Ɛfɛ́ɛs 4 - Nɛsɔ́g nɛ́ Nɛwa

Nkó ɛlɛ kilúd kɛ́ yoom əgín náan kímuʼ

¹ Mɛ nyɔ́ ndɛɛ́ a yoog yɛ njaan lɛ́ ndɛ əgugudin Sə́dúk, ndaboyɔ́sɔ́gɔlɔn pəŋi pá Táán ayɛ́boodɔ́ŋɔn. Ndaboyɔ́sɔ́gɔlɔn lɛ́ puə́siəd kɔŋɛʼ a ombod wó wáásɛʼtan na ntɔ́ŋɔ́nɔ́n yɛ́ Táán ayɛ́boodɔ́ŋɔn.

² Ə́súlíən nkó a nsí, póɛn na ntɛ́m ngwiyə́ə́n, pónóʼtan ntɔ́b, pónóʼtanan pəŋi na pəŋi a nnyɔ́ŋánán.

³ Ə́yísíən lɛ́ pólaa əgín unuʼ wááŋan úmmuʼ wó Uŋun wó Ufúlúʼtú ómáboyɛ́ʼkɛn a uŋóón wó pugódíí pəŋi na pəŋi.

⁴ Nkó ɛlɛ kilúd kɛ́ yoom əgín náan kímuʼ súg, ɛlɛ nɛágɔnyɛd nɛ́ pəə́liʼtiniʼ. Uŋun wó Ufúlúʼtú tɛn ólɛ úmmuʼ. Táán ayɛ́boodɔ́ŋɔn tɛn lɛ́ ná póɛn na nɛmɛnaʼ pɛda nímuʼ.

⁵ Sə́dúk alɛ úmmuʼ súg, kəə́liʼtiniʼ tɛn kúmuʼ, ɔsɔgɛn úmmuʼ.

⁶ Táán alɛ úmmuʼ súg, Sɛ o mɔɔd ungim, alɛ alaamɛ ungim, alɛ əgugud a ungim, alɛ tɛn a mɔɔd ungim.

⁷ Mɔɔd ungim ogóódi nkə kɛ́ Táán ayɛ́moyɛ́ʼkɛn a kɔdɛ́ɛ ɔʼtɛ́m kuə́ŋ, əgín tɛn wɔnɔ́ ná Yə́sus Kilíʼtus əyə́líʼtíníí na ɔʼtɛ́m wə́ə́ŋ ungim.

⁸ Lɛ́ kɛ́lɛ kidiídílə́ a kálaʼtaʼ lɛ́: «Ná yɛɛ́bág a mɔɛn, ayɛ́ɛ́n na pɔɔd pá a yoog yɛ njaan; Amɛ́ʼkɛ́nan moom na pɔɔd»

⁹ Nkə aa kɛ́lɛɛ́ lɛ́ yɛɛ́bág a mɔɛn? Kɛ́lɛ anyóon lɛ́ yɛɛ́yáŋ əsuu a nsí.

¹⁰ Nyɔ́ yiísúú a nsí, alɛ tɛn nyɔ́ yɛɛ́bág a mɔɛmɔɛ́n lɛ́ ná yáálam a nsí ngim.

¹¹ Nuboʼ nó ayɛ́ɛ́lɛ nólɛ lɛ́, ayáába maʼtɛ́lɛm lɛ́, póonɛ pɔɔ́n pá maʼtom, pə́mmú palɔɛgɛʼ pɛbán pá Táán, pə́mmú pənuŋ, páadáŋananɛ pɔsɔ́g, pə́mmú tɛn palaamɛʼ Tɔsɔm Tólaŋ, pɔsɔ́g pə́mmú pɛlág

¹² Ayɛ́ɛ́lɛ náan a pá páagoob na Táán lɛ́ ná pɛ́ɛn na toɛn tó kɛɛlɛ pigólí piə́ŋ, agɛɛlɛ lɛ́ ɛgɔny ɛ́ pəə́liʼtiniʼ ɛ́yam.

¹³ A niɛlɛ nɛ́ɛn, tɛagɛɛn paladáán pəsi piim unuʼ úmmuʼ a kəə́liʼtiniʼ. Pəsi piim tɛ́ɛlɛŋ kə́mmú kɔŋɛʼ kɔŋɛʼ Mɔɔ́n o Táán, tɛ́ɛgon əgiig a niɛŋ nɛ́ Kilíʼtus.

¹⁴ Tidiə́giʼkini kɛɛn poómbaa kə́mmú, tɛdiɛn tɛn wɔnɔ́ ɛyaa ɛ́ kɛʼkɔ́m yɛ́ piʼtús pɛ́ məní pɛ́lɛɛ́ əgudíʼkəni. Pɔɔd pá məlíg pə́diə́bilígə tɛn kə́mmú na tɔgɛ́ɛ́ toɔ́bɔn tó muyən əgibidə́əŋi a ɔsɛd.

¹⁵ Náa, tɛmaʼkodɛ́ananɛ pafɔ́lɔ́b a nnyɔ́ŋánán yɛ́ ɛlɛɛ́ pəsi na pəsi, tɛayam a pɛbán piim a niyə́ən nɛ́ tiə́yə́ən ngə́ ɛ Kilíʼtus nyɔ́ alɛɛ́ oʼto ó pəə́liʼtiniʼ.

¹⁶ Nyɔ́lɛ́ aa ayɛ́ɛ́lɛ lɛ́ pɛʼkab pɛ́ nkó piim píɛn pɛladáán, pɛ́yɛɛn nkó mmuʼ. Angɛŋ əngim aa yáagɛɛlɛ lɛ́ nkó yɛ́ɛn ndadáán. Kɛnɛŋ kiim kɛ́ ɛ́nɛ́ kɛʼkab kɛ́lɛɛ́ agɛɛlɛ pigólí piə́ŋ, nkó ngim yaayam a nnyɔ́ŋánán.

Ɔlaa ó kalaʼ na ó nɛ́gɔŋ

¹⁷ Nkə kɛ́ ndábodɛ́anɛ, ndə́əgiiʼkini kubiʼti a niiŋ nɛ́ Sə́dúk, kɛ́lɛ lɛ́: Pudiyíʼkíni kə́mmú kodáŋana wɔnɔ́ pɔɔd pá pɔ́dɛɔ́gɔ na kəə́liʼtiniʼ, wɔnɔ́ pɔɔd pá páadáŋana əgín wɔnɔ́ ná nsiŋ yɔɔbɔn yɛ́ ɛdɛáboɛ́bɛɛ́, yaábodɛ́anɛ.

¹⁸ Nsiŋ yɔɔbɔn ɛlɛ na mbin, na lɛ́ ɔlaa ó Táán ólɛ ungən na pɔ́lɛ́ lɛ́ pándɛŋɛn yoom, ntɛ́m yɔɔbɔn tɛn nnasáŋ.

¹⁹ Pɔ́dɛɔ́gɔ agolɛŋ kə́mmú kocálɛn kó kɛbán kɛ́laŋ na kɛ́ kɛbɛ́. Pə́əgəə́siəd ɔmbɔ́ tuə́, páanyóŋɛnɛla əgín kɛɛlanɛ pɛbán pɛ́ pɛbɛ́ piim pɛ́ ntɛ́m ɛlɛɛ́ agonyóŋɛnɛla lɛ́ pɛ́ɛlɛ, kídibuyə́bi.

²⁰ Náa a pəŋi, adɛ́njaŋ nkə kɛ́ poyáʼkan aa kɛ́ɛg a Kilíʼtus.

²¹ Pafɔ́lɔ́b pá páyɛ́boyáʼkánánɛ a oʼto ó Yə́sus, poɛ́lɛ́ŋ koob pɔ́lɛ́, isuŋ ɛ́dɛɔ́gɔ.

²² Pugóódi anɛ́ɛ́n lɛ́ púdi madáŋánánɛ́ mááŋan má kalaʼ, púudi ɔlaa wááŋan ó pɛag pɛ́ osɛ́ɛ́ na pɛbán pɛ́ pɛbɛ́ pɛ́ poyɛ́ɛ agonyóŋɛnɛla kɔ, pɛbán pɛ́ məlíg pɛ́ pɛ́aboyɛ́ɛlɛ lɛ́ púwu.

²³ Puə́lis a ɔlaa wó ongwa a udi ungim. Puə́lis náan a ɔʼtɛ́m wááŋan na a uŋun wááŋan.

²⁴ Puə́nííg ɔlaa wó ongwa wó Táán ayɛ́ɛ́lɛ a kɛŋwáŋánán kiə́ŋ Wó wóoloodi ɔlaa wó pafɔ́lɔ́b páagɛɛ́ʼkɛn a ɔlaa ó sáád na a ɔlaa wó a ngə́ ɛ Táán.

²⁵ Pudiyíʼkíni kulígənən kə́mmú, ɛ́nɛ́ mɔɔd ogóódi kodɛ́anɛ fɔ́lɔ́b na sɔ́g lɛ́ pəsi piim tɛlɛ pɛʼkab pɛ́ nkó mmuʼ.

²⁶ Wɛ nyɔ́ ilúún ɛ́mágoobány, odɛnyɛ́ɛ́lɛ kɔbɛ́, ilúún yááŋ ígóódi lɛ́ ɛ́soo ná wɔɔ́s ódɛ́mman kusuu.

²⁷ Podɛyɛ́ʼkɛn ngə́ na Omɔlɛɔ́g lɛ́ áboónyɔŋ.

²⁸ Sɔ́g nyɔ́ ayɛ́ɛ əgiíbə, ə́di wiib, ə́gud na ɔmbɔg yə́ə́ŋ agɛɛlɛ lɛ́ ánɛ ɔlaa a pasáád, áyɛɛn na nkə kɛ́ alɛɛ́ ogɛɛ́bɛ mɔsɔ́gasɔ́gá na kɛ́lɛ́.

²⁹ Podɛnjɛ́ɛ́n na tɔgɛ́ɛ́ tó tobɛ́ ɔmbɔ́ túmuʼ a nnuʼ yaaŋan, póɛn agá na tɔgɛ́ɛ́ tólaŋ, tɔgɛ́ɛ́ tó tóagɛɛ́bɛ sɔ́g, tó tóamoogónɛ nkó lɛ́ yɛ́ɛlɛ nkə kɛ́ alɛɛ́ lɛ́ yɛ́ɛlɛ, tɔgɛ́ɛ́ tó tólɛɛ́ tógɛɛlɛ lɛ́ pá páagoob nkə kɛ́ puə́səə pɔ́ɔŋ kɔŋɛʼ.

³⁰ Uŋun wó Ufúlúʼtú wó Táán ayɛ́boyɛ́ʼkɛn, podɛʼkányɛ wólɛ́ ɔʼtɛ́m Ólɛ kɛálɛ́ʼkán kɛ́ Táán ayɛ́boyáág agɛɛlɛ lɛ́ áboólɛŋ a wɔɔ́s wó əə́giim agaáŋɛn pɔɔd a mabɛ́.

³¹ Tíən pɛbán pɛ́ pɛbɛ́ pɛ́ɛnɛ pɛ́ pɛ́lɛɛ́ lɛ́: Ɔʼtɛ́m ódiɛn ommoáŋáán a kaadɛ, mulúún, nɛnyɛ́n, pɛdog, nɛŋo əgín nɛnasáŋ, na mbod ɛ nɛngɛn ngim.

³² Póɛn na ntɛ́m ɛlaŋ, na nnyɔ́ŋánán pəŋi na pəŋi. Púlisənən pəŋi na pəŋi, wɔnɔ́ ná Táán əyíbulísin pəŋi a niiŋ nɛ́ Yə́sus Kilíʼtus.