Ɛfɛ́ɛs 5 - Nɛsɔ́g nɛ́ Nɛwa

Ɔlaa wó a kisəə

¹ Wɔnɔ́ ná polɛɛ́ pɔɔ́n pá Táán alɛɛ́ anyɔ́ŋɛn, ágɔ́nɛ́gɛ́an agɛɛlɛ lɛ́ póɛn wɔnɔ́ nyɔ́lɛ́

² Pólaa a nnyɔ́ŋánán wɔnɔ́ ná Kilíʼtus ayɛ́bɛnyɔ́ŋɛn aábod amɛ́ʼkɛn ɔlaa wə́ə́ŋ na Táán a kidíídí kiə́s wɔnɔ́ ngab na kɛfɔny kɛ́ kíənug wɔnɔ́ lamɛ́ndaʼ ɛlaŋ

³ Polɛ pɔɔd pá páagoob na Táán, pɛbán pɛ́ pɛ́aboyáág pinig a nkó wɔnɔ́ kubúlim na ɔʼkɛ́ɛd, oó lɛ́ na ɔnɔ́mɛɛd nyɔ́ ɔdɛɔ́gɔ waaŋ, wɔnɔ́ kaag kó əngis a yoom yɛ́ ɛ́dɛɔ́gɔ yááŋ, pɛ́dɛnjɛ́ɛ́n a kɛgaágadɛ kɛáŋan, pídinjə́búŋíí tɛn kɔ.

⁴ Kɛ́ʼtɛ́ɛ́lɛn tɛn ɔmbɔ́ lɛ́ pósɔyɛla tɔgɛ́ɛ́ tó fúlúus, tɔgɛ́ɛ́ tó masɔɔ, tɔgɛ́ɛ́ tó pinig. Poɛ́ʼkɛnan agá Táán pisoyidiʼ.

⁵ Lɛŋáan kɔŋɛʼ kɔŋɛʼ lɛ́ pɔɔd pá pə́əbúlimən na pagɛ́ɛd, ɔmbɔ́ lɛ́ na panɔ́mɛɛd pá pɔ́dɛɔ́gɔ pɔ́ɔ́bɔn, na pɔsɔ́g pá pálɛɛ́ agɛɛlanɛ pɛbán pɛ́ pɛ́agaag mɔɔd pinig a nkó, pádɛágɛɛn na ngab a Nɛlaamɛʼ nɛ́ Kilíʼtus na nɛ́ Táán. Ɔmbɔ́ tɛn pɔɔd pá nɔgág pádɛágɛɛn na ngab a Nɛlaamɛʼ nɛ́ Kilíʼtus lɛ́, mɔɔd o nɔgág alɛ əgusiəd moom móom a əngis yə́ə́ŋ agaáyɛn Táán.

⁶ Mɔɔd na mɔɔd ədiíbulígə na piyəg pɛ́ tɔgɛ́ɛ́. Masɛd móom náan aa máagɛɛlɛ lɛ́ Táán yóób ilúún na pɔɔd pá pə́ədə́əmini oʼto na nyɔ́lɛ́.

⁷ Podɛnjɛ́ɛ́n anɛ́ɛ́n na yoom ɔmbɔ́ ímuʼ yɛ́ poágɛɛlɛ na mbod ɛ pɔɔd wɔnɔ́ yɛ́ɛy.

⁸ A kɛnɛŋ kɛ́ kalaʼ, poyɛ́ɛ a mbin, náa nɛ́gɔŋ yɛ́ɛnɛ poándɛɛ́ paladáán na Sə́dúk, poándɛ a kɛmoámoáŋ Laaláan anɛ́ɛ́n wɔnɔ́ pɔɔ́n pá kɛmoámoáŋ

⁹ lɛ́ pɛbán pɛ́ pɛ́alon a kɛmoámoáŋ pɛ́lɛ pɛbán pɛ́ pɛŋɛʼ, pɛbán pɛ́ sáád, pɛbán pɛ́ pafɔ́lɔ́b.

¹⁰ Ágɔ́nɛ́gɛ́an lɛ́ pólɛŋ nkə kɛ́ kiə́gə́mmi Sə́dúk.

¹¹ Pudisiə́d ngab a pɛbán pɛ́ nsíísí iyó, pɛbán pɛ́ pɛ́lɛɛ́ a mbin a kaadɛ, kwaŋɛ́an agá pɛ́lɛ́ a táán.

¹² Aándɛ tɛágoóbɛla kɔmɔɛ́d oʼto kono agosɔyɔ pɛbán pɛ́ pɔɔd pə́mmú páagɛɛlanɛ a pɛɔsɛ́g.

¹³ Náa, yoom yiim yɛ́ yándɛɛ́ ɛʼkwaŋɛán, yáʼkolon a kɛmoámoáŋ.

¹⁴ Kɛ́lɛ lɛ́, yiim yɛ́ yáʼkolónɛ́ɛ́ a kɛmoámoáŋ, yándɛ kɛmoámoáŋ. Kólɛ́ aa pálɛɛ́ əgusəə pɔ́nɔ́: Wɛ nyɔ́ olɛɛ́ a ɛnɔ, wóndig. Wɛ nyɔ́ wəə́ʼkugúú wóndɛg. Áay, kisəə kɛ́ Kilíʼtus kɛ́agɛɛn na wɛ.

¹⁵ Álɛ́ŋɛ́an anɛ́ɛ́n na ɔlaa wááŋan wó poálaa. Pudiyə́siə́díí wɔnɔ́ piyəg, puə́siəd agá wɔnɔ́ pɔɔd pá pálɛɛ́ na nsiŋ.

¹⁶ Kɛnɛŋ kiim kɛ́ pomɔ́ɔ́ŋ ngə́ ɛgɛɛlɛ kɔŋɛʼ a ɔlaa wóonɛ ó nɛ́gɔŋ, ɛlɛ́an lɛ́ mədúg móonɛ má tigódíí málɛ mabɛ́.

¹⁷ Puʼkóodi lɛ́ púyəgəni anɛ́ɛ́n, ágɔ́nɛ́gɛ́an koob nkə kɛ́ Sə́dúk alɛɛ́ anyɔ́ŋɛn lɛ́ póɛlɛ.

¹⁸ Podɛndáŋ kaáyɛ́ʼkɛn a maloʼ koŋo máság koboŋwáŋɛ lɛ́, kɛnɛŋ kɛ́ máʼkoboŋwáŋɛɛ́, máaboodom a pɛbán pɛ́ pɛ́dɛɔ́gɔ pɛŋɛʼ. Náa, Uŋun wó Ufúlúʼtú úyə́əg na pəŋi.

¹⁹ Puə́bulid, púdúmə pɛʼkwáá na mbod ɛ pɛlɛ́ɛ́ ngim yɛ́ Uŋun wó Ufúlúʼtú wáagɛɛlɛ lɛ́ púdúmə. Púdúmən Sə́dúk pɛlɛ́ɛ́ na ɔʼtɛ́m wááŋan ungim, agomonyáadɛ

²⁰ A niiŋ nɛ́ Sə́dúk wəəs Yə́sus Kilíʼtus, púsoyidəni Táán Sɛ wəəs pɛnɛŋ piim, a pɛbán piim.

Ɔlaa ó na panom na pagán

²¹ Sɔ́g yóóbɛn sɔ́g, a nnyáádɛ́ yɛ́ polɛɛ́ na yɛ́lɛ́ na Kilíʼtus.

²² Pəŋi pagɛ́ɛd pá kodɔn, puóbɛn panom pááŋan wɔnɔ́ ná polɛɛ́ agoóbɛn Sə́dúk

²³ lɛ́, ɔnɔ́mɛɛd alɛ nkúm yɛ oʼkán wəəŋ, wɔnɔ́ ná Kilíʼtus alɛɛ́ nkúm ɛ pəə́liʼtiniʼ, nyɔ́lɛ́ Ongɔɔyɛʼ wɔɔbɔn o pɔ́lɛ́ pá pálɛɛ́ nkó yəəŋ.

²⁴ Pagɛ́ɛd pógóódi anɛ́ɛ́n lɛ́ póóbɛn panom pɔ́ɔ́bɔn a pɛbán piim, wɔnɔ́ ná pəə́liʼtiniʼ pálɛɛ́ agoóbɛn Kilíʼtus.

²⁵ Pəŋi panɔ́mɛɛd pá poáʼkogóanɛɛ́, nyɔ́ŋɛ́naan pagán pááŋan wɔnɔ́ ná Kilíʼtus yɛɛ́nyɔ́ŋɛn pəə́liʼtiniʼ súʼtə́ə́ amáyɛ́ʼkɛ́nɛ́ɛ́ nyɔ́lɛ́nyɔ́amɔɛ́d a kidíídí kɛɔ́bɔn.

²⁶ Ayɛ́ɛ́lɛ náan lɛ́ ná áboyɛ́ɛlɛ pɛ́ɛn tə́ngə́d a oʼto ó Táán, ná aáʼkoboósɔgɛn na məní má ɔsɔgɛn, na a nɔgɛ́ɛ́ tɛn.

²⁷ Yɛɛ́nyɔ́ŋɛn lɛ́ pəə́liʼtiniʼ póóloodi a udi wə́ə́ŋ ná pándɛ pisig pɛ́ kúfuʼ, kibuu ɔmbɔ́ kímuʼ fiɛ́d na pɔ́lɛ́, nti yɔɔbɔn lɛɔgɛ lɛɔgɛ, pamoáŋáán, ɛgom fiɛ́d.

²⁸ Náan aa kíəguunə lɛ́ panɔ́mɛɛd pányɔ́ŋɛn pagán pɔ́ɔ́bɔn wɔnɔ́ ná pálɛɛ́ anyɔ́ŋɛn nkó yɔɔbɔn. Nyɔ́ aányɔ́ŋɛn oʼkán, amányɔ́ŋɛ́nɛ́ɛ́ nyɔ́lɛ́nyɔ́amɔɛ́d

²⁹ lɛ́, mɔɔd ɔdɛɔ́gɔ kɔ nyɔ́ aáʼkoyaŋɛɛ́ kobɛnɛn nkó yəəŋ, ndóo, alɛ amɛ́nɛ agá yɛ́lɛ́, əə́muyə́gəʼkəəŋəni wɔnɔ́ ná Kilíʼtus alɛɛ́ agɛɛlɛ na pəə́liʼtiniʼ.

³⁰ Adɛ́ pəsi piim tɛlɛ pɛʼkab pɛ́ nkó yəəŋ yɛ́ɛy a?

³¹ Əgín wɔnɔ́ ná kɛ́lɛɛ́ kidiídílə́ a Kálaʼtaʼ lɛ́: «Kólɛ́ aa ɔnɔ́mɛɛd alɛ́ɛ́ kudi ə́mə́dí sɛ na ŋŋí agɛɛn agaálad na oʼkán, pándɛ anyóon úmmuʼ súg»

³² Kɛa kɛ́ kɛdám kɛ́ kɛbán kɛɔ́sɛ áay a nkə kɛ́ mbə́ʼkusəlií nɛ́gɔŋ, kɛ́lɛ kɛbán kɛ́, na Kilíʼtus na pəə́liʼtiniʼ.

³³ Náa kɛ́lɛɛ́ anɛ́ɛ́n a pəŋibáamɔɛ́d lɛ́, ɛ́nɛ́ mɔɔd ogóódi lɛ́ ányɔ́ŋɛn oʼkán wɔnɔ́ ná alɛɛ́ agaányɔ́ŋɛn nyɔ́lɛ́nyɔ́amɔɛ́d. Ɔʼkɛ́ɛd ungim ogóódi tɛn koóbɛn onom.