NEHEMIA 12 - AMÜSÜH HÜM CL Bible (BSI)

Amükeamrü tüsho Levirübo

¹ Amükeamrü tüsho Levirü Shealtiel tsührü Zerubbabel tüsho Jeshua ane yande alung. Amükeamrü: Seraia, Jeremia, Ezra,

² Amaria, Malluk, Hattush,

³ Shekania, Rehum, Meremoth,

⁴ Iddo, Ginnethoi, Abija,

⁵ Mijamin, Moadia, Bilga,

⁶ Shemaia, Joiarib, Jedaia,

⁷ Sallu, Amok, Hilkia, Jedaia. Harü ha Jeshua kim ching arü keoniorü amükeamrübo kurungkheak azothsürübo ah.

⁸ Levirü: Keoniorü lung makshe jihkhi khün berübo: Jeshua, Binnui, Kadmiel, Sherebia, Juda, tüsho Mattania.

⁹ Harünü khün thsürü boto bede aloachih khün thsü: Bakbukia, Unno, tüsho arü müyamrü Levirübo.

Jeshua Achangbe Amükeambuh kheaknü Atrükkhitrü

¹⁰ Jeshua ju Joiakim abuh; Joiakim ju Eliashib abuh; Eliashib ju Joiada abuh;

¹¹ Joiada ju Jonathan abuh; tüsho Jonathan ju Jaddua abuh lakheah.

Amükeam Trük ching Akuthsürübo

¹² Joiakim Achangbe Amükeambuh lachoki guk ching akuthsürübo: Seraia kheaknü Meraia; Jeremia kheaknü Hanania;

¹³ Ezra kheaknü Meshullam; Amaria kheaknü Jehohanan;

¹⁴ Malluki kheaknü Jonathan; Shebania kheaknü Josep;

¹⁵ Harim kheaknü Adna; Meraioth kheaknü Helkai;

¹⁶ Iddo kheaknü Zekaria; Ginnethon kheaknü Meshullam;

¹⁷ Abija kheaknü Zikri; Miniamin tüsho Moadia guk chingnü Piltai;

¹⁸ Bilga kheaknü Shammua; Shemaia kheaknü Jehonathan;

¹⁹ Joiarib kheaknü Mattenai; Jedaia kheaknü Uzzi;

²⁰ Sallai kheaknü Kallai; Amok kheaknü Eber;

²¹ Hilkia kheaknü Hashabia; Jedaia kheaknü Nethanel.

Amükeamrü tüsho Levirü Jipü-yukhean

²² Levirü tüsho amükeamrü yamkhün ching akuthsürübo jipü-yukhean, Eliashib, Joiada, Johanan tüsho Jaddua pürü nimungbo ching Darius Persia kiulongthsüchoki thrüta zo.

²³ Tütüshe Levi yamkhün chingnü akuthsürübo Eliashib tsührü-tsührü Johanan kim lang khiungde dükde kiuthsü hüm ching thrütyuka zo.

Thrünpuh Yam ching Rhimo Thiyikhi

²⁴ Hashabia, Sherebia, tüsho Kadmiel tsührü Jeshua pürünü arü keoniorü lung nungbah Thrünpuh mihtsürü, kiulongthsüpuh Davidnü thsangdankhi yande, bo mahnenü aloachihde Thrünpuh mung shi.

²⁵ Arüngyam aheangrü harünü chipi kinü arüngyam khiungde tsühyungbe zopung khiungshak aheang: Mattania, Bakbukia, Obadia, Meshullam, Talmon, tüsho Akkub.

²⁶ Harübo Jozadak tsührü Jeshua tsührü Joiakim, Nehemia kovünor, tüsho athrütbuh Ezra amükeambuh arü kim ching lakheah.

Nehemianü Chipi Müsükhitkhi

²⁷ Jirusalem chipi müsüchoki, Levirü alala nihbuh lapung chingnü jiyuk, tüsho arünü larüp, bingshang tüsho bingkhungbo shuhbah makshe jihkhi khünbo thsü.

²⁸ Levirü yamkhün chingnü khün thsürü Jirusalem mühi larü tüsho Netopha kiuto mühi chingnü arü,

²⁹ tüsho Beth-gilgal, Geba, Azmaveth chingnü she khün thsürü arübah kiulong thsü.

³⁰ Amükeamrü tüsho Levirünü nihbuh mihtsürü, chipimurungbo tüsho chipi thsungkheak müsükhitde arüng rhimo ju rhimo.

³¹ Inü Juda limberübo chipi ku kheak bekihbahle bo mahne chamjih tüsho Thrünpuh ki makshe jihde amükampü yü. Akhuhbe boto ju tsülimpeang chipi ku kheaknü Müneanmuru Ripit lim dungde yü.

³² Arü dunglim Hoshaia tüsho Judarü limberü chamshahkhühnü yan.

³³ Tüsho ju khin Azaria, Ezra, Meshullam,

³⁴ Juda, Benjamin, Shemaia, Jeremia,

³⁵ tüsho amükeamrü tsührü khungpi shuhbah atsahrübo: Jonathan tsührü Zekaria, Shemaia tsührü, Mattania tsührü, Mikaia tsührü, Zakkur tsührü, Asaph tsührü;

³⁶ tüsho api buhtsührü, Shemaia, Azarel, Milalai, Gilalai, Maai, Nethanel, Juda tüsho Hanani, arünü Thrünpuh mihtsürü David yo khungpi aphuaphu shuh. Tüsho arü müngüh Ezra athrütbuhnü thobah dung.

³⁷ Kedükim Chipiripit ki arünü David kiuto limpeang limduk yande wutubah David yam ho, tüsho kiuto aniakhiukhlim Ke Chipiripit lim alode arü.

³⁸ Makshe jihrü boto püpü chipi kumung yande yü, tüsho I she mihtsürü chamkhüh bebah yü. Isa chinzhinpung tsahhobah Chipi To lim yü,

³⁹ ju chingnü Ephraim Chipiripit, Jeshana Chipiripit, Thüngüh Chipiripit, Hananel Aheangsadam, tüsho Chi Aheangsadam, ju chingnü Namfimihnu Chipiripit tüsho tsahde arünü Arüngyam Chipiripit kinü arün thsü.

⁴⁰ Jumonü makshe jihrü boto mahne Thrünpuh yam ching zhip, tüsho I lung atorü chamshakkhüh lakheah;

⁴¹ tüsho amükeamrübo khungpi mütrü harü she abekheah: Eliakim, Maaseia, Miniamin, Mikaia, Elioenai, Zekaria, tüsho Hanania,

⁴² tüsho arü yanrübo Maaseia, Shemaia, Eleazar, Uzzi, Jehohanan, Malkhija, Elam, tüsho Ezer. Khün thsürü Jezrahianü bebah düsheak achangnü thsü.

⁴³ Ju nimung kingaün ahihkhüh jihde, tüsho mihtsürübo asühkhinü mi tümüde Thrünpuhnü arübo khide asühpü jih. Aliberü tüsho azürübo müsükhitkhi münchi ching be, tüsho arü alalanü alankhi ju limshu chingnü she so.

Arüngyam ching Kingaünkhi

⁴⁴ Judüki arüngyam thsungkheak jihchungkhibo, thürü shihcham, hi akhuh yimlukhi tüsho sangaso akhuh asokhibo zopung thüyam khiungshak aban kheahshihpü, tüsho amükeamrü le Levirü kilim jihpü yakzannü mülükhi nangde kiutobo lu chingnü athremukhungpü mihtsürübo rhimo ching yüzahshih. Judarünü amükeamrü le Levirü kheak asüh,

⁴⁵ tümüde arünü Thrünpuh kingaün tüsho müsühkhitkhi kingaünbo arüng. Kiulongthsüpuh David le atsührü Solomon anenü yakzan thsükhi yande khün thsürü tüsho arüngyam aheangrübonü she nihbuh rhimo ju rhimo.

⁴⁶ Kiulongthsüpuh David tüsho adüso khün thsübuh Asaph kim chingnü, khün thsürübonü Thrünpuh ki makshe jihde mungshikhi rhimo thsü.

⁴⁷ Zerubbabel le Nehemia ane kim ching, Israelrü alalanü arüngyam khün thsürü tüsho arüngyam aheangrü kilim arung jihshihpü thsüde nimung aban thsambah jih. Mihtsürübonü Levirü kilim amüsüh kingaün jih, tüsho Levirünü Aron kheaknü arükhi amükeamrübo kilim shihcham jih.