फिलिप्पि 4 - याक्खा1 न्हाङामाङ् आफुआनुन्छा आनाआनुन्छाचि, का न्निङ्दा प्याक आलुङ्मा तुङ्मेॽनेनिन्हा, न्हाङ् न्निङ्दानुङ् इब्बे-इब्बे तुप्मा मितामाङ्ना॥ न्निङ्दा का चोन्सिॽमेतामागा, न्हाङ् न्निङ्दामाङ् आका कामगा इनामसिगान॥ आलुङ्मा तुक्नेनिन्हा आफुआनुन्छा आनाआनुन्छाचि, न्निङ्दा खाॽलामाङ् हाङ्बाबे डिगो वायामासानि॥ आर्तिगा चेॽया 2 इयोदिया नुङ् सुन्तुखे, न्जिङ्दा आमुक फाक्साङ् लुमेॽनेन्चिन, न्जिङ्दा एको निङ्वागा लेक्साचि॥ 3 आका बिस्वासिलोना काम्निभाक, न्दा खा हिप्पाङ् मामुचि तोङ्मागा फातुचि, इजाङ्बाङ्निङ् खाचिङा कानुङ् से मेन्ना, क्लेमेस नुङ् हिङ्लुङ्गा छेप्तापपे निङ् वाखुबा हेकोहा आकाम्निभाकचिनुङ् चा नुसाला खेम्मेॽमाहा काम निङ्वा पियाचुहोङ् चोगामाचुहा॥ 4 हाङ्बाबे साधाइ आनान्दा चोगानि, का फेरि चा लुमेॽनेनिन, आनान्दा चोगानि॥ 5 न्निङ्दा चोगुम्घा उचुन्हा बेभार घाक याॽमिचिङा था न्दोक्तुनि॥ हाङ्बा ताहेक्साना॥ 6 इहाचा चेॽयाबे चिन्ता न्जोगानिन, ङ्खाॽनिङ्गो न्निङ्दा खाचो आइघा घाक चेॽया पार्थानाबे निङ्वाफुमा लुयानुम न्हाङा उङ् नुनिङ्वा पिसाङ् पार्थाना चोगानि॥ 7 न्हाङा निङ्वाफुमाभाङ् तोक्माना हाङ्हाङ् न्निङ्दा तोक्त्वाम्गाना॥ ना हाङ्हाङ् खिङ् माडाना, न्नागा उतुम्बे इसाङा चा मिॽमा चा ङ्यास्वानिन्हा॥ न्ना हाङ्हाङ्ङामाङ् न्निङ्गा लुङ्मा नुङ् निङ्वा येसुबे जोगाचोगुनेस्वाचिहा॥ 8 हाकु मेन्माना बेलाक्पे आफुआनुन्छा आनाआनुन्छाचि, न्निङ्दा हेखा चेॽया सात्या नुङ् आदार योग्याहा, हेखा चेॽया ठिक नुङ् पाबित्ताराहा, हेखा चेॽया लुङ्मातुक्मा लायिक नुङ् उचुन्हा, न्हाङ् हेखा चेॽया पार्साम्सा चोक्मा लायिक्हा, ङ्खाबेॽमाङ् निङ्वा पियानुम॥ 9 का लुॽनेनिन्हा हेखा चेॽया न्निङ्दा खेप्सुक्सुम्गा, निसुक्सुम्गा न्हाङा हेखा चेॽया न्निङ्दा काभाङ् चिन्दिमिगा, तोक्तुक्सुम्गा ङ्खा चेॽया पालाना चोगानुम न्हाङ् हाङ्हाङ् पिखुबा निङ्वाफुमा न्निङ्दानुङ् वामेॽना॥ भेटिगा लागि नुनिङ्वा 10 का हाङ्बाबे इब्बे-इब्बे आनान्दित्ङाना॥ इजाङ्बाङ्निङ् न्निङ्दा माङ्फा हेक्साङ् का मिॽमाना माउका न्निङ्दा तोक्तुक्सुम्गा॥ न्निङ्दा जेप्पा आका लागि चिन्ता चोगिमिसिगा, ङ्खाॽनिङ्गो न्निङ्दा माउका न्दोक्तुक्साम्गान॥ 11 का खाचोबे आयाङ्होङ् खाॽला लुॽनेनिन्हा मेन्ना, इजाङ्बाङ्निङ् कानुङ् इहा वान्ने ङ्खाबे सोन्तोक वामा का चिन्दामाङ्ना॥ 12 खाचोबे आमानिङ् नुङ् प्याक वामेॽनिङ् इमिन हिङ्माहा बाङ्ना का था वान्ने॥ इमिन्हा बेलाक्पे चा, खामानिङ् चा, साकङा सिमानिङ् चा प्याक वामेॽनिङ्चा, म्मामेन्निङ् चा सान्तुस्टा लेङ्माहोङ् हिङ्मा का चिन्दामाङ्ना॥ 13 का खा घाक चेॽया खिरिस्टङा पियाङ्हा साक्तिङामाङ् चोक्मा यास्वाङ्हा॥ 14 ङ्खोङ्चा का छाक्नुङ्बे आयाङ्निङ् न्निङ्दा फाताघोङ् उचुन चोगुम्घा॥ 15 न्निङ्दा था वान्ने, का सुरुबे नुसाला खेम्मेॽनेनिन्होङ् माकेडोनिया लिङ्खामभाङ् ख्याङ्निङ् का फाखुबा छुम्वाङ् न्निङ्दा से साइगा, याङ् पियाघोङ् न्निङ्दा से फातामासागा॥ 16 इजाङ्बाङ्निङ् का थेस्लोनिके साहारबे खाचोबे आयाङ्निङ् चा न्निङ्दामाङ् इमा-हिॽमा फातामासागा॥ 17 का भेटि योगुङ्हा मेन्ना, ङ्खाॽनिङ्गो न्निङ्गा उचुन्गा लागि लुॽमा योक्नेनिन्हा ओम॥ 18 खिङ्बेला का तोक्माहा हाक्निङ्चा प्याक तोक्तुक्सुङ्हा॥ इपाफोर्डिटास पाहाङ् हाक्सुम्घा भेटि तोक्तुङ्, न्हाङ् का खोतामाङ्ना॥ ङ्खा भेटि च्हेन निङ्वाफुमाबे गाराहान योग्या नुङ् उङा उसाप थाक्माहा भेटि ओम॥ 19 आका निङ्वाफुमाङामाङ् न्निङ्गा घाक खाचो पुरा चोक्तुबिइवाघा॥ येसु खिरिस्टबेॽहा उका प्याक्हा याङ्साभाङ् न्निङ्दा चाहाचोगिघा चेॽया पुरा चोक्तुबिइवाघा॥ 20 हाकु एङ्गा निङ्वाफुमा पागा साधाइ माहिमा लेङ्नुङ्नि! आमेन॥ आखेरिबे 21 न्नाबे खिरिस्ट येसुबे वेतिघा निङ्वाफुमागा घाक याॽमिचिबे आका सेवायो॥ नाबे कानुङ् ङ्वान्नेहा आफुआनुन्छा आनाआनुन्छाचिङा चा न्निङ्दा सेवायो लुइमिगा॥ 22 निङ्वाफुमागा घाक याॽमिचि नुङ् मुक्खे च्हेन काइसारगा हाङ्पाङ्बे वाखुबाचिङा न्निङ्दा सेवायो लुइमिघा॥ 23 हाकु हाङ्बा येसु खिरिस्टका आनुगाराहा न्निङ्दानुङ् वानि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.