Ɛ́fɛsɛ 2 - Nogálɔ ná mammana ya Gɛɔyɔ

Asaŋa a fáanana gɛɔyɔ go báaba bá mo olimonyomú naá Kilítusu

¹ Cóá, no mba lɛ́ begúe naá giliíli go busío bá bɛoba bɛ́nyɔ́ na bɛlɔgɔ bɛ́nyɔ́.

² No mba lɛ́ no ɔyɔ aŋa batɔ bá cí yɛ́ɛyɛ; no ɔ́bɛnɔnɔ ufuŋe yá magaaga má gɛgáda gá giliíli gɛ́ɛgɛ gɛ́ lɔ́mɔ́ naá kadɛ́gadɛ́ɛ ya mmoɛná na cí, giliíli gɛ́ɛgɛ gɛ́ yɔgɔnɔmɔ́ godɔ́ɔdɔ naá báaba bá báaŋɛganamɔ́ Asaŋa.

³ Dɛ mba lɛ́ naá ombanɔ yá batɔ bɔ́ɔbɔ, bɛɛcɔ́ɔ biimée tɔ́nɔ báaba dɛ mbaá lɛ dɛ ɔyɔ aŋa odɛ́má yɛ́cɔ́ yó lɛ́galɛgamɔ́, dɛ ŋanana buimée bɔ́ɔbɔ nnyɔ́dɔ yɛcɔ́ na mbééníŋínyí sɛ́cɔ́, mó lɛ́galɛgamɔ́. Nɔ́ gɔ́ɔ naá odɛ́nɛ́ yɛ́cɔ́ yá boɔtɔ, dɛ mbaá lɔmɔ́ dɛ háanana na mpímí ya Asaŋa aŋa batɔ báaba bóntió.

⁴ Kanɛ́ Asaŋa a lɛ́ na odɛ́má yá mahana akɛ́báamɔ́. Go gɛantá gá gɛnɔ́ɔ́nɛ́nɔ́ gɛ́ɛgɛ a có maamanamɔ́,

⁵ akɛ́ aŋa dɛ mbaá lɔmɔ́ begúe go busío bá bɛoba bɛ́cɔ́, a mba có fáá gɛɔyɔ go Kilítusu. Bó lɔ́mɔ́ go niibo ná Asaŋa gɔ́ɔ a mbaá nyó sódío.

⁶ Naá gobálada gɛ́cɔ́ gɔ́ɔgɔ na Yésu Kilítu, Asaŋa a mba có fúfúné naá begúe olɔŋɔ nɛhɛ́, a báá có lukúményée naá mmoɛná,

⁷ nɔ́ɔnɔ, go gɛnɔ́gɔ́ gɛ́hɛ́ gá odɛ́má go busío bɛ́cɔ́ naá Yésu Kilítu, a mba maamánáa go dúfíe go ɛgɛlɛ yɛ́ɛyɛ yɛ úlenemú bonɔ́mɛ bá kanɛ gieninye bá niibo nɛ́hɛ́.

⁸ Ɛɛ́ɛŋ, bó lɔ́mɔ́ go niibo nɛ́hɛ́ gɔ́ɔ Asaŋa a nyó sódonyomú goŋaá no olimonyo. Bó do báá bɛɛnyɔ́ɔ báa no yɔgɔnɔmɔ́ go go bɛa gisódio gɛ́ɛgɔ, bó lɔ́mɔ́ pááná ya Asaŋa.

⁹ Gisódio gɛ́ɛgɛ gɛ́ dɛ úlénée go meŋiigíe, goŋaá mɔtɔ a dɛ bágóbá ombɔ́gɔ.

¹⁰ Ɛɛ́ɛŋ, dɛ lɔ́mɔ́ bigedíe bɛ́hɛ́, mɔ́ɔ a mbaá có gedíe naá gobálada gɔ́ɔgɔ naá Yésu Kilítu go bɛnɔ́gɔ́ bá meŋiigíe bɛ́ɛbɛ a mbaá dóáná go kɛsɛda goŋaá dɛ bɛ́ ŋanana.

Dɛ lɛ́ bɛɛcɔ́ɔ biimée bábándɛ́gɛ́náalú naá Kilítusu

¹¹ Bééníŋényéemú nɔnɔ kanɛ́ bɔ́ɔbɔ no mbaá lɔmɔ́ cóá. No do báá Beyúdene bá mbíényée; Beyúdene moatɛ́ bá nyó gɔ́lɔnɔ aŋa batɔ bá kanɛ go ancaba, bɔ́ɔ moatɛ́ bá béfínenye bá amɔ́ bá lɛ́ ancábáalú, aŋa bá manɛmɔ́ go sómba nnyɔ́dɔ yabɔ́.

¹² Naá gɛcamɛna moánɛ gíiní, no mba lɛ́ halaháláa na Kilítusu, no mba lɛ́ biinyí, no do mbáa lɛ no ɔ́bɛnɔnɔ na boɛ́nɔ bá Asaŋa. Bá mba nyó dóŋóná naá tánɔ yɛ́ɛyɛ Asaŋa a mbaá ŋaáa na boɛ́nɔ bɛ́hɛ́ naá bɛlada bugúle. No mba lɛ́ no ɔyɔ naá cí kanɛ mbémineminie ya gisódio, kanɛ Asaŋa.

¹³ Kanɛ́ godɔ́ɔdɔ, naá gobálada gɔ́ɔgɔ na Yésu Kilítu, bɛɛnyɔ́ɔ báaba no mbaá lɛ halaháláa cóá, no ná lɛ́ mekúígíi na Asaŋa go manɔ́ŋɔ́ má Kilítusu.

¹⁴ Ɛɛ́ɛŋ, mɔ́ɔ a lɔ́mɔ́ buumbénú bɛ́cɔ́, a báá ŋaáa goŋaá bɔ́ɔbɔ bó lɔ́mɔ́ ádónáalú, bó bɛ́ɛmba búmmue. Aŋa a mbií íŋéné nnyɔ́dɔ yɛhɛ́, a mba buhé omɛndɛ́ yá mbɛlɔ́ yɔ́ɔyɔ yó mbaá lɔmɔ́ yó có ádona.

¹⁵ A mba níŋísídé gicele gá Beyúdene na bɛlɔsɛnɔ, na bisúnígéné bá gɛ́ go cí. A mba lɛ́gá nɔ́ɔnɔ goŋaá Beyúdene na báaba bá lɔ́mɔ́ bá dɛ bɛ́ɛmba Beyúdene, bɛ́ ɛ́ya mɔtɔ ofáa táŋɛ́ ummue; nɔ́ɔ gɔ́ɔ a mbaá ágá buumbénú naá tɛ́mádɛ́má yabɔ́.

¹⁶ Go nigúe nɛ́hɛ́ naá kolósi, Kilítusu a mba ladá Beyúdene na báaba bá lɔ́mɔ́ bá dɛ bɛ́ɛ́mbá Beyúdene, bá báá gundé nnyɔ́dɔ táŋɛ́ mmue, a báá gɔnɔ́ bó gedie na Asaŋa. Naá kolósi, a mba meníe mbɛlɔ́.

¹⁷ A mbu úlé go go nco dúmenye Gɛnɔ́gɔ́ gá Cɔ́mɔ gá buumbénú go bɛɛnyɔ́ɔ báaba no mbaá lɔmɔ́ halaháláa, na báaba bá mbaá lɔmɔ́ mekúígíi.

¹⁸ Go busío bɛ́hɛ́ gɔ́ɔ bɛɛcɔ́ɔ biimée dɛ bɛananamɔ́ ŋgásɛ́ ya go báyɛkɛna Baaba, naá Giliíli táŋɛ́ ummue.

¹⁹ Nɔ́ɔnɔ gɔ́ɔ no lɔ́mɔ́ no do báá gɔnɔ́ biinyí, ɛ́na lí basalɔsálɔ́ɔ; no ná lɛ́ batɔ bá gɛdɔŋɔ gímmue na bimmúmpúu; no ɔ́bɛnɔnɔ na ncíbo ya batɔ ya Asaŋa.

²⁰ No ná lɛ́ gɛfóaga gɛ́ɛgɛ mogoná má gɛ́ mó lɔ́mɔ́ baapótɛlɛ na mbúsí sá Asaŋa; ɛdánɛ́ ná bugído nɛ́ lɔ́mɔ́ Yésu Kilítu moatɛ́ moatɛ.

²¹ Naá gobálada gɔ́ɔgɔ na Kilítusu gɔ́ɔ gɛfóaga gɛ́ bédílimenyemú, bá gɛ́ fedigenye go go ɛ́ya naá Daadáa gimmúmpúu gá Nnyaŋá ya Asaŋa.

²² Naá gobálada gɔ́ɔgɔ nɛhɛ́, no ná lɛ́ tɔ́nɔ olɔŋɔ naá gɛfóaga go go ɛ́ya go Giliíli kɛ́gɛ́ná ya Asaŋa olɔŋɔ na báaba bóncodío.