Ɛfɛ́ɛs 2 - Nɛsɔ́g nɛ́ Nɛwa

Kuliog a kɛáŋ kɛ́ kugu, agɛɛn a ɔlaa

¹ A noá na Uŋun, poyɛ́ɛ a kɛnɛŋ kɛ́ kalaʼ wɔnɔ́ pɛlóŋ pɛ́ kúfuʼ lɛ́ poyɛ́ɛ na masɛd, poágɛɛlanɛ kɔbɛ́.

² Poyɛ́ɛ əguyə́ən maáyɛ́ɛlanɛʼ má pɔɔd pá a nsí yɛ́ɛnɛ. Poyɛ́ɛ agoóbɛn nkúm ɛ pá pálɛɛ́ na toɛn tó tobɛ́ a mɔɛn. Nkúm ɛgo yɛ́ɛy ɛlɛ uŋun wó ɔmbɛ́ wó olɛɛ́ əgugud náan na pɔɔd pá pádɛ́agoóbɛnɛɛ́ Táán.

³ A niə́bə́ə niə́s, tɛyɛ́ɛ tɛn yoom ímuʼ wɔnɔ́ pɔ́lɛ́ lɛ́ tɛyɛ́ɛ agɛɛlanɛ tɛn əgín nkə kɛ́ ɔlaa ó pumog puə́s óyɛ́ɛ anyɔ́ŋɛn. Ɔʼtɛ́m wə́ə́s óyɛ́ɛ əgín a pɛbán pɛ́ píəbisóbin. Ilúún yɛ́ Táán alɛɛ́ na yɛ́lɛ́ na pɔsɔ́g póob, náan tɛn aa ayɛ́ɛ na yɛ́lɛ́ na pəsi.

⁴ Kɛbán kímuʼ, Táán alɛ əgusiəd maan kɛ́fɔlɛ́ na pəsi a oʼto wóonɛ lɛ́ aálaŋ kɛbɛnyɔ́ŋɛn.

⁵ Ná tɛyɛ́ɛ pɛlóŋ a oʼto ó masɛd mə́ə́s, ayɛ́bɛyɛ́ɛ́lɛ lɛ́ tíiʼkini kɛɛn a ɔlaa na Kilíʼtus. Pomɔ́ɔy lɛ́ Táán aádɛ́ɛ́ ɔʼtɛ́m.

⁶ Tɛyɛ́ɛ pɛlóŋ, Táán aáság kɛbɛyóndɛgɛ lɛ́ tɛlɛ paladáán na Yə́sus Kilíʼtus. A ngim yɛ́ɛy aáság kɛbɛyɛ́ɛlɛ lɛ́ tíləndin ondáŋ na nyɔ́lɛ́ a mɔɛn.

⁷ Náan aa a kɔdɛ́ɛ ɔʼtɛ́m kuə́ŋ kóog kó əyíbilóódi a Yə́sus Kilíʼtus, aányɔ́ŋɛn tɛn kuloodi kólɛ́ na pɔsɔ́g pá a mədúg má yuudi lɛ́ nyɔ́lɛ́ aálaŋánan a kɔdɛ́ɛ ɔʼtɛ́m.

⁸ Kɛ́lɛ lɛ́, a kɔdɛ́ɛ ɔʼtɛ́m kó Táán áa pomɔ́ɔy lɛ́ pomáág oʼto na nyɔ́lɛ́, kɛ́lɛ nɔŋáan nó Táán, kɛ́dɛɔ́gɔ a pəŋibáamɔɛ́d.

⁹ Kɛ́diɛn tɛn ɔmbɔ́ a nkə kɛ́ polɛɛ́ agɛɛlɛ, ná mɔɔd na mɔɔd ədinjə́gídə́níí a igog.

¹⁰ Ɛɛ́ɛ, kɛ́lɛ náan lɛ́ Táán áa ayɛ́bɛyɛ́ɛ́lɛ. A oʼto wóonɛ lɛ́ tɛlɛ paladáán na Yə́sus Kilíʼtus aa ayɛ́bɛyɛ́ɛ́lɛ lɛ́ ná tíɛlanɛ pɛnɛŋ piim pɛbán pɛ́laŋ. Pɛbán pɛ́go pɛ́ɛb pɛ́lɛ pɛbán pɛ́ yɛɛ́yáŋ osóbini pɛ́lɛ́ kalaʼ lɛ́ ná tíɛlɛ pɛ́lɛ́.

Yoom ímuʼ a Yə́sus Kilíʼtus

¹¹ Pəŋi pá podɛɔ́gɔ pibíəniʼ pɛ́ Yúdɛn, poáyɔ́ɔ́ŋɛ nkə kɛ́ poyɛ́ɛ kalaʼ. Yúdɛn ɛlɛ agaanyɛ. A oʼto ó «waany» wóow wó pálɛɛ́ agɛɛlɛ lɛ́ páagaásóm kiony, pálɛ agoboodɔ́ŋɔn pəŋi lɛ́ polɛ «pisun».

¹² Poáyɔ́ɔ́ŋɛ lɛ́, a kɛnɛŋ kɛ́go kɛ́ɛg káag, podɛʼkɛ́ɛ na Məsíi, poyɛ́ɛ pɛnɔɔŋɛʼ a ndɛg yɛ Ɛ́sɛlayɛl. Nkə kɛ́ Táán yɛɛ́gágɛn na pɔɔ́n pá Ɛ́sɛlayɛl, pəŋi podɛʼkɛ́ɛ kɔ a ɔmban wóow. Poyɛ́ɛ alaa a nsí yɛ́ɛnɛ pommɛna pɛda a yoom ɔmbɔ́ ímuʼ. Podɛ́ʼkóolɛŋɛn tɛn ɔmbɔ́ Táán.

¹³ Náa nɛ́gɔŋ yɛ́ɛnɛ, pəŋi pá poyɛ́ɛ laálá na Táán poándɛ ndúmiʼ na nyɔ́lɛ́ wɔnɔ́ ná polɛɛ́ paladáán na Yə́sus Kilíʼtus, a maŋɔ́ mə́ə́ŋ má yiísúb.

¹⁴ Nyɔ́lɛ́ aa əyíbiyíímin na kiwiiyiʼ, aálad a kɛfɔg kímuʼ lɛ́ na Yúdɛn, na pɛnɔɔŋɛʼ, pɔ́lɛ́ pá páyɛ́ɛ paásáláán. A nɛáyɛ́ʼkɛn nɛ́ ayáyɛ́ʼkɛ́nɛ́ɛ́, yiídə́ə́ŋi waŋ yɛ́ ɛyɛ́boósaalɛn. Waŋ yɛ́ɛy ɛlɛ ɛbɛnɛn yɛ́ ɛyɛ́ɛ kɔ pɔ́lɛ́ na pɔ́lɛ́.

¹⁵ Yɛɛ́sóólɛ pɛcɛm pɛ́ Yúdɛn na pisiə́g pɛ́ pɛ́lɛɛ́ kɔ, na piə́giliʼ tɛn pɛ́ pɛ́lɛɛ́ kɔ. Yɛɛ́nyɔ́ŋɛn kɛɛlɛ náan lɛ́ ná Yúdɛn, na pɛnɔɔŋɛʼ kɛ́ pɛ́ɛn ndɛg yɛ́ ngwa əgín mmuʼ a unuʼ úmmuʼ na nyɔ́lɛ́, páyɛɛn a uŋóón.

¹⁶ Pɔ́lɛ́ piim pábaan páyɛɛn paladáán yoom ímuʼ, pə́yiʼkini kaálad na Táán. Ayɛ́ɛ́lɛ náan a kugu kó yiígú a ɔmbásá. Kɔ a wólɛ́ aa yɛɛ́mánɛ ɛbɛnɛn.

¹⁷ Kilíʼtus əyíím anyóon alɔɛgɛ Tɔsɔm tó uŋóón na pəŋi pá poyɛ́ɛ laálá, na pɔsɔ́g pá páyɛ́ɛ ndúmiʼ na Táán

¹⁸ Kilíʼtus aa amɛ́ɛ́lɛ wɔnɔ́ ná pəsi piim lɛ́ na Yúdɛn na pɛnɔɔŋɛʼ kɛ́, tɛándɛɛ́ págodɛ́lɛm a udi ó Paabá a toɛn tó Uŋun wó Ufúlúʼtú ogo úmmuʼ.

¹⁹ Náan, pəŋi pundigi kə́mmú pɛnɔɔŋɛʼ, pundigi kə́mmú pɔɔd pá a ɔsaa, poándɛ nɛ́gɔŋ yɛ́ɛnɛ pɔɔd pá páagoob na Táán, pɔɔd pá a yoog ɛ pɔɔd ɛ Táán.

²⁰ Poáʼkosɔd a ondáŋ wó ongwáag wó pɔɔ́n pá maʼtom na palɔɛgɛʼ pɛbán pá Táán pálɛɛ́ kɔ wɔnɔ́ tɔɛd tó a nibiŋ nɛ́ noádɛʼ, Yə́sus Kilíʼtus kɔ nyɔ́lɛ́nyɔ́amɔɛ́d wɔnɔ́ nɔɛd nó a oʼto ó noádɛʼ.

²¹ A nyɔ́lɛ́ aa ongwáag ungim ólɛɛ́ oʼkónáán. Ólɛ agaáwáag lɛ́ ná wɛ́ɛn yoog yɛ́ ɛlɛɛ́ pulúʼkə́n a niiŋ nɛ́ Sə́dúk.

²² A nyɔ́lɛ́ tɛn aa pəŋi poándɛɛ́ ondáŋ a ongwáag wóow wó Táán əə́ləndin a wólɛ́ a Uŋun wə́ə́ŋ.