lokhüm chamkhüh yakzanshuhbuhnü Müneanmuru Chipiripit thsülo. Apinü ripit rihbebo yukkham.

¹⁵ Kolhoze tsührü Shallum, Mizpa lokhüm chamkhüh yakzanshuhbuhnü Kenü Chipiripit thsülo. Apinü chipiripit limro thüning lim she muhiudo tüsho ripitbo awopung wode akhrihbe yukkham. Kiulongthsüpuh wündo ki Shela kedükim chipi she David kiuto chingnü limro dukkhi chinde yüzahkhi khiungde thsülo.

¹⁶ Azbuk tsührü Nehemia, Bethzur lokhüm chamkhüh yakzanshuhbuhnü ju khin David kiuyuk, kedükim, tüsho bonungrü-yam khiungde thsü.

Chipi Thsürü Levirübo

¹⁷ Levirü harünü khin ahihkhüh chipi thsülo: Bani tsührü Rehumnü ju khin thsü; Hashabia, Keilah lokhüm chamkhüh kurungkheak yakzanshuhbuhnü api lokhüm chamkhüh thsung thsüde ju khin thsü;

¹⁸ Henadad tsührü Bavvai lokhüm chamkhüh püpü kurungkheak yakzanshuhbuhnü ju khin thsü;

¹⁹ Jeshua tsührü Ezer, Mizpa yakzanshuhbuhnü ju khin molühyam müngüh, chipi kiklopung khiungde thsüde wutu;

²⁰ Zabbai tsührü Baruknü ju khin, Eliashib Achangbe Amükeambuh yam lim yüzahpung khiungde thsü;

²¹ Hakkoz tsührü Uria tsührü Meremothnü ju khin Eliashib yam akheam khiungde thsü.

Chipi Thsürü Amükeamrübo

²² Api dunglim adükhün ching larü amükeamrübonü ju khin thsü;

²³ Benjamin tüsho Hasshub bünenü ju khin arü yam müngüh thsü; Anania tsührü Maaseia tsührü Azarianü ju khin, ayam müngüh thsü;

²⁴ Henadad tsührü Binnuinü ju khin, Azaria yam kinü chipi mühit khiungde thsü;

²⁵ Uzai tsührü Palalnü ju khin, chipi mühit tüsho kiulongthsüpuh yam achangbe aheangpung mikinü tankihde thsü; api dunglim Parosh tsührü Pedai

²⁶ tüsho Ophel ching larü yamlarübonü aniakhiuklim Ke Chipiripit tüsho aheangsadam khiungde thsü.

Chipi Thsürü Püpürübo

²⁷ Ju khin Tekoarünü mahnepü thsüde, aheangsadam thripkhüh Ophel chipi khiungde thsü.

²⁸ Ju khin amükeamrübonü Khora Ripit kumung nihbe yam phünide thsü.

²⁹ Immer tsührü Zadoknü ju khin, ayam müngüh thsü. Shekania tsührü Shemaia, aniakhiuklim chipiripit neakbuhnü ju khin thsü.

³⁰ Shelemia tsührü Hanania tüsho Zalaph tsührü athurukbuh Hanunnü mahnepü thsüde ju khin thsü. Berekia tsührü Meshullamnü ju khin, ayam müngüh thsü.

³¹ Ju khin, sunakingbuh Malkhijanü arüngyam ching tankihrü yam tüsho aheangpung ripit miki shothsümolorü tüsho achangbe khiungshak amühit chipi khiungde thsü.

³² Sunakingrü tüsho shothsümolorübonü akheam thsüde, amühit khiungshak kheaknü Namfimihnu Ripit khiungde thsü.