फिलिप्पि 4 - याम्फु1 मोडोगे़ॽ के़हा वावानिसानुङ नानुसाजि, हे़निङ्नोॽ के़ॽ बेॽलो नम्नम ले़ःॽपॽआजि ले़न्डानिङ, मोबा हे़निङ चुप्मा सारोनोॽ मिॽइनिम्ने़। हे़निङे़ॽ का साप्थाङ्मेॽटानिङ, हे़निङ काङ्मि योम्बोकमि इनाम ले़न्डानिङे। हे़निङ इडोक्नोॽ परभुबेॽ सानिङ बोलियो लिनुङ हिक्सानिङे। अरति 2 हागो के़ॽ इयोदियानुङ सुन्तुखे हे़न्जिङ परभुबेॽ इक्को निवानुङ्मा लिमा खे़ये लुनुङ बिन्ति ले़न्जिम्ने़। 3 हे़न्जिङ काङ्मि बिस्वासनुङ्मा लङ्गामजि हे़न्जिङेॽ इघा मेॽनामिॽचि सहायोग ले़टाजे, इन्ढोङ्होङ इघाजिडे़ॽ कानुङ सोरि सुसमाचारमि योम्बोक निवाबाङ्नोॽ ले़ए़टुजे। कानुङ्रेॽ ने़ॽनि क्लेमेसनुङ मोबा कानुङ योम्बोक ले़ःॽखुबा के़हा हाइखा लङ्गामजिनुङ्सो मोडोक्नोॽ योम्बोक ले़ए़टुजे, खोजिमि निङ हिङ्मवामि नेॽचिराबेॽ टुहा। 4 परभुबेॽ सानिङ हाङ्हाङ ले़टानिङे, के़ॽ फेरिसो लुनिम्ने, हाङ्हाङ ले़टानिङे। 5 हे़निङे़ॽ चोप याॽमिजिनुङ नुबा बेबहार ले़ःॽपॽआ हाइखाजिडे़ॽ लेसुमिरो। परभु चान्डोनोॽ लेङ्इये। 6 हे़निङ इमाङ खामि लागिसो सुरता ए़ले़टानिङे, तर हे़निङ पाप्मिहा खा निवाहाङ्नुङ पारथनाबेॽ ङागानुमे, मोबा ओहाक पिसाङ खोनुङ बिन्ति ले़टानुमे। 7 मोबा कानिङ याॽमिजिमि निवाडे़ॽ लेहेनिबा निवाहाङ्मि सान्तिडे़ॽ हे़निङ्मि निवानुङ सोःक्मा खिरिस्ट येसुबेॽ रच्छे ले़न्डुए। 8 इघा खामि ए़क्साङ्बेॽ, के़हा वावानिसानुङ नानुसाजि लुनिम्ने़, इमाङ खा चाइबमा ले़ये, इमाङ खा नेन्जामारोमा ले़ये, इमाङ खा आदरनुङ्मा ले़ये, इमाङ खा न्यायनुङ्मा ले़ये, इमाङ खा चोखो ले़ये, इमाङ खा नम्नम ले़ःॽमारोमा ले़ये, इमाङ खा ओहाङ ले़ःॽमारोमा ले़ये, इमाङ खा सारोनोॽ नुबा ले़ये इघा चोप खा निवाबेॽ युक्सानुमे। 9 काबाङ हे़निङे़ॽ इमाङ चिङ्इटानुमेनुङ चुप्मिटानुमे माहा चिम्बॽआनुङ चुप्पॽआ खानोॽ ले़टानुमे, मोबा सान्ति पिघुबा निवाहाङ हे़निङ्नुङ सोरि पेङ्इये। भेटिमि लागि ओहाकयो 10 का परभुबेॽ बेॽलो हाङ्हाङ ले़ङे। बेॽलो याक ए़क्साङ फेरि हे़निङे़ॽ काङ्मि ले़ख्खो ले़टोक्टानुम। हे़निङे़ॽ काङ्मि ले़ख्खो मे़ले़टानुमे लुबॽआ ने़ॽनि, तर के़ॽ लुबॽआ चाहिँ हे़निङे़ॽ ले़ख्खो ले़ःॽमा मिॽनुङ्सो मे़ले़टोक्टानुम। 11 का खाँचोबेॽ सिॽटिङ लुबॽआ ने़ॽनि, कानुङ इमाङ, इन्डोक टुउ मोडोक्पेॽनोॽ साप्थाङ्मा के़ॽ चिङ्इटुङे। 12 का खाँचोबेॽ सिॽमाबेॽसो कानुङ चोप थोक टुमाबेॽसो इन्डोॽ हिङ्मा खे़ये लुनुङ के़ॽ लेटुङे। साक्मेन्जाबेॽसो, उक्खामाबेॽसो, बेॽलो टुमाबेॽसो, मायेम्बेॽसो मोबा चोप बेलाबेॽ साप्थाङ्मानुङ हिङ्मे खा के़ॽ चिङ्इटुङे। 13 खिरिस्टडे़ॽ का पिबॽआ सक्तिबाङ्नोॽ इघा चोप खा के़ॽ ले़ःॽहेनुङे। 14 तरसो का खेःबेॽ सिॽपॽआ बेलाबेॽ हे़निङे़ॽ सहायता ले़ःॽनुङ सारोनोॽ नुबा ले़टानुम। 15 हे़निङे़ॽ लेन्डानुम, याक्लो के़ॽ हे़निङ सुसमाचार खेम्मेॽनुङ माकेडोनिया छेत्राबाङ बिदा लिनुङ खे़ॽमाबेॽ का सहायता ले़ःॽखुबा मन्डलि हे़निङ्बाङ हाइखा असासो माडामि। 16 थेस्लोनिकि सहरबेॽ का खाँचो सिॽमाबेॽ हे़निङे़ॽ इक्खेॽ निघेॽ सहायता हाङ्बेॽटानिङ। 17 के़ॽ हे़निङ्बाङ भेटि चुप्मामि ने़ॽनि, तर के़ॽको हे़निङे़ॽ ले़ःॽपॽआ योम्बोकमि इनाम हे़निङ्मिनोॽ निङ्बेॽ सुम्रो लुनुङ लुनिम्ने़। 18 के़ॽ इन्डोक चुप्मा खडे़, मोबाङ्सो बेॽलोनोॽ चुप्मिटुङे। इपाफोरडिटसमि हुकबाङ हे़निङे़ॽ पाङ्बॽआ भेटि चुप्नुङ का हाङ्हाङ लिटिङे। हे़निङे़ॽ पाङ्बॽआ भेटि चाहिँ निवाहाङ्डे़ॽ लामारोमानुङ नेन्जामारोमा बलिदानडोॽ ले़ये। 19 के़ए़ निवाहाङ्डे़ॽ हे़निङ्मि चोप खाँचो पुरा ले़न्डुए। खिरिस्ट येसुबेॽ टुये खोमि महिमानुङ्मा याङ्सरावाबाङ्नोॽ हे़निङ पाप्मिहा खा चोप पिये। 20 हागो कानिङ्मि निवाहाङ पाबामि सानिङ महिमा लिडुङ्घे़ॽरो। आमेन। हामा बेलामि सेवायो 21 खिरिस्ट येसुबेॽ बिस्वास ले़ःॽखुबा चोप पबित्रा याॽमिजिमि लागि काङ्मि सेवायो। इगोबेॽ कानुङ सोरि टुघुबा वावा निसाजिडे़ॽसो हे़निङ सेवायो ले़ःॽहाङ्इटामे। 22 खिरिस्ट येसुमि पबित्रा याॽमिजिडे़ॽ, मोबाङ्सो रोमि सरकारमि हाङ्खिमबेॽ टुघुबाजिडे़ॽ हे़निङ सेवायो पाङ्इटामे। 23 परभु येसु खिरिस्टमि अनुग्रहा हे़निङ्नुङ सानिङ टुरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.