नेॽचिरामि चिनारि
इगो पत्रा पावलडे़ॽ गिरिक देसमि फिलिप्पि सहरबेॽ टुबॽआ याक्लोए मन्डलिबेॽहा बिस्वासिजिमि लागि साप्पॽआ ले़ये। फिलिप्पि चाहिँ माकेडोनिया छेत्राबेॽए रोम देसबेॽ सिॽइये इक्को सहर ले़टे़। इगो पत्रा साप्माबेॽ पावल रोम देसबेॽए इक्को सहरमि तिरिङ्गा खिमबेॽ से़क्सिघे़ॽपॽआ ले़टे़। मोडोक्पेॽ इन्डोक जनाडे़ॽ पावल बिरोध ले़ःॽनुङ खोमि निवा टुक्मेॽपॽआ ले़टा। मोडोक्पेॽ फिलिप्पिबेॽए मन्डलिबेॽ रेम्सिङ सिक्छे परचार लिमे़ॽनिङ्सिडे़। तर इगो पत्राडे़ॽ मोबेॽए मन्डलिबेॽहा बिस्वासिजि साप्थाङ्मानुङ बिस्वासबेॽ बोलियो लिबॽआ चाहिँ पावलडे़ॽ खिरिस्टबेॽ ले़ःॽपॽआ बिस्वासडे़ॽ लुहेये।
इगो पत्रा चाहिँ फिलिप्पिबेॽहा खिरिस्टियानजि ओहाक पिमामि लागि साप्पॽआ ले़टा। खोजिडे़ॽ पावल खाँचो सिॽमाबेॽ दान भेटि पाङ्बेॽपॽआ ले़टे़। मोडोक्पेॽनोॽ खोसे़ॽ टाङ्बानुङ खोजिबेॽ लेम्बॽआ दुःखमि बेलाबेॽ खोजि बोलनुङ भरोसा पिमामि लागि इगो पत्रा साप्पॽआ ले़टे़। खोजि टाङ्बामिरेॽ भलो ले़ःॽनुङ काङायोङ्बा लिमा ने़ॽनि येसुडोॽ ए़डेॽमा लिमे आनिबानि चिनुजिरो लुनुङ अरति पिन्डुजे। खिरिस्टबेॽ टुबॽआ खोजिमि हिङ्मवा चाहिँ निवाहाङ्मि बरदान ले़ये। इगोगो खोजिडे़ॽ यहुदि नियमबेॽहा चाल चलन पालना ले़ःॽपॽआसे़ॽ चुप्पॽआ ने़ॽनि, तर येसु खिरिस्टबेॽ बिस्वास ले़ःॽनुङ चुप्पॽआ लुनुङ पावलडे़ॽ लुन्डुजे। पावलडे़ॽ खिरिस्टबेॽ बिस्वास ले़ःॽनुङ हिङ्घुबाजि निवाहाङ्बाङ साप्थाङ्मानुङ सान्ति चुप्मिन्डुजे लुनुङ साप्मिन्डुए। इगो पत्राबेॽ खिरिस्टियान बिस्वासनुङ हिङ्मवाबेॽ चुप्मिये साप्थाङ्मा, भरोसा, इक्को लिनुङ टोङ्जामे खानुङ योम्बोकपेॽ एकोहोरो लिमे खामि टुम्बेॽ नुरोॽ साप्मिटुए।
इगो पत्रा हाइखा पत्राबाङ खोरोमा ले़ये। इगो पत्राबाङ पावलडे़ॽ फिलिप्पिमि मन्डलिबेॽहा बिस्वासिजि इन्डोक बेॽलो नम्नम ले़न्डुए लुमे खा लेहेये। इगो पत्रा अङ्ग्रेजि निङ ६२-६३ बेॽ रोम देसबाङ पावलडे़ॽ साप्हाङ्बॽआ ले़टे़ लुनुङ बाइबलमि टुम्बेॽ साप्खुबा निवादाङ्बाजिडे़ॽ लुन्डुजे
नेॽचिरामि बिसय सुचि
१. चिनारि १:१-२
२. पावलडे़ॽ फिलिप्पिबेॽहाजि ओहाक पिबॽआ १:३-११
३. खिरिस्टबेॽ इन्डोक्मा हिङ्मवा हिङ्मा खे़ये लुमे टुम्बेॽ १:२७–२:१८
४. तिमोथिनुङ इपाफोरोडिटस इमाङ ले़ःॽमेॽमे लुमे टुम्बेॽ खा २:१९-३०
५. बिरोध ले़ःॽखुबाजिनुङ मङे़हा खाबाङ जोगबा लिमे खा ३:१–४:९
६. पावलनुङ फिलिप्पिबेॽहा लङ्गामजि ४:१०-२०
७. रुक्मारा ४:२१-२३
