एफिसि 2 - याक्खाउलिप्पा नुङ् ओछोङा हिङ्लुङ् 1 इमा न्निङ्दा निङ्वाफुमागा बिरुद्दाबे पाप चोगुम्घोङ् आत्मिक रुप्पे सिइमिसिगा॥ 2 ङ्खिङ्बेला न्निङ्दा कायुङ्लेनगा पापि सोभाबपे लाम्मासिइगा, न्हाङा ताङ्खेङ्बेॽहा साक्तिगा मालिक पुजा चोगुम्गा॥ खिङ्बेला न्नाङा निङ्वाफुमागा चेॽया मेयेन्खुबा याॽमिचि उका तायेनबे युक्सुक्सुचिहा॥ 3 कानिङ् चा इमा ङ्खाॽलाहा साइङ्॥ सालुङ्ङा योगुहा नुङ् निङ्वाबे चोक्मा मितुम्ङाहा लोॽवा चोक्मासिइङ्, ङ्खोङ्माङ् कानिङ् चा हेकोहा याॽमिचि लोॽवा निङ्वाफुमागा दान्डा तोक्मा पोर्ने साया॥ 4 ङ्खाॽनिङ्गो निङ्वाफुमाङा कानिङ् प्याक उलुङ्मा तुक्ता न्हाङ् प्याक दाया चोगा॥ 5 न्हाङामाङ् कानिङ् पापपे सिइमिसिङ्होङ्चा उङा कानिङ् खिरिस्टनुङ् हिङ्गिलिक लेङ्मेता॥ न्हाङ् न्निङ्दा उद्दार तोक्तुम्गाना चा उका आनुगाराहाङामाङ् ओम॥ 6 कानिङ् येसु खिरिस्टपे वेतिहाङा उङ्नुङ् निङ्वाफुमाङा कानिङ् चा हिङ्गिलिक लेङ्मेता, न्हाङ् उङ्नुङ् वालोक्का राज्याबे चोक्तोक चालाचोक्मा पिया॥ 7 उङा न्दायेॽहा युगचि सोॽमेमागा खा घाक चेॽया चोगु॥ न्ना आनुगाराहा उङा कानिङ् खिरिस्ट येसुबे सोॽमेतामा॥ 8 निङ्वाफुमागा आनुगाराहाङा न्निङ्दा बिस्वास चोगुम्गा न्हाङ् मुक्ति तोक्तुम्गाना ओम॥ न्निङ्दा आफाइ चोगुम्घा कामङा मेन्ना, ना गो निङ्वाफुमाङा पिइघा पिनिक्ला ओम॥ 9 न्निङ्दा चोगुम्घा कामभाङ् मेन्ना, ङ्खोङ्माङ् न्निङ्दा घामान्डा चोक्माना चेॽयामाङ् मान्ना॥ 10 इजाङ्बाङ्निङ् कानिङ् उचुन्हा काम चोगुम्निभोङ्माङ् खिरिस्ट येसुबे निङ्वाफुमाङा चोगाहा ओम॥ न्हाङामाङ् कानिङ् निङ्वाफुमागा उमुक्का सिप सिइन॥ कानिङ् ङ्खा उचुन्हा काम चोगुम्निभोङ् उङा ओन्दाङ्माङ् त्यार चोगामासा॥ खिरिस्टपे घाक एकोसिन 11 न्हाङामाङ् खा चेॽया मितानुम, ओन्दाङ् न्निङ्दा निङ्वाफुमा चिनामेन्जोक्ले, सालुङ्बे याॽमिगा मुकङा खाताना चोक्खुबा इजिरेलिचिङा न्निङ्दा “खाताना मेन्जोक्खुबा” लुइगा॥ 12 ङ्खिङ्बेला न्निङ्दा खिरिस्टपाहाङ् लाॽला लेक्सिमिसिगा, इजिरेलबेॽहा याॽमिचिङा तोक्माहा चोक्तोक न्दोक्तुक्साम्गान, न्हाङ् निङ्वाफुमाङा याॽमिचि बाचा पिचिहोङ् थुन्दुना कारारभाङ् माङ्दु साइगा॥ न्निङ्दा आसा मेॽनिङ् लेक्सिमिसिगा न्हाङ् ना कायुङ्लेनबे न्निङ्दा निङ्वाफुमा मेॽनिङ्हा साइगा॥ 13 ङ्खाॽनिङ्गो ङ्खिङ्बेला खिरिस्ट येसुभाङ् माङ्दु साइघा न्निङ्दा, हाकु च्हेन खिरिस्ट येसुगा हेलिङा निङ्वाफुमागा उयुम्बे ताइमिघा॥ 14 इजाङ्बाङ्निङ् उङ्माङ् कानिङ् हाङ्हाङ् पिखुबा ओम॥ उङामाङ् उका सालुङ् कुरुसपे छुएन्दुहोङ् याहुदि नुङ् हेकोहा जातिगा याॽमिचि घाक एको चोगामा, न्हाङ् कानिङ् फोङ्खुबा एङ्गा लुम्बेॽना सात्तुरतागा पार्खाल होताहाक्ताब्यामाहा॥ 15 न्हाङा उङा इजिरेलि नुङ् हेकोहा जातिगा याॽमिचि उङ्बे एको चोक्मागा नुङ् ओछोङा जाति चोक्मागा उका सालुङ्बे ब्यावास्था नुङ् न्नागा रितिथिति घाक खारेज चोगुक्सुहा॥ 16 सात्तुरता नास चोक्मागा न्हाङ् एको जाति चोक्माहोङ् निङ्वाफुमानुङ् तुप्मेमागा उङ् कुरुसपे बोलि लेक्सा॥ 17 उङ् तायाहोङ् न्निङ्दा निङ्वाफुमाभाङ् माङ्दु लेक्सिघा हेकोहा जातिगा याॽमिचि नुङ् निङ्वाफुमागा नाजिक्हा याहुदिचि हाङ्हाङ् पिखुबा नुसाला खेम्मेतिगा॥ 18 इजाङ्बाङ्निङ् उङ्भाङ्माङ् याहुदिहोङ्चा होकोहा जातिगा याॽमिचिहोङ्चा कानिङ् घाकङा एको पाबित्तारा आत्मा तोक्तुम्होङ् निङ्वाफुमागा उयुम्बे खेॽमा याखुबा लेक्सिमि॥ 19 न्हाङामाङ् न्निङ्दा हाकु हेकोहा जातिगा याॽमि नुङ् हेकोहा खाम्युकपेॽहा याॽमि म्मेतिसिगान्हा, ङ्खाॽनिङ्गो निङ्वाफुमागा याॽमिचिनुङ् एको लेक्सिमिगा न्हाङ् निङ्वाफुमागा पाङ्बेॽहा याॽमि लेक्सिमिघा॥ 20 न्निङ्दा चा सेगुम्पाकचि नुङ् निङ्वाफुमाभाङ् चेक्खुबाचिङा ङ्येन्दुना जागपे चोगाना पाङ्सिगान॥ येसु खिरिस्ट आफाइ च्हेन सुरगा मुक्खे लुङ्खाक ओम॥ 21 न्हाङ् पाङ् घाक उङामाङ् लाबुक्सुना॥ उङा ना पाङ् हाङ्बाबे सामार्पान चोगाना एको पाबित्तारा निङ्वाफुमापाङ् चोग्वाना॥ 22 न्हाङ् पबित्तारा आत्माबे निङ्वाफुमा वामाना न्ना पाङ् लेङ्मागा न्निङ्दा चा उङ्नुङ् एको पाङ् लेङ्साङ् खेॽमासिइवाघा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.