JOHAN 14 - AMÜSÜH HÜM CL Bible (BSI)

Limro, Thiyuro tüsho Rhangdung

¹ “Nüsa mulong düthsümünim, nüsanü Thrünpuh kheak kinang, tüsho I kheak she kinang.

² I Buh yam ching khiungshak ahihdo lah; jude yungkhülaa, inü nüsa ki thaa labah, I nüsa thsungkheak lapung thsakhampü yüchoh.

³ Tüsho nüsa thsungkheak lapung thsakhampü I yüsho, I alode arübah tüsho I kilim nüsa bea lubah; junangde I küching labanü, nüsa she ju ching labah.

⁴ Tüsho nüsanü I yükhi limro mükheahlah.”

⁵ Thomanü api ki tha, “Atungpuh, nü külim yüchonü isanü mümükheah, dale küde thsah isanü limro mükheahpü?”

⁶ Jisunü api ki tha, “I limro, thiyuro tüsho rhangdung. I hode yungsho shenü she I Buh kilim marüchoh.

⁷ Nüsanü I mükheahkhülaa, I Buh she mükheah-a labah; tüsho kheakünü rünbah nüsanü api mükheahlah tüsho api ngüdo.”

⁸ Philipnü api ki tha, “Atungpuh, isa ki Abuh huhang, tüsho ju isa thsungkheak asuhdah ah.”

⁹ Jisunü api ki tha, “Philip, I nüsa lung khide ruhde lado, tüsho kheaküshe nünü I mümükheah de? Shepünü I ngüdünü I Buh ngüdo; jumonü küde thsah nünü, ‘Isa ki Abuh huhang,’ de thacho?

¹⁰ I Abuh kheak lah tüsho Abuh I kheak lah de nünü mükincho de? Inü nüsa ki thakhi yubo ju I yo thiyukhüm-sühmühnü masuk tüshe I kheak lakhi I Buh rhimo rhimochoh.

¹¹ I Abuh kheak lah tüsho I kheak Abuh lah de kinang, yungsho rhimobo thsülimnü I kheak kinang.

¹² Atsütsü inü nüsa ki thachoh, shepünü I kheak kinchonü, inü arhimokhi rhimobo apinü she arhimobah; tüsho harü kheaknü atobe rhimobo apinü arhimobah, tümütüsho I Buh kilim I yüchoh.

¹³ Tüsho nüsanü tümüpürü I mung chingnü akheangbanü inü arhimobah, junangde atsührü kheaknü Abuh müretahbah.

¹⁴ Nüsanü tümükhüh I mung chingnü kheangsho, inü ju rhimobah.

Amüsüh Me Alokhikhi

¹⁵ “Nüsanü I muzhosho, I yuzüngbo zoang.

¹⁶ Inü I Buh ki tamkhüntamnübah, tüsho apinü nüsa kilim arungrü püpü jihbah, junangde apinü nüsa lung lünnü alabah–

¹⁷ ju thiyuro Me. Alominü api müleangkhikhuk, müngü yungsho api mümükheah; tüshe nüsanü api mükheahlah, tümüde api nüsa lung lah tüsho nüsa kheak labah.

¹⁸ “Inü nüsa mürerübo nangde mübahjih; I nüsa kilim arübah.

¹⁹ Anükhüh labah alominü I müngüde akambah, tüshe nüsanü I ngübah, Tümütüsho I lale, nüsa she alabah.

²⁰ Ju nimung I Abuh kheak lah, nüsa I kheak lah, tüsho I nüsa kheak lah de nüsanü amükheahbah.

²¹ Shepü I yuzüngbo la tüsho jurübo zochonü apinü I muzhochoh. Shepünü I muzhochonü I Buhnü amuzhobah, tüsho inü api muzhobah tüsho api ki I akhiuka huhbah.”

²² Judanü (Iskariot yung) api ki tha, “Atungpuh, nünü küde thsah alomi ki yungde isa ki akhiuka huhba?”

²³ Jisunü api ki alo, “Khürünü I muzhosho, apinü I yu zobah; I Buhnü api muzhobah, tüsho ike api kilim arübah tüsho api lung ike yam thsübah.

²⁴ Shepünü I mümuzhonü I yubo muzochoh; tüsho nüsanü asokhi yu ju I yo yung tüshe I thiyikhi I Buh yo ah.

²⁵ “Harü I nüsa lung lachoki inü nüsa ki asukdo.

²⁶ Tüshe I mung chingnü I Buhnü athiyipü lakhi arungrü, Amüsüh Menü nüsa ki alala thsangyubah, tüsho inü nüsa ki thakhi alala lümkhitshihbah.

²⁷ Inü nüsa lung mungtsü zojihchoh, I yo mungtsü inü nüsa kilim jihchoh; alominü ajihkhi yung nangde inü nüsa kilim jihchoh. Nüsa mulong düthsümünim, yungsho dütre.

²⁸ Inü nüsa ki, ‘I yüchoh tüsho nüsa kilim alode arübah,’ de athakhi nüsanü sodo. Nüsanü I muzhosho, nüsa asühachihbah, tümütüsho inü tha, ‘I Buh kilim I yüchoh,’ tümüde I Buh ju I kheaknü atobe ah.

²⁹ Tüsho kheakü ju müdünjiyide inü nüsa ki thado, junangde küyimki ju dünjibanü nüsanü akinbah.

³⁰ Kheaküa inü nüsa lung masukachih, tümüde ha lomi yakzanshuhrü arüchoh, tüsho api ju I ki tümü müla.

³¹ Tüshe inü I Buh muzholah de alominü amükheahpü, tüsho I Buhnü thiyuzüng jihkhi nangde inü rhimochoh. Asürang, isanü ha chingnü yüanü.