Kolossa 3 - Yakan

¹ Manjari, peggeꞌ Almasi bakas pinakellum amban kamateynen, kite bi isab kuweꞌ bakas patuhut si iye pinakellum balik duk niyaꞌ ne umulte bi gaꞌ niyaꞌ tamananne. Hangkan iye subey inapasten bi meꞌ malaꞌi si surgaꞌin. Peggeꞌ īꞌ laꞌi Almasi si surgaꞌ magbayaꞌ duk ningkoloꞌ si kanawanan Tuhanin, iye lugal mabangsahanin.

² Subey ne iye luwal pinikilten bi meꞌ malaꞌi si surgaꞌin, dumaꞌin meꞌ matuꞌu si dunyahin.

³ Peggeꞌ kite bi meꞌ masandel pu si Isa Almasihin, kuweꞌ ne kite bi bakas mamatey miyaꞌan, gaꞌ ne niyaꞌ bayaꞌte si meꞌ bayuꞌan si dunya inin. Duk umulte mabaꞌahu inin laꞌi pu si Almasi duk gaꞌi pe pinakitehan weꞌ Tuhanin.

⁴ Almasi mangurungan kite umul baꞌahuhin hangkan si pasōngan bang ne iye paguwaꞌ balik si dunya, paguwaꞌ du isab kite nuhut iye liput weꞌ sahayane.

Kawul-piꞌil masahin duk kawul-piꞌil kuweꞌituhin

⁵ Hangkan hep, meꞌ kapungtinaꞌihanku masandel pu si Isa Almasihin, daꞌa teꞌed ūtanun bi napsu baranbin. Daꞌa teꞌed kaꞌam magjina. Daꞌa kaꞌam baꞌisan duk daꞌa kaꞌam magkadupangan. Lebbahanun bi ne napsubi si meꞌ bayuꞌan matuꞌu si dunyahin. Peggeꞌ bang gaꞌi lebbahanbi napsubi inin, kuweꞌ tuhanbi ne napsubin peggeꞌ iye luwal tinuhutbin.

⁶ Sabab meꞌ hinangan malaꞌat miyaꞌan, ujudnen legga Tuhanin du meꞌ aꞌa manggaꞌi manuhut iyehin.

⁷ Kaꞌam matuꞌuhin luwal teꞌed hinangbi meꞌ hinangan malaꞌat miyaꞌan.

⁸ Saguwaꞌ kuweꞌitu subey ne lebbahanbi meꞌ addatbi malaꞌatin kuweꞌ magastel, bunsi duk magpikilan laꞌat si saweꞌbi. Subey kaꞌam gaꞌi ngalimutan saweꞌbi atawa ngalakaꞌ-ngalakaꞌan saweꞌbi.

⁹ Daꞌa ne kaꞌam magdustaꞌ si saweꞌbi. Essebun bi weꞌ bakas lebbahanbi ne meꞌ addatbi duk meꞌ hinanganbi masahin.

¹⁰ Duk kuweꞌitu pinda ne kawul-piꞌilbin. Binaꞌahuhan ne weꞌ Tuhanin ateybin duk luwal pe kaꞌam baꞌahuhanne sampay ujudnen manjari ne kaꞌam kuweꞌ iyehin. Hangkan kaꞌam baꞌahuhanne, supaya kataꞌuhanbi ne teꞌed Tuhanin.

¹¹ Bang baꞌahu ne kēmon saliꞌ-saliꞌ, manjari gaꞌ ne iyan niyaꞌ pagbiddaꞌan Yahudihin duk dumaꞌin Yahudihin, meꞌ bakas magislamin duk manggaꞌ magislamin, meꞌ taga pangadjiꞌin duk meꞌ manggaꞌ niyaꞌ pangadjiꞌnen, banyagaꞌin duk amuhin. Gaꞌ ne niyaꞌ pagbiddaꞌande, peggeꞌ laꞌi Almasi patennaꞌ dem ateyde saliꞌ-saliꞌ, duk Almasi hadja iye mahadje si siyehin.

¹² Kaꞌam iyan meꞌ aꞌa tapeneꞌ weꞌ Tuhanin hinangne meꞌ aꞌane, duk kinalasahan kaꞌam weꞌ ne. Hangkan subey kaꞌam maꞌaseꞌ si pagkasibi. Subey hāp addatbin si siye. Subey diyawaꞌ pagateybin duk lunuk ateybin. Subey kaꞌam be-iman.

¹³ Subey kaꞌam magpasensiya si saweꞌbi bang niyaꞌ gaꞌi kasulutanbi. Bang niyaꞌ taga duse si saweꞌne magampun-inampun kaꞌam. Ampunun bi saweꞌbin kuweꞌ pangampun Tuhan kaꞌamin.

¹⁴ Duk importante amban kēmon inin, subey kaꞌam malasa si pagkasibi. Peggeꞌ bang maglasa-ilasa kite bi asal magsulut-sulut teꞌed kite bi.

¹⁵ Ambat Almasi magbayaꞌ dem ateybi supaya kaꞌam magsulut-sulut. Kite bi meꞌ masandel pu si Isa Almasihin kuweꞌ dambuwaꞌ baran hadja duk kabayaꞌan Tuhanin weꞌ magsulut-sulut kite bi. Daꞌa isab kayipatanun bi magsukul si Tuhan.

¹⁶ Essebun bi kēmon meꞌ panoloꞌ Almasihin duk ennaꞌun bi dem ateybi. Subey kaꞌam magusihat-inusihat duk magtoloꞌ-tinoloꞌ, duk gunahun bi kataꞌu pangurung Tuhan kaꞌamin. Magkanta kaꞌam meꞌ kanta pamudjibi Tuhanin duk meꞌ kanta pinanoloꞌan weꞌ Niyawa Tuhanin si kaꞌam. Nganta kaꞌam si Tuhan sabab magsukul teꞌed kaꞌam si iye dem ateybi.

¹⁷ Ine-ine hinangbi atawa paꞌinbi, subey essebbi weꞌ Isa Almasi Panuhutanbin. Duk subey hadje pagsukulbin si Samaten bi Tuhanin sabab Isa Almasi.

Panoloꞌ si meꞌ magtewtey-anakin duk meꞌ banyagaꞌin

¹⁸ Kaꞌam meꞌ dendehin, subey kaꞌam patuhut si kabayaꞌan ellabin. Patut inin hinangbi peggeꞌ sandel kaꞌam si Panuhutanten bi Isa Almasi.

¹⁹ Kaꞌam isab meꞌ lellahin, subey kalasahanbi andabin. Daꞌa siye kaꞌastelanun bi.

²⁰ Duk kaꞌam isab meꞌ mākanakin, peggeꞌ sandel ne kaꞌam si Panuhutanten bi, subey luwal tuhutbi toloꞌ meꞌ matettoꞌabin peggeꞌ kasulutan Tuhanin si kaꞌam bang inin hinangbi.

²¹ Kaꞌam meꞌ matettoꞌahin, daꞌa paꞌastelun bi meꞌ anakbin palanduꞌ duk gaꞌi ngalamma ateyden.

²² Kaꞌam meꞌ banyagaꞌin, subey tuhutbi kēmon pangandaꞌakan amubi matuꞌu si dunyahin, dumaꞌin hadja bang luꞌu siye mayam-mayam supaya kaꞌam sanglitande. Saguwaꞌ subey siye tuhutbi ateybin dambūs-būs peggeꞌ talew kaꞌam si Tuhan.

²³ Ine-ine hinangbi, hinangun bi ateybin dambūs-būs duk kimmatanun bi weꞌ Panuhutanin, Isa Almasi, paghinanganbin duk dumaꞌin aꞌa,

²⁴ peggeꞌ kataꞌuhanbi du weꞌ urungan Tuhanin kaꞌam kahāpan si pasōngan duk tasangkabi du iyan meꞌ inennaꞌne para si meꞌ aꞌanen. Peggeꞌ Almasi hep teꞌed amubi paghinanganbin.

²⁵ Duk sasuku maghinangan laꞌat, tinumbasan du iye sabab hinanganne malaꞌatin, peggeꞌ Tuhanin gaꞌi pagbiddaꞌne manusiyaꞌin.