MATHI 9 - AMÜSÜH HÜM CL Bible (BSI)

Jisunü Thripshe Tukthsürü Thsüngukhi

¹ Jisunü sangkung ching yüzahbah keto hode yü, tüsho anihbuh kiuto ching arü.

² Mihtsürü khürünü thripshe tukthsürü khülang yapkiu kheak yapshihbah api kilim bedarü. Küyimki Jisunü arü akin ngükhea, apinü thripshe tukthsübuh ki tha, “Mulong toang I tsah-a; nü neakbo bahjihdo.”

³ Ha dünkheak yakzan thsangyurübonü arü küdah thsüde lüm chingnü tha, “Ha mihtsürünü Thrünpuh mükhemürangchoh!”

⁴ Tüshe Jisunü arü lümkhi mükheahbah tha, “Tümü thsükhi nüsa mulongbo ching amütsü lümcho?

⁵ Tümütüsho, ‘Nü neakbo bahjihdo,’ yungsho ‘Asürang tüsho tsahang,’ de athakhi küpü amülübe laba?

⁶ Junangde alomi ching neakbo bahjihpü Mihtsürü Tsührü wu lah de nüsanü amükheahbah”–judüki apinü thripshe tukthsübuh ki tha, “Asürang, nü yapkiu hanang tüsho nü yam lim yüang.”

⁷ Tüsho apinü asürübah thüyam lim yü.

⁸ Küyimki botonü ju ngükhea, arünü müyinsah, tüsho mihtsürü kilim hadürü wu jihbuh Thrünpuh shijih.

Jisunü Mathi Jikhi

⁹ Jisu ju chingnü yüde alachoki, apinü ruk-threyam ching Mathi binde ngü. Apinü anihbuh ki tha, “I dunglim yanang.” Tüsho apinü asürübah api dunglim yan.

¹⁰ Jisu ju Mathi yam ching yimtsühde alachoki, ruk-threrü ahihkhüh tüsho aneakrübo arübah api le ajingyanrübo lung yimtsüh.

¹¹ Küyimki Pharisirünü ha ngükhea, arünü api jingyanrübo ki keo, “Tümü thsükhi nüsa thsangyubuhnü rukthrerü tüsho aneakrübo lung yimtsühcho le?”

¹² Ju sobah Jisunü tha, “Phü tsürü thsungkheak thümürü yihnüpü müla, tüshe tukthsürü thsungkheak ah.

¹³ Yüang tüsho ha amütsan anikhitang: Inü mihmüthsüm lunelah, tüsho laksah-a kingaünkhi yung. Tümütüsho amüsührü yungde amüneanrü jipü I arükheah.”

Khümkeak Thsükhi dünkheak Keokhikhi

¹⁴ Judüki Johan Baptijihbuh jingyanrübo arübah Jisu ki keokhi, “Tümü thsükhi isa le Pharisirübonü khümkeak thsücho, tüshe nü jingyanrübonü khümkeak müthsücho?”

¹⁵ Jisunü arü ki alo, “Yamkhünkambuh arü lung lachoki amüyamrübonü atüzhopü kukla de? Tüshe arü kinü yamkhün-kambuh bede atsopü nimungbo arübah, tüsho arünü khümkeak thsübah.

¹⁶ Shenü she khim amürhüt kheak aso mükhüpkihchoh, tümütüsho akhüpkihkhi ju khim kheaknü rukkhichoh tüsho arukrüpkhi amütsübe kamshihchoh.

¹⁷ Yungsho shenü she shihküp-keluh awün ching yukhu amühdo muyukchoh, jude thsüsho shihküp-keluh lahrüpbah tüsho yukhu ju müyeana bahbah, tüsho shihküp-keluh ju athsümünimbah. Tüshe arünü shihküp-keluh aso ching yukhu amühdo yukchoh, tüsho ane chido müthsümünimde lachoh.”

Atorü Tsührübe tüsho Aliberü Thsüngukhi

¹⁸ Apinü arü ki harü thade alachoki, Jihudarü atorü khülang api ki arübah khukningde tha, “I tsührübe kheakü shea lah, tüshe arübah anihbe kheak nü khahnü qiuang tüsho alibe arhang labah.”

¹⁹ Jumonü Jisunü wusubah api yande yü, tüsho api jingyanrübonü api lung yü.

²⁰ Tüsho zukleangnü kam thürükheak mahne thiyih müyande alakhi api dunglim arü tüsho api khim müngam kheak qiu;

²¹ tümütüsho alibenü aküdah thsüde tha, “Inü api khim kheak qiusho, I tsüde angubah.”

²² Tüshe Jisunü rholobah alibe ngü tüsho anihbe ki tha, “I tsührübe, mulong toang; nü akinnü nü ngudo.” Tüsho ju kim chingnü alibe ju nguabah.

²³ Küyimki Jisu ju atorü yam ching yüzahbah khungpi khungrü tüsho mitripde alanajikhi ngükhea,

²⁴ apinü arü ki tha, “Atrütang, tümüde anünübe müshe, tüshe ayapshekhi lang lah.” Tüshe arünü api ki münejih.

²⁵ Tüshe küyimki boto ju wungdo yankhita bahkhea, apinü yüzahbah akhah kheaknü thoa lu, tüsho anünübe ju asürü.

²⁶ Tüsho ha yusheak lomi alala ching bukhide yü.

Müktukrü Mahne Thsüngukhi

²⁷ Küyimki Jisu ju chingnü chamachihkhea, müktukrü mihtsürü mahne api dunglim arübah zhide tha, “David tsührü, ike muzhoang!”

²⁸ Küyimki api thüyam lim arükhea, müktukrü mihtsürübonü api kilim arü. Jisunü ane ki tha, “Inü ha thsükhuklah de nükenü kincho shi?” Anenü api ki alo, “Am, Atungpuh.”

²⁹ Judüki apinü ane mükbo qiude tha, “Nükenü akinkhi nangde nüke kheak rhimoshang.”

³⁰ Tüsho ane mükbo khimshuh. Jisunü ane ki müküpde tha, “Ha she ki she dütha.”

³¹ Tüshe küyimki arü chamachihkhea, anenü api dünkheak ju lomi alala ching thari.

Aduhrü khülang Thsüngukhi

³² Arü wukhiukde alachoki, mihtsürü khülang amünean me yüzahbah thiyu müthakhukde alakhi Jisu kilim bedarü.

³³ Küyimki amünean me ju ayankhitkhea, mihtsürü junü thiyu tha, tüsho botonü müyinsahde tha, “Israel ching hanangde müdünjiakheah.”

³⁴ Tüshe Pharisirübonü tha, “Ha amünean mebo atobuh hode apinü amünean mebo yankhitchoh.”

Rhimorübo Nüklah

³⁵ Jisunü arü sinagogbo ching thsangyude, kiulongthsü yusheak atsü thsangyuthsangrade tüsho tukthsü le phüthsüphürambo thsüngude kiutobo tüsho kiulongbo alala ching yü.

³⁶ Küyimki apinü botobo ngükhea, apinü arü muzhode lüm, tümütüsho arübo aneakrü mülakhi namfimihnubo nangde thsümütsüde tüsho arungrü mülade alakheah.

³⁷ Judüki apinü ajingyanrübo ki tha, “Yimlupü tode lah tüshe rhimorübo nüklah.

³⁸ Jumonü thulu yimlupung ching rhimorü arüshang de yimlu putungpuh ki nüsanü tamkhüntamnüang.”