Kolossa 2 - Yakan

¹ Kabayaꞌankun kataꞌuhanbi weꞌ asal gagal ku si kaꞌam duk māku-māku ku teꞌed si Tuhan para si kaꞌam duk para si meꞌ masandel pu si Isa laꞌi si lahat Laodikeahin duk si meꞌ sinduwe manggaꞌ bakas mangite akuhin.

² Iye inin hinangkun supaya asig ateybin duk luwal kaꞌam maglasa-ilasa, ubus ngahaget ne sandelbin duk gaꞌi ne kaꞌam duwe-duwehan peggeꞌ tahātibi ne teꞌed mabennalin. Manjari kataꞌuhanbi ne iyan sabab tinapukan Tuhanin, hātinen sabab Almasi.

³ Almasi puꞌunnen hangkan makajari kataꞌuhante bi kataꞌu Tuhan malalemin, peggeꞌ iye kuweꞌ dalil kunsiꞌ mangaluka pagennaꞌan kataꞌu Tuhanin.

⁴ Hangkan inin paꞌinku si kaꞌam, supaya kaꞌam gaꞌi tapadupang weꞌ meꞌ aꞌa mamissā kuweꞌ asal tewwaꞌ pinaꞌinden saguwaꞌ gaꞌi toꞌo.

⁵ Peggeꞌ bisan ku gaꞌ luꞌu si kaꞌam, luwal kaꞌam tapikilku. Kēgan ku peggeꞌ magsulut-sulut du kaꞌam duk peggeꞌ basag du sandelbi pu si Isa Almasihin.

Meꞌ panessaꞌ duk siye gaꞌi taboꞌo weꞌ meꞌ guru magdustaꞌin

⁶ Manjari, peggeꞌ bakas tayimaꞌbi ne Isa Almasi duk iye ne kuweꞌitu Panuhutanbin, subey ne kawul-piꞌilbin matukan iye.

⁷ Kuweꞌ kayuhin nganggamut pinalalem, sa iyan du isab subey sandelbi pu si Isa Almasihin. Pateteg kaꞌam si iye duk pabasagun bi sandelbin sa bakas panoloꞌ si kaꞌam matuꞌuhin. Duk subey kaꞌam luwal magsukul si Tuhan.

⁸ Pahatul-hatul kaꞌam kaw kaꞌam inakkalan weꞌ aꞌa, peggeꞌ batang kaꞌam boꞌode nuhut siye. Bang pinakale meꞌ bissāden kuweꞌ bantuk hāp, saguwaꞌ gaꞌ niyaꞌ kagunahanne. Peggeꞌ meꞌ toloꞌden hinang-hinang aꞌa hadja, meꞌ panoloꞌ meꞌ aꞌa dehellu sabab meꞌ malaꞌikat duk meꞌ seyitan. Dumaꞌin toloꞌden amban Isa Almasi.

⁹ Peggeꞌ Almasi bisan iye inanakan kuweꞌ bantukte bi manusiyaꞌ, saguwaꞌ tipun laꞌi si iye kēmon addat duk pikilan Tuhanin;

¹⁰ duk kaꞌam iyan, peggeꞌ luꞌu ne si kaꞌam Almasi, tepe si kaꞌam isab sasuku maniyaꞌ pu Almasihin. Duk amban kēmon meꞌ magbayaꞌin duk taga kapatutin, malaꞌikat ke siye atawa seyitan, gaꞌ niyaꞌ palangkew amban Isa Almasi. Iye pe magbayaꞌ si siyehin kēmon.

¹¹ Meꞌ Yahudihin, magislam siye sa pangandaꞌakan saraꞌin supaya koꞌ siye manjari meꞌ aꞌa Tuhanin. Saguwaꞌ kaꞌam, dumaꞌin sa inin hangkan kaꞌam manjari meꞌ aꞌa Tuhanin; dumaꞌin sabab niyaꞌ hinang aꞌa si kite saguwaꞌ sabab inānan weꞌ Almasi duseten bi duk pinaluwas kite bi weꞌ ne amban meꞌ malaꞌat kinabayaꞌan napsuten bi.

¹² Duk pamandi si kaꞌamin, dalilnen patuhut kaꞌam pu si Isa Almasi kinubul, duk patuhut isab kaꞌam si iye pinakellum balik peggeꞌ kahagad kaꞌam weꞌ balakatan Tuhanin. Duk Tuhanin mamakellum Almasi amban kamateynen.

¹³ Matuꞌuhin kuweꞌ matey kaꞌam si pagmatahan Tuhanin peggeꞌ dusehan kaꞌam duk peggeꞌ dumaꞌin kaꞌam meꞌ aꞌa Tuhanin, hātinen gaꞌ tuhutbi saraꞌ tasulat si Musahin. Saguwaꞌ kuweꞌitu kuweꞌ pinakellum ne kaꞌam magtuhut duk Almasi. Inampun weꞌ Tuhanin kēmon duseten bi.

¹⁴ Matuꞌuhin ilaboꞌan kite bi hukuman weꞌ subey kite bi ilegga sabab gaꞌ tuhutte bi saraꞌin. Saguwaꞌ kamatey Almasi diyataꞌ olomin, inānan weꞌ Tuhanin kapatut saraꞌ si kitehin bi, hangkan gaꞌ ne niyaꞌ jānne pangaleggahan kite bi.

¹⁵ Duk laꞌi diyataꞌ olom miyaꞌan tadaꞌag teꞌed weꞌ Almasi meꞌ mananassat taga kapatutin. Inānan weꞌ Almasi kapatutde magbayaꞌin duk pakitehanne si kēmon aꞌa weꞌ iye mangandaꞌagin.

¹⁶ Hangkan hep, meꞌ kapungtinaꞌihanku masandel pu si Isa Almasihin, daꞌa kaꞌam ngatu pagbayaꞌan aꞌa pasal kinakanbin duk ininumbin atawa pasal meꞌ kādjaꞌan meꞌ Yahudihin duk pagkādjaꞌanden bang bulan baꞌahu duk pasal meꞌ ellew liꞌihin.

¹⁷ Kēmon meꞌ saraꞌ Yahudi pasal meꞌ miyaꞌan pangessebande bang ine inagad-agadde matekka si pasōnganin. Bu inagad-agadde inin, tekka ne hep duk inin si Almasi.

¹⁸ Daꞌa kaꞌam ngatu diniyawaꞌan weꞌ meꞌ aꞌa magabbu weꞌ siye mataꞌuhin peggeꞌ paꞌinde weꞌ niyaꞌ meꞌ bakas pabagala si siye. Sinna siye magmā-mā kuweꞌ diyawaꞌ ateyden duk magtoloꞌ siye weꞌ subey kite bi koꞌ nambahayang si meꞌ malaꞌikat. Meꞌ panoloꞌde inin kadupangan, peggeꞌ amban pikilande hadja duk pagabbude hadja.

¹⁹ Meꞌ aꞌa inin gaꞌi ne pateteg pu si Almasi, bu Almasi hep dalil kōkin duk meꞌ masandel si iyehin dalil barannen. Almasi magbayaꞌ si barannen, hātinen meꞌ masandel si iyehin. Pabasagne sandelden sa kabayaꞌan Tuhanin duk pagdambuwaꞌne siye kēmon kuweꞌ dalil baranin isab magtoket kēmon sabab meꞌ ohatnen.

Dalil patuhut pu si Isa Almasi matey duk ellum balik

²⁰ Kaꞌam, sabab sandelbi pu si Almasihin, kuweꞌ kaꞌam bakas patuhut si iye matey duk gaꞌi ne kaꞌam nuhut meꞌ biꞌat-biꞌatan manusiyaꞌ. Hangkan, weꞌey boꞌohanbin kuweꞌ tuhutbi pe meꞌ pangandaꞌakan meꞌ aꞌa manguntarahan Tuhanin? Weꞌey tuhutbi bang paꞌinde,

²¹ “Daꞌa iyan singkuhun,” atawa “Daꞌa iyan kakanun,” atawa “Daꞌa iyan antanun.”

²² Kēmon tinaggahande inin bang ubus ne ginuna, na, gaꞌ ne. Meꞌ pangandaꞌakan miyaꞌan hinang-hinang meꞌ manusiyaꞌ du hadja.

²³ Toꞌo, kuweꞌ bantuk patut isab meꞌ biꞌat-biꞌatanden. Magāgama siye teꞌed duk magmā-mā siye weꞌ diyawaꞌ ateyden duk tiksaꞌde baranden, bu kēmon hinangande inin amban kabayaꞌande hadja. Saguwaꞌ gaꞌi du inin makapages napsu baranden.