Sofonias 3 - Ja yab'al ja Dyosi

Ja mulal jumasa b'a chonab' Jerusaleni

¹ —Jel wokol oj ek'uk a wujilex swinkil Jerusalen. Ja we'nlexi mini t'un jasxa k'u'anexa, sok waxa wixtala'anex lom lom ja tuk jumasa. —B'ut'elex mulal.

² Mixa k'ana ma' oj ya'wi rason, mix cho'a k'ana ma oj stoj a; mixa le'awon ja ke'n sok mixa k'u'anon.

³ —Ja ma'tik jel niwak ja ya'tel a wuji lajane sok ja k'ak'al choj jumasa; ja wa mandaranum jumasa lajane sok ja ok'il, wa sle'a swa'el ja a'kwali sok mixani xe'n b'ak wax yawekan ja sb'a sakb'ela.

⁴ Ja wa aluman dyos jumasa jel wa stoyo sb'aje, sok mix b'ob' k'u'axuk ja jas wax yalawe'i; wa pagre jumasa jel tuk ja jas wa sk'u'lane b'a snajtsil jtsomjeli sok mini t'un wa sk'u'ane ja mandar jumasa'a.

⁵ —Ja jaw jumasa mini t'un wax k'ixwiye'a. —Swinkil Jerusalen, ja ke'n ti'ni ayon amok b'a oj k'u'luk a wi ja b'a leka, mi sb'a oj k'u'luk a wi b'a mi sb'ejuk. Spetsanil ja k'ak'u jumasa wax le'a b'a jastal lek oj kil'a.

⁶ —Ja ke'n jch'akunej niwak chonab' jumasa, sok jemunej ja scha'nil ts'akab' stone jumasa; mixa ni jun ma' wax b'ejyi ja b'a skaye'e jumasa ch'ab'anxa; ja schonab'ile jumasa kanta jipan, mixani jun swinkil ay altiro'a.

⁷ —Spetsanil ja iti jk'u'lan yuj ja we'n swinkil Jerusalen. Jpensaran ja jachuki oj b'ob' a k'u'ukon sok mixa ojto ka'wi wokol. Jaxa kristyano jumasa ma tey a moki jel juts'in och sch'ik sb'aje sok chikan ja stik'e mulalil.

⁸ —Jaxa ya'ni, yuj ja jach' a k'u'lanexta jan jastal jawi, wanxta mojojuk ja k'ak'u b'a oj jakon b'a ka'a tup ja wa mulexi. Ke'n Dyos yuj ja israelenio, ja jas wax kala yujni ajch' oj k'u'l merana. Kalata ojni ch'ak jtsom ja swinkil ja niwak chonab' jumasa b'a oj ka' stup ja smule sok spetsanil ja koraja, yajni wala tajkiyoni, lajanon sok ja k'ak'i; —ojni ch'ak jtsik spetsanil ja lu'umi—

Ja Dyosi oj skoltaj ja swinkil ja niwak chonab' jumasa

⁹ —Yaj nix k'ot ja k'ak'u jawi, spetsanil ja chonab' jumasa oj ka k'umanuke sok jun k'umal tsamal b'a toj slekil, b'a jach' lajan oj stoy'one sok oj b'ob' sta'e ti' ja b'i'ili.

¹⁰ Ja'yuj ja ma'tik wa stoyowone'i, jaxa juts'in ti' aye b'a tuktukil niwak chonab' jumasa, oj jak stsik e ki ja jmajtan jumasa man b'a niwan chonab' Etiopia.

¹¹ —Ja we'n, Jerusalen, mi jasxa k'u'an altiro; mixa oj ja wa'a b'aj k'ixwel pilan majke. Jakum ja k'ak'u oj ch'ak ka eluk ja ma' tey a moki ja ma'tik jel niwan wax ya'a sb'aje'i. Ja b'a'ya mey b'a oj ajyuke jama jel stoyo sb'aji, b'a oj ajyuk ja ma'tik jel stoyo sb'aji.

¹² Ja b'a wa kaye jumasa kechan oj ajyuk ja ma' chin wax ya'a sb'aj, sok ma'tik jun k'ujoli, ke'n oj ya'e sniwanil sk'ujole jmok.

¹³ Ja t'usan israelenio jumasa ma'tik kanyeto sak'ani mixani jun tik'e smul oj sle'e'a; mi oj sle'e ab'al sok mi ma' oj slo'laye, jel laman oj ajyuke sok mini t'un oj xiwuke'a.

Ja Dyosi, oj ya kumxuk ja chonab'ili

¹⁴ Ke'n ja Sofoniasoni, oj kal a wabyex: —Israelenio jumasa ts'eb'ananik sb'a gusto'il. —Gusto ajyanik, swinkil chonab' Jerusalen.

¹⁵ Mi jas oj b'ob' xiwanik yuj altiro, yuj ja Dyos mandaranum yuj ja israelenio, mixa ojto ya'a tup ja wa mulexi; ch'akta snuts el ja wa kontra'ex jumasa, sok ti'xa oj ajyuk b'a wa nalanex.

¹⁶ Ja k'ak'u jawi oj alxuk: —Mok xiwan chonab' Jerusalen, mok a yo'pes a b'aj,

¹⁷ Ja wa Dyosi, ti'ni ay a moka sok ja yipi, oj skoltaya. A'nima mi t'ilan oj ja wab' jas oj yal b'a ti oj sje' a wi yuj wa syajtaya, kechan sok tsamal ts'eb'oj b'a oj b'ob' smaklaya ja slekilali, oj ni a wab'a,

¹⁸ Jach' jastal jun sk'ak'u'il k'in. Ja Dyosi, wax yala oj ya' tek'an ja wokol wa'nex yi'jeli sok ja jas jel k'ixwela ti' ayex soki.

^19-20 Ja iti, jun lo'il: —Yaj nix k'ot ja k'ak'u jawi, oj koltaj ja ma'tik mi ma wax koltaji yuji sok oj ka stup ja smul ja ma'tik ixta wax iljiye yuji. Ke'n oj le' jastal oj ka stukb'es sb'aj ja ma'tik saktantan aye ek'i, sok oj ni ka kumxuke ja b'a slu'ume'a. —Ja iti, oj ni a wil'ex ja we'nlexa. —Yuj k'a mini jun sb'ej sk'u'lane jan ja b'ajtani, jaxa juts'in jelni lek oj sk'umukex ja we'nlexa, jaxa jastal jel lekex ja we'nlexi oj chiknajuk b'a spetsanil ja niwak chonab' jumasa b'a lu'umi. Ja ke'n Dyos yuj ja israelenio, ja jas wax kala yujni jach' oj k'u'l merana.