फिलिप्पि 2 - याक्खाखिरिस्टका लुङ्मा तुक्तायि 1 इना खिरिस्टपेॽना न्निङ्गा हिङ्लुङ्ङा न्निङ्दा साहास पिइमिघा? उका लुङ्मा तुक्तायिङा सान्त्वाना पिइमिघा? न्निङ्गा साङ्गाति पाबित्तारा आत्मानुङ् वान्नेॽना? इना न्निङ्दा एकोङा हेकोना लुङ्मा तुक्खुसा चाइवाघा? 2 ङ्खाॽला ओमभोङ् न्निङ्दा निङ्वा तोङ्खुबा लेक्सिघोङ्, लुङ्मा तुक्खुसा चाइघोङ्, न्हाङा एको निङ्वागा लेक्सिघोङ् आका आनान्दा पुरा चोगानुम॥ 3 आका से उचुन लेङ्नि लोॽवा न्जोगानिन, न्हाङा बित्थाहा चेॽयाबे घामान्डा चोक्मागा इहाचा न्जोगानुम्निन॥ ङ्खाॽनिङ्गो एको हेकोनागा लागि मि लेक्सानि न्हाङ् का हाक्निङ् उङ्चि माम्माहाचिभोङ् मिखुसा चायानि॥ 4 न्निङ्दा घाकङा आफाइगा से उचुन मेन्ना, याॽमिचिगा लागि चा मितानुम॥ 5 न्निङ्गा निङ्वा खिरिस्ट येसुगा लोॽवा सानि॥ 6 उङ् निङ्वाफुमाहिङ्गा सायाहोङ्चा, निङ्वाफुमाहिङ्गा लेङ्मा बोल न्जोगान॥ 7 उङा घाक थोक नासिहोङ्, ताम्दाङ्फुमाबे एको कामारागा स्वारुपपे याॽमि लेक्साराया॥ 8 स्वारुपपे उङ् याॽमि लोॽवा लेक्साहोङ् आफाइ मि लेक्सा, न्हाङ् कुरुसपे स्यानुङ् सोम्मा उङा निङ्वाफुमा पागा आग्गे येनु॥ 9 न्हाङामाङ् निङ्वाफुमाङा उङ् घाक हाक्निङ् तो निङ्ला पिॽमाना ठोङ्बे पोघेतु, न्हाङ् घाक हाक्निङ् माडा निङ्ला पिहोङ् तो थेन्दु॥ 10 खाॽला वालोक, ताम्दाङ्फुमा नुङ् ताम्दाङ्फुमागा मोहा घाकङा येसुगा आदारगा लागि उङ्चि लाङ्छुक न्द्वाचि, 11 न्हाङा घाकङा निङ्वाफुमा पागा माहिमागा लागि येसु खिरिस्टमाङ् हाङ्बा ओमभोङ् सुइकार न्जोग्वाना॥ कायुङ्लेनबे चाम्काचोक्खुबा जोति 12 न्हाङामाङ् आलुङ्मा तुक्नेनिन्हा आफुआनुन्छा आनाआनुन्छाचि, का न्निङ्दानुङ् वायाङ्निङ् न्निङ्दा साधाइ आचेॽया येनुक्सुम्गा॥ का न्निङ्दानुङ् वाङानिङ् से मेन्ना, ङ्खाॽनिङ्गो माङ्दु वाङानिङ् चा झान तुक्नुङ् किसिसाङ् न्निङ्दा तोक्तुम्गाना मुक्तिगा थेन्सिॽमाहा चाल्चालान लेङ्निभोङ् तुखि चोगानि॥ 13 इजाङ्बाङ्निङ् निङ्वाफुमाङा न्निङ्दाबे काम चोक्मासिमेॽना॥ उङामाङ् न्निङ्दा उका उनिङ्वा लोॽवा चोक्माना निङ्वा नुङ् साक्ति पिइवाघा॥ 14 गान्गान मेन्जोक्ले, चेॽया मेन्दुमेॽले घाक काम चोक्साङ् ख्यानि॥ 15 ङ्खाॽला चोगिगाभोङ् पापि नुङ् इसिॽहा याॽमिचिगा उलुम्बे न्निङ्दा पाप मेॽनिङ्हा नुङ् निङ्वाफुमागा खोट् मेॽनिङ्हा सान्तान लेक्सिॽवाघा॥ न्हाङा चोक्चोकिचिङा ताङ्खेङ् ओम ङ्ओत्वाना लोॽवा न्निङ्दा चा ङ्खाचिगा उलुम्बे चाम्काचोगिॽवाघा॥ 16 हिङ्लुङ् पिखुबा नुसाला न्निङ्दा चात्तुनुङ् लाबामासानुम॥ खाॽला चोगिगाभोङ् का ब्यार्थाबे न्लुक्ताङान, न्हाङ् ब्यार्थाबे तुखि न्जोगाङान्नाभोङ् खिरिस्ट तामाना लेनबे घामान्डा चोक्मा तोक्त्वाङ्ना॥ 17 न्निङ्गा बिस्वास नुङ् न्निङ्दा चोगुम्घा निङ्वाफुमागा काम च्हेन बोलिदान तिसाहा लोॽवा ओम, न्हाङा ङ्खाबे आका हिङ्लुङ् बोलि तिमा पोराचोक्होङ्चा का आनान्दित्ङाना, न्हाङ् न्निङ्दानुङ् चोन्सिमेङ्ना॥ 18 ङ्खाॽलामाङ् न्निङ्दा चा कानुङ् चोन्दास्यानि न्हाङ् आनान्दित लेक्सानि॥ तिमोथि नुङ् इपाफोर्डिटास 19 हाङ्बा येसुगा उनिङ्वा लेक्साभोङ् आका आस वान्ने, तिमोथि मिछिटो न्निङ्दाबे पाक्स्वाङ्, न्हाङ् न्निङ्गा सालेन तोक्तुङ्होङ् का चोन्सिॽमा याङानि॥ 20 उचुन्ना निङ्वाङा न्निङ्गा वास्ता चोक्खुबा तिमोथि सेॽना, हेकोहा इसा चा कानुङ् मानिन्हा॥ 21 हेकोहाचि गो उङ्चिगा धुनबे ङ्वान्ने, येसु खिरिस्टङा मितुहा चेॽयाबे च्हेन निङ्वा म्बिवानिन॥ 22 ङ्खाॽनिङ्गो तिमोथिगा बानिबेहोरा उचुन्हा बाङ्ना चेॽया गो न्निङ्दा था वान्ने॥ उच्याङा उप्पा सेवा चोग्वाना लोॽवा उङा कानुङ् नुसालागा कामबे सेवा चोगुक्सु॥ 23 न्हाङामाङ् आका लागि इलेङ्मे ङ्खा था लेङ्मेहोङ् सोलोक तिमोथि न्निङ्दाबे पाङ्मा मितुक्सुङ्ना॥ 24 न्हाङा का चा न्नाबे हानि तामा तोक्त्वाङ्ना बाङ्ना हाङ्बाबे बिस्वास युक्सुक्सुङ्ना॥ 25 आनुन्छा इपाफोर्डिटास फेरि चा न्निङ्दाबे पाङ्मा आवास्याक एतामाङ्ना॥ उङ् कानुङ् काम चोगाना याॽमि ओम, न्हाङ् नुसाला खेम्मेॽमाहा लाडाइबे चा कान्चिङ् सोरि लाडाइ चोगाङ्चिङ्हा॥ उङ् का फासे पाक्सुम्गाना न्निङ्गा दुत ओम॥ 26 उङ् चा न्निङ्दानुङ् इब्बे-इब्बे तुप्मा मितामाना॥ उङ् तुगाब्याना चेॽया न्निङ्दा खेप्सुम्घाबुभोङ् उङ् सुर्ता चामासिमेॽना॥ 27 जेप्पा उङ् तुक्नुङ् तुगाब्याहोङ् ओल्लोबाक न्स्यान्ना, ङ्खाॽनिङ्गो निङ्वाफुमाङा उङ् दाया चोगु॥ उङ् से मेन्ना का चा उङा दाया चोगाङ्, न्हाङ् सोकपे सोक आङ्मा पोरान्जोगाङान॥ 28 न्हाङामाङ् झान उङ् न्निङ्दाबे पाङ्मा मितुक्सुङ्ना॥ उङ् निस्वाम्घोङ् न्निङ्दा चोन्दिसिइवागा न्हाङ् आनिङ्वाबेॽहा तुखि चा साप्नुङ् लेङ्मेहा॥ 29 हाङ्बाबे उङ् नुन्छा लोॽवा निङ्वाभाङ् स्वागात चोगानुम॥ खाॽलाहा याॽमिचि आदार चोक्माहाचि॥ 30 इजाङ्बाङ्निङ् उङा खिरिस्टका काम चोगुनिङ् उका हिङ्लुङ् आप्ठेरोबे आमेतु, न्हाङ् न्निङ्दा आका लागि पुरा चोक्मा ङ्यासुम्गानाहा सेवा पुरा चोगुनिङ् उङ् ओल्लोबाक सिमा पोराचोगा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.